Read Samo, Southern TDP 33 Bible Online

TDP 33 - Samo, Southern bible

TDP 33

¹Lawa a boo gii-dali Muizu barka mɛn da Izirayeli minin lɛn ganaa á tɔ́n gã, bɛ n ka kɛ nɛ.

²A na á pɛ kɛnɛn: «Dɛnaa Lawa bɔ Sinayii kele la á daa, a na á n toa Seyiiri gána nɛ á daa ǹ lɛa, ka wasa bɛ́ lɔn, á n toa Paran kele la, á wasa kaa a minin lɛn ganaa. Á daa a minin li, kun ka lon a dia dí-a wole duu damata nɛ, ka a dí-pɛ tɛdɛnaa kɛ nɛ a gɔn.

³Sonbore, Dɛnaa Lawa á minin narɛ, min mɛnɛn bɛ́ a wɔn lɛa, ǹ mɛnɛn bɛ́ woe giɛ̃ tán a li, bɛ̀ ǹ nə n too kɔ a boo li, bɛn lɛn sii na a gɔn.

⁴Muizu na á dí-pɛ kɔ wɔ la, Zakɔba tɔrɔn lɛn kíɛ̃ nɛ.

⁵Zaman lɛ a nyɛɛnaandɛnan bɛ́ ǹ nə́ n lɛ sɔkɔn, kun ka Izirayeli tɔrɔn lɛn nɛ, Izirayeli minin lɛn nə́ kii yɛ.

⁶Lawa die a Urubɛn tɔrɔn lɛn toa. A laanɛ ǹ ba tɛ wa, Lawa die a ǹ nyin toa.»

⁷A màn mɛn pɛ Zudaa wɔ paǹ li, bɛ á ke: «E, Dɛnaa Lawa, n too kɔ Zudaa tɔrɔn kɛn lɛn li, n nə ǹ kaa kun ka ǹ tɔrɔ minin ni. N din nə pàã kɔ ǹ la, n dɔ ǹ lɛ, ǹ boo ǹ zɔ́ɔn la.»

⁸ *Levii tɔrɔn wɔ paǹ li, a na á kɛ pɛ: «Dɛnaa, ń nə́ n din dùũ dɔ̃ ǹ mànan kɔ ǹ dí-nyali sonboren kɛn la. Ń nə́ n da ǹ gɔ́ɔ̃ li Masaa, ń dɔlɔ bɔ ǹ ganaa Meribaa mu lɛ a boo-a.

⁹Ǹ nə́ n din narɛ á la ǹ díin laanka ǹ náan manɛ, ǹ nə́ n piã ka ǹ dɔɔ̃nɔn nɛ n din a lɛa, ǹ nə́ ǹ nɛnyaanan tii n din a lɛa. Ǹ nə́ n boo kɛ tamaa, ǹ nə́ n yiri koa n lɛ kɔ kɔn la lɛ li.

¹⁰Ǹ dinin lɛn man Zakɔba tɔrɔn darɛɛ n sii yɔrɔ bɔ ǹ boon ganaa, ǹ dinin man Izirayeli minin darɛɛ n dí-pɛn ganaa. Ǹ dinin man nyɔɔ gìĩ kɔɔ̃n tiɛ̃ n yɔrɔ-a, ǹ dinin man *wúlu màn tiɛ̃ *wúlu bɔ ǹ bǎã kɛ nɛ.

¹¹Dɛnaa Lawa, n din nə màn da ǹ pàã li, ǹ bɛ́ dí mɛn nyɛɛ n bɛ lɛ si. Min mɛnɛn bɛ́ yui ǹ gialaa, bɛn kii yiɛ, min mɛnɛn bɛ́ ǹ biɛ zɔ́ɔ, n nyan toa bɛn nə yoo doo wa.»

¹²Bɛnzamɛn tɔrɔn wɔ paǹ li, a na á kɛ pɛ: «Dɛnaa Lawa Bɛnzamɛn tɔrɔn narɛ parsiini. Maǹ là nyantoro la kun ka n din ni, n din nə ǹ tamaɛ baraabaraa n din nə giã nɛ ǹ bii.»

¹³Zozɛfu tɔrɔn wɔ paǹ li, a na á kɛ pɛ: «Dɛnaa Lawa die a kaa gána bǐɛ̃ kɔ. Lawa die a bǐɛ̃ sonbore baa ka la, a die a pele gisĩ kaa tán la, a tán giulun mu kɛ dɔ kɔ ka la.

¹⁴Wasa bɛ́ boe bɛ̀ a màn mɛn bǐɛ̃ kɔ, màn mɛn bɛ́ miɛ̃ mui woo mui, a die a bɛ tumaa a sonbore kɔ ka la.

¹⁵Kelen man kaa bǎã lɛ nɛ haalɛ lɛlɛ lɛlɛ, tentenen man a nɛ haalɛ bibi, kaa bǎã lɛ á màn bǐɛ̃ koe á la yii ni.

¹⁶Gána sonbore kɛ lɛ a naforo ne, Lawa mɛn bɛ́ á n din nyaa daãn nɛ, bɛa bǐɛ̃ nɛ, bɛ die a dɔ Zozɛfu tɔrɔn kɛn ganaa, Zozɛfu mɛn bɛ́ á ǹ dɔɔ̃nɔn mìilandɛnaa baa.

¹⁷Zozɛfu nyàa á lon! A n kaka ka dii gɔ̀lɔ̀ bɛ́ lɔn, ka lɛlɛ a don a zù kɛ bɛ́ lɔn. Á bɛn gegere màn paa bɔ, goon nə ka Efrayimu tɔrɔ gigiã kɛ nɛ, goon nə ka Manaasee tɔrɔ duu damata kɛ nɛ. A n tɔrɔn dii ka a bɛnɛn lɛn nɛ, a ǹ loo a wo ǹ koa kanaa lɛ dan ganaa.»

¹⁸Zabulɔn tɔrɔn wɔ paǹ li, a na á kɛ pɛ: «Zabulɔn tɔrɔn, ka n nyɛnyɛɛ kaa soo a wo ga màn li lɛ gɔ́ɔ̃ nɛ. Kasɛn, Isakaara tɔrɔn, ka dɔn nə n nyɛnyɛɛ kaa mɔnaa kionən ne.

¹⁹Ǹ tá re tɔrɔn bii ǹ wo ne kele la, ǹ tá re wúlu mànan koe a yɔrɔ li walan. A giala, ǹ tá re màn gigiã wɛɛ yìsi mu li, ǹ tá re màn sonboren wɛɛ nyɔɔsɔ li.»

²⁰Gaadi tɔrɔn wɔ paǹ li, a na á kɛ pɛ: «Ma á barka diɛ Lawa nɛ, a giala, á bǎã gole kɔ Gaadi tɔrɔn la, ǹ nə́ giã a nɛ ka yàra nɛ ǹ dan bɛ́ lɔn, a na a siĩ duĩ, a kũ, a saa a gòãn ganaa a sɔ̃ a wo a mìi yaa.

²¹Gaadi tɔrɔn man nə́ gána lɛ a bǎã sonbore bɔ. Gána lɛ a mìilandɛnaa wɔ gii na á goã walan. Bɛ kio, ǹ nə́ woo dɔ tɔrɔn lɛn goledɛnan li, Dɛnaa Lawa bɛ́ giɛ màn mɛn li, ǹ nə́ bɛ zɛnaa, a màn mɛn pɛ Izirayeli wɔ paǹ li, ǹ nə́ bɛ zɛnaa.»

²²Dan tɔrɔn wɔ paǹ li, a na á kɛ pɛ: «Dan tɔrɔn man ka yàra ten bɛ́ lɔn, maǹ soe Basan gána nɛ ka baa nɛ.»

²³Nɛfutalii tɔrɔn wɔ paǹ li, Muizu na á kɛ pɛ: «Nɛfutalii tɔrɔn nə́ kã ka màn kɔɔ̃n nɛ, Dɛnaa Lawa a bǐɛ̃ nə́ ǹ gɔ̀nɔn bɔ. Ǹ die ǹ gána lɛ a lɛ̀nyɛɛn gɔn la laanka a gusin a lɛ̀gɔn la si.»

²⁴Asɛɛrɛ tɔrɔn wɔ paǹ li, a na á kɛ pɛ: «Zakɔba a nɛgiĩn lɛn tumaa bii, Lawa die a barka da Asɛɛrɛ tɔrɔn ganaa, Lawa die a na gìĩ da ǹ dɔɔ̃nɔn lɛn tumaa nyin ni, Lawa die a na a nyɔɔ lɛ kɔ ǹ la.

²⁵Kaa kiɛnlɛ-a ǹ goon lɛn die ǹ goã fɔlɔ laanka zan lɛa, ka goã kaka miɛ̃ yǎa a woe kiɛ kaa gɛ̀ lɛ.»

²⁶Bɛ kio Muizu wusoo á kɛ pɛ: «Izirayeli minin lɛn, màn kɔn ba n zoɛ̃ kaa Lawa kɛ-a wa. A din nə dii labaran la, a n toa lon a gisĩ tán ka gugurubaa nɛ, a din nə die n doe ka lɛ.

²⁷Lawa mɛn bɛ́ a tan yǎa duduu, a din lɛ n duru n bǎã lɛa, A din lɛ gɔn nə ka li yǎa duduu. Á kaa zɔ́ɔn loo á ǹ bɔ ka nyɛɛnɛ, á pɛ ka nɛ, mà ka ǹ dɛ lenlen.

²⁸Izirayeli minin lɛn man là nyantoro la, n susui, Zakɔba tɔrɔn lɛn manə ǹ gɔrɔ. Ǹ bɛ́ re woe gána mɛn nɛ, *belee laanka rezɛ̃ gána nɛ, a giala, pele a gisĩ ǹ bǎã lɛ-n parsiini.

²⁹Izirayeli minin, kasɛn wɔ bǐɛ̃ kɔ! Dɛnaa Lawa na á tɔrɔ kɔsɔ mɛn kirisibaa ka kasɛn kɛn bɛ́ lɔn? A din nə goóro lɛa ka tamaɛ, a din dɔ n gɔya sa lɛa, pàã koe ka la. Kaa zɔ́ɔn tá re ka bebele ka yɔrɔ yii ni, sɛnɛ, kasɛn tá re tɔ we ǹ dɔ̀ɔ̃ la.»