Read Samo, Southern TDP 5 Bible Online

TDP 5 - Samo, Southern bible

TDP 5

¹Muizu Izirayeli minin lɛn tumaa biì á pɛ ǹ nɛ: — Izirayeli minin lɛn, ma bɛ́ landa boon laanka sii yɔrɔ bɔ ǹ boon mɛnɛn kiɛ ka too-n pelo ke, ka n too kɔ bɛn li. Ka n daraa ǹ ganaa, ka ǹ tamaa, ka kɔ ǹ lɛ.

²Wɔa Lawa, Dɛnaa Lawa lɛ lɛ kɔ kɔn la wɔ wɔ nɛ, Orɛbu kele la.

³Dɛnaa Lawa bie á bɛa lɛ kɔ kɔn la lɛ wɔ ka wɔ digolon dininsɔɔ̃nɔn nɛ wa. Sɛnɛ, a na á doa kɔn ka wɔ dɔn nɛ, wɔ mɛnɛn tumaa yii á ke koo kànaa pelo.

⁴Dɛnaa Lawa na á boo da ka dinin yii ni, kele lɛ la tɛ bii.

⁵Bɛa waáraa lɛ nɛ, ma din nə má tɔ́n golee ka laanka Dɛnaa Lawa bii, má n Dɛnaa Lawa a boo sii pii ka nɛ. A giala, ka n ká goã nyɛ́ɛ biɛ tɛ lɛ nyɛɛnɛ, ka goã ká dii kele lɛ la wa. Dɛnaa Lawa na á pɛ ka-n kɛnɛn:

⁶«Masɛ din Dɛnaa Lawa lɛ n kaa Lawa lɛa. Ma din ni má ka waa má ka bɔ bɛ̀rɛbaa nɛ Ezipti gána nɛ.

⁷Máa ka baran lawa kɔsɔ guguru kɔ masɛ kio wa,

⁸ Ka baran màn nyìn zɛnaa ka bɛ baa kaa lawa lɛa wa. Mànan mɛnɛn bɛ́ lon, ǹ mɛnɛn bɛ́ tán la, ka ǹ mɛnɛn dɔn bɛ́ mu li tán, a nyan bɛ kɔn nyìn baa wa.

⁹ Ka baran n kuməə bɛa lawan kɛn lɛn yɔrɔ-a, ka ǹ guguru kɔ wa. A giala, masɛ din Dɛnaa Lawa n kaa Lawa lɛa. Maa lɛ koe ka lawa kɔsɔ guguru kɔ wa. Bɛ̀ min sii la masɛ la, ma á dɔlɔ boe a nɛnyaanan ganaa, a nɔ̀ɔnɔn nɛ, yǎa a woe doe a nɔ̀ɔ fulupaa ganaa.

¹⁰Sɛnɛ, min mɛnɛn bɛ́ masɛ narɛ, ǹ nə masɛ a gɔn waa ǹ boon kɛn tamaɛ, man maa bǐɛ̃ kɛ zɛnɛɛ bɛn tɔrɔ duu gigiã nɛ.

¹¹ Ka baran kaa Lawa, Dɛnaa Lawa tɔ bii sii kooron ganaa wa. A giala, bɛ̀ min mɛn masɛ tɔ bii sii kooron ganaa, masɛ a bɛa dɛnaa kɛ toɛ dɔlɔ baã wa.

¹² Ka *susu ǹ pii tamaa, ka bɛ koa a gɔrɔn Lawa a lɛa, ka kaa Lawa, Dɛnaa Lawa goã á pɛ á laa ka ganaa lɔn.

¹³ Ka dí nya lɛawaa sɔrɔ gɔ́ɔ̃ nɛ, ka kaa sii tumaa zɛnaa bɛ lɛ gɔ́ɔ̃ nɛ.

¹⁴Sɛnɛ, a lɛawaa sɔbaabaa ǹ wɔ ke, bɛ n masɛ Dɛnaa Lawa, kaa Lawa lɛ a susu ǹ pii lɛa. Ka baran dí kɔn nya bɛa pinaa kɛ lɛ-n wa: ka dinin ni, kaa nɛgiĩn ni, kaa nɛlɔn nɛ, kaa bɛ̀rɛgiĩn ni, kaa bɛ̀rɛlɔn nɛ. Kaa diin ni, kaa dundunun ni, kaa tɔɔn tumaa, ǹ kɔn baran dí nya wa, haalɛ gùlin mɛnɛn dɔn bɛ́ giã-n kaa kiwin ni. Ka zɛnaa miɛ̃ màn mɛn bɛ́ toɛ, kaa bɛ̀rɛlɔn laanka kaa bɛ̀rɛgiĩn nə n susu ka ka dɔn wɔ bɛ́ lɔn.

¹⁵Ka n yiri koa a nɛ, mà ka n ká goã bɛ̀rɛn lɛa Ezipti gána nɛ. Kaa Lawa, Dɛnaa Lawa lɛ na á sii kakan zɛnaa, á ka waa ka pàã nɛ á soo ka nɛ. Bɛ lɛ na á toa masɛ Dɛnaa, kaa Lawa lɛ laa ka ganaa, máa yǎa ka susu ǹ pii koɛ.

¹⁶ N díi laanka n náa guguru kɔ, ka masɛ Dɛnaa Lawa, kaa Lawa lɛ pɛ má laa ka ganaa lɔn, màn mɛn bɛ́ toɛ n nyin sasa yɛ, n yii-nyɛɛ dɔ yɛ gána kɛ nɛ, kaa Lawa, Dɛnaa Lawa n koe ka la.

¹⁷ N baran gɛ̀ dɛ wa.

¹⁸ N baran naarɛbaa zɛnaa wa.

¹⁹ N baran wurumu baa wa.

²⁰ N baran soɛ da min la wa.

²¹ N yii baran bɔ min kɔsɔ gɔn màn kɔn li wa. A nyan bɔ a lɔ li wa, a kion ne, a wuru ni, a bɛ̀rɛgiĩ ni, a bɛ̀rɛlɔ nɛ, a dii ni, a dundun ni, n yii nyan bɔ bɛ kɔn li wa.»

²² Dɛnaa Lawa na á bɛa boon lɛn pɛ ka nɛ ka lɛn gole ne, tɛ bii, tɛmaa bii, ka wɔlɔ tì gole ne. Ka mɛnɛn tumaa goã kele lɛ gòã lasa la, a na á boon kɛn lɛn da ka dinin manɛ, a màn kɔsɔ ti a ganaa wa. Bɛ kio, á boon lɛn kiɛ̃ kɔlɔ-sɛlɛɛ màn paa la, á ǹ kɔ ma la.

²³Ka bɛ́ ka boo-diɛ lɛn lɛ ma, wɔlɔ tì bii, tɛ n ka a n kele lɛ dɔ kuĩ, kaa tɔrɔn lɛn nyɛɛnaandɛnan laanka ǹ min golen nə́ n zɔ̃ ǹ nə́ dɔ ma li.

²⁴Ǹ nə́ pɛ: «Wɔa Lawa, Dɛnaa Lawa lɛ á ke á ná a gugurubaa laanka a golebaa nyaa wɔ nɛ. Wɔ́ a lɛ ma tɛ lɛ bii. Wɔ́ yɛ pelo kəni, wɔa Lawa á boe la a boo da ka min ni, ǹ dɛnaa yii wusoo a goã koo.

²⁵Sisia, wɔ a re toɛ tɛ gole kɛ wɔ dɛ wa. Bɛ̀ wɔ́ woo nyɛɛn kɛnɛn, wɔ n wɔa Lawa, Dɛnaa Lawa kɛ lɛ miɛ, wɔ n die giɛ̃.

²⁶Min bin Lawa Yiikoonaa kɛ lɛ ma boo diɛ tɛ bii ka wɔsɛn bɛ́ lɔn, a yii wusoo á goã koo?

²⁷Nsɛ nə n zɔ̃ n woo. Wɔa Lawa, Dɛnaa Lawa lɛ bɛ́ re màn mɛn pii, n too kɔ bɛ tumaa li. A bɛ́ re màn mɛn tumaa pii n nɛ, nsɛ wusoo n bɛ pɛ wɔsɛn nɛ, wɔ á re n too koe li, wɔ kɔ lɛ.»

²⁸Ka boon mɛnɛn da ma nɛ, Dɛnaa Lawa nə́ ǹ ma. Á tɔ́n pɛ ma nɛ: «Zaman lɛ boon mɛnɛn da, má ǹ ma. Taãn tá ǹ lon, ǹ bɛ tumaa pɛ.

²⁹Sɛnɛ, toa bɛ̀ bɛa foo lɛ miã nə ǹ lon biikoo tumaa li, ǹ nə́ nyɛ́ɛ biɛ masɛ nɛ, ǹ nə́ masɛ a landa boon kɛn tumaa tamaɛ, ǹ dinin laanka ǹ nɛnyaanan yii-nyɛɛ a lɛa yǎa duduu.

³⁰Wo pɛ ǹ nɛ mà ǹ wusoo, ǹ wo ǹ mɔnaa kionən ne.

³¹Sɛnɛ, nsɛ golee kànaa, ma li. Ma á re gɔn waa ǹ boon kɛn tumaa pii n ni, landa boon kɛn nɛ, ka sii yɔrɔ bɔ ǹ boon kɛn nɛ. Ń die n nə ǹ daraa bɛn lɛn ganaa, ǹ kɔ ǹ lɛ gána kɛ lɛ nɛ, má n koe ǹ la, ǹ wɔ lɛa.»

³²Haya! Kaa Lawa, Dɛnaa Lawa lɛ nə n gɔn waa ka-n lɔn, ka zɛnaa a kɔnpɛ ka bɛ nɛ. Ka nyan kanaa ka wo gusin wa, ka nyan wo gɔsɛ wa.

³³Kaa Lawa, Dɛnaa Lawa màn mɛn tumaa pɛ ka nɛ á laa, ka kɔ bɛ lɛ pepere, màn mɛn bɛ́ toɛ, ka yii goã koo, kaa wɔ boo la a bǐɛ̃ kɔ, ka nyin sasa yɛ gána kɛ nɛ, ká n die sii ka baa kaa wɔ lɛa.