Read Samo, Southern TDP 9 Bible Online

TDP 9 - Samo, Southern bible

TDP 9

¹Izirayeli minin lɛn, ka n too kɔ! Ka n die Zurdɛ̃ tà kuri pelo. Tɔrɔn mɛnɛn bɛ́ didi ǹ nə́ la ka nɛ, ǹ pàã dɔ din la kaa wɔ nɛ, ǹ kiwi nə́ dadara kungɔnun nə́ ǹ lɛnpɛnɛ, sasa lon ka piwɔɔn, ka n die bɛa tɔrɔn lɛn lui.

²Sanparɛ Anaaki tɔrɔn kɛn mɔnaa nɛ, sɔsɔrɔ dɔn. Ka tá doɛ̃, ǹ bin pɛ, ká ma dɔn dinin mà die n boe la a golee Anaaki tɔrɔn kɛn nyɛɛnɛ?

³Ka dɔ̃ pelo, mà kaa Lawa, Dɛnaa Lawa lɛ din nə die miɛ̃ ka nyɛɛnɛ, ka tɛ á ke màn kuĩ lɔn. A din nə die ǹ dii, a ǹ kaa tán ka nyɛɛnɛ. Ka á re ǹ lui, ǹ papaã ǹ nə n bɔ walan bǎã goon, ka Dɛnaa Lawa bɛ́ á n lɛ kɔ ka la lɔn.

⁴Bɛ̀ kaa Lawa, Dɛnaa Lawa lɛ nə́ ǹ loo á ǹ bɔ ka nyɛɛnɛ ǹ mɛn waáraa, ka baran din gole kɔ ǹ boo da ka pɛ mà ka dinin peperebaa a lɛa nɛ, Dɛnaa Lawa toa ka wɔ gána lɛ nɛ, ka si ka baa kaa wɔ lɛa wa. Sɛnɛ, ka dɔ̃ mà tɔrɔn kɛn lɛn baraabaa a lɛa nɛ, Dɛnaa Lawa á re ǹ lui, a ǹ bɔ ka nyɛɛnɛ.

⁵Kaa peperebaa laanka kaa gɔ́ɔ̃ fubaa bie re toɛ, ka wɔ ǹ gána lɛ nɛ, ka si ka baa kaa wɔ lɛa wa. Sɛnɛ, bɛa tɔrɔn kɛn lɛn dinin baraabaa n die toɛ, kaa Lawa, Dɛnaa Lawa nə ǹ loo a ǹ bɔ ka nyɛɛnɛ. A n die bɛ zɛnɛɛ dɔn, màn mɛn bɛ́ toɛ, a na a lɛ kɔ ǹ boo lɛ pã ka digolon wɔ paǹ li: Abrahamu laanka Izaaki ni, ka Zakɔba nɛ.

⁶Ka dɔ̃ mà kaa peperebaa a lɛa bie re toɛ, kaa Lawa, Dɛnaa Lawa gána sonbore kɛ lɛ kɔ ka la, ka si ka baa kaa wɔ lɛa wa. A giala, ka n tɔrɔ too kaka-a lɛa.

⁷Ka sii mɛn zɛnaa, ká kaa Lawa, Dɛnaa Lawa lɛ foo yoo ne don, ka n yiri kɔ bɛ li, ka nyan toa ka yiri bɔ ka bɛ-n wa. A saa kaa soo Ezipti gána-n ganaa, a da kaa kaa dɔ kànaa kɛ lɛ, ka gòãn man dii-n kɔn ka Dɛnaa Lawa-n miɛ̃.

⁸Orɛbu kele la, ká Dɛnaa Lawa foo yoo. A foo busu ka li, á baa re ka dii a ka nya.

⁹ Dɛnaa Lawa lɛ kɔ kɔn la mɛn wɔ kɔn ka nɛ, a bɛ lɛ a boo kiɛ̃ kɔlɔ-sɛlɛɛn mɛnɛn ganaa, man má goã má dii kele lɛ la, má woo bɛn lɛn si. Ma lɛawaa pusi ka tèlò pusi n kele lɛ la, ma a màn bii wa, ma a mu mii wa.

¹⁰Dɛnaa Lawa na á kɔlɔ-sɛlɛɛ màn paa lɛ kɔ ma la walan. A din nə n toa kele lɛ la tɛ bii á boon mɛnɛn da ka nɛ, a din na á bɛa boon lɛn tumaa kiɛ̃ kɔlɔn lɛn ganaa. A pinaa, bɛ̀ ka á soen kɔn kele gòã kɛ la.

¹¹Lɛawaa pusi ka tèlò pusi lɛ lɛ bɛ́ á pã, Dɛnaa Lawa kɔlɔ-sɛlɛɛ màn paa lɛ kɔ ma la, lɛ kɔ kɔn la ǹ boon lɛn nə́ kiɛ̃ nɛ ǹ ganaa.

¹²Dɛnaa Lawa tɔ́n pɛ ma nɛ: «N nanaa n gisĩ, n nə n bɔ kànaa. A giala, n tɔrɔn lɛn, má ǹ waa má ǹ bɔ Ezipti gána nɛ, ǹ nə́ n dinin ziziɛ̃. Masɛ zii mɛn nyaa ǹ nɛ mà ǹ kɔ lɛ, ǹ nə́ kanaa, ǹ nə́ n bɔ bɛ la gɔrɔ, ǹ nə́ sana yo, ǹ nə́ màn nyín zɛnaa nɛ.»

¹³Dɛnaa Lawa tɔ́n boo da ma nɛ á pɛ ma-n kɛnɛn: «Ma yii tɔrɔn kɛn lɛn gɔ̀nɔn bɔ. Á ke, tɔrɔ too kaka-an manɛ.

¹⁴Toa ma ǹ dɛ ma ǹ nya, ma ǹ tɔ tuturu ma bɔ kanaa. Ma á re toɛ n din tɔrɔn nə mɔnaa, pàã nə́ ǹ lon á la kɛn manɛ.»

¹⁵Má tɔ́n nə n bɔyaa, máa man gisĩ n boe kele lɛ la, tɔn tɛ lɛa girigiri. Kɔlɔ-sɛlɛɛ màn paa mɛn bɛ́ lɛ kɔ kɔn la ǹ boon lɛn nə́ goã kiɛ̃ nɛ ǹ la, bɛn man nə́ goã ma gɔnɔn paanan nɛ.

¹⁶Má daa yaa, bɛ̀ ka á ke ká sii babaraa la kaa Lawa, Dɛnaa Lawa la: ka n ká sana yo, ka diin nɛ nyín zɛnaa nɛ. Dɛnaa Lawa zii mɛn nyaa ka nɛ mà ka kɔ lɛ, ká kanaa ká n bɔ bɛ la gɔrɔ.

¹⁷Bɛ lɛ nɛ má tɔ́n kɔlɔ-sɛlɛɛ màn paa lɛ zũ má ǹ bɔ ma gɔn, má ǹ yɔyɔrɛ tán ka dinin yii ni.

¹⁸Má tɔ́n na má kaa tán Dɛnaa Lawa yɔrɔ-a, ma lɛawaa pusi ka tèlò pusi, ka bibinaa wɔ lɛ bɛ́ lɔn. Ma màn-bii wɔ ma lɛ-n wa, ma mu wɔ ma lɛ-n wa, kaa sii baraa kɛ lɛ tumaa a lɛa ká zɛnaa. Sii mɛn bɛ́ baraa Dɛnaa Lawa yii li, ka n ká bɛ lɛ zɛnaa, ká a foo yoo ne.

¹⁹ Nyɛ́ɛ masɛ din kũ a foo-yoo lɛ gɔ́ɔ̃ nɛ. A giala, a foo yoo ka li á dɔ bǎã mɛn nɛ, a na á baa re ka dii a ka nya. Sɛnɛ, á wusoo á maa nyankɔ si ka bɛ lɛ dɔ-n doo.

²⁰A foo yoo Aarɔn din li á là da. A na á baa re dii. Sɛnɛ, má gòã-kũ da a ganaa Aarɔn dɔ a lɛa, bɛa pinaa kɛ lɛ nɛ.

²¹Bɛ kio, ka dí mɛn nya kaa sii baraa zɛnaa lɛ gɔ́ɔ̃ nɛ, diin nɛ nyín lɛ, má bɛ saa, má da tɛ-n. Má zũ má baa wùsu lɛa nɔnɔɔ, ka tii ni. Tà mɛn a mu á ke n toɛ kele lɛ la bɛ̀ a gisĩ, má a wùsu lɛ kaa bɛa mu li.

²² Taberaa kiwi, Maasaa kiwi, Kibrɔti-Hataabaa kiwi, ká Dɛnaa Lawa foo yoo bɛa bǎãn kɛn lɛn dɔn nɛ.

²³ Ka bɛ́ Kadɛsi-Barneya, Dɛnaa Lawa bɛ́ á ka dia á pɛ ka nɛ mà asɛ bɛ́ gána mɛn lɛ koe ka la, mà ka woo, ka si ka baa kaa wɔ lɛa, ká n piã ka kaa Lawa, Dɛnaa Lawa lɛ a boo ne, ka waa la wa, ka n too kɔ a lon wa.

²⁴Masɛ din ka dɔ̃ ǹ mɛn pinaa, ka n Dɛnaa Lawa bɔlɔ-tiilin lɛa miɛ̃.

²⁵Dɛnaa Lawa bɛ́ mà a n die ka dii a ka nya, má tɔ́n kaa tán a yɔrɔ-a. Ma lɛawaa pusi ka tèlò pusi n tán a yɔrɔ-a.

²⁶Má gòã-kũ da Dɛnaa Lawa ganaa, má pɛ kɛnɛn: «Dɛnaa Lawa, n baran n minin lɛn dɛ wa! Tɔrɔn kɛn lɛn manə n din wɔn lɛa, ń nə́ ǹ si ka n din a boo sii la nɛ, ń nə́ ǹ waa ka pàã nɛ Ezipti ń soo ǹ ne.

²⁷N yiri kɔ n dí-nyalin kɛn li: Abrahamu ni, Izaaki ni ka Zakɔba nɛ. N baran n saa tɔrɔn kɛn too kakabaa li, ǹ baraabaa nɛ, ka ǹ sii baraakɛn nɛ wa.

²⁸N wɔ waa ń wɔ bɔ gána mɛn lɛ nɛ, n nyan toa minin nə wusoo ǹ kɛ pɛ walan wa: Dɛnaa Lawa na á ǹ waa á soo ǹ ne, á toa ǹ nə́ gã don. A giala, a n lɛ kɔ ǹ la ka gána mɛn lɛ a sii ni, a goã boe la á woe ǹ ne walan wa. Ka bɛ dɔ nɛ, ǹ sii goã kɔɔ̃nɛ a ganaa wa.

²⁹A da yaa, tɔrɔn kɛn lɛn, n din a minin manɛ, ń sii kakan zɛnaa, ń nə́ ǹ waa ka pàã gole ne, ń soo ǹ ne.»