Read Samo, Southern Zaã 14 Bible Online

Zaã 14 - Samo, Southern bible

Zaã 14

¹Yezu mà a kialandɛnan lɛn ganaa: «Ka foo baran ziziɛ̃ wa. Ka golee Lawa li, ka golee masɛ dɔ li.

²Giã ǹ bǎã gigiã tá maa Díi a sumu-n. Man woe giã ǹ bǎã zɛnɛɛ ma á koɛ ka nɛ. Bɛ̀ bɛ bie wa bɛ̀ ma ba maa woo boo kɛ diɛ ka nɛ, ma ka foo ziziɛ̃ wa.

³Bɛ̀ má woo bǎã zɛnaa má koa ka nɛ, ma á re wusii ma daa, ma ka goa ma wo ka nɛ ma din li, màn mɛn bɛ́ toɛ, ma bɛ́ bǎã mɛn nɛ, ka dɔn nə goã walan.

⁴Ma bɛ́ woe bǎã mɛn nɛ, ka tá a zii doɛ̃.»

⁵Toomaa tɔ́n pɛ nɛ: «Dɛnaa, wɔsɛn ba n woo ǹ bǎã doɛ̃ wa, Wɔ n siɛ lɔn wɔ tɔn a zii dɔ̃?»

⁶Yezu pɛ nɛ: «Masɛ din nə zii lɛa, sonbore lɛa, yiikoonaabaa lɛa. Min kɔ́n ba woe Díi Lawa li, bɛ̀ a ná a kɔ masɛ lɛ wa.

⁷Bɛ̀ ka ǹ masɛ doɛ̃, ka á re maa Díi dɔ doɛ̃. A kũ sisia ganaa, ká dɔ̃, ká yɛ dinin.»

⁸Filipi tɔ́n pɛ nɛ: «Dɛnaa, n Díi lɛ nyaa wɔsɛn manɛ, bɛ á wɔsɛn boe.»

⁹Yezu mà Filipi ganaa: «Man kun ka ka nɛ haalɛ bibi ǹ duũ, bɛ din tumaa kio, n tɔn masɛ dɔ̃ bɔrɔ wa? Bɛ̀ min mɛn masɛ yɛ, ǹ dɛnaa na á maa Díi yɛ. Wàa na á baa n tá pii doo mà ma maa Díi nyaa ka nɛ?

¹⁰N ba wɛɛ la mà ma á kun ka maa Díi ni, mà maa Díi dɔ á kun ka masɛ-n wa? Ma bɛ́ boon mɛnɛn pii ka nɛ, ma bie ǹ pii ma din mìi gialaa wa dɛ! Maa Díi mɛn bɛ́ kun ka masɛ nɛ, a din na a nya ǹ dín nyɛɛ.

¹¹Ka waa masɛ la, masɛ n kun ka maa Díi ni, maa Díi dɔ n kun ka masɛ nɛ. Bɛ̀ ka a wɛɛ masɛ a boo la wa, zɛnaa ǹ siin kɛn lɛn sɛn taman yii, ka waa la mà Lawa á kun ka masɛ nɛ.

¹²Man taãn pii ka nɛ, bɛ̀ min mɛn nə́ golee masɛ li, ma bɛ́ siin mɛnɛn zɛnɛɛ, ǹ dɛnaa dɔ á die bɛn miãn zɛnɛɛ. A tá re mànan dinin zɛnɛɛ ǹ la bɛn manɛ, a giala, masɛ n woe maa Díi li.

¹³Bɛa biikoo li, ka bɛ́ re màn woo màn nyankoe ka masɛ tɔ nɛ, ma á die bɛ koe ka la, màn mɛn bɛ́ toɛ, ma maa Díi a gugurubaa nyaa.

¹⁴Bɛ̀ ka tá màn mɛn nyankoe masɛ lon ka ma din tɔ nɛ, ma á die bɛ koe ka la.

¹⁵Bɛ̀ ka tá masɛ narɛ, ka á re n doɛ ka kɔ maa dí-pɛn lɛn lɛ.

¹⁶Masɛ dɔ á re maa Díi nyankoe má a Dɔmalɛ Wole kɔsɔ kɔ ka la, bɛ n die goɛ̃ ka li miɛ̃ biikoo tumaa waáraa.

¹⁷Yiri Fu mɛn bɛ́ sonbore pii, bɛ lɛ nɛ. Kanaa minin ba boe la ǹ lɛ kɔ a ganaa wa, a giala, ǹ yii ba a ganaa wa, ǹ ba doɛ̃ dɔn wa. Sɛnɛ, kasɛn kɛn tá doɛ̃, a giala, á giã nɛ ka li, á kun ka nɛ.

¹⁸Ma á die ka toɛ nɛ toenən lɛa wa, ma á wusii die ka li.

¹⁹Kànaa ka boɛɛn, kanaa minin ba re masɛ yii doo wa, sɛnɛ, kasɛn tá re ma yii ma yii n koo, ka dɔn yii á re goɛ̃ koo.

²⁰Bɛ lɛ a pinaa kəni, ka á re doɛ̃ mà masɛ á kun ka maa Díi ni, ka dɔn tá kun ka masɛ nɛ, ma dɔ á kun ka ka dɔn nɛ.

²¹Bɛ̀ min mɛn lɛ kɔ masɛ a dí-pɛn lɛn ganaa, á kɔ ǹ lɛ, bɛa dɛnaa n masɛ narɛ; bɛ̀ min mɛn dɔ tá masɛ narɛ, maa Díi dɔ á re bɛa dɛnaa narɛ, ma dɔ á re bɛa dɛnaa narɛ, ma n din nyaa nɛ.»

²²Zudaasi, Kariyɔtin Zudaasi kɛ bie wa, bɛ́ tɔ́n pɛ nɛ: «Dɛnaa, ma nə n din nyɛɛ wɔsɛn man lɔn, n nə́ n ba n din nyɛɛ kanaa min gialakunun kɛn man wa?»

²³Yezu pɛ nɛ: — Bɛ̀ min mɛn tá masɛ narɛ, bɛa dɛnaa tá re masɛ a boo sii. Maa Díi dɔ á re bɛa dɛnaa narɛ, ma laanka maa Díi á re die bɛa dɛnaa li, wɔ giã a li.

²⁴Min mɛn bɛ́ a ba masɛ narɛ wa, bɛa dɛnaa ba masɛ a boon sii wa. Ka bɛ́ boo mɛn miɛ masɛ lɛ-n dinin, masɛ din gɔn tɔ boo bie wa, maa Díi mɛn ma dia, bɛ lɛ a boo ne.

²⁵Ma bɛ́ kun ka nɛ, man má bɛa siin lɛn boo da ka nɛ.

²⁶Yiri Fu, Dɔmalɛ Wole lɛ, maa Díi n die diɛ ka masɛ tɔ nɛ, bɛ lɛ á die ka darɛɛ bɛa siin lɛn tumaa ganaa. Ma boo mɛn tumaa pɛ ka nɛ, á die ka yiri diɛ bɛ yii tumaa nɛ.

²⁷Man là nyantoro koɛ ka li, ma din a là nyantoro ne. Kanaa bɛ́ là nyantoro koe lɔn, masɛ wɔ kɛ bie miɛ̃ wa. Ka yiri baran n lɔlɔkɔn doo wa, ka baran nyɛ́ɛ baa doo wa.

²⁸Ma bɛ́ má pɛ ka nɛ máa man woe, ma wusoo man bɔyaa ma da ka li, ka bɛ́ ka ma. Bɛ̀ ka tá ma narɛ, ka tá re n nyɛnyɛɛ masɛ a wo maa Díi li lɛ taman yii, a giala, maa Díi á gole á la masɛ nɛ.

²⁹Man sii lɛ a boo diɛ ka nɛ sisia bɛ̀ a ná a tɔn nə n zɛnaa wa, màn mɛn bɛ́ toɛ, bɛ̀ á n zɛnaa ǹ mɛn waáraa ka golee masɛ li.

³⁰Ma a die boo gigiã diɛ ka nɛ kɛ kio doo wa, a giala, kanaa lɛ a mìilandɛnaa lɛ á die. A wɔlɔ yii masɛ wɔ ganaa wa,

³¹sɛnɛ, sii mɛn bɛ́ re masɛ yii, man lɛ koe a ganaa, màn mɛn bɛ́ toɛ, kanaa minbuiinin nə dɔ̃ mà masɛ tá maa Díi narɛ, ǹ dɔ̃ dɔn mà man maa dí nyɛɛ á kɔnpii ka maa Díi a da ǹ boo ne. Ka yoo wɔ woo wɔ n bɔ kànaa!