Read Samo, Southern Zaã 19 Bible Online

Zaã 19 - Samo, Southern bible

Zaã 19

¹Pilati nɔmaa á soo ka Yezu ni, á kɔ ǹ la mà ǹ duwəə ka sɛ̌n nɛ.

²Sɔraasin lɛn nə́ nyan tã kii bafolo lɛa ǹ nə́ wɔ a mìi-a, ǹ nə́ dɔnkɛ tã wɔ a ganaa ka n pɛ mà maǹ koɛ kii lɛa.

³Maǹ nə n zoɛ̃ bɛ̀ ǹ dɔ a li bɛ̀ ǹ pɛ-n kɛnɛn: «Fòo le, Zuifun kii!» Ǹ nə́ goã n gɔn tɔtoe a para-n.

⁴Pilati nə́ n bɔyaa á daa kanaa doo á pɛ zaman lɛ nɛ: «Á ke, man die soe-n kanaa ma kɔ ka la, màn mɛn bɛ́ toɛ, ka dɔ̃ mà ma zɛ̀rɛbaa ǹ sii kɔ́n yɛ a ganaa wa.»

⁵Yezu soo kanaa, kii bafolo nyandɛnaa lɛ ná a mìi-a ka dɔnkɛ tã lɛ dɔ nɛ a ganaa. Pilati tɔ́n pɛ ǹ nɛ mà haya, mà giĩ lɛ á ke!

⁶Sɛnɛ, wúlu-bɔlen goledɛnan lɛn laanka garadin lɛn nə yɛ lɔn, ǹ nə́ kaa lɛ-dɛ nɛ ǹ nə́ pii: «A dere gɔn ganaa! A dere gɔn ganaa!» Pilati tɔ́n pɛ ǹ nɛ mà ǹ dininmaan nə kũ ǹ dere gɔn ganaa. Mà asɛ zɛ̀rɛbaa ǹ sii yɛ a wɔ paǹ li sɛn wa.

⁷Zuifun lɛn mà Pilati ganaa mà landa kɔ́n tá ǹsɛn lon, mà a kɔnpɛ ka bɛa landa kɛ lɛ nɛ, mà a doamaa-n ka gɛ̀ nɛ, a giala, mà a na á n din baa Lawa a Nɛgiĩ lɛa!

⁸Pilati bɛ ma lɔn, màn wusoo á mɛ a nyɛ́ɛ li.

⁹Á wusoo á woo wɔ kion doo á nɔ̀n da Yezu la mà asɛ kɛ lɛ, mà a n boe maa? Yezu na a lɛ si ka boo kɔ́n nɛ wa.

¹⁰Pilati tɔ́n pɛ nɛ: «Ma nə n lɛ tiɛ̃ masɛ lɛ? Pàã tá masɛ lon ma n si ma n da, pàã tá ma lon dɔ-n ma n dere gɔn ganaa. N ba bɛ doɛ̃ wa?»

¹¹Yezu tɔ́n pɛ nɛ: «N ba boe la n sii kɔ́n zɛnaa masɛ nɛ, bɛ̀ Lawa ná a lɛ kɔ n la wa. Bɛ lɛ din taãn na á toa, min mɛn ma wɔ n gɔn, bɛa sii baraa á gole a mìi ni á la nsɛ wɔ nɛ.»

¹²A kũ bɛ-a lɔn, Pilati na á goã giɛ a da ǹ gɔn li. Sɛnɛ, Zuifun lɛn nə́ kaa lɛ-dɛ nɛ doo, ǹ nə́ pii: «Bɛ̀ n da sɛn, n ba Rɔmun kii gole gole a giaára lɛa wa! A giala, min woo min tá n din biɛ kii lɛa, bɛa dɛnaa nə n din diɛ kɔn ka kii gole gole ne.»

¹³Pilati bɛa boon lɛn ma lɔn, á Yezu kũ á soo-n kanaa nɛ, á koa tán kiri kuru ǹ bǎã nɛ, ǹ bɛ́ ǹ mɛn bíi mà "kɔlɔ kaa kɔn la ǹ bǎã", *Ebrəə bɔlɔ nɛ mà "Gabaataa".

¹⁴Bɛ á zɛnɛɛ, bɛ̀ *kiɛ̃mala ǹ zɔ́n nə ka biɛ̃ nɛ, penleen biikoo li. Pilati mà Zuifun lɛn ganaa mà haya, mà ǹ kii lɛ á ke!

¹⁵Sɛnɛ, ǹ nə́ kaa lɛ-dɛ nɛ: «A dɛ a gã! A dɛ a gã! A dere gɔn ganaa!» Pilati wusoo á pɛ: «Ká mà ma kaa kii lɛ dere gɔn ganaa?» Wúlu-bɔlen goledɛnan mà a ganaa mà ǹsɛn kii kɔsɔ banban á kiɛ̃ Rɔmun kii gole gole la wa.

¹⁶Bɛa biikoo li, Pilati Yezu kɔ ǹ la mà ǹ wo dere gɔn ganaa. Ǹ nə́ nɔmaa ǹ nə́ Yezu kũ.

¹⁷Yezu ná a dinmaa a dere gɔn gũ, á soo á woo bǎã kɔ́n nɛ, ǹ nə́ bíi "Mìi pán bǎã", Ebrəə bɔlɔ nɛ mà "Golgootaa".

¹⁸Maǹ nə́ dere gɔn ganaa walan, ka min paa kɔsɔ dɔ nɛ, goon na a wàã kɛa-a, kɛ dɔ ná a wàã kɛ-a, Yezu din ni bii.

¹⁹Pilati sɛ́wɔ kɔ́n kiɛ̃ á kɔ ǹ la mà ǹ naa dere ǹ gɔn lɛ ganaa. A màn mɛn kiɛ̃ la bɛ á ke: «Nazarɛtin Yezu, Zuifun kii.»

²⁰Bɛa sɛ́wɔ-kiɛ̃ kɛ lɛ, Zuifu gigiã pɛ, a giala, ǹ Yezu dere gɔn ganaa bǎã mɛn nɛ, a wɔlɔ tá kunu kiwi lɛ ganaa. Ka bɛ dɔ nɛ, sɛ́wɔ lɛ na á goã kiɛ̃-n ka Ebrəə bɔlɔ nɛ, ka Latɛ̃ bɔlɔ nɛ, ka Grɛki bɔlɔ nɛ.

²¹Zuifun wúlu-bɔlen goledɛnan nə́ pɛ Pilati ni mà toa bɛ̀ a na a kiɛ̃ mà «Zuifun kii» wa, mà a n siĩni a kiɛ̃ mà «Giĩ kɛ na á n din baa Zuifun kii lɛa.»

²²Pilati tɔ́n pɛ ǹ nɛ mà asɛ màn mɛn kiɛ̃, mà asɛ na á bɛ kiɛ̃!

²³Sɔraasin lɛn bɛ́ ǹ nə́ Yezu dere gɔn ganaa ǹ nə́ nya ǹ mɛn waáraa, ǹ ná a mɔnaan goa ǹ nə́ ǹ tala kɔn wɔlɔ sii, didie wɔ n ka a wɔlɔ goon ne. A gialakun na á goã a dɔnkɛ sasa kɛ lɛa, nimii bǎã ba a ganaa wa, a na á n tã gɔ́ɔ̃ goon, a saa a lon ganaa a da a tán-a yaa.

²⁴ Sɔraasin lɛn nə́ tɔ́n pɛ kɔn nɛ mà a ba siĩni ǹsɛn nə toɛ̃ wa. Mà á soɛ ǹsɛn nə n pã a ganaa, bɛ̀ á re doe min mɛn ganaa ǹsɛn nə bɛa dɛnaa dɔ̃. Lawa a boo màn mɛn pɛ, a na á n zɛnaa á kaa bɛ lɛ lɛ: «Ǹ nə́ maa mɔnaan gii kɔn, maa dɔnkɛ sasa ke, ǹ nə́ n pã bɛ ganaa.» Sɔraasin lɛn nə màn mɛn zɛnaa, a din lɛ n ke.

²⁵Yezu a náa laanka a náa lɛ dɔɔ̃nlɔ goã golee ne a dere ǹ gɔn lɛ genli, kun ka Klopaasi a lɔ Mariya laanka Magadalaan Mariya nɛ.

²⁶Yezu bɛ́ a ná a náa yɛ golee ne, a bɛ́ a kialandɛnaa mɛn narɛ, bɛ dɔ n golee na a li, á pɛ a náa nɛ: «N nɛgiĩ á ke n li.»

²⁷Bɛ kio á pɛ a kialandɛnaa lɛ dɔ nɛ: — N dan nə́ ke n li. A kũ bɛ lɛ-a, bɛa kialandɛnaa lɛ kũ á da a kion.

²⁸ Bɛ kio, Yezu bɛ́ doɛ̃ mà sii din tumaa nə́ n zɛnaa á nya sisia, á n toa mà mu boro na asɛ ganaa. A na á bɛ pɛ, màn mɛn bɛ́ toɛ, Lawa a boo din tumaa lɛ pã.

²⁹Dɔ́n kɔ́n goã tán walan, duvɛ̃ pipiã ná a piɛ̃. Ǹ nə́ màn sã bɛa mu lɛ li, ǹ nə́ wɔ da kɔ́n gɔn lɛwɔn ganaa, ǹ nə́ bíi *izopi, ǹ nə́ mɔrɔ Yezu lɛ ganaa.

³⁰Yezu bɛa duvɛ̃ pipiã lɛ mi lɔn, á pɛ: «A tumaa lɛ pã kəni!» Bɛ kio á n mìi kuməə, a piɛ̃ nya.

³¹Kiɛ̃mala ǹ zɔ́n na á goã ka biɛ̃ nɛ. Zuifun ba li gere goã dere ǹ gɔn ganaa *susu ǹ pii pinaa wa, a giala, lɛawaa gole ne a tɔ-a. Bɛ lɛ nɛ, ǹ nə́ Pilati nyankɔ mà a toa ǹsɛn nə ǹ gòãn yiɛ ń giɛ ǹ tá giɛ̃ fufuu, ǹsɛn nə ǹ bɔ ǹ nə n bɔ dere ǹ gɔn ganaa.

³²Sɔraasin lɛn nə́ daa, ǹ min mɛnɛn lɛn deren kun ka Yezu ni, ǹ ná a bibinaa gòãn yiɛ, ǹ nə́ kiɛ̃ ǹ ná a paabaa ǹ wɔ wɔn yiɛ.

³³Ǹ bɛ́ ǹ nə́ dɔ Yezu ganaa, ǹ nə́ yɛ mà á saa lɛlɛ á gã, ǹ na asɛ gòãn yiɛ wa.

³⁴Sɛnɛ, sɔraasin giĩ lɛ goon nə́ fɔ̃ a kolo ganaa ka a sɛmiɛ nɛ, yǎa mà laanka mu soo a nɛ a din bǎã-n gɔrɔ.

³⁵Min mɛn nə bɛa siin lɛn yɛ, bɛa dɛnaa lɛ nə ǹ boo diɛ; a bɛ́ boo mɛn diɛ, sonbore ne. Ǹ dɛnaa dinmaa dɔ á doɛ̃ mà asɛ bɛ́ boo mɛn pii mà taãnɛ, bɛ lɛ na á toa á pii, màn mɛn bɛ́ toɛ, ka dɔn nə golee li.

³⁶ Sonbore ne, kɛ din tumaa na á n zɛnaa màn mɛn bɛ́ toɛ, Lawa a boo lɛ pã: «A wen lɛn kɔ́n ba re yiɛ wa.»

³⁷Lawa a boo paǹ kɔ́n dɔ á pii doo mà ǹ min mɛn lɛ fɔ̃, mà ǹ tá re yii.

³⁸Bɛa siin lɛn zɛnaa kio, Zozɛfu mɛn bɛ́ boe Arimatee kiwi, bɛ́ woo Yezu gere nyankɔ Pilati lon. (Zozɛfu na á goã Yezu a kialandɛnaa goon lɛa, sɛnɛ, a na á goã n duri, a giala, a na á goã nyɛ́ɛ biɛ Zuifun lɛn manɛ). Pilati lɛ kɔ, Zozɛfu tɔ́n daa Yezu gere bɔ á woo ne.

³⁹ Nikodɛmu mɛn bɛ́ á goã á woo Yezu li tèlò basa li, bɛ dɔ́ daa ka nyɔɔ gìĩ kɔɔ̃n kɔ́n nɛ, ǹ nə́ bíi *miíri, lɔloɛ-n kɔn ka nyɔɔ gìĩ kɔɔ̃n-a kɔ́n nɛ, ǹ nə́ bíi "aloɛsi"; á kilo pɔsɔɔ boe.

⁴⁰A kɔnpɛ ka Zuifun gere bĩ ǹ gɔn nɛ, ǹ nə́ Yezu gere lɛ saa, ǹ nə́ mɔnaa gɔnɔn pɛpɛnɛ a ganaa, bɛ̀ ǹ tá nyɔɔ gìĩ kɔɔ̃n kiɛ a ganaa.

⁴¹Ǹ Yezu dere gɔn ganaa bǎã mɛn nɛ, dù gɔrɔ goã walan, gere bĩ ǹ yala diidii goã a nɛ, ǹ nə́ ǹ tɔn min kɔ́n bĩ a-n duduu wa.

⁴²Bɛa pinaa lɛ a lɛawaa bɛ́ re n biɛ Zuifun susu ǹ pii lɛa, yala lɛ dɔ bɛ́ kunu bɛa bǎã lɛ ganaa, bɛ lɛ nɛ, ǹ nə́ Yezu gere da walan.