Read Samo, Southern Zaã 20 Bible Online

Zaã 20 - Samo, Southern bible

Zaã 20

¹Dimaasi pinaa, baayɛlɛ yiisoo ne, bɛ̀ wɔlɔ bɛ́ tɔn tì, Magadalaan Mariya woo yala lɛ lɛ-a, á woo yaa bɛ̀ yala lɛ lɛ bɛ́ tiɛ̃-n ka kɔlɔ mɛn nɛ, bɛ nə́ n bɔ á n bɔ lɛ.

²Á baa si á dɔ Simɔn Piɛrɛ li kun ka kialandɛnaa goon kɛ lɛ nɛ Yezu goã ǹ mɛn lɛ narɛ, á pɛ ǹ nɛ: «Ǹ nə́ Dɛnaa gere lɛ bɔ ǹ nə́ bɔ yala lɛ nɛ, ǹ da bǎã mɛn nɛ, wɔ ba doɛ̃ wa.»

³Piɛrɛ laanka ǹ miã kialandɛnaa goon kɛ lɛ soo, ǹ nə́ woo yala lɛ lɛ-a.

⁴Ǹ dinin min paa goã baa sii kun, sɛnɛ, kialandɛnaa goon kɛ lɛ baa si fufuu á Piɛrɛ daa, á dɔ yala lɛ lɛ-a bibinaa nɛ.

⁵Á n zuməə á mɔnaa gɔnɔn lɛn yɛ tán. Sɛnɛ, a wɔ wa.

⁶Simɔn Piɛrɛ mɛn bɛ́ a kio, bɛ́ daa á dɔ, á wɔ yala lɛ nɛ, á mɔnaa gɔnɔn lɛn yɛ tán,

⁷mɔnaa mɛn dɔ nə n pɛnɛ a mìi ganaa, á bɛ dɔ yɛ; bɛa mɔnaa lɛ nə n da kun ka mɔnaa gɔnɔn lɛn nɛ wa, sɛnɛ, a na á goã muni ni a gɔrɔn tán bǎã kɔsɔ nɛ.

⁸Bɛ kio, kialandɛnaa goon kɛ lɛ á dɔ bibinaa nɛ, a dɔ́ tɔ́n wɔ yala lɛ nɛ. Á yɛ, á golee li.

⁹Bɛ á zɛnɛɛ, Lawa a boo mɛn bɛ́ pii mà Yezu yii doamaa nɛ a kaa a n bɔ geren bii, bɛ̀ ǹ tɔn bɛ giala ma bɔrɔ wa.

¹⁰Bɛ kio, kialandɛnan lɛn nə́ wusoo ǹ nə́ woo piɛ.

¹¹Mariya na á goã golee-n kanaa yala lɛ lɛ-a, á goã wuu pii. Á n toa wuu pii á n zuməə á n yii kɔ yala lɛ nɛ.

¹²Á lon a dia dí-a wole min paa yɛ, ka mɔnaa fufun ni ǹ ganaa. Ǹ Yezu gere da bǎã mɛn lɛ din ni, ǹ nə́ giã-n tán walan, goon ná a mìi dia ǹ bǎã nɛ, goon ná a gòãn dia ǹ bǎã nɛ.

¹³Ǹ nə́ tɔ́n nɔ̀n da la: «Lɔ lɛɛ, wàa na á baa n tá wuu pii?» Á ǹ lɛ si: «Maǹ nə́ maa Dɛnaa bɔ, ǹ da bǎã mɛn nɛ, ma a doɛ̃ wa.»

¹⁴Á n toa boo diɛ, á n kio bɔyaa á Yezu yɛ golee-n walan, sɛnɛ, a dɔ̃ mà a din ni wa.

¹⁵Yezu tɔ́n pɛ nɛ: «Lɔ lɛɛ, wàa na á baa n tá wuu pii? Ma n giɛ die li?» Sɛnɛ, asɛ n taasɛ mà dù gɔrɔ-lɛduə̃li n boo diɛ ka asɛ nɛ. Bɛ lɛ nɛ á pɛ nɛ: «Bɛ̀ n din ni n bɔ, n da bǎã mɛn nɛ, a bǎã pɛ masɛ nɛ, ma á die woe siɛ.»

¹⁶Yezu pɛ nɛ: «Mariya!» Á n bɔyaa á pɛ nɛ ka *Ebrəə bɔlɔ nɛ mà Raboni, bɛ giala mà Mìinaa.

¹⁷Yezu tɔ́n pɛ nɛ: «N baran n gɔn paraa masɛ ganaa wa! A giala, ma bie zii la woe maa Díi li bɔrɔ wa. Sɛnɛ, wo pɛ ma dɔɔ̃nɔn manɛ mà ma á re dii ma wo maa Díi li kəni, ǹ mɛn lɛ bɛ́ ka dɔn Díi lɛa, ma á re woe Lawa li kəni, ǹ mɛn lɛ bɛ́ ka dɔn Lawa lɛa.»

¹⁸Magadalaan Mariya daa pɛ kialandɛnan lɛn manɛ mà asɛ Dɛnaa yɛ! Dɛnaa boon mɛnɛn pɛ nɛ, á bɛn lɛn pɛ ǹ nɛ.

¹⁹A din dimaasi pinaa lɛ a wasamiɛnɛ, kialandɛnan lɛn nə́ goã kion kɔ́n nɛ, ǹ nə́ kiɛnlɛ sɔɔ ǹ dinin lɛ, a giala, maǹ nə́ goã nyɛ́ɛ biɛ Zuifun pàãdɛnan lɛn manɛ. Yezu daa á golee ǹ bii, á pɛ ǹ nɛ: «Là nyantoro die a giã ka li.»

²⁰Ǹ bɛ́ boo diɛ á n gɔnɔn lɛn laanka a kolo lɛ nyaa ǹ nɛ. Kialandɛnan lɛn bɛ́ ǹ nə́ Dɛnaa yɛ, ǹ nə́ n nyɛnyɛɛ parsiini.

²¹Bɛ kio, Yezu wusoo á pɛ ǹ nɛ doo: «Là nyantoro die a giã ka li. Maa Díi Lawa bɛ́ á masɛ dia lɔn ke, masɛ dɔ n ka diɛ miɛ̃.»

²²Bɛa boon lɛn diɛ kio, á piɛ̃ pɛ ǹ ganaa á pɛ ǹ nɛ: «Ka Lawa a Yiri Fu si.

²³ Bɛ̀ ka min mɛnɛn sii baraan toa ǹ nɛ, Lawa á re bɛa dɛnan sii baraan toɛ ǹ nɛ. Bɛ̀ ka n piã ka min mɛnɛn wɔn toa ǹ nɛ wa, Lawa a re bɛa dɛnan sii baraan toɛ ǹ nɛ wa.»

²⁴Sɛnɛ, Yezu bɛ́ die ǹ mɛn waáraa, bɛ̀ Toomaa banban. A kialandɛnaa fulupaa lɛ goon ne ka bɛ nɛ, ǹ nə́ bíi: "Bɛlɛman", ǹ dinin bɔlɔ nɛ mà "Diidiimu".

²⁵Kialandɛnaa gialakunun lɛn nə́ tɔ́n pɛ nɛ: «Wɔsɛn nə́ Dɛnaa yɛ!» Sɛnɛ, Toomaa mà ǹ ganaa: «Bɛ̀ masɛ kiɛ lɛn kɛn yɛ a gɔn tìsì-n wa, bɛ̀ man gòon wɔ kiɛ lɛn kɛn nɛ wa, bɛ̀ man gɔn wɔ a kolo kɛ dɔ nɛ wa, ma a wɛɛ la wa!»

²⁶Piizii goon bɛ kio, kialandɛnan lɛn nə́ goã soe-n kɔn kion lɛ-n doo, Toomaa dɔ́ goã kunun ǹ ni. Kiɛnlɛn lɛn tumaa sɔɔmaa nɛ, sɛnɛ, Yezu daa á golee ǹ bii, á pɛ ǹ nɛ: «Là nyantoro die a giã ka li.»

²⁷Bɛ kio, á tɔ́n pɛ Toomaa nɛ: «N gòon wɔ kànaa n ga ma gɔnɔn lɛn ganaa, n gɔn wɔ ma kolo lɛ dɔ nɛ n ga a ganaa. Goleemalibaã kɛ lɛ da, n goleemali wɔ!»

²⁸Toomaa tɔ́n pɛ nɛ: «Maa Dɛnaa! Maa Lawa!»

²⁹Yezu tɔ́n pɛ nɛ: «N bɛ́ ń masɛ yɛ, bɛ lɛ bie ń tɔn waa la wa? Min mɛnɛn bɛ́ wɛɛ masɛ la, ǹ nə́ ǹ masɛ yɛ dɔn bɔrɔ wa, barka á re n diɛ bɛa dɛnan ganaa.»

³⁰Yezu kaãbaa ǹ sii gigiã kɔsɔn zɛnaa a kialandɛnan lɛn yɔrɔ-a, ǹ mɛnɛn boo bɛ́ a kiɛ̃-n sɛ́wɔ kɛ-n wa.

³¹Sɛnɛ, ǹ mɛnɛn boo bɛ́ a nɛ, bɛn man nə́ n kiɛ̃ màn mɛn bɛ́ toɛ, ka waa la mà Yezu n Minin Nyin-sili lɛa, Lawa a Nɛgiĩ ni, ka bɛ dɔ nɛ, bɛ̀ ká waa la, ka yiikonaabaa taãn yɛ ka a din tɔ nɛ.