Read Samo, Southern Zaã 21 Bible Online

Zaã 21 - Samo, Southern bible

Zaã 21

¹Lɛawaa dan kɔ́n bɛ kio, Yezu nə́ n din nyaa kialandɛnan lɛn manɛ Tiberiadi tà lɛkoro-a. A n din nyaa ǹ nɛ lɔn, á ke:

²Simɔn Piɛrɛ nɛ, ka Toomaa nɛ, ǹ bɛ́ ǹ mɛn bíi "Bɛlɛman", ka Natanayeli mɛn bɛ́ boe Kaanaa kiwi Galilee gána nɛ, ka Zebedee a nɛgiĩn ni, ka kialandɛnaa min paa kɔsɔ dɔ nɛ, bɛn man nə́ goã kun.

³ Simɔn Piɛrɛ tɔ́n pɛ ǹ nɛ mà asɛ n woe zɔ̀ kuĩ. Ǹ nə́ pɛ nɛ mà ǹsɛn tá woe kun ni. Ǹ nə́ soo ǹ nə́ wɔ tà kuru ǹ goo ne, sɛnɛ, bɛa tèlò kɛ lɛ nɛ, ǹ màn kɔ́n kũ wa.

⁴Wɔlɔ bɛ́ fúli, Yezu daa á golee tà lɛkoro-a, sɛnɛ, a kialandɛnan lɛn nə dɔ̃ mà a din ni wa.

⁵Á n toa ǹ ganaa: «E, maa minin lɛn, ka zɔ̀ kɔ́n kũ wa ya?» Ǹ ná a lɛ si mà haayii.

⁶ Á tɔ́n pɛ ǹ nɛ: «Ka zɔ̀ɔ lɛ zũ goo lɛ a gusin gialaa, ka á re zɔ̀ yii.» Ǹ nə́ zũ, á zɔ̀ gigiã kũ, yǎa ǹ dinin ba boe la ǹ nə́ baɛ̃ die-n kanaa doo wa.

⁷Yezu bɛ́ kialandɛnaa mɛn lɛ narɛ, bɛ́ tɔ́n pɛ Piɛrɛ nɛ: «Dɛnaa nɛ!» Piɛrɛ bɛ́ á ma lɔn mà Dɛnaa nɛ, mɔnaa sasa mɛn goã a ganaa, á bɛ saa á wɔ, a ná a lɛ goa á kaa a bɔsɔn, (a giala, a na á goã á bɛa mɔnaa lɛ bɔ), bɛ kio, á n yii sã mu li.

⁸Kialandɛnaa gialakunun lɛn nə́ n bɔyaa ka goo lɛ nɛ. Zɔ̀ɔ lɛ piɛ̃maa nɛ á goã ka zɔ̀ nɛ, ǹ nə n toɛ die bɛ̀ ǹ tá baɛ̃. Ǹ wɔlɔ goã sɔsɔɔ tà lɛ lɛkoro-a miɛ̃ wa, a kiɛ̃ mɛtərə paabiɛ kɛ miã la wa.

⁹Ǹ bɛ́ ǹ nə́ soo ǹ nə́ n bɔ mu lɛ li, ǹ nə́ tɛ nàn kɔ́n yɛ tán, zɔ̀ n la, ka buuru ni.

¹⁰Yezu tɔ́n pɛ ǹ nɛ: «Ka zɔ̀ mɛn kũ sisia lɛn, ka da ka ǹ kɔ́n nɛ.»

¹¹Simɔn Piɛrɛ wusoo á wɔ goo lɛ nɛ, á zɔ̀ɔ lɛ baã á soo-n kanaa nɛ, a piɛ̃maa nɛ á goã ka zɔ̀ dadara paabiɛ ka posoorowensɔɔ (153) nɛ. Sɛnɛ, a laanɛ zɔ̀ lɛ mɔnaa á la yii ni, zɔ̀ɔ lɛ na wa.

¹²Yezu tɔ́n pɛ ǹ nɛ mà ǹ da màn bii. Kialandɛnaa lɛ kɔ́n yii goã we á nɔ̀n diɛ la yiiwee: «Die n ka nsɛ nɛ» wa, a giala, ǹ nə́ goã doɛ̃ taãn-taãnɛ mà Dɛnaa din ni.

¹³Yezu tɔ́n daa, á buuru lɛ saa á kɔ ǹ la, á zɔ̀ lɛ dɔ saa á kɔ ǹ la.

¹⁴Yezu yii kaa á n bɔ geren bii lɔn, a gunyin sɔɔbaa ǹ wɔ-n ka bɛ nɛ n din nyɛɛ a kialandɛnan manɛ.

¹⁵Ǹ bɛ́ ǹ nə́ màn bii ǹ nə́ nya, Yezu pɛ Piɛrɛ nɛ: «Zaã a nɛgiĩ Simɔn, n tá masɛ narɛ á la kɛn manɛ?» A ná a lɛ si: «Hiĩ, Dɛnaa, n din tá doɛ̃ mà ma tá n narɛ.» Yezu tɔ́n pɛ nɛ: «Ga maa sère nɛn lɛn walan.»

¹⁶Gunyin paabaa ǹ wɔ Yezu wusoo á pɛ-n doo: «Zaã a nɛgiĩ Simɔn, n tá masɛ narɛ?» A ná a lɛ si: «Hiĩ, n din tá doɛ̃ mà ma tá n narɛ.» Yezu tɔ́n pɛ nɛ: «Ga masɛ a sèren lɛn walan.»

¹⁷A sɔɔbaa ǹ wɔ, á wusoo á pɛ nɛ doo: «Zaã a nɛgiĩ Simɔn, n tá masɛ narɛ?» Yezu a wusoo á pɛ Piɛrɛ nɛ kɛ lɛ a gunyin sɔɔbaa ǹ wɔ mà a tá asɛ narɛ ya, bɛ́ Piɛrɛ yɔrɔ kɔsɛ. Á tɔ́n pɛ Yezu ni: «Dɛnaa, n tá sii din tumaa doɛ̃, n tá doɛ̃ mà masɛ tá n narɛ!» Yezu tɔ́n pɛ nɛ: «Ga masɛ a sèren lɛn walan.

¹⁸Man taãn pii n ni: N bɛ́ nɛnyaan lɛa ǹ mɛn waáraa, n din ni n maabɛlɛ yii, bǎã mɛn bɛ́ kɔɔ̃nɛ n ganaa n soo bɛ̀ n wo walan. Sɛnɛ, bɛ̀ n zizi kɔ ǹ mɛn waáraa, n tá re n gɔnɔn goɛ lon, min kɔsɔ n die yii, n bɛ́ n ba li n wo bǎã mɛn nɛ wa, a n kũ a wo n ne walan.»

¹⁹(Piɛrɛ bɛ́ re gɛ̀ mɛn tɔrɔ we a Lawa guguru kɔ nɛ, Yezu na á bɛa boo lɛ da á bɛ lɛ nyaa nɛ.) Bɛ lɛ a diɛ kio, Yezu wusoo á pɛ nɛ: «Kɔ masɛ kio lɛ.»

²⁰ Piɛrɛ bɛ́ á n yɔrɔ bɔyaa, Yezu bɛ́ kialandɛnaa mɛn lɛ narɛ, á bɛ yɛ a kio. (A din lɛ na á n para kanaa màn bii biikoo li á nɔ̀n da Yezu la kɛnɛn: «Dɛnaa, min mɛn bɛ́ re n koe n zɔ́ɔn la die-n dɔn?»)

²¹Piɛrɛ bɛ́ á yɛ, á tɔ́n pɛ Yezu ni: «Dɛnaa, kɛ dɔ, wàa mɛn sii n die bɛ yii?»

²²Yezu tɔ́n na a lɛ si: «Bɛ̀ masɛ tá li mà a goã a yii n koo yǎa masɛ wusii die, n wàa mɛn sii na a nɛ? Yǎa nsɛ kɔ ma kio lɛ!»

²³Minin man nə́ n bibiə̃ ka bɛa boo lɛ nɛ dɔɔ̃nɔn lɛn bii mà bɛa kialandɛnaa lɛ a die giɛ̃ wa. A da yaa Yezu bie á pɛ nɛ, mà a re giɛ̃ wa. A màn mɛn pɛ bɛ á ke: Bɛ̀ ma tá li a goã a yii n koo yǎa ma wusii die, n wàa mɛn sii na a nɛ?

²⁴A din kialandɛnaa lɛ n bɛa boon lɛn diɛ, a din dɔ na á ǹ kiɛ̃. Wɔ á doɛ̃ dɔn wáa a bɛ́ boo mɛn diɛ sonbore ne.

²⁵Yezu sii gigiã kɔsɔn dɔn zɛnaa. Bɛ̀ a gogoonmaa tumaa na á n kiɛ̃, ǹ bɛ́ re n kiɛ̃ sɛ́wɔn mɛnɛn nɛ, ma á taasɛ ǹ ba boe la ǹ wɔ kanaa kɛ gɔ́ɔ̃-n wa.