Read Samo, Southern Zaã 6 Bible Online

Zaã 6 - Samo, Southern bible

Zaã 6

¹Bɛ kio, Yezu woo Galilee tà kio, a din ni ǹ tá bíi Tiberiadi tà.

²Zaman gigiã goã koe a kio lɛ, a giala, a goã kaãbaa ǹ siin mɛnɛn zɛnɛɛ busulən ganaa a nə́ ǹ kaka koe, minin nə́ bɛn yɛ.

³Yezu dii kele la á giã tán kun ka a kialandɛnan nɛ.

⁴Bɛ na á n zɛnaa Zuifun *kiɛ̃mala ǹ zɔ́n nyɛɛn boɛɛn nɛ.

⁵Yezu bɛ́ á n yii saa lon, á zaman gole yɛ die a li. Á tɔ́n pɛ Filipi ni mà ǹsɛn man die buuru pii maa, minin kɛn nə tɔn màn yɛ ǹ bii?

⁶(A na á pɛ miɛ̃ á n diɛ a gɔ́ɔ̃ li. A bɛ́ re sii mɛn zɛnɛɛ, a din tá bɛ doɛ̃.)

⁷Filipi tɔ́n pɛ nɛ: «Lɛawaa biɛ paa (200) a dí nya ǹ giɔ̀mɔ din ba boe la a dɔ buuru ganaa, min gogoonmaa na a lɛkoro boɛɛn yɛ wa.»

⁸A kialandɛnaa kɔsɔ mɛn tɔ bɛ́ Andre, Simɔn Piɛrɛ ǹ dɔɔ̃n lɛa, bɛ tɔ́n pɛ nɛ

⁹mà nɛginin goon tá kànaa, *ɔrzi buuru sooro tá a gɔn, ka zɔ̀ màn paa nɛ. Sɛnɛ, mà bɛ n wàa ǹ bǐɛ̃ koe bɛa min gigiã kɛ ganaa?

¹⁰Yezu tɔ́n pɛ: «Ka pɛ minin lɛn manɛ mà ǹ giã tán.» Buu gigiã goã bɛa bǎã lɛ nɛ. Ǹ nə́ giã tán walan. Ǹ nə́ dɔ giĩ duu sooro (5 000) kɛ miã, lɔn laanka nɛnyaanan nə́ ǹ ba a-n wa.

¹¹Yezu tɔ́n buurun lɛn goa, á barka da Lawa nɛ, á ǹ gii giã tán wolen lɛn manɛ. Bɛ kio, á zɛnaa miɛ̃ ka zɔ̀ lɛ dɔ nɛ. Ǹ bɛ́ giɛ li lɔn, á kɔ ǹ la miɛ̃.

¹²Ǹ bɛ́ ǹ nə́ kã ǹ mɛn waáraa, Yezu tɔ́n pɛ a kialandɛnan manɛ mà a lɛkoron mɛnɛn nə goã, mà ǹ goa ǹ sɔkɔn, màn mɛn bɛ́ toɛ, ǹ kɔ́n baran papaã wa.

¹³Ɔrzi buuru sooro lɛ lɛkoron mɛnɛn nə goã a sɔ̃lin lɛn lon, a kialandɛnan lɛn nə́ bɛn goa ǹ nə́ kankaan fulupaa pã nɛ.

¹⁴Minin bɛ́ ǹ nə́ bɛa kaãbaa ǹ sii kɛ lɛ yɛ á n zɛnaa, ǹ nə́ tɔ́n pɛ: «Lawa a boo gii-dali mɛn doamaa bɛ́ a da kanaa gɔ́ɔ̃ nɛ, a din lɛ n ka kɛ-n sonbore!»

¹⁵Sɛnɛ, Yezu bɛ́ á dɔ̃ mà ǹ tá re die asɛ kuĩ ka pàã nɛ, mà maǹ na asɛ biɛ kii lɛa, á kiɛ̃ á n bɔ ǹ li, á wusoo á woo kele lɛ la a dinsɔɔ̃.

¹⁶Wasa bɛ́ á mɛ, Yezu a kialandɛnan lɛn nə́ gisĩ ǹ nə́ woo yǎa tà lɛ-a.

¹⁷Ǹ nə́ wɔ tà kuru ǹ goo ne, ǹ nə́ mu kurii giala kɔ, ǹ nə́ n yɔrɔ dia Kafaranaamu kiwi la, mà maǹ woe tà kio. Wɔlɔ tii dɔn gɔrɔ, bɛ̀ Yezu din tɔn dɔ ǹ li wa.

¹⁸Piɛ̃ gole na á goã boe, tà mu lɛ goã bìn diɛ.

¹⁹Ǹ nə́ mu kuru ǹ nə́ lui kilo sii hinlaa sooro kɛ miã, bɛ̀ ǹ yii bɛ́ Yezu ganaa tɔ we mu la die goo lɛ ganaa. Nyɛ́ɛ nə́ ǹ kũ.

²⁰Sɛnɛ, Yezu pɛ ǹ nɛ: «Ma din ni, ka baran nyɛ́ɛ baa wa!»

²¹A na á goã ǹ gɔ́ɔ̃ nɛ mà ǹ Yezu saa ka goo lɛ nɛ, sɛnɛ, boɛɛn gɔrɔ, ǹ bɛ́ woe bǎã mɛn nɛ, goo lɛ dɔ tán ganaa walan.

²²A lɛawaa, zaman mɛn nə goã gole-n tà kio, bɛn yiri goã a nɛ, mà mu kuru ǹ goo goon dinsɔɔ̃ na á goã bǎã lɛ nɛ. Ǹ nə́ dɔ̃ mà Yezu da kun ka a kialandɛnan nɛ goo lɛ gɔ́ɔ̃-n wa, bɛn man nə́ woo ǹ dininsɔɔ̃nɔn.

²³Sɛnɛ, mu kuru ǹ goo kɔsɔn nə́ n toa Tiberiadi kiwi, Dɛnaa Yezu barka da buuru ganaa á kɔ ǹ la ǹ nə́ sɔ̃ bǎã mɛn nɛ ke lɛ-n, ǹ nə́ daa ǹ nə́ diri bɛ la.

²⁴Zaman lɛ bɛ́ á yɛ mà Yezu ba walan wa, a kialandɛnan dɔn banban, ǹ nə́ wɔ bɛa goon lɛn nɛ, ǹ nə́ woo Kafaranaamu kiwi, mà maǹ woe giɛ Yezu li.

²⁵Ǹ bɛ́ ǹ nə́ yɛ tà kio, ǹ nə́ tɔ́n pɛ nɛ: «Mìinaa, ma nə́ n dɔ kànaa biĩ?»

²⁶Yezu tɔ́n pɛ ǹ nɛ: «Man taãn pii ka nɛ, ka bɛ́ ka buuru sɔ̃ ka kã, bɛ lɛ na á toa, ka tá giɛ masɛ li, a bie ka ka n ka kaãbaa ǹ siin kɛn giala ma wa.

²⁷Màn-bii mɛn bɛ́ ziziɛ̃, ka baran dí nya bɛa lɛa wa, sɛnɛ, màn-bii mɛn bɛ́ beleboe, a n nyin nyabaã koe, ka dí nya bɛa lɛa. Bɛa màn-bii kɛ lɛ, Min a Nɛgiĩ n koe, a giala, Díi Lawa din na á boo sii la ǹ pàã kɔ la.»

²⁸Ǹ nə́ tɔ́n pɛ nɛ: «Wɔ doamaa nɛ wɔ wàa mɛn zɛnaa, bɛ n Lawa foo sii dí lɛa kəni?»

²⁹Yezu tɔ́n pɛ ǹ nɛ: «Lawa foo sii dí n ka kɛ nɛ, a min mɛn lɛ dia, ka golee bɛ lɛ li.»

³⁰Ǹ nə́ Yezu lɛ si ǹ nə́ pɛ nɛ: — Sɛnɛ, ma n boe la n wàa kaãbaa ǹ sii zɛnaa n nyaa wɔ-n kəni wɔ tɔn golee n li? Wàa ǹ dí ni n tá nyɛɛ?

³¹ Wɔ digolon nə́ màn kɔ́n bii don a tɔ n *maánə, ka á bɛ́ kiɛ̃-n Lawa a boo n kɛnɛn lɔn: «Á buuru kɔ́n kɔ ǹ la ǹ nə́ sɔ̃, bɛa buuru lɛ n boe lon.»

³²Yezu tɔ́n pɛ ǹ nɛ: «Man taãn pii ka nɛ, Muizu bie á lon a buuru lɛ kɔ ka la wa, sɛnɛ, masɛ a Díi n lon a buuru taãn koe ka la.

³³A giala, màn mɛn bɛ́ á bɔ lon á daa yiikoonaabaa kɔ kanaa minin la, Lawa a buuru lɛ n ka bɛ nɛ.»

³⁴Ǹ nə́ tɔ́n pɛ Yezu ni: «Dɛnaa, bǐɛ̃ kɔ n bɛa buuru kɛ lɛ kɔ wɔsɛn la baraabaraa!»

³⁵Yezu mà ǹ ganaa: «Masɛ din nə yiikoonaabaa kɔ ǹ buuru lɛa. Bɛ̀ min mɛn daa masɛ li, bòo ba re bɛa dɛnaa kuĩ duduu wa, bɛ̀ min mɛn golee masɛ li, mu boro a re bɛa dɛnaa kuĩ doo duduu wa.

³⁶Sɛnɛ, ma bɛ́ má pɛ ka nɛ, ka yii bɛ́ á masɛ yɛ, bɛ din tumaa kio, ka bɛ́ ka a golee ma li wa.

³⁷Maa Díi bɛ́ min mɛn tumaa koe masɛ la, bɛn tá re die ma li, bɛ̀ min mɛn dɔ daa ma li, ma a re bɛ kɔ́n lui wa.

³⁸A giala, ma bie má n toa lon má gisĩ ma din foo sii zɛnaa a lɛa wa, min mɛn bɛ́ á ma dia, man má daa bɛ lɛ foo sii zɛnaa.

³⁹A foo sii lɛ n ka kɛ nɛ: A min mɛnɛn kɔ masɛ la, ma nyan toa bɛn goon papaã wa, sɛnɛ, ma ǹ yii kaa kanaa a nya pinaa.

⁴⁰Maa Díi foo sii lɛ n ke sonbore: Bɛ̀ min mɛn ná a Nɛgiĩ yɛ, yǎa a golee li, bɛa dɛnaa nyin nyabaã yɛ. Masɛ dɔ n die bɛa dɛnaa yii kiɛ kanaa a nya pinaa.»

⁴¹A kũ bɛ lɛ ganaa, Zuifun nə́ mɛ la ǹ nə́ boo zùzùũ da Yezu wɔ a paǹ li, a giala a na á pɛ mà asɛ n buuru lɛa, màn mɛn nə́ n toa lon á gisĩ tán.

⁴²Ǹ nə́ goã pii kɛnɛn: «Zozɛfu a nɛgiĩ Yezu kɛ lɛ bie wa ya? Wɔ ba ǹ di laanka ǹ dan doɛ̃ wa? A n siɛ lɔn á pii kanna mà asɛ na á n toa lon á gisĩ tán?»

⁴³Yezu tɔ́n wusoo á n lɛ da boo lɛ nɛ á pɛ ǹ nɛ: — Ka boo zùzùũ pɛ kɔn nɛ kɛ lɛ da!

⁴⁴Min kɔ́n ba boe la a da masɛ li a din ganaa wa, maa Díi mɛn ma dia, yǎa bɛ lɛ diɛ zii. Ma dɔ á re bɛa dɛnaa yii kiɛ kanaa a nya pinaa.

⁴⁵ A tá kiɛ̃-n Lawa a boo gii-dalin sɛ́wɔ nɛ mà Lawa á die min tumaa doree. Min woo min á masɛ a Díi a da ǹ boo ma, a ná a doroo si, bɛa dɛnaa n die masɛ li.

⁴⁶A bie ka min na á masɛ a Díi yɛ ka a yii-n wa. Min mɛn bɛ́ á bɔ a li á daa, bɛ lɛ dinsɔɔ̃ ná á yɛ.

⁴⁷Masɛ n taãn pii ka nɛ, bɛ̀ min mɛn golee masɛ li, nyin nyabaã n bɛa dɛnaa wɔ lɛa.

⁴⁸Man yiikoonaabaa kɔ ǹ buuru lɛa.

⁴⁹Ka digolon nə́ maánə sɔ̃ don, sɛnɛ, ǹ nə́ gã.

⁵⁰Buuru mɛn bɛ́ n toɛ lon gisĩ tán, bɛ n buuru lɛa, bɛ̀ min mɛn bɛ sɔ̃, ǹ dɛnaa a giɛ̃ wa.

⁵¹Masɛ n yiikoonaabaa kɔ ǹ buuru lɛa, á n toa lon á gisĩ tán. Min mɛn bɛ́ re bɛa buuru lɛ soɛ̃, bɛa dɛnaa n goɛ̃ a yii n koo yǎa duduu. Buuru mɛn dɔ bɛ́ masɛ á re koe, masɛ din gɔ̀nɔn siĩ ni, á n kɔ, màn mɛn bɛ́ toɛ, kanaa minin nə yiikoonaabaa yɛ.

⁵²Bɛa boo lɛ taman yii, Zuifun nə́ bɔ ǹ nə́ mɛ la ǹ nə́ liere bibiɛ kɔ kɔn bii n ni, ǹ nə́ goã nɔ̀n didiɛ kɔn la mà bɛa giĩ kɛ nə n gɔ̀nɔn siĩ koe ǹsɛn la lɔn ǹsɛn nə sɔ̃?

⁵³Yezu tɔ́n pɛ ǹ nɛ: «Man taãn pii ka nɛ: Bɛ̀ ka bie ka Min a Nɛgiĩ siĩ sɔ̃, ka a mà mi wa, ka a re yiikoonaabaa yii wa.

⁵⁴Bɛ̀ min mɛn masɛ siĩ sɔ̃, á ma mà mi, nyin nyabaã n bɛa dɛnaa wɔ lɛa, ma á die bɛa dɛnaa yii kiɛ kanaa a nya pinaa.

⁵⁵A giala, masɛ gɔ̀nɔn siĩ lɛ n màn-bii taãn lɛa, ma mà lɛ n mi ǹ màn taãn lɛa.

⁵⁶Bɛ̀ min mɛn masɛ gɔ̀nɔn siĩ sɔ̃, á ma mà mi, man goɛ̃ kun ka bɛa dɛnaa nɛ, bɛa dɛnaa dɔ n goɛ̃ kun ka masɛ nɛ.

⁵⁷Maa Díi mɛn n ma dia, a din lɛ n yiikoonaabaa koe, ma yii n koo ka bɛ lɛ barka nɛ, bɛ̀ min mɛn n masɛ sɔ̃, bɛa dɛnaa dɔ yii n goɛ̃ koo miɛ̃ ka masɛ barka nɛ.

⁵⁸Buuru mɛn lɛ bɔ lon á daa, a din lɛ n ke. Bɛ̀ min mɛn bɛa buuru lɛ sɔ̃, bɛa dɛnaa yii á die goɛ̃ koo yǎa duduu. Ka digolon nə́ buuru tɔrɔ kɔ́n sɔ̃ lɛlɛ, sɛnɛ, ǹ nə́ gã. A laanka bɛa goon wa.»

⁵⁹Yezu doroon mɛnɛn kɔ minin la lɛsɔkɔn kion Kafaranaamu kiwi, bɛn lɛn man ka kɛn nɛ.

⁶⁰Yezu a kialandɛnaa gigiã ná a boo lɛ ma, bɛ kio, ǹ ná a giala kɔ ǹ nə́ goã pii mà bɛa boo kɛ á kaka dɛ! Mà die n boe la a lɛ kɔ kɛ ganaa?

⁶¹Sɛnɛ, Yezu bɛ́ á dɔ̃ a din ganaa, mà a kialandɛnan man boo zùzùũ diɛ bɛ lɛ wɔ gɔn la, á pɛ ǹ nɛ mà bɛ nə ǹ mìi ziziɛ̃ ǹ giala lɛa?

⁶²Bɛ̀ ka Min a Nɛgiĩ yɛ dii a lɛlɛ a giã ǹ bǎã-n dɔn, ka tɔn nə n baa lɔn?

⁶³Lawa a Yiri Fu n yiikoonaabaa koe; minbuiin nɛ a boe la a sii kɔ́n bǐɛ̃ kɔ bɛ gɔ́ɔ̃-n wa. Ma boon mɛnɛn pɛ ka nɛ, maǹ boe Lawa a Yiri Fu ni, bɛa boon lɛn man yiikoonaabaa koe.

⁶⁴Sɛnɛ, minin tɛnɛn tá ka bii ǹ ba golee li wa. (Min mɛnɛn bɛ́ ǹ goã golee Yezu li wa, á bɛa dɛnan dɔ̃ a giala kɔ waáraa gɔrɔ; min mɛn dɔ bɛ́ re koe a zɔ́ɔn la, á bɛ dɔ a dɛnaa dɔ̃.)

⁶⁵Á tɔ́n wusoo á pɛ: «Bɛ lɛ na á toa má pɛ ka-n lɛn, máa min kɔ́n ba boe la a da masɛ li, bɛ̀ maa Díi na a pàã kɔ ǹ dɛnaa la wa.»

⁶⁶A kũ bɛ lɛ ganaa, a kialandɛnaa gigiã nə́ n na ǹ nə́ n bɔ a ganaa, ǹ ná a kɔmalɛ lɛ da.

⁶⁷Yezu tɔ́n pɛ dia dí-a wole fulupaa lɛ nɛ: «Kasɛn dɔn, ka a li ka woo wa ya?»

⁶⁸ Simɔn Piɛrɛ tɔ́n a lɛ si: «Dɛnaa, wɔsɛn man die woe die li? Nyin nyabaã kɔ ǹ boon lɛn man nə n din gɔn.

⁶⁹Wɔsɛn nə́ golee li, wɔ́ dɔ̃ dɔn, wáa Lawa din a dia dí-a wole sonbore nə n ne.»

⁷⁰Yezu tɔ́n pɛ ǹ nɛ: «Ka dinin min fulupaa kɛ lɛ, ma din bie má ka yii gɔgɔɔ̃ wa? A laanka bɛ lɛ yii ni, kaa min goon nə *Sɛtaan minbuiin lɛa!»

⁷¹Kariyɔtin Simɔn a nɛ Zudaasi boo na á diɛ miɛ̃; a giala, a din lɛ n min fulupaa lɛ goon lɛa, die Yezu koe a zɔ́ɔn la.