Read Samo, Southern Zaã 7 Bible Online

Zaã 7 - Samo, Southern bible

Zaã 7

¹Bɛ kio, Yezu goã n bibiĩ Galilee gána nɛ. Bibiə̃ Zudee gána-n goã kɔɔ̃n a ganaa wa, a giala, Zuifun pàãdɛnan man nə́ goã giɛ li mà ǹ dɛ.

² Zuifun *giã siã giulun zɔ́n diri.

³Yezu ǹ dɔɔ̃nɔn nə́ tɔ́n pɛ nɛ: N ba boe la n goã kànaa wa. N ta Zudee gána nɛ, màn mɛn bɛ́ toɛ, n kialandɛnan lɛn dɔn nə boo la, ǹ nə n siin lɛn yɛ.

⁴Bɛ̀ n tá li minin nə n dɔ̃, n baran n zɛnaa ǹ sii duru wa. N bɛ́ ke bɛ miã siin kɛn zɛnɛɛ, a toa min tumaa nə n yɛ.

⁵Sonbore ne, Yezu ǹ dɔɔ̃nɔn lɛn dininmaan nə goã golee li wa.

⁶Yezu tɔ́n pɛ ǹ nɛ: «Maa biikoo tɔn dɔ wa; biikoo din tumaa bɛ́ n siĩni kasɛn gɔn.

⁷Kanaa minin ba boe la ǹ kasɛn baa zɔ́ɔ wa, sɛnɛ, masɛ, maǹ ma biɛ zɔ́ɔ, a giala, masɛ nə ǹ sɔ̀n pii, ǹ zɛnaa ǹ siin ba siĩn wa.

⁸Ka wo zɔ́n kɛ lɛ ganaa. Masɛ ba re woe bɔrɔ sɛn wa, a giala, masɛ a biikoo tɔn dɔ wa.»

⁹A na á bɛa boon lɛn da miɛ̃, á n zɔ̃ á goã Galilee.

¹⁰Sɛnɛ, Yezu ǹ dɔɔ̃nɔn lɛn bɛ́ ǹ nə́ woo zɔ́n lɛ-a, ǹ woo kio, Yezu dɔ́ yoo á zii saa á woo ka durii ni, a n din nyaa min ni wa.

¹¹Zuifun goledɛnan man nə́ goã giɛ li zɔ́n lɛ biikoo li, ǹ nə́ goã pii: «A n maa dinin koɛ?»

¹²Zaman lɛ bii, minin man nə́ goã kɔn liere koe parsiini a wɔ gɔn la. Ǹ tɛn na á goã pii mà min sonbore ne, ǹ tɛn dɔ mà Aba, mà a n minin yiri siɛ̃.

¹³Sɛnɛ, min kɔ́n yii goã we a n boo diɛ a wɔ gɔn la foaã wa, Zuifun goledɛnan lɛn lɛa.

¹⁴Zɔ́n lɛ din bɛ́ a dɔ, Yezu woo Lawa a kion, á bɔ á mɛ la a n minin darɛɛ.

¹⁵Bɛ kaãbaa da Zuifun lɛn ganaa, ǹ nə́ goã pii mà a n siɛ lɔn á bɛa siin kɛn doɛ̃ kɛnɛn, asɛ mɛn bɛ́ a n daraa min lon wa?

¹⁶Yezu tɔ́n pɛ ǹ nɛ: «Maa doɛ̃ kɛ lɛ bie boe masɛ din ni wa, min mɛn ma dia, bɛ lɛ na á kɔ ma la.

¹⁷Bɛ̀ min mɛn tá li a Lawa foo sii zɛnaa, bɛa dɛnaa á die doɛ̃ bɛ̀ maa doɛ̃ lɛ n boe Lawa li, hinlaa masɛ dinmaa li.

¹⁸Bɛ̀ min mɛn tá boo diɛ a din gɔn wìi a lɛa, bɛa dɛnaa n giɛ tɔ li. Sɛnɛ, min mɛn bɛ́ giɛ li mà a dia wole tɔ bɔ, bɛa dɛnaa n sonbore pii, gɔ́ɔ̃ tìbaa ba a lon wa.

¹⁹Táa Muizu na á Lawa a dí-pɛn lɛn kɔ ka dinin lɛn la? Sɛnɛ, ka kɔ́n bɛ́ ka a ǹ tamɛɛ wa. Ka n giɛ li dinin ka masɛ dɛ?»

²⁰Zaman lɛ tɔ́n pɛ nɛ: «Mànan manə n ganaa koɛ! Die n giɛ li a n dɛ?»

²¹Yezu wusoo á n lɛ da boo lɛ nɛ á pɛ ǹ nɛ: «Masɛ n má sii goon dinsɔɔ̃ zɛnaa ka yii-n kànaa, bɛ lɛ n ka tumaa la paparɛ.

²² Muizu na á nɛgininin kuru ǹ landa koa, mà ka ǹ kuru ǹ yɛ lɛawaa kiwisi. Ta a na á kɔnpɛ ka *susu ǹ pii pinaa nɛ, ka ǹ zɛnɛɛ. (A da yaa dinin Muizu bie á bɛa sii kɛ lɛ giala kɔ wa, ka dinin digolon manɛ.)

²³ Bɛ̀ ka tá boe la ka nɛginin kuru susu ǹ pii pinaa, màn mɛn bɛ́ toɛ, Muizu dí mɛn pɛ kurii wɔ gɔn la ka baran bɛ ziziɛ̃ wa, wàa na á baa ka foo á yui masɛ li, a giala, masɛ n má minbuiin nɛ tumu a busu nya má bɔ a ganaa susu ǹ pii pinaa?

²⁴Ka baran ga sii lanlan ganaa ka kiri kuru wa. Ka kiri pepere wɔ!»

²⁵Zeruzalɛmu minin kɔnɔn man nə́ goã pii: «Minin bɛ́ giɛ giĩ mɛn lɛ li mà ǹ dɛ, a din lɛ bie ke wa ya?

²⁶Á ke boo diɛ zaman yɔrɔ-a, ǹ ba boo kɔ́n dɔ diɛ-n wa! Wɔa goledɛnan lɛn dinin bie ǹ nə́ dɔ̃ taãnɛ mà a n Minin Nyin-sili lɛa sonbore wa le?

²⁷Kɛa giĩ ke, wɔsɛn tá a bɔ ǹ bǎã doɛ̃, sɛnɛ, bɛ̀ Minin Nyin-sili lɛ á die ǹ mɛn waáraa, min kɔ́n din ba re a bɔ ǹ bǎã doɛ̃ wa.»

²⁸Yezu bɛ́ minin darɛɛ Lawa a kion, á n lɛn saa lon á pɛ: «Táa ka tá masɛ doɛ̃! Táa ka tá maa bɔ ǹ bǎã doɛ̃! Masɛ bie má daa ma din li wa. Sɛnɛ, min mɛn masɛ dia, sonbore-pɛle ne, ǹ mɛn lɛ bɛ́ ka a doɛ̃ wa.

²⁹Sɛnɛ, masɛ á doɛ̃, a giala, man boe a din li, a din na á masɛ dia.»

³⁰Bɛ lɛ kio, ǹ nə́ ga Yezu kũ ǹ gɔn li. Sɛnɛ, min kɔ́n nə n gɔn da a ganaa wa, a giala, a biikoo tɔn dɔ wa.

³¹Zaman lɛ bii, min gigiã golee li, ǹ nə́ goã pii: «Bɛ̀ Minin Nyin-sili lɛ daa ǹ mɛn waáraa, Lawa nə n lɛ kɔ ka ǹ mɛn lɛ nɛ, a n die kaãbaa ǹ siin zɛnɛɛ a la giĩ kɛ wɔn manɛ?»

³²Minin bɛ́ ǹ nə́ goã boo zuzuũ mɛn diɛ Yezu wɔ gɔn la zaman lɛ bii, bɛ kaa *Fariziɛ̃n too ne. Bɛ lɛ nɛ, wúlu-bɔlen goledɛnan laanka Fariziɛ̃n nə́ garadin dia mà ǹ wo kũ.

³³Yezu tɔ́n pɛ: «Masɛ n kun ka nɛ biikoo boɛɛn gɔ́ɔ̃ nɛ, bɛ kio, min mɛn ma dia, ma á die wusii ma wo bɛ li.

³⁴Ka á re giɛ ma li, sɛnɛ, ka a re ma yii wa, a giala, masɛ bɛ́ bǎã mɛn nɛ, ka a boe la ka da walan wa.»

³⁵A kũ bɛ lɛ ganaa, Zuifun man nə́ goã pii kɔn nɛ, mà a n die woe maa kəni, ǹsɛn nə ǹ ba yii doo wa? Mà Zuifun mɛnɛn bɛ́ pɛsiɛ̃-n bǎã kɔsɔn nɛ, mà a n die woe n doe kun bɛn nɛ, a Lawa doɛ̃baã wolen kɛn daraa kəni?

³⁶Mà bɛa boo ke á da, mà a giala n ka wàa nɛ: «Ka á re giɛ ma li, sɛnɛ, ka a re ma yii wa, masɛ bɛ́ bǎã mɛn nɛ dɔn, kasɛn ba boe la ka da walan wa?»

³⁷ Zɔ́n lɛ a nya pinaa, a din pinaa lɛ dɔ n zɔ́n lɛ a kɔɔ̃nbaa pinaa lɛa, Yezu yoo á golee lon á pɛ ka lɛn gole-n kɛnɛn: «Bɛ̀ mu boro tá min mɛn ganaa, ǹ dɛnaa da masɛ li a mu mi.

³⁸ Bɛ̀ min mɛn golee masɛ li, yiikoonaabaa kɔ ǹ mu á die bɛa dɛnaa foo basɛ̃, min kɔsɔ dɔ wɔ bǐɛ̃ kɔ a gɔ́ɔ̃ nɛ, ka mu bɛ́ n toɛ tà nɛ, a baa si a wo bǎã kɔsɔ dɔ bǐɛ̃ kɔ lɔn. Lawa a boo na á pɛ miɛ̃.»

³⁹(Yezu na á pɛ miɛ̃, á goã boo diɛ Lawa a Yiri Fu wɔ gɔn la, a goleemali wolen bɛ́ re ǹ mɛn yii. Sonbore, bɛa biikoo li, bɛ̀ Lawa a Yiri Fu tɔn nə n kɔ ǹ la wa, a giala, bɛ á zɛnɛɛ, bɛ̀ Lawa tɔn gugurubaa kɔ Yezu la bɔrɔ wa.)

⁴⁰Min mɛnɛn nə n too kɔ bɛa boon lɛn ganaa zaman lɛ bii, ǹ tɛn na á goã pii mà sonbore pɛ á soɛ, mà Lawa a boo gii-dali mɛn bɛ́ ǹsɛn tá n yii diɛ la, mà a din nə ke!

⁴¹Ǹ tɛn dɔ na á goã pii mà Minin Nyin-sili lɛ kaa, mà a din nə ke! Sɛnɛ, ǹ gialakunun dɔn man nə́ goã pii mà Minin Nyin-sili lɛ á boe la a bɔ Galilee gána nɛ?

⁴² Mà Lawa a boo bie pii mà a n die kii Davida tɔrɔ biɛ, a yɛ Davida a kiwi Bɛtlehɛmu, wa ya?

⁴³Zaman lɛ na á n tala kɔn miɛ̃ Yezu taman yii.

⁴⁴Ǹ tɛnɛn man nə́ baa re kuĩ, sɛnɛ, min kɔ́n nə n gɔn da a ganaa wa.

⁴⁵Garadin lɛn nə́ wusoo ǹ nə́ woo dɔ wúlu-bɔlen goledɛnan lɛn laanka Fariziɛ̃n lɛn li. Bɛn nə́ tɔ́n nɔ̀n da ǹ la mà wàa na á baa ǹ da ka Yezu lɛ-n wa?

⁴⁶Garadin lɛn nə́ tɔ́n pɛ mà min kɔ́n din bin boo da ka giĩ kɛ bɛ lɔn wa!

⁴⁷Fariziɛ̃n lɛn nə́ tɔ́n pɛ ǹ nɛ mà a na á ǹ dɔn bebele ya?

⁴⁸Mà ǹsɛn min yii guguru-an bii, hinlaa Fariziɛ̃n bii, mà haalɛ min goon din yɛ á golee li?

⁴⁹Mà bɛa zaman kɛ lɛ dinsɔɔ̃ n ke, ǹ ba Muizu a landa siin doɛ̃ wa, Lawa nə́ ǹ daa!

⁵⁰ Sɛnɛ, Fariziɛ̃n Nikodɛmu kɛ lɛ á woo Yezu li lɛlɛ, bɛ tɔ́n pɛ:

⁵¹«A kɔnpɛ ka wɔsɛn landa nɛ, wɔa boe la wɔ dɔlɔ bɔ min ganaa, bɛ̀ wɔ ǹ dɛnaa lɛ gɔ́ɔ̃ ǹ boo ma bɔrɔ wa, wɔ ǹ dɛnaa a zɛnaa ǹ sii dɔ̃ wa.»

⁵²Ǹ nə́ tɔ́n na a lɛ si ǹ nə́ pɛ mà a dɔ n Galilee gána min lɛa ya? Mà a ga Lawa a boo-n doɛ̃, mà á re yii mà Lawa a boo gii-dali kɔ́n bin bɔ Galilee wa. [

⁵³Bɛ kio, didie kiɛ̃ á woo piɛ.