Read Samo, Southern Zaã 8 Bible Online

Zaã 8 - Samo, Southern bible

Zaã 8

¹Yezu dɔ kiɛ̃ á woo *Olivie dan kele la.

²Baayɛlɛ yiisoon ne, á wusoo á daa Lawa a kion. Zaman tumaa daa a li, á giã tán, á goã ǹ darɛɛ.

³Landa sii-daraalin laanka *Fariziɛ̃n nə́ lɔ kɔ́n kũ naarɛbaa ǹ bǎã nɛ, ǹ nə́ daa-n minbuiin lɛ tumaa yɔrɔ-a,

⁴ǹ nə́ pɛ Yezu-n kɛnɛn: «Mìinaa, wɔsɛn man wɔ́ lɔ kɛ kũ naarɛbaa ǹ bǎã nɛ.

⁵ Dí-pɛ gɔ́ɔ̃ nɛ, Muizu na á pɛ, mà wɔ bɛ miã lɔn kɛn lɛn dɛ ka kɔlɔ nɛ. Nsɛ dɔ mà lɔn bɛ wɔ gɔn la?»

⁶Maǹ nə́ bɛ pɛ miɛ̃ ǹ tá n diɛ a gɔ́ɔ̃ li, màn mɛn bɛ́ toɛ, ǹ na a zɛ̀rɛbaa ǹ sii yɛ. Sɛnɛ, Yezu nə́ n zuməə, á bɔ á mɛ la á sɛ́wɔ kikiɛ̃ tán-a ka a gòon ne.

⁷Ǹ bɛ́ ǹ ba nɔ̀n-diɛ lɛ lɛ diɛ wa, Yezu tɔ́n yoo á n tele lon á pɛ ǹ nɛ: «Min mɛn bɛ́ ka bii, a tɔn sii baraa zɛnaa duduu wa, bɛa dɛnaa dɛ ka kɔlɔ lɛ-n bibinaa nɛ.»

⁸Á wusoo á n zuməə doo á sɛ́wɔ kikiɛ̃ tán.

⁹Ǹ bɛa boon lɛn ma lɔn, ǹ nə́ n moɛ gogoon, a saa ǹ yii fulii-an ganaa a wo ǹ kiodɛnan yaa. Yezu dinsɔɔ̃ goã bǎã-n bii-a, kun ka lɔ lɛ-n tɔn golee-n a yɔrɔ-a.

¹⁰Yezu yoo á n tele lon á pɛ nɛ: «Lɔ lɛɛ, n biɛ-kɔlen lɛn maa? Min kɔ́n dɔlɔ da n mìi-n wa?»

¹¹Lɔ lɛ tɔ́n pɛ, mà Dɛnaa ganaa, mà min kɔ́n. Yezu tɔ́n pɛ nɛ: «Masɛ dɔ a dɔlɔ boe n ganaa wa. Woo, sɛnɛ, n nyan toa n sii baraa zɛnaa doo wa.»]

¹² Yezu wusoo doo á boo giməə kɔsɔ da zaman lɛ nɛ, á pɛ: «Masɛ n kanaa a wɔlɔ fúlu lɛa. Bɛ̀ min mɛn tá koe masɛ kio lɛ, bɛa dɛnaa a die tɔ we wɔlɔ tì li wa. Wɔlɔ fúlu mɛn bɛ́ toɛ min yiikoonaabaa yɛ, bɛa dɛnaa á die bɛ yii.»

¹³ Fariziɛ̃n nə́ tɔ́n pɛ nɛ mà a n siére biɛ a dinmaa wɔ gɔn la! Mà a bɛ́ boo mɛn diɛ, mà ǹsɛn ba sii taãn lɛa wa.

¹⁴Yezu tɔ́n pɛ ǹ nɛ: «Sonbore ne, masɛ n siére biɛ masɛ din wɔ gɔn la, sɛnɛ, ma bɛ́ màn mɛn pii, taãn nɛ. A giala, ma tá ma din a bɔ ǹ bǎã doɛ̃, ma tá maa woo ǹ bǎã dɔ doɛ̃. Sɛnɛ, kasɛn kɛn, ka a maa bɔ ǹ bǎã doɛ̃ wa, ka a maa woo ǹ bǎã dɔ doɛ̃ wa.

¹⁵Ka n kiri we ka minbuiin nɛbaa nɛ; masɛ a kiri we min kɔ́n ganaa wa.

¹⁶Bɛ din tumaa kio, bɛ̀ masɛ n kiri we min ganaa, man kiri pepere we, a giala, ma dinsɔɔ̃ bie wa. Maa Díi mɛn ma dia, bɛ tá kun ka ma nɛ.

¹⁷ Ka dinin landa sɛ́wɔ gɔ́ɔ̃ nɛ, a tá kiɛ̃-n, mà min paa a siérebaa ǹ boo á boe la a n si sonbore lɛa.

¹⁸Masɛ n siére biɛ ma din wɔ gɔn la, maa Díi mɛn ma dia, bɛ dɔ n siére biɛ maa wɔ gɔn la.»

¹⁹Ǹ nə́ tɔ́n nɔ̀n da Yezu la mà a Díi lɛ dɔ n maa? Yezu tɔ́n pɛ ǹ nɛ: «Ka a masɛ doɛ̃ wa, ka a maa Díi dɔ doɛ̃ wa. Bɛ̀ ka ǹ ka masɛ dɔ̃, bɛ̀ ka á maa Díi dɔ doɛ̃.»

²⁰Yezu na á bɛa boon lɛn da Lawa a kion, bɛ̀ a bɛ́ Lawa gɔ ǹ wɔrɔ si ǹ mànan bǎã nɛ minin darɛɛ. Min kɔ́n nə n gɔn da a ganaa wa, a giala, a biikoo tɔn dɔ wa.

²¹Yezu wusoo á pɛ ǹ nɛ: «Man die woe. Ka tá re giɛ ma li, sɛnɛ, ka tá re giɛ̃ ka kaa sii baraa nɛ ka mìi ni. Ma bɛ́ woe bǎã mɛn nɛ, ka a boe la ka wo walan wa.»

²²Zuifun nə́ tɔ́n pɛ: «N bɛ́ pii mà nsɛ bɛ́ woe bǎã mɛn nɛ, mà wɔsɛn ba boe la wɔ wo walan wa, din-dɛ nə n gɔ́ɔ̃-n koɛ?»

²³Yezu tɔ́n pɛ ǹ nɛ: «Ka ǹ tán minin lɛa, masɛ n lon min lɛa. Ka n kanaa minbuiinin lɛa, masɛ bie kanaa minbuiin lɛa wa.

²⁴Bɛ lɛ na á toa, má pɛ ka nɛ, máa ka tá re giɛ̃ ka kaa sii baraan nɛ ka mìi ni. Masɛ bɛ́ min mɛn lɛa, bɛ̀ ka a ma doɛ̃ bɛ lɛa wa, ka á re giɛ̃ ka kaa sii baraan nɛ ka mìi ni.»

²⁵Ǹ nə́ tɔ́n pɛ mà asɛ n die lɛa bɔrɔ? Yezu tɔ́n pɛ ǹ nɛ: «Masɛ bɛ́ boo mɛn lɛ pii ka nɛ baraabaraa, haalɛ a saa a giala kɔ waáraa ganaa, bɛ lɛ nɛ.

²⁶Ka dinin wɔ paǹ li, boo gigiã tá masɛ lɛ-n ma pɛ ka nɛ, ma kiri dɔ wɔ ka ganaa sii gigiã a lɛa. Sɛnɛ, min mɛn masɛ dia, sonbore-pɛle ne. Ma boo mɛn ma a li, man bɛ lɛ pii kanaa minbuiinin manɛ.»

²⁷Ǹ na a giala ma mà a n Díi Lawa boo diɛ ǹ nɛ wa.

²⁸Yezu tɔ́n pɛ ǹ nɛ: «Bɛ̀ ká Min a Nɛgiĩ dere gɔn ganaa lon ǹ mɛn waáraa, ma bɛ́ min mɛn lɛa, ka á re doɛ̃ mà man bɛ lɛa. Ka á re doɛ̃ dɔn mà ma ba sii kɔ́n zɛnɛɛ ma din gɔn wìi a lɛa wa. Maa Díi ma daraa màn mɛn ganaa, man bɛ lɛ pii.

²⁹Min mɛn ma dia, a tá kun ka ma nɛ. A ma toa ma dinsɔɔ̃ wa, a giala, ma tá a foo sii zɛnɛɛ biikoo tumaa waáraa.»

³⁰Yezu bɛ́ bɛa boon lɛn diɛ miɛ̃, min gigiã golee li.

³¹Zuifun mɛnɛn nə golee Yezu li, á tɔ́n pɛ bɛn lɛn manɛ: «Bɛ̀ ka lɛ kɔ ka masɛ a boo si, ka ǹ maa kialandɛnan lɛa taãn-taãnɛ.

³²Bɛ lɛ n die toɛ ka sonbore dɔ̃, sonbore lɛ dɔ n die toɛ ka goã ka dinin gɔn wìi a lɛa.»

³³ Ǹ nə́ tɔ́n pɛ Yezu ni: «Wɔsɛn man Abrahamu tɔrɔn lɛa, min kɔ́n bin wɔsɛn baa bɛ̀rɛ lɛa wa. A n siɛ lɔn n tá pii mà wɔ á re goɛ̃ wɔ dinin gɔn wìi a lɛa?»

³⁴Yezu tɔ́n pɛ ǹ nɛ: «Man taãn pii ka nɛ, min mɛn bɛ́ sii baraa zɛnɛɛ, bɛa dɛnaa n sii baraa a bɛ̀rɛ lɛa.

³⁵Bɛ̀rɛ ba giɛ̃ kun ka kion minin ni biikoo tumaa waáraa wa. Sɛnɛ, min mɛn bɛ́ kion lɛ a nɛ lɛa, bɛ n giɛ̃ kun ka kion minin ni biikoo tumaa waáraa.

³⁶Bɛ̀ masɛ Lawa a Nɛgiĩ ka si ma ka kaa, ka á re goɛ̃ tá ma din gɔn wìi a lɛa wole taãnan lɛa.

³⁷Ka n Abrahamu tɔrɔn lɛa, ma á bɛ doɛ̃. Sɛnɛ, ka n giɛ li ka tá masɛ dii, a giala, maa boo lɛ na a ba ka foo sii wa.

³⁸Ma sii mɛn yɛ maa Díi li, man bɛ lɛ pii. Sɛnɛ, ka dɔn nə màn mɛn ma kaa díi li, ka ǹ bɛ lɛ zɛnɛɛ!»

³⁹Ǹ nə́ tɔ́n pɛ Yezu ni mà Abrahamu nə ǹsɛn díi lɛa. Yezu tɔ́n pɛ ǹ nɛ: «Bɛ̀ ka ǹ Abrahamu a nɛnyaanan lɛa sonbore, ka kɔ Abrahamu a zɛnaa ǹ siin lɛ.

⁴⁰Masɛ sonbore mɛn ma Lawa li, man má bɛ lɛ pɛ ka nɛ; sɛnɛ, ka ǹ giɛ li ka tá masɛ din dii kanna. Abrahamu bɛ miã zɛnaa wa koe!

⁴¹Sɛnɛ, kasɛn man koe ka di a zɛnaa ǹ siin lɛ.» Ǹ nə́ tɔ́n pɛ Yezu ni: «Kikio nɛn bie ka wɔsɛn nɛ wa dɛ! Wɔsɛn Díi n goon toto dinsɔɔ̃, bɛ n ka Lawa nɛ.»

⁴²Yezu tɔ́n pɛ ǹ nɛ: «Bɛ̀ Lawa n kaa Díi lɛa sonbore, bɛ̀ ka á masɛ narɛ. A giala, masɛ n má bɔ Lawa li má daa. Ma bie má daa ma din gɔn wìi a lɛa wa, a din na á ma dia.

⁴³Wàa na á baa ka ba maa boo giala miɛ wa? A giala, ka a boe la ka n too kɔ masɛ a boo ganaa wa.

⁴⁴Kaa díi n ka *Sɛtaan nɛ, ka ǹ giɛ li ka kaa díi foo sii zɛnaa. A kũ kanaa a giala kɔ waáraa ganaa, a dí n ka gɛ̀ dɛ nɛ. A lɛ kɔ sonbore ganaa wa, a giala, sonbore kɔ́n ba a gɔ́ɔ̃-n wa. Bɛ̀ á soɛ boe, a din lɛ mui sii na á zɛnɛɛ, a giala, a n soɛ-bɔle lɛa, soɛ a díi dɔ nɛ.

⁴⁵Sɛnɛ, masɛ bɛ́ sonbore pii, bɛ lɛ nɛ ka ba golee ma li wa.

⁴⁶Die n ka bii, bɛ́ n boe la a masɛ Yezu a sii baraa zɛnaa nyaa? Bɛ̀ masɛ á sonbore pii, wàa dɔ na á baa ka a golee ma li wa?

⁴⁷Min mɛn bɛ́ Lawa wɔ lɛa, bɛa dɛnaa nə n too koe Lawa a boo li. Ka bɛ́ ka a Lawa wɔn lɛa wa, bɛ lɛ nɛ, ka a n too koe masɛ lon wa.»

⁴⁸Zuifun nə́ tɔ́n pɛ Yezu ni mà Sonbore tá ǹsɛn lon ǹsɛn nə pɛ, mà á baraa ka Samarii min bɛ́ lɔn, mà mànan man a ganaa.

⁴⁹Yezu nə́ n lɛ si á pɛ ǹ nɛ: «Aba, mànan bie masɛ ganaa wa. Man maa Díi guguru koe, sɛnɛ, kasɛn man masɛ dɔ puusə koe!

⁵⁰Masɛ dinmaa bie giɛ tɔ li wa. Min tan, a tá masɛ tɔ boe, a din lɛ dɔ n kiri kuri.

⁵¹Man taãn pii ka nɛ, bɛ̀ min mɛn masɛ a boo si, bɛa dɛnaa a giɛ̃ duduu wa.»

⁵²Zuifun nə́ tɔ́n pɛ nɛ: «Sisia kəni, wɔ́ dɔ̃ wáa mànan manə n ganaa! Abrahamu gã, Lawa a boo gii-dalin dɔn nə́ gã, nsɛ dɔ nə́ n daa ń tá pii mà bɛ̀ min mɛn nə́ nsɛ a boo si, mà bɛa dɛnaa a giɛ̃ duduu wa.

⁵³Wɔsɛn digolo Abrahamu mɛn bɛ́ á gã, nsɛ n gole n la bɛ-n kən le? Lawa a boo gii-dalin dinin nə́ gã. Nsɛ nə n din biɛ wàa lɛa bɔrɔ?»

⁵⁴Yezu tɔ́n pɛ ǹ nɛ: «Bɛ̀ masɛ nə n din laakalɛɛ, ga tɔ li kooro n ka bɛ nɛ. Maa Díi kɛ lɛ ka tá pii mà kasɛn Lawa nɛ, a da yaa ka n ka a doɛ̃ wa, bɛ lɛ n masɛ tɔ boe. Ma á doɛ̃. Bɛ̀ má pɛ máa ma a doɛ̃ wa, masɛ dɔ n soɛ-bɔle lɛa ka ka dɔn bɛ́ lɔn. Sɛnɛ, masɛ á doɛ̃, ma tá a boo dɔ sii.

⁵⁵

⁵⁶Ka digolo Abrahamu kɛ lɛ, ka lɛ n paraa-n a tɔ ganaa, á goã n nyɛnyɛɛ, a ná a yiri ni mà a tá re masɛ a biikoo yii. Á yɛ, a foo kɔɔ̃n kɔ parsiini.»

⁵⁷Bɛa boo lɛ taman yii, Zuifun nə́ pɛ Yezu ni mà asɛ din nə tɔn dɔ lɛ̀ posooro bɔrɔ wa, mà a lɛ n boe mà á ǹsɛn digolo Abrahamu yɛ!

⁵⁸Yezu tɔ́n pɛ ǹ nɛ: «Man taãn pii ka nɛ, Abrahamu laan bɛ̀ a yɛ, bɛ̀ masɛ tan.»

⁵⁹Bɛa boo lɛ taman yii, ǹ nə́ kɔlɔn goa mà maǹ Yezu dii ni. Sɛnɛ, á n duru á soo á n bɔ Lawa a kion.