Read Samo, Southern Zaã 9 Bible Online

Zaã 9 - Samo, Southern bible

Zaã 9

¹Yezu bɛ́ kiɛ̃, á giĩ goon yɛ, a yii tere-amaa na á yɛ.

²A kialandɛnan nə́ tɔ́n nɔ̀n kɛ da la kɛnɛn: «Mìinaa, wàa na á baa giĩ kɛ yɛ yii tere-a lɛa? A din a sii baraa taman yii-n hinlaa a yɛ wolen wɔ nɛ?»

³Yezu tɔ́n pɛ: «A din sii bie wa, a yɛ wolen dɔn sii bie wa. Sɛnɛ, a na á yɛ miɛ̃, màn mɛn bɛ́ toɛ, Lawa ná a din a boo sii la nyaa minin manɛ.

⁴Bɛ̀ lɛ̀ waa lɔn, dí-nyalin man nə ǹ dí nyɛɛ, bɛ̀ wɔlɔ baa tii. Wɔsɛn dɔn doamaa nɛ, wɔ masɛ a dia wole a dín nya miɛ̃. A giala, min kɔ́n ba re boe la a dí nya tèlò-n wa.

⁵ A masɛ toa kanaa kɛ gɔ́ɔ̃ nɛ, masɛ na a bólon fúlu lɛa.»

⁶Bɛa boon lɛn diɛ kio, Yezu sɛ̀ kaa tán, á lɔlɔkɔn-a ka tii ni á bɛrɛɛ baa, á bɔ á lɔ yii tere-a lɛ yiin ganaa,

⁷á pɛ nɛ: «Mu nyankɔrɔ mɛn bɛ́ ǹ tá bíi Silowee (bɛ giala mà dia dí-a wole), wo n yii pii bɛ nɛ.» Yii tere-a lɛ woo walan, á n yii pii, a bɛ́ n bɔyɛɛ die bɛ̀ a yii n wɔlɔ yii.

⁸Ǹ miãkɛnɛn laanka min mɛnɛn bɛ́ goɛ̃ bɛ̀ ǹ yɛ, ǹ nə́ doɛ̃ nyankɔle lɛa, bɛn man nə́ goã pii mà giĩ kɛ lɛ goɛ̃ giɛ̃ tán-a bɛ̀ a nyankɔ, mà a din lɛ bie ke wa?

⁹Min tɛn mà a din ni. Ǹ tɛn dɔ mà asɛ bie wa. Mà a bɔ kɔn li wole ne. Sɛnɛ, a dinmaa na á goã a foaãbaa pii mà asɛ din ni.

¹⁰Ǹ nə́ tɔ́n nɔ̀n da la mà bɛ̀ a din ni, mà a yiin kɛn man nə́ saa lɔn ǹ nə́ n bũ?

¹¹Á tɔ́n pɛ ǹ nɛ kɛnɛn: «Ǹ bɛ́ giĩ mɛn bíi Yezu, bɛ lɛ na á bɛrɛɛ zɛnaa á lɔ ma yiin ganaa, á pɛ ma nɛ mà ma wo n yii pii Silowee mu nyankɔrɔ nɛ. Ma dɔ́ woo walan má n yii pii, ma yiin nə́ n bũ.»

¹²Ǹ nə́ tɔ́n nɔ̀n da la mà bɛa giĩ lɛ n maa? Á tɔ́n pɛ ǹ nɛ mà asɛ a doɛ̃ wa.

¹³Minin nə́ yii tere-a zizi lɛ kũ ǹ nə́ woo ne *Fariziɛ̃n li.

¹⁴A da yaa, *susu ǹ pii pinaa nɛ, Yezu bɛrɛɛ zɛnaa á giĩ lɛ yiin bũ.

¹⁵Fariziɛ̃n dɔn nə́ nɔ̀n da la, mà a yii lɛ na á saa lɔn á wɔlɔ yii sisia. Á tɔ́n pɛ ǹ nɛ, mà Yezu na á bɛrɛɛ lɔ asɛ yiin ganaa, asɛ nə́ n yii pii, bɛ lɛ nɛ asɛ yii á wɔlɔ yii sisia.

¹⁶Bɛ lɛ nɛ, Fariziɛ̃n lɛn tɛnɛn nə́ goã pii mà Lawa din bie á kɛa giĩ kɛ dia wa, a giala, mà a ba susu ǹ pii tamaɛ wa. Sɛnɛ, ǹ tɛn dɔ na á goã pii mà bɛ̀ sii baraa-zɛnaali ni, mà á n siɛ lɔn a boo la a kaãbaa ǹ siin kɛn miãn zɛnaa? Ǹ lɛ kaa kɔn para-a.

¹⁷Fariziɛ̃n nə́ wusoo ǹ nə́ nɔ̀n da yii tere-a zizi lɛ la kɛnɛn: «A bɛ́ á n dɔ yiin bũ, man wàa mɛn boo diɛ a wɔ gɔn la?» Á tɔ́n pɛ ǹ nɛ mà Lawa a boo gii-dali ni.

¹⁸Sɛnɛ, Zuifun goledɛnan nə waa la, mà giĩ lɛ na á goã yii tere-a lɛa lɛlɛ, mà a yii na á n bũ sisia wa, yǎa ǹ ná a yɛ wolen bíi,

¹⁹ǹ nə́ nɔ̀n da ǹ la: «Ka bɛ́ pii mà kaa nɛ mɛn na á yɛ yii tere-a lɛa, a din lɛ n ke koɛ? Wàa na á toa a yii n wɔlɔ yii kanna?»

²⁰A yɛ wolen lɛn nə́ tɔ́n pɛ ǹ nɛ kɛnɛn: «Wɔsɛn tá doɛ̃ wáa wɔ dinin nɛ nɛ, a na á yɛ yii tere-a lɛa.

²¹Sɛnɛ, màn mɛn toa a yii n wɔlɔ yii kanna, wɔ a bɛ doɛ̃ wa. Min mɛn na a yiin bũ, wɔ a doɛ̃ wa. Nɛnyaan bie doo wa, á boe la a min lɛ si, ka nɔ̀n da a din la.»

²²A yɛ wolen lɛn man nə́ pɛ miɛ̃, a giala, maǹ nə́ goã nyɛ́ɛ biɛ Zuifun goledɛnan lɛn manɛ. A giala, bɛn nə́ saa lɛlɛ ǹ nə́ n lɛ kaa kun, mà bɛ̀ min mɛn nə́ pɛ mà Yezu n Minin Nyin-sili lɛa, mà maǹ die bɛa dɛnaa lui, ǹ ba toɛ a da lɛsɔkɔn kion doo wa.

²³Bɛ lɛ na á toa, a yɛ wolen lɛn nə́ pɛ mà nɛnyaan bie doo wa, mà ǹ nɔ̀n da a din la.

²⁴Fariziɛ̃n nə́ yii tere-a zizi lɛ bíi doo ka a paabaa ǹ wɔ nɛ, ǹ nə́ pɛ nɛ: «Nyɛ́ɛ baa Lawa yii ni, n sonbore pɛ dɛ! Wɔsɛn tá doɛ̃ wáa giĩ kɛ lɛ n sii baraa-zɛnaali lɛa.»

²⁵Giĩ lɛ tɔ́n pɛ ǹ nɛ: «Bɛ̀ sii baraa-zɛnaali ni, masɛ a doɛ̃ sɛn wa. Sɛnɛ, masɛ n sii goon doɛ̃: Masɛ n má goã yii tere-a lɛa, sɛnɛ, ma yii á wɔlɔ yii sisia.»

²⁶Fariziɛ̃n lɛn nə́ tɔ́n nɔ̀n da la: «A na á wàa zɛnaa n nɛ? A na á n yiin lɛn bũ lɔn?»

²⁷Giĩ lɛ tɔ́n pɛ ǹ nɛ kɛnɛn: «Má a yɔrɔ pɛ ka nɛ á nya dɔn, sɛnɛ, ka bɛ́ ka n too kɔ masɛ lon wa! Wàa na á baa ka tá li ka ma doo? Hinlaa ka dɔn man giɛ li, ka n baa a kialandɛnan lɛa dinin hɛ̃!»

²⁸Fariziɛ̃n nə́ nɔmaa ǹ nə́ sɔ kakaa la, ǹ nə́ goã pii: «N din kɛ lɛ n bɛa giĩ lɛ a kialandɛnaa lɛa! Wɔsɛn man Muizu kio.

²⁹Wɔsɛn tá doɛ̃ wáa Lawa boo da ka Muizu ni, sɛnɛ, giĩ kɛ lɛ sɛ, wɔsɛn ba a bɔ ǹ bǎã doɛ̃ dinin wa!»

³⁰Yii tere-a zizi lɛ tɔ́n pɛ ǹ nɛ: «Sii kaka n ka kɛ-n dɛ! Ka ba a bɔ ǹ bǎã doɛ̃ wa, a da yaa á masɛ dɔ yii bũ!

³¹Min tumaa á doɛ̃ mà Lawa ba sii baraa-zɛnaalin lɛ sii wa. Sɛnɛ, bɛ̀ min mɛn tá nyɛ́ɛ biɛ a yii ni, a ná a foo sii zɛnɛɛ, a n bɛa dɛnaa lɛ sii.

³²Wɔsɛn nə tɔn ma bɔrɔ, mà min na á yɛ yii tere-a lɛa min ná a yii bũ wa.

³³Bɛ̀ giĩ kɛ lɛ bie boe Lawa li wa, bɛ̀ a boe la a sii kɔ́n zɛnaa wa.»

³⁴Ǹ nə́ tɔ́n pɛ yii tere-a zizi lɛ nɛ: «Ma nə́ n yɛ sii baraa-zɛnaali lɛa, ma nə́ n daa wɔsɛn dɔn daraa a ganaa kəni!» Bɛ kio, ǹ nə́ loo ǹ nə́ bɔ lɛsɔkɔn kion lɛ nɛ.

³⁵Yezu ma mà ǹ nə́ giĩ lɛ loo. Á tɔn daa yaa ǹ kɔ́n pinaa, á pɛ nɛ: «Nsɛ kɛ lɛ, n golee Min a Nɛgiĩ li?»

³⁶Giĩ lɛ tɔ́n nɔ̀n da la: «Die n ka bɛ nɛ, Dɛnaa, a pɛ ma nɛ, màn mɛn bɛ́ toɛ, ma golee li.»

³⁷Yezu tɔ́n pɛ nɛ: «N yii yɛ dɔn, ma din lɛ n ke boo diɛ n nɛ.»

³⁸Giĩ lɛ tɔ́n pɛ Yezu ni: «Dɛnaa, ma golee n li.» Bɛ kio, á kaa tán-a a giulun a ná a guguru kɔ.

³⁹Yezu tɔ́n pɛ kəni: «Man má daa kanaa kɛ lɛ gɔ́ɔ̃ nɛ kiri wɔ a lɛa, màn mɛn bɛ́ toɛ, min mɛnɛn bɛ́ yii tere-an lɛa, bɛn yii wɔlɔ yɛ, min mɛnɛn bɛ́ yii wɔlɔ yɛlen lɛa, bɛn yii tã.»

⁴⁰Fariziɛ̃n mɛnɛn bɛ́ kun ni, ǹ nə́ bɛa boo lɛ ma, bɛn nə́ tɔ́n pɛ: «Sii n kəni, wɔsɛn dɔn man yii tere-an lɛa kən le?»

⁴¹Yezu tɔ́n pɛ ǹ nɛ: «Bɛ̀ ka n yii tere-an lɛa, bɛ̀ sii ba ka mìi-n wa. Sɛnɛ, haalɛ tɔn pelo, ka n pii mà kasɛn yii á wɔlɔ yii, bɛ lɛ na á toa, kaa sii baraa tá tɔn ka mìi ni.»