Read Samo, Southern NDS 16 Bible Online

NDS 16 - Samo, Southern bible

NDS 16

¹Pooli dɔ Dɛrbə, bɛ kio á woo Listrə kiwi. Lawa-nyankɔle goon na á goã walan, a tɔ n Timote, ǹ dan nə Zuifu lɛa, a n golee-n Lawa li, n di na á goã Grɛki lɛa.

²A tɔ sonbore goã boe ǹ dɔɔ̃nɔn bii Listrə laanka Ikoniɔmu kiwi.

³A na á goã Pooli gɔ́ɔ̃ nɛ a wo-n kun ka a din ni. Pooli kũ á kuru, Zuifun mɛnɛn bɛ́ bɛa bǎãn lɛn nɛ, a na á zɛnaa bɛn lɛa, a giala, ǹ tumaa goã doɛ̃ sonbore, mà Timote lɛ di na á goã Grɛki lɛa.

⁴Ǹ bɛ́ kiɛ̃ kiwin mɛnɛn nɛ, Zeruzalɛmu a dia dí-a wolen laanka a nyɛɛnaandɛnan nə́ boon mɛnɛn pɛ, Pooli laanka Silaasi na á goã bɛn pii bɛa kiwin lɛn minin manɛ, bɛ̀ ǹ tá ǹ nyankoe mà ǹ tɔ wɔ a kɔnpɛ ka bɛn lɛn nɛ.

⁵Màn na á goã miɛ Lawa a sɔmɔ minin lɛn golee Lawa li li woe nyɛɛnɛ, bɛ̀ min kɔsɔn dɔn tá miɛ ǹ dinin li baraabaraa.

⁶Pooli laanka Silaasi Frizii laanka Galaasi gána wɔsɔ, a giala, Yiri Fu lɛ kɔ ǹ la mà ǹ Lawa a boo pɛ Azii gána-n wa.

⁷Ǹ bɛ́ ǹ nə́ dɔ Miizii lɛkoro-a, ǹ ná a lɛn zɔɔ̃ mà maǹ woe Bitinii gána nɛ, sɛnɛ, Yezu a Yiri Fu toa ǹ nə́ woo wa.

⁸Ǹ nə́ tɔ́n Miizii gána wɔsɔ ǹ nə́ woo Troasi kiwi.

⁹Tèlò kɔ́n nɛ, Pooli yii màn kɔ́n yɛ: Masedoanɛ gána min goon ne, á n din nyaa nɛ golee-n lon, a ná a nyankoe kɛnɛn: «Da Masedoanɛ, n nə n dɔ wɔsɛn lɛ.»

¹⁰Pooli yii bɛ́ á bɛa màn kɛ lɛ yɛ, wɔ́ yoo fufuu wɔ́ ga wo Masedoanɛ ǹ gɔn li, a giala, wɔ dɔ̃ taãn-taãnɛ wáa Lawa n wɔ bíi walan, mà wɔ a din a boo tii kɔɔ̃n kɛ pɛ ǹ nɛ.

¹¹Wɔ bɛ́ wɔ́ dɔ Troasi, wɔ́ wɔ tà kuru ǹ goo ne, wɔ́ woo pere-pere Samotrasi gána kɛ nɛ yìsi mu bii, a lɛawaa wɔ́ dɔ Neyapolisi kiwi.

¹²Wɔ́ n toa walan wɔ́ tɔ wɔ, wɔ́ woo Filipi kiwi, bɛ mɛn bɛ́ á goã Masedoanɛ gána paǹ goon a kiwi gole lɛa, Rɔmu minin giã ǹ bǎã lɛa. Wɔ biikoo kɔ́n zɛnaa bɛa kiwi lɛ nɛ.

¹³*Susu ǹ pii pinaa, wɔ́ soo wɔ́ n bɔ kiwi lɛ nɛ, wɔ́ woo tà kɔ́n lɛ-a. Wɔ́ taasɛ wáa wɔ á boe la wɔ Zuifun Lawa nyankɔ ǹ bǎã kɔ́n yɛ walan. Wɔ bɛ́ wɔ́ giã tán, lɔn mɛnɛn lɛ bɛ́ soe-n kɔn walan, wɔ́ boo da bɛn nɛ.

¹⁴Ǹ goon ne, a tɔ n Lidi, a n mɔnaa tɔnaa tɔrɔ kɔn siɛ̃, Tiatiiri kiwi min ni, á nyɛ́ɛ biɛ Lawa nɛ. Asɛ na á goã n too koe parsiini, a giala, Dɛnaa na á ná a foo lɛ bũ, a ná a taasiɛ din tumaa doa Pooli a boon kɛn ganaa.

¹⁵A din laanka a kiondɛnan bɛ́ ǹ nə́ *batɛmu yɛ, á pɛ wɔ nɛ: «Ka dinin bɛ́ giɛ a ganaa, masɛ golee Dɛnaa li, ka da giã masɛ a piɛ.» Á n laa wɔ ganaa yǎa wɔ́ lɛ kɔ.

¹⁶Ǹ kɔ́n pinaa wɔ bɛ́ woe Lawa nyankɔ ǹ bǎã nɛ, bɛ̀rɛlɔ goon daa n da wɔ lɛ. Nɔ̀ɔnɔn man a ganaa, a n wɔkuĩ. A bɛ́ min mɛnɛn bɛ̀rɛ lɛa, a wɔ-kũ ǹ dí na á goã là gole we bɛn lon.

¹⁷A na á goã koe wɔ kio lɛ, wɔ laanka Pooli ni, bɛ̀ a nə́ n lɛ dii: «Minin kɛn man Lon a Lawa Gole a dí-nyalin lɛa. Maǹ kirisibaa ǹ zii boo pii ka nɛ.»

¹⁸Á bɛa sii kɛ lɛ zɛnaa lɛawaa damata gɔ́ɔ̃ nɛ. Pooli bɛ́ á nɔmaa, á n bɔyaa á pɛ nɔ̀ɔnɔn lɛn manɛ: «Man pii ka nɛ ka Yezu *Krita tɔ nɛ, ka n bɔ lɔ kɛ ganaa.» A din bǎã-n gɔrɔ, nɔ̀ɔnɔn lɛn nə́ n bɔ a ganaa.

¹⁹Minin mɛnɛn bɛ̀rɛlɔ bɛ́ nɛ, bɛn bɛ́ ǹ nə́ yɛ mà ǹsɛn màn yɛ ǹ gɔn na á woo ka bɛ nɛ, ǹ nə́ Pooli laanka Silaasi kũ, ǹ nə́ ǹ baã ǹ nə́ woo ǹ ne zaman paã ǹ bǎã nɛ, kiri-wɔlen yɔrɔ-a.

²⁰Rɔmu minin mɛnɛn bɛ́ kiri sii yɔrɔ boe, ǹ nə́ ǹ nyaa bɛn manɛ, ǹ nə́ pɛ: «Minin kɛn man kiwi lɛ a minin lɔlɛkɔn. Zuifun manɛ.

²¹Maǹ siin kɔnɔn boo diɛ, wɔsɛn Rɔmu minin landa siin bɛ́ ǹ ba toɛ, wɔ lɛ kɔ siin mɛnɛn ganaa, wɔ ǹ zɛnaa wa.»

²²Zaman lɛ yoo ǹ gialaa. Kiri-wɔlen lɛn nə́ Pooli laanka Silaasi a dɔnkɛn waa, ǹ nə́ pɛ mà ǹ nə ǹ dɛ ka bàlà nɛ.

²³Ǹ bɛ́ ǹ nə́ ǹ dɛ parsiini ǹ mɛn waáraa, ǹ nə́ ǹ zũ kòso-n, ǹ nə́ pɛ kòso-lɛduə̃li ni, mà a ga ǹ walan parsiini.

²⁴Bɛa boo lɛ a pɛ kio, kòso lɛduə̃li lɛ nə́ ǹ kaa kòso lɛ a kɛ gialaa nɛ, á ǹ gòãn kaa kan nɛ.

²⁵Làan biikoo li Pooli laanka Silaasi Lawa nyankɔ, bɛ̀ ǹ tá loe loe ǹ nə́ Lawa tɔ boe ne. Kòso nɛ gialakunun kɛn nə́ goã n too koe ǹ lon.

²⁶Bǎã goon ne, tán nə́ bìn da ka pàã gole ne, yǎa kion lɛ a gòã yii bìn da. Kiɛnlɛn lɛn tumaa nə́ n bũ a din bǎã-n gɔrɔ, fɔlɔ biɛn mɛnɛn bɛ́ kòso nɛn lɛn-a, bɛn nə́ na.

²⁷Kòso-lɛduə̃li lɛ bɛ́ á yoo á n bɔ nyuù ni, á kòso kiɛnlɛn lɛn yɛ buĩ ni. A bɛ́ taasɛ mà kòso nɛn lɛn nə́ soo ǹ nə́ baa si, a ná a din a gɔya saa mà a n die n din dii ni.

²⁸Sɛnɛ, Pooli pɛ nɛ ka lɛn gole ne: «N baran sii baraa kɔ́n zɛnaa n din ni wa, wɔsɛn tumaa tan.»

²⁹Kòso-lɛduə̃li lɛ nɔ̀n da ka bólon fúlu ni, á n baa fufuu á wɔ kion lɛ gɔ́ɔ̃ nɛ. Á gɔ̀nɔn bɛ́ bìn diɛ, á na á kaa tán Pooli laanka Silaasi giulun.

³⁰Á pɛ ǹ nɛ mà ǹ soo, bɛ kio á tɔ́n pɛ ǹ nɛ: «Giĩn lɛn, masɛ doamaa nɛ ma wàa mɛn zɛnaa ma tɔn kirisibaa?»

³¹Ǹ ná a lɛ si: «Golee Dɛnaa Yezu li, n tá re kirisibiɛ, n laanka n kion minin ni.»

³²Ǹ nə́ tɔ́n Lawa a boo pɛ nɛ kun ka minin mɛnɛn tumaa bɛ́ a kion.

³³A din biikoo lɛ nɛ, tèlò biribiri lɛ gɔ́ɔ̃ nɛ, kòso-lɛduə̃li lɛ nə́ ǹ kũ á woo ǹ ne, á ǹ busu lɛn pii. Bɛ kio gɔrɔ, á lɛ kɔ, ǹ nə́ batɛmu da a ganaa, a laanka a kion minin ni.

³⁴Bɛ kio, á Pooli laanka Silaasi kũ á woo ǹ ne a piɛ, á màn-bii kɔ ǹ la. Á n nyɛnyɛɛ kun ka a kion minin ni ǹ golee Lawa li a lɛa.

³⁵Lɛ̀ bɛ́ á waa, Rɔmu a kiri sii yɔrɔ-bɔlen nə́ kənən dia mà ǹ wo pɛ kòso-lɛduə̃li lɛ nɛ mà a minin kɛn lɛn kaa.

³⁶Kòso-lɛduə̃li lɛ bɛa boo kɛ lɛ pɛ Pooli ni: «Rɔmu kiri sii yɔrɔ-bɔlen lɛn mà wɔ ka kaa. Bɛ̀ bɛ nɛ, ka soo ka wo ka bǐɛ̃ nɛ.»

³⁷Sɛnɛ, Pooli pɛ ǹ nɛ: «Wɔsɛn mɛnɛn bɛ́ Rɔmu gána minin lɛa, ǹ nə́ wɔsɛn dɛ zaman yɔrɔ-a, bɛ̀ dɔlɔ ná a wɔsɛn kũ wa, ǹ nə́ wɔ kaa kòso-n. Sisia maǹ giɛ li mà ǹ tá wɔ kiɛ ka durii ni. Bɛ ba n zɛnɛɛ wa. Ǹ dininmaan nə da wɔ kaa.»

³⁸Kənən lɛn nə́ woo boon kɛn lɛn pɛ kiri sii yɔrɔ-bɔlen lɛn manɛ. Ǹ bɛ́ ǹ nə́ ma mà Rɔmu gána minin man ka Poolin lɛ nɛ, nyɛ́ɛ nə́ ǹ kũ.

³⁹Ǹ nə́ daa Poolin nyankɔ, mà ǹ nə ǹsɛn sã toa ǹ nɛ. Bɛ kio, ǹ nə́ ǹ kaa, ǹ nə́ pɛ ǹ nɛ, mà ǹ soo ǹ kiwi lɛ toa.

⁴⁰Pooli laanka Silaasi bɛ́ ǹ nə́ soo kòso-n gɔrɔ, ǹ nə́ woo Lidi yaa, ǹ nə́ dɔɔ̃n Lawa-nyankɔlen lɛn yɛ, ǹ nə́ ǹ foo taã, bɛ kio, ǹ nə́ woo.