Read Samo, Southern NDS 25 Bible Online

NDS 25 - Samo, Southern bible

NDS 25

¹Lɛawaa sɔɔ a dɔ kio gána kɛ nɛ, Kii Fɛstusu bɔ Sezaaree kiwi á woo Zeruzalɛmu.

²Zuifun wúlu-bɔlen goledɛnan laanka ǹ min yii guguru-an nə́ daa a li, ǹ nə́ ǹ busii pɛ nɛ,

³mà a bǐɛ̃ kɔ ǹsɛn-a, a da ka Pooli ni Zeruzalɛmu. Sonbore, maǹ nə́ n lɛ kaa kun ǹ nə́ die gɔn diɛ Pooli ganaa ǹ dɛ zii la.

⁴Sɛnɛ, Fɛstusu nə́ ǹ lɛ si mà Pooli n kòso-n Sezaaree, mà ka bɛ dɔ din ni, mà asɛ dinmaa lɛ n die wusii a wo walan sisia.

⁵Á tɔ́n pɛ ǹ nɛ: «Bɛ̀ á daa yaa giĩ kɛ lɛ sii kɔkɔrɔ kɔ́n zɛnaa sonbore, kaa nyɛɛnaandɛnan nə n ta kun ma nɛ Sezaaree, ǹ na a zɛ̀rɛ baa walan.»

⁶Fɛstusu a bele bɔ ǹ li Zeruzalɛmu kiwi kiɛ̃ lɛawaa kiwisi hinlaa fù kɛ miã la wa. A bɛ́ á dɔ Sezaaree lɔn gɔrɔ, a lɛawaa, á woo giã kiri-wɔlen bǎã nɛ, á pɛ mà ǹ da ka Pooli ni.

⁷Pooli bɛ́ á daa lɔn gɔrɔ, Zuifun mɛnɛn nə bɔ Zeruzalɛmu ǹ nə́ daa, bɛn nə́ yoo ǹ ná a lɛnpɛnɛ, ǹ ná a zɛ̀rɛ biɛ ka sii kaka gigiã nɛ. Sɛnɛ, ǹ goã boe la ǹ tá nyɛɛ taãn-taãnɛ, mà bɛa siɛ̃n kɛn lɛn man sonbore lɛa wa.

⁸Pooli na á goã pii a din wɔ gɔn la: «Ma sii kɔ́n zɛnaa á Zuifun landa ziziɛ̃ wa, ma Lawa a kion kɛ a soɛ̃ sii kɔ́n zɛnaa wa, ma màn kɔ́n da Rɔmu a kii gole gole lɛ dɔ ganaa wa.»

⁹Sɛnɛ, Fɛstusu bɛ́ giɛ li mà a sii kɔɔ̃n kɔ Zuifun ganaa, á pɛ Pooli ni: «N tá li n wo Zeruzalɛmu, n kiri lɛ nə n kuru walan masɛ yɔrɔ-a ya?»

¹⁰Pooli pɛ: «Man Rɔmu a kii gole gole lɛ a kiri wɔ ǹ bǎã-n kɛnɛn, masɛ a kiri lɛ nə n kuri kànaa. Zuifun mɛnɛn bɛ́ kànaa ke, ma dɔ din yii bɛ́ a ganaa taãn-taãnɛ, ma màn kɔ́n la ǹ la wa.

¹¹Bɛ̀ ma zɛ̀rɛ-n sonbore, bɛ̀ má sii la sonbore, sii mɛn bɛ́ gɛ̀ dɔlɔ boe ka bɛ da ma mìi ni, ma ba n piɛ̃ ka gɛ̀-n wa. Sɛnɛ, minin kɛn bɛ́ masɛ zɛ̀rɛ biɛ ka siin mɛnɛn nɛ, bɛ̀ ǹ ba sonbore lɛa wa, min kɔ́n doamaa bie a ma kɔ ǹ la wa. Bɛ lɛ taman yii, man giɛ li Rɔmu a kii gole gole lɛ sii kɛ lɛ a yɔrɔ-bɔle baa.»

¹²Bɛ kio, Fɛstusu boo da kun ka a yiri kɔmala wolen ne, a bɛ́ á nya, á pɛ Pooli ni: «Táa ma n giɛ li kii gole gole lɛ nə n sii lɛ yɔrɔ bɔ, n tá re woe walan le!»

¹³Lɛawaan kɔnɔn kiɛ̃ kio, kii Agripaa laanka ǹ miãnɛn Berenisi daa n yii kɔ Fɛstusu li Sezaaree kiwi.

¹⁴Ǹ bɛ́ ǹ nə́ lɛawaa paa bɔ, Fɛstusu Pooli a sii lɛ boo da kii Agripaa nɛ: «Giĩ goon tá kànaa, má daa yaa Feliksi toa kòso-n.

¹⁵Ma bɛ́ má woo Zeruzalɛmu, wúlu-bɔlen goledɛnan laanka Zuifun nyɛɛnaandɛnan nə́ daa a zɛ̀rɛ baa ma li, ǹ nə́ pɛ ma nɛ, mà ma dɔlɔ da a mìi ni.

¹⁶Má nyaa ǹ nɛ máa bɛ ba n zɛnɛɛ wɔsɛn Rɔmu gána minin li wa. Wɔsɛn ba kòso nɛ koe min la, a da yaa wɔ́ n wɔ tɔn nə ǹ kaa kɔn yɔrɔ-a, wɔ a zɛ̀rɛ-baalin wɔ ma, wɔ zii kɔ a din dɔ la, a n bɔlɔ pɛ a zɛ̀rɛbaa ǹ sii lɛ wɔ gɔn la wa.

¹⁷Bɛ lɛ nɛ ǹ nə́ daa kànaa, man yii da wa, a lɛawaa gɔrɔ, má woo giã kiri wɔ ǹ bǎã nɛ, má pɛ máa ǹ da ka giĩ lɛ nɛ.

¹⁸A zɛ̀rɛ-baalin lɛn bɛ́ ǹ nə́ n lɛ sɔkɔn a li lɔn gɔrɔ, maa taasiɛ bɛ́ á goã sii kakan mɛnɛn-a, ǹ bɛ kɔ́n pɛ a paǹ li wa.

¹⁹Liere kooron man nə́ goã ǹ bii ni ǹ Lawa a zii wɔ gɔn la, ka giĩ kɔ́n dɔ nɛ a tɔ n Yezu, min mɛn bɛ́ á gã dinin, sɛnɛ, Pooli sɛ mà a yii á koo.

²⁰Masɛ a doɛ̃ ma bɛ́ re kɛ miã siin kɛn yɔrɔ boe lɔn wa, bɛ lɛ nɛ má pɛ Pooli ni, máa bɛ̀ á lɛ koe a wo Zeruzalɛmu, ǹ na a kiri lɛ kuru walan.

²¹Sɛnɛ, Pooli mà asɛ a sii lɛ n siĩni, a n yɔrɔ bɔ kii gole gole kɛ li. Bɛ lɛ nɛ masɛ máa ǹ toa kòso-n, bɛ̀ ma baa boe diɛ kii gole gole lɛ la.»

²²Agripaa tɔ́n pɛ Fɛstusu ni: «Ma dɔ á giɛ li man too kɔ giĩ kɛ lon.» Fɛstusu ná a lɛ si: «Biɛ̃ bɛ á die yɔrɔ boe.»

²³A lɛawaa, Agripaa laanka Berenisi daa ka min golebaa nɛ, ǹ nə́ wɔ kɔn-yɛ ǹ kion kun ka sɔraasi gialɛ dadara dɛnan nɛ, ka kiwi lɛ a min yii guguru-an nɛ. Fɛstusu boo da, ǹ nə́ daa ka Pooli ni.

²⁴Fɛstusu nə́ n lɛ bũ á pɛ: «Kii Agripaa ganaa, ka min mɛnɛn tumaa bɛ́ kun wɔsɛn nɛ, ka yii tá giĩ kɛ ganaa. Zuifun tumaa na á daa masɛ li Zeruzalɛmu kiwi, ka kànaa nɛ, giĩ kɛ a sii ganaa. Maǹ nə́ goã n lɛ dii, mà giĩ kɛ doamaa bie a yii goã koo doo wa.

²⁵Ma kɔn nə sii yɛ a ganaa màn mɛn nə́ gɛ̀ dɔlɔ boe wa. Sɛnɛ, a bɛ́ á pɛ mà a sii nə n yɔrɔ bɔ kii gole gole kɛ li, man die diɛ walan le.

²⁶Ma bɛ́ re màn mɛn kiɛ̃ taãn-taãnɛ, ma dia kii gole gole lɛ la giĩ lɛ wɔ gɔn la, ma yii bɛ́ a ba bɛ ganaa wa, bɛ lɛ nɛ ma daa nɛ ka tumaa yɔrɔ-a, sanparɛ nsɛ kii Agripaa, màn mɛn bɛ́ toɛ, lɛsɔkɔn kɛ kio, ma màn kɔ́n yɛ ma kiɛ̃ giĩ lɛ wɔ gɔn la, ma dia kii gole gole lɛ la.

²⁷Sonbore, má yɛ máa mìi ba la n kòso nɛ dia bǎã nɛ, bɛ̀ n nə́ n ba a zɛ̀rɛbaa ǹ siin kiɛ̃ n da li wa.»