Read Samo, Southern NDS 5 Bible Online

NDS 5 - Samo, Southern bible

NDS 5

¹Giĩ goon dɔ nɛ, a tɔ n Ananiasi, a laanka a lɔ Safira kɔn wɔ ma, ǹ nə ǹ tán sã.

²Sɛnɛ, asɛ laanka a lɔ lɛ golee bɔlɔ goon la, á tán giɔ̀mɔ lɛ kɔ́n bɔ, á daa ka a gialakun kɛ nɛ, á kɔ dia dí-a wolen lɛn la.

³Sɛnɛ, Piɛrɛ pɛ nɛ: «Ananiasi, wàa na á baa ń toa *Sɛtaan nə́ n gɔ́ɔ̃ tii kɛnɛn, á n diɛ soɛ bɔ ganaa Lawa a Yiri Fu ni? Táa ma nə n tán giɔ̀mɔ lɛ kɔ́n bɔ.

⁴Min kɔ́n nə n da n tán lɛ a siɛ̃ ganaa wa. N bɛ́ ń sã dɔn, min kɔ́n nə n bíi mà n da ka a wɔrɔ-n wa. A na á saa lɔn sii kɛ a zɛnaa ǹ gɔn wɔ n foo ne? N bie n soɛ bɔ min ni wa, ma nə́ n soɛ bɔ Lawa nɛ.»

⁵Ananiasi bɛ́ á bɛa boon kɛn lɛn ma lɔn gɔrɔ, á bɔ á mɛnaa á gã. Minin mɛnɛn tumaa na a gɛ̀ boo ma, nyɛ́ɛ gole bɛn kũ.

⁶Tɔntɔraan nə́ yoo ǹ nə́ màn pɛnɛ a gere ganaa, ǹ nə́ saa ǹ nə́ woo bĩ.

⁷Biikoo sɔɔ miã bɛ kio, a lɔ daa wɔ. Sii mɛn bɛ́ á n zɛnaa, a bɛ dɔ̃ wa.

⁸Piɛrɛ lɛ dia la á pɛ nɛ: «Masɛ n nɔ̀n diɛ n la, ka ǹ ka tán lɛ sã giɔ̀mɔ kɛ ganaa?» Lɔ lɛ ná a lɛ si mà hiĩ, mà bɛa lɛ kɛ lɛ nɛ.

⁹Piɛrɛ tɔ́n wusoo á pɛ nɛ: «A na á saa lɔn ka kɔn wɔ ma kɛnɛn, ka wɔ Dɛnaa a Yiri Fu lon? Haya! Minin mɛnɛn nə wo n zuũ gere bĩ, bɛn nə́ wusoo ǹ nə́ daa, ma á ke ǹ gòã wuu miɛ kiɛnlɛ-a, maǹ die n dɔ gere siɛ.»

¹⁰A din bǎã-n gɔrɔ, lɔ lɛ bɔ á mɛnaa Piɛrɛ giulun, á gã. Tɔntɔraan lɛn bɛ́ ǹ nə́ wɔ kion, ǹ nə́ daa yaa a dɔ́ gã, ǹ nə́ saa ǹ ná a gere bĩ, a yala nə́ ǹ zuũ wɔ li.

¹¹Bɛa sii kɛ lɛ a zɛnaa nyɛ́ɛ da Lawa a sɔmɔ minin ganaa parsiini, ka a ma wolen tumaa nɛ.

¹²Dia dí-a wolen lɛn man nə́ goã kaãbaa ǹ sii dadara gigiã zɛnɛɛ minin bii. Ǹ tumaa, dia dí-a wolen laanka Lawa-nyankɔle gialakunun kɛn man nə́ goã kun, bɛ̀ ǹ golee Salomɔn a Siã Bǎã kɛ nɛ.

¹³Sɛnɛ, min kooro kɛ kɔ́n yii wɔ á woo wɔ kunun ǹ ni wa, a da yaa minin lɛn dɔn manə ǹ tɔ bǐɛ̃ pii.

¹⁴Màn na á goã miɛ zaman gole kɛ li die golee Dɛnaa Yezu li, giĩ gigiã nɛ ka lɔ gigiã nɛ, bɛn man nə́ goã kiɛ Lawa a zaman lɛ li.

¹⁵Minin man nə́ goã ǹ busulən naɛ piìn la hinlaa kataran la, bɛ̀ ǹ soo ǹ ne zii la, màn mɛn bɛ́ toɛ, bɛ̀ Piɛrɛ á kiɛ̃, ta a wúlu dinsɔɔ̃ nɛ, bɛ kaa ǹ mɛn ganaa.

¹⁶Min gigiã dɔ na á goã boe Zeruzalɛmu lɛkoro lɛ-a kiwin ni, ǹ nə́ die ka busulən ne, ka minin mɛnɛn dɔn bɛ́ nɔ̀ɔn baraan nə́ ǹ nɔmiɛ. Bɛn tumaa dɔ a nɔmaa na á goã nyɛɛ.

¹⁷Bɛa siin kɛn lɛn zɛnaa gɔ́ɔ̃ nɛ, Lawa a Kion wúlu-bɔlen kiã foo yoo, kun ka *Sadusɛɛ̃n lɛsɔkɔn minin kɛn tumaa nɛ a tá kun wolen lɛa. Ǹ nə́ pɛ mà yǎa ǹsɛn nə yui ǹ sii zɛnɛɛ.

¹⁸Ǹ nə́ minin kaa dia dí-a wolen lɛn ganaa, ǹ nə́ ǹ kũ, ǹ nə́ ǹ zũ kòso-n min tumaa yɔrɔ-a.

¹⁹Sɛnɛ, tèlò-n, Dɛnaa a lon a dia dí-a wole goon nə́ kòso kion lɛ a kiɛnlɛ bũ, á ǹ waa á ǹ kaa, á pɛ ǹ nɛ:

²⁰«Ka wo Lawa a kion, Yezu da ka yiikoonaabaa mɛn nɛ, ka bɛ boo da zaman nɛ.»

²¹Dia dí-a wolen lɛn ná a bɔlɔ si, bɛ lɛ a lɛa baayɛlɛ yiisoone gɔrɔ, ǹ nə́ woo Lawa a kion lɛ nɛ, ǹ nə́ minin daraa walan. Lawa a Kion wúlu-bɔlen kiã laanka a tá kun wolen nə́ daa, ǹ nə́ kiri-wɔlen kuru lɛ sɔkɔn, ka Izirayeli a min golen ne. Ǹ nə́ minin dia, mà ǹ wo dia dí-a wolen lɛn waa kòso-n, ǹ da ǹ nɛ.

²²Sɛnɛ, dí-nyalin lɛn bɛ́ ǹ nə́ dɔ kòso lɛ nɛ, ǹ wo dia dí-a wolen lɛn yaa wa. Ǹ bɛ́ ǹ nə́ n bɔyaa, ǹ nə́ daa pɛ,

²³mà ǹsɛn nə́ woo kòso lɛ yaa a lɛ n tiɛ̃-n sɔnbɔraanɛ, sɔraasin dɔn nə́ doa nɛ a kiɛnlɛ-a. Sɛnɛ, mà ǹsɛn bɛ́ ǹ nə́ kiɛnlɛ lɛ bũ, ma ǹsɛn nə min kɔn yɛ kòsokion lɛ gɔ́ɔ̃-n wa.

²⁴Ǹ bɛ́ ǹ nə́ boon kɛn ma, Lawa a Kion-lɛduə̃lin goledɛnaa laanka wúlu-bɔlen goledɛnan yiri nə́ n lɔlɔkɔn, ǹ ba doɛ̃ ǹ bɛ́ re màn mɛn taasɛ dia dí-a wolen kɛn papaã wɔ gɔn la doo wa.

²⁵Sɛnɛ, min goon daa pɛ ǹ nɛ: «Á ke, ka bɛ́ ka minin mɛnɛn kaa kòso-n lɛn, ǹ tá Lawa a Kion, ǹ nə́ minin darɛɛ.»

²⁶Lawa a Kion-lɛduə̃lin goledɛnaa lɛ sɛ yoo gɔrɔ, á woo kun ka dí-nyalin ni, ǹ nə́ dia dí-a wolen lɛn kũ, ǹ nə́ daa ǹ nɛ. Sɛnɛ, ǹ nə ǹ nɔmaa wa, a giala, maǹ nə́ goã nyɛ́ɛ biɛ, mà zaman lɛ á die ǹsɛn dii ka kɔlɔ nɛ.

²⁷Ǹ nə́ daa ka dia dí-a wolen lɛn nɛ, ǹ nə́ ǹ nyaa kiri-wɔlen kuru lɛ nɛ. Lawa a Kion wúlu-bɔlen kiã lɛ tɔ́n nɔ̀n da ǹ la:

²⁸ «Táa wɔsɛn nə́ pɛ wɔ́ laa ka ganaa, wáa ka baran minin daraa bɛa tɔ kɛ lɛ ganaa wa. Á ke, ka kaa daraa lɛ wɔ Zeruzalɛmu kiwi minin tumaa yiri ni. Ka ǹ li mà giĩ kɛ lɛ a gɛ̀ dɔlɔ wɔsɛn kũ?»

²⁹Sɛnɛ, Piɛrɛ laanka dia dí-a wole gialakunun lɛn nə́ ǹ lɛ si: «Wɔsɛn doamaa nɛ, wɔ Lawa bɔlɔ si a la minbuiinin wɔ nɛ.

³⁰Ka Yezu mɛn dere gɔn-a, ka dɛ lɛn, wɔ digolon Lawa lɛ na á bɛ lɛ yii kaa á bɔ geren bii.

³¹Lawa na á ná a din lɛ saa lon, á koa gugurubaa ǹ bǎã nɛ a din gusin, kii lɛa, kirisibaali lɛa, màn mɛn bɛ́ toɛ, Izirayeli minin nə boo la, ǹ wusoo ǹ sii baraan kio, Lawa nə ǹ sii baraan toa ǹ nɛ.

³²Wɔsɛn dinin man bɛa siin kɛn lɛn siéren lɛa, wɔsɛn laanka Yiri Fu kɛ nɛ, Lawa din nə ǹ mɛn kɔ a bɔlɔ-silin la.»

³³Kiri-wɔlen lɛn bɛ́ ǹ nə́ bɛa boon kɛn ma, ǹ foo yoo. Maǹ nə́ goã giɛ li ǹ dia dí-a wolen lɛn dɛ ǹ gã.

³⁴Sɛnɛ, giĩ goon nə́ yoo kiri-wɔlen lɛn bii, á pɛ mà ǹ soo ka kòso nɛn lɛn nɛ kanaa boɛɛn nɛ. Bɛa giĩ lɛ n *Fariziɛ̃ lɛa, a tɔ n Gamalieli, landa sii-daraali goon ne, a sii á kɔɔ̃n gána lɛ a minin-a parsiini.

³⁵Ǹ bɛ́ ǹ nə́ soo ka kòso nɛn lɛn nɛ, asɛ pɛ: «Izirayeli minin lɛn, ka yiri bɔ kaa zɛnaa ǹ sii li minin kɛn wɔ gɔn la.

³⁶A tɔn belebɔ wa, wɔsɛn nə́ Tedaasi a yoo yɛ, a na á goã n din biɛ màn gole lɛa, á min biɛ sii (400) miã yɛ, á kaa kun a din ni. Wɔ́ yɛ ǹ nə́ dɛ á gã, min mɛnɛn nə goã koe lɛ, bɛn nə́ sasawaa, ǹ kɔ́n goã wa.

³⁷Bɛ kio, wɔsɛn nə́ Galileen Zudaasi a yoo yɛ, á kɔnpɛ ka minin-nimii biikoo ne. A dɔ́ zaman baã á kaa a din kio. Sɛnɛ, wɔ yɛ, a dɔ́ gã, minin mɛnɛn tumaa kɔ lɛ, bɛn yii sasawaa.

³⁸Bɛ lɛ nɛ, ma á pii ka nɛ, máa ka baran ga minin kɛn lɛn walan doo wa, ka toa ǹ woo. Minin kɛn lɛn, bɛ̀ ǹ gù we yii ǹ sii kɛ lɛ, hinlaa bɛ̀ ǹ dí kɛ lɛ n boe min li, á re papaɛ̃ a din ganaa.

³⁹Sɛnɛ, bɛ̀ a n boe Lawa li, ka a boe la ka sii kɛ laanka dí kɛ papaã wa. Ka yiri bɔ ka dinin li, ka baran ga zia li Lawa li wa.» Kiri-wɔlen lɛn nə́ lɛ kɔ Gamalieli a doroo lɛ ganaa.

⁴⁰Ǹ nə́ lɛ dia dia dí-a wolen lɛn la, mà ǹ da wɔ. Ǹ nə́ minin kaa ǹ-a ǹ nə́ ǹ dɛ. Ǹ nə́ tɔ́n nə n gòon pepere ǹ yii li doo, mà ǹ baran toa ǹ Yezu tɔ kɛ pɛ doo wa. Bɛ kio, ǹ nə́ ǹ kaa.

⁴¹Dia dí-a wolen lɛn nə́ n bɔ kiri-wɔlen lɛn li ǹ nə́ woo. Ǹ foo goã kɔɔ̃n parsiini, a giala, Lawa ga ǹ ganaa, mà ǹ doamaa nɛ, ǹ fuu yɛ Yezu tɔ kɛ a lɛa.

⁴²Baraabaraa, Lawa a kion gɔ́ɔ̃ nɛ hinlaa ǹ dinin piɛn nɛ, ǹ goã minin daraa laanka Yezu Minin Nyin-sili boo kɔɔ̃n kɛ a pɛ lɛ diɛ wa.