Read Samo, Southern NDS 8 Bible Online

NDS 8 - Samo, Southern bible

NDS 8

¹Itian dɛ a gã kɛ lɛ kɔɔ̃n kɔ Sooli dɔ ganaa. A din pinaa kɛ lɛ nɛ, fuu gole yoo Lawa a sɔmɔ gialaa Zeruzalɛmu kiwi. Bɛ̀ á n bɔ dia dí-a wolen kɛn nɛ, Lawa-nyankɔlen lɛn tumaa sasawaa, ǹ nə́ woo Zudee gána bǎã gialakunun ni ka Samarii gána nɛ.

²Nyɛ́ɛbaa Lawa yii-n wolen nə́ Itian gere saa ǹ nə́ bĩ, ǹ ná a gɛ̀ wuu pɛ parsiini.

³ Sooli sɛ, asɛ na á goã n doɛ, mà asɛ Lawa a sɔmɔ kɛ nya. A na á goã we kionən ne, a giĩn laanka lɔn baã a soo ǹ ne, bɛ̀ a wo ǹ zũ kòso-n.

⁴Sɛnɛ, ǹ minin mɛnɛn sasawaa ke, bɛn ma nə́ goã n bibiĩ, bɛ̀ ǹ nə́ Yezu a boo kɔɔ̃n kɛ pii.

⁵Bɛa gɔn kɛ lɛ la, Filipi woo Samarii kiwi. Á pɛ bɛa kiwi lɛ a minin manɛ, mà Lawa bɛ́ mà á re Minin Nyin-sili mɛn diɛ, mà Yezu lɛ n bɛ lɛa.

⁶Zaman lɛ tumaa kɔn bɔlɔ ma, ǹ nə́ n too kɔ Filipi a boo li sɔnbɔraanɛ. Maǹ nə n too koe a lon, bɛ̀ ǹ tá giɛ a kaãbaa ǹ sii zɛnaan kɛn dɔn ganaa.

⁷Sonbore, nɔ̀ɔn babaraa gigiã na á goã n boe nɔ̀ɔndɛnan ganaa, bɛ̀ ǹ nə́ n lɛ dii parsiini. Bɔlɔka gigiã laanka siməə wole gigiã dɔ a busu nya.

⁸Nyɛnyɛɛ gole yɛ bɛa kiwi lɛ nɛ.

⁹Á daa yaa, giĩ goon dɔ na á goã bɛa kiwi lɛ nɛ, a tɔ n Simɔn. A na á goã koe siin zɛnɛɛ, á n kaãbaa diɛ Samarii minin ganaa parsiini.

¹⁰A na á goã n din biɛ màn gole lɛa, min tumaa goã n foo doɛ a ganaa, a kũ nɛnyaanan ganaa a wo min golen yaa. Maǹ nə́ goã pii: «Lawa kɔ́n pàã n giĩ kɛ nɛ, Lawa mɛn tɔ bɛ́ "Pàã Gole".»

¹¹Ǹ tumaa na á goã n foo doɛ giĩ lɛ ganaa, a giala, haalɛ bibi a na á goã kaãbaa diɛ ǹ ganaa ka a koe siin zɛnaa kɛ nɛ.

¹²Sɛnɛ, Filipi na á goã *Lawa a kiibaa ǹ Boo Tii Kɔɔ̃n kɛ pii Yezu *Krita wɔ gɔn la, á nyaa, mà Lawa a kiibaa ǹ dí lɛ na á n giala kɔ kanaa ka a din ni. Ǹ bɛ́ ǹ nə́ golee li, ǹ nə́ lɛ kɔ, lɔn laanka giĩn ni, ǹ nə́ *batɛmu kɛ si.

¹³Simɔn lɛ dɔ́ Lawa-nyankɔle baa, á lɛ kɔ batɛmu kɛ ganaa. A goã n boe Filipi kio doo wa. A bɛ́ á sii-nyaa ǹ siin laanka kaãbaa ǹ sii dadaran kɛn yɛ n zɛnɛɛ, sonbore, a dɔ nə́ n kaãbaa parsiini.

¹⁴Dia dí-a wolen lɛn Zeruzalɛmu kiwi, ǹ bɛ́ ǹ nə́ ma, mà Samarii minin nə́ lɛ kɔ Lawa a boo lɛ ganaa, ǹ nə́ Piɛrɛ laanka Zaã dia bɛa kiwi lɛ nɛ.

¹⁵Ǹ bɛ́ ǹ nə́ dɔ lɔn gɔrɔ, bɛa min paa lɛ Lawa nyankɔ Samarii minin lɛn manɛ, màn mɛn bɛ́ toɛ Lawa a Yiri Fu gisĩ ǹ dɔn la.

¹⁶Sonbore, Lawa a Yiri Fu goã á gisĩ ǹ kɔn la bɔrɔ wa, maǹ nə́ goã ǹ nə́ batɛmu dinsɔɔ̃ yɛ ka Dɛnaa Yezu tɔ nɛ.

¹⁷Piɛrɛ laanka Zaã tɔ́n mɛ la, ǹ nə́ n gɔnɔn da Samarii minin lɛn mìi ni, ǹ nə́ Lawa nyankɔ, yǎa Yiri Fu gisĩ ǹ la.

¹⁸Sɛnɛ, Simɔn bɛ́ á yɛ mà bɛ̀ dia dí-a wolen lɛn nə́ n gɔn da min la, mà Yiri Fu n gisĩ la, á pɛ ǹ nɛ: «Masɛ n die wɔrɔ koe ka la.

¹⁹Ka bɛa pàã kɛ lɛ kɔ masɛ dɔ la, màn mɛn bɛ́ toɛ, bɛ̀ masɛ dɔ́ nə́ n gɔn da minin mɛnɛn la, Yiri Fu gisĩ bɛn la.»

²⁰Sɛnɛ, Piɛrɛ ná a lɛ si: «N bɛ́ ń taasɛ mà n tá boe la, n Lawa a bǐɛ̃ sonbore kɛ pii ka wɔrɔ nɛ, n laanka n wɔrɔ tumaa bɔ̀n baa kun.

²¹Màn mɛn bɛ́ n zɛnɛɛ kànaa, n wɔ gii kɔ́n ba bɛ-n wa, a giala n foo a tele-n Lawa yɔrɔ-a wa.

²²N taasɛ n golee n sii baraan li, n wusoo n baraabaa kɛ kio, n Dɛnaa nyankɔ. Taasiɛ naarɛ mɛn wɔ n foo-n ke, kɔntan Lawa á re bɛ toɛ n nɛ.

²³Má yɛ máa busii baraa tá n foo ne, sii baraa dɔ́ nə n kũ á n baa bɛ̀rɛ lɛa.»

²⁴Simɔn pɛ: «Ka dininmaan nə Dɛnaa lɛ nyankɔ masɛ a lɛa, màn mɛn bɛ́ toɛ, ka sii mɛn boo da masɛ wɔ gɔn la, bɛ kɔ́n baran n zɛnaa masɛ-n wa.»

²⁵Piɛrɛ laanka Zaã tɔ́n nyaa ka Lawa a boo ne, siin mɛnɛn nə n zɛnaa Dɛnaa Yezu lɛ nɛ, mà bɛn tá kiɛ̃-n sɛ́wɔ-n gɔrɔ. Bɛ kio, ǹ nə́ wusoo ǹ nə́ woo Zeruzalɛmu. Ǹ nə́ goã Boo Tii Kɔɔ̃n kɛ pii Samarii gána kiwi gigiã nɛ.

²⁶Dɛnaa a lon a dia dí-a wole boo da ka Filipi ni: «Zii saa n wo Ezipti gána paǹ li, zii mɛn bɛ́ boe Zeruzalɛmu á woe Gaazaa kiwi, minin nə́ ǹ ba koe lɛ wa, wo bɛ saa.»

²⁷Filipi bɛ́ á bɛ ma lɔn gɔrɔ, á yoo fufuu á woo. Á daa yaa, giĩ goon dɔ na á goã bɛa zii lɛ la, Etiopii gána a kii lɔ dɛnaa kɛ a dí-nyali gole goon ne. Giĩ lɛ n kii lɛ a kion sii yɔrɔ-bɔle lɛa, á koa a naforo din tumaa mìi la. Bɛa Etiopii gána min kɛ lɛ na á woo Lawa guguru kɔ Zeruzalɛmu,

²⁸a na á wusoo á woe a gána nɛ. A bɛ́ giã nɛ a wotoro ne, a na á goã Lawa a boo gii-dali Izayii a sɛ́wɔ kɛ pii.

²⁹Yiri Fu pɛ Filipi ni: «N zɔ̃ n dɔ wotoro kɛ li.»

³⁰Filipi baa si á n mɔrɔ a ganaa, á giĩ lɛ lɛ ma Lawa a boo gii-dali Izayii a sɛ́wɔ pii, yǎa a pɛ nɛ: «N bɛ́ màn mɛn pii, n tá bɛ giala miɛ taãn-taãnɛ?»

³¹Giĩ lɛ Filipi lɛ si: «Man siɛ lɔn ma a giala ma, bɛ̀ min na a yɔrɔ pɛ ma-n wa?» Á lɛ dia Filipi la, á wɔ wotoro lɛ nɛ á giã a li.

³² Giĩ lɛ bɛ́ á goã bǎã mɛn pii sɛ́wɔ lɛ nɛ, bɛ n ka kɛ nɛ: «Ká sère bɛ́ lɔn ǹ nə́ woe a bɔlɔ kuri, ka sère nɛ mɛn bɛ́ kiĩni a ka-kuruli gɔn, a dɔ n miɛ̃ a ba n lɛ buĩ á boo diɛ wa.

³³Ǹ ná a puusə kɔ, ǹ nə́ n piã ǹ sonbore kɔ la wa. Ǹ ná a nyin bɔ, ǹ nə́ bɔ kanaa minin li. Bɛ lɛ tɔ ganaa, a bɛ́ a re nɛyaanan yii, min tɔn bɛn boo da wa.»

³⁴Giĩ lɛ pɛ Filipi ni: «Ma nə n nyankoe máa n pɛ ma nɛ, Lawa a boo gii-dali kɛ lɛ n boo diɛ die wɔ gɔn la? A n boo diɛ a din wɔ gɔn la, hinlaa a n boo diɛ min kɔsɔ wɔ gɔn la?»

³⁵Filipi tɔ́n nə́ n lɛ bũ, á saa sɛ́wɔ kɛ lɛ a boo ganaa, á Yezu boo kɔɔ̃n kɛ pɛ giĩ lɛ nɛ.

³⁶Ǹ bɛ́ zii lɛ la woe, ǹ nə́ woo dɔ mu bǎã goon ne, yǎa Etiopiin giĩ lɛ pɛ: «Mu á ke. Wàa n nə masɛ kurii batɛmu lɛ a yɛ ganaa?»

³⁷[Filipi pɛ nɛ: «Bɛ̀ ń golee Lawa li ka n foo din tumaa nɛ, n tá boe la n bɛa batɛmu lɛ yɛ.» Giĩ lɛ ná a lɛ si: «Masɛ golee li máa Yezu Krita lɛ n Lawa a Nɛgiĩ lɛa.»]

³⁸Bɛ kio, giĩ lɛ pɛ mà ǹ wotoro lɛ kurəə. A din dí-nyali gole kɛ lɛ, a laanka Filipi wɔ mu lɛ li, ǹ dinin min paa, yǎa Filipi batɛmu lɛ da a ganaa.

³⁹Ǹ bɛ́ ǹ nə́ soo ǹ nə́ n bɔ mu lɛ li, Yiri Fu Filipi saa. Giĩ lɛ yɛ a yii-n doo wa, sɛnɛ, a ná a zii gialakun kɛ tɔ wɔ ka nyɛnyɛɛ nɛ.

⁴⁰Filipi sɛ́ woo n din yaa Azɔti kiwi. Á soo walan á zii kũ, bɛ̀ a n Yezu boo pii kiwin tumaa nɛ, yǎa á woo dɔ Sezaaree kiwi.