Read Samo, Southern Rɔm 11 Bible Online

Rɔm 11 - Samo, Southern bible

Rɔm 11

¹ Man nɔ̀n diɛ kəni: Lawa na á ná a din a tɔrɔ kɛ daa? Haayii dɛ! A giala, ma dinmaa lɛ n Izirayeli min lɛa, Abrahamu a nɔ̀ɔn nə ma nɛ, man Bɛnzamɛn tɔrɔ lɛa.

²Lawa din saa lɛlɛ a ná a tɔrɔ mɛn bɔ ke, a bɛ daa wa dɛ. Yilii bɛ́ wuu pii Lawa ganaa Izirayeli a lɛa bǎã mɛn nɛ, Lawa a boo á màn mɛn pii walan, ka n yiri gisĩ bɛ nɛ.

³ Yilii mà Dɛnaa ganaa: «Ǹ nə́ n boo gii-dalin dɛ, ǹ nə́ n wúlu bɔ ǹ bǎãn ziziɛ̃. Masɛ dinsɔɔ̃ n má goã, maǹ giɛ li ǹ tá masɛ dɔ nyin boe.»

⁴ Sɛnɛ, Lawa na á pɛ nɛ mà wàa? Mà asɛ min duu sɔbaa (7 000) bɔ, á ǹ koa a wɔn lɛa, ǹ kɔ́n ná a tɔn nə n musin kuruməə tán *Baali dì kɛ yɔrɔ-a wa.

⁵Bɛa yɔrɔ goon kɛ lɛ la, haalɛ ka pelo yii ni, Izirayeli min gialakun boɛɛn tan, Lawa din bɔ á kɔnpɛ a din a bǐɛ̃baa kɛ nɛ.

⁶Lawa na á ǹ bɔ a din a bǐɛ̃baa a lɛa, ǹ nya ǹ dí a lɛa bie wa. Bɛ̀ ǹ nya ǹ dí a lɛa nɛ, bɛ̀ Lawa a bǐɛ̃ lɛ ba n bíi doo mà bǐɛ̃ wa.

⁷Wɔ n die pii mà wàa kəni? Izirayeli tɔrɔ lɛ bɛ́ á goã giɛ màn mɛn li, a bɛ yɛ wa. Lawa din boɛɛn mɛn bɔ, bɛn nə́ yɛ, gialakunun kɛn sɛn nə boo la, ǹ ná a giala ma wa.

⁸ A na á n pɛ Lawa a boo ne, bɛa gialakunun kɛn lɛn wɔ gɔn la: «Lawa toa ǹ yiri tã. Haalɛ a da kaa pelo lɛ, maǹ giɛ, sɛnɛ, ǹ yii a wɔlɔ yii wa, manə n too koe, sɛnɛ, ǹ too a boo miɛ wa.»

⁹ Kii Davida dɔ́ pɛ: «Ǹ dinin zɔ́n màn-biin die ǹ nə ǹ kũ ka kan bɛ́ lɔn, a die a ǹ mɛnaa ǹ gòã baa, a die a dɔlɔ baa ǹ mìi ni.

¹⁰Ǹ yii die a tii ká a baran wɔlɔ yɛ dinin wa, Lawa die a bɛ̀rɛbaa ǹ nɔmaa da ǹ mìi ni yǎa duduu.»

¹¹Man nɔ̀n diɛ kəni: Zuifun sã lɛ na á ǹ papaã baa duduu ya? Haayii dɛ! Sɛnɛ, ǹ sã lɛ a lɛa nɛ, kirisibaa mɛn bɛ́ ǹ wɔ lɛa, tɔrɔ kɔsɔn kɛn nə́ bɛ yɛ, màn mɛn bɛ́ toɛ, Zuifun foo wuu pɛ ǹ li.

¹²Zuifun bɛ́ ǹ nə́ sii baraa zɛnaa, sii sonbore gigiã dɔ kanaa din tumaa ganaa. Zuifun zaman boɛɛn kooro na á kirisibaa, sɛnɛ, bɛa sii sonboren kɛn lɛn nə́ dɔ tɔrɔ kɔsɔn min gigiã gigiã ganaa. Bɛ̀ Izirayeli tumaa daa Yezu *Krita dɔ̃ ǹ mɛn waáraa, sii sonboren mɛnɛn bɛ́ re boe bɛ nɛ, ǹ dɔ kanaa ganaa, bɛn ba re mɔnɛɛ ǹ la yii-n wa?

¹³Kasɛn mɛnɛn bɛ́ ka a Zuifun lɛa wa, man kɔn kasɛn nɛ sisia. Lawa na á masɛ bɔ, á ma dia tɔrɔ kɔsɔn la, mà ma a din a boo kɛ pɛ. Bɛ lɛ nɛ, ma tá n nyɛnyɛɛ bɛa dí lɛ a nyɛɛ gɔ́ɔ̃ nɛ,

¹⁴ta bɛ á re ma din tɔrɔ minin Zuifun kɛn lɛn foo busi, a gialakunun kirisibaa ǹ gòã baa.

¹⁵Sonbore, ǹ da para li kio ne, kanaa bii kɔɔ̃n kɔ kɔn ka Lawa nɛ. Bɛ̀ Lawa wusoo á n yɔrɔ da ǹ la, wàa n die n zɛnɛɛ kəni? A n die n biɛ ka min a yii kaa a bɔ geren bii bɛ́ lɔn!

¹⁶Bɛ̀ n wii dii bibinaa kɔ Lawa la, ma nə́ n ná a gialakun kɛ tumaa dɔ kɔ la. Bɛ̀ da gòonən nə́ n kɔ Lawa la, da lɛ a gùrùn dɔn man nə́ n kɔ la.

¹⁷Izirayeli tɔrɔ lɛ n kɔnboe ka *olivie da kɔ́n nɛ min zumu, a ná a gùrùn tɛnɛn kuru. Nsɛ mɛn bɛ́, n ba Zuifu lɛa wa, man kɔnboe ka don a olivie da gùrù ni, ǹ nə́ kuru, ǹ nə́ daa wɔ gùrù taãnan lɛn bǎã nɛ. Ǹ olivie da mɛn zumu lɛn, bɛ lɛ gòonən manə n dɔ toe sisia.

¹⁸Bɛ lɛ taman yii, n baran n din koa gùrù kurii wolen lɛn ganaa wa. N din koa ǹ paǹ din nə maa bɔrɔ? Nsɛ bɛ́ n bie da lɛ gòonən guĩ wa, da lɛ gòonən manə nsɛ guĩ.

¹⁹Táa ma n die pii: «Maǹ nə gùrùn kɛn lɛn kuru, màn mɛn bɛ́ toɛ, ǹ masɛ wɔ ǹ bǎã nɛ!»

²⁰Sonbore ne. Maǹ nə́ ǹ kuru a giala, ǹ golee Lawa li wa. Nsɛ dɔ n doa nɛ, golee Lawa li barka nɛ. N baran toa din gole kɔ wɔ n foo-n wa. Sɛnɛ, nyɛ́ɛ baa Lawa nɛ.

²¹A giala, Zuifun mɛnɛn bɛ́ kɔnboe ka da lɛ a gùrù taãnan nɛ, bɛ̀ Lawa bɛn sã toa wa, a n die nsɛ wɔ toɛ lɔn?

²²N yiri kɔ sii màn paa kɛ li: Lawa a bǐɛ̃baa kɛ laanka a kakaarɛbaa kɛ nɛ. A n kakaarɛ a piãman wolen ganaa, a n bǐɛ̃ zɛnɛɛ nsɛ dɔ nɛ. Sɛnɛ, yǎa n goɛ̃ bɛa bǐɛ̃ kɛ lɛ nɛ, bɛ bie wa, á re n dɔ kuri a n daa.

²³Bɛ̀ Zuifun lɛn dɔn nə́ wusoo ǹ goleemalibaã kɛ kio, Lawa á re wusii a ǹ wɔ da giala lɛ ganaa, a giala, bɛa pàã tá Lawa lon.

²⁴Sonbore, nsɛ tɔrɔ kɔsɔ kɛ lɛ, nsɛ nə n goã don a olivie da gùrù lɛa. N lɛ-mui sii bɛ́ a bie ka sii mɛn nɛ wa, bɛ na á n zɛnaa n nɛ. Maǹ nə́ n bɔ n bǎã nɛ, ǹ nə́ daa n wɔ olivie da taãn ganaa. Sanparɛ Zuifun mɛnɛn dinin bɛ́, ǹ nə́ goã olivie da taãn kɛ a gùrù taãn-taãnan lɛa, bɛ̀ ǹ tá wusii bɛn woe ǹ bǎã zizin ni, bɛa re naanaa koe a la yii-n wa?

²⁵Ma dɔɔ̃nɔn lɛn, man giɛ li ma sii-durii goon nyaa ka nɛ, màn mɛn bɛ́ toɛ, ka baran ka dinin baa sii-dɔ̃lin lɛa wa. Sonbore ne, Zuifun gigiã yiri tã, ǹ ba boe la ǹ tá màn kɔ́n giala miɛ wa. Sɛnɛ, bɛa re beleboe wa. A n die goɛ̃ miɛ̃, yǎa Lawa din a bíi wolen kɛn tumaa tɔrɔn kɔsɔn bii, bɛn nə die a ganaa ǹ nyɛɛ.

²⁶ Bɛa yɔrɔ kɛ lɛ la, Izirayeli minin dɔn tumaa á re kirisibiɛ, ká a bɛ́ á n kiɛ̃ lɔn: «Nyin-sili lɛ n die boe *Siɔn kele la Zeruzalɛmu kiwi, a n die Zakɔba tɔrɔ minin kɛn Lawa bɔlɔ-tii nyɛɛ.

²⁷ Bɛ̀ má ǹ sii baraan nya ǹ mɛn waáraa, bɛ lɛ n die lɛ kɔ kɔn la biɛ masɛ laanka ǹsɛn bii ni.»

²⁸Ǹ piã ka Lawa a boo tii kɔɔ̃n kɛ lɛ taman yii ni, Zuifun tá Lawa a zɔ́ɔn lɛa. Bɛ na á n zɛnaa kasɛn tɔrɔ kɔsɔn kɛn bǐɛ̃ a lɛa. Sɛnɛ, Lawa din a minin bɔ kɛ wɔ gɔn la, Lawa tá ǹ narɛ ǹ digolon lɛ-a.

²⁹A giala, bɛ̀ Lawa màn kɔ, a na á kɔ, bɛ̀ á min dɔ bíi, a na á bíi, a ba wusii a sii zɛnaa kio wa.

³⁰Kasɛn tɔrɔ kɔsɔn kɛn lɛn, lɛlɛ ká goã ká Lawa bɔlɔ tii. Sɛnɛ kanna, Zuifun Lawa bɔlɔ-tii taman yii, Lawa makara bɔ ka ganaa.

³¹A n die n zɛnɛɛ bɛa yɔrɔ kɛ lɛ la Zuifun lɛn dɔn manɛ. A laanɛ ǹ tá Lawa bɔlɔ tii wolen lɛa kanna ke, ǹ kɔ́n pinaa Lawa á re makara boe ǹ dɔn ganaa.

³²Lawa na á min din tumaa baa ka kòso nɛn bɛ́ lɔn, ǹ bɔlɔ-tii a lɛa. A na á bɛ zɛnaa, màn mɛn bɛ́ toɛ, a makara bɔ min tumaa ganaa.

³³ Lawa a bǐɛ̃ lɛ á gole á la yii ni! A sii-doɛ̃ dɔ á zuzulu á la yii ni! Min kɔ́n ba boe la a na a kiri kɛ giala ma wa, min kɔ́n ba boe la a na a makara kɛ dɔ giala ma wa.

³⁴ Ká a bɛ́ á n pɛ Lawa a boo-n lɔn: «Die n boe la a Lawa a taasiɛ dɔ̃ sonbore? Die n yiri koe la? Min kɔ́n!»

³⁵ Hinlaa «Die ne, mà asɛ na á màn kɔ Lawa la lɛlɛ, sɛnɛ, mà a ná a tɔn bɛ dòo saraa asɛ la wa? Min kɔ́n!»

³⁶ A giala, màn tumaa n boe a din ni, a tumaa na a tan a din barka nɛ, a tumaa na a tan a din a lɛa. Lawa die a goã guguru miɛ̃ yǎa duduu. A n miɛ̃!