Read Samo, Southern Rɔm 13 Bible Online

Rɔm 13 - Samo, Southern bible

Rɔm 13

¹Min din tumaa doamaa nɛ a goledɛnan bɔlɔ si. A giala, goledɛnaabaa kɔ́n banban, bɛ̀ bɛ ná a bɔ Lawa li wa. Goledɛnan mɛnɛn bɛ́ ǹ tan ke, ǹ koa na á bɔ Lawa li.

²Bɛ lɛ nɛ, min mɛn bɛ́ a ba goledɛnaa bɔlɔ sii wa, ǹ dɛnaa na a ba lɛ koe Lawa a sii yɔrɔ bɔ ganaa wa. Min mɛnɛn bɛ́ n piɛ̃ ǹ ba lɛ koe Lawa a sii yɔrɔ bɔ ganaa wa, bɛn man giɛ dɔlɔ li, ǹ tá diɛ ǹ dinin mìi ni.

³Sonbore, sii bǐɛ̃-zɛnaalin doamaa bie, ǹ nyɛ́ɛ baa pàãdɛnan man wa, sii baraa-zɛnaalin doamaa nɛ ǹ nyɛ́ɛ baa ǹ nɛ. Táa n ba li n nyɛ́ɛ baa goledɛnaa-n wa? Bǐɛ̃ zɛnaa, á re n para pii.

⁴Goledɛnaa lɛ n dí nyɛɛ Lawa nɛ, màn mɛn bɛ́ toɛ, a n da bǐɛ̃ zɛnaa ganaa. Sɛnɛ, bɛ̀ n tá sii baraa zɛnɛɛ, n doamaa nɛ n nyɛ́ɛ baa pàãdɛnaa nɛ, a giala, dɔlɔ bɔ ǹ pàã lɛ bie a gɔn kooro wa. A n Lawa a dí-nyali lɛa, á Lawa a foo-yoo ǹ dɔlɔ diɛ sii babaraa-zɛnaalin mìi ni.

⁵Bɛ lɛ taman yii, a n siĩni min pàãdɛnan bɔlɔ si, fuu kɛ dinsɔɔ̃ a lɛa bie wa, sɛnɛ, màn mɛn bɛ́ toɛ, n foo baran n zɛ̀rɛ baa wa.

⁶ Bɛ lɛ dɔ a lɛa nɛ, ka á nyin giɔ̀mɔ sarɛɛ, a giala, goledɛnan lɛn dɔn man bɛ zɛnɛɛ, ǹ tá dí nyɛɛ Lawa nɛ.

⁷Ka doamaa bɛ́-n ka màn mɛn kɔ goledɛnan la, ka bɛ kɔ ǹ la. Ka nyin giɔ̀mɔ saraa ǹ la, ka wusuru kɔ ǹ la, ka nyɛ́ɛ baa ǹ nɛ, ka ǹ guguru kɔ. Ka doamaa bɛ́ nɛ, ka màn mɛn kɔ ǹ la, ka bɛ kɔ ǹ la.

⁸Ka baran toa min kɔ́n a giɔ̀mɔ goã ka ganaa wa, bɛ̀ á n bɔ giɔ̀mɔ goon toto ne, bɛ n ka kɔn-narɛɛ nɛ. Min mɛn bɛ́ ǹ miã narɛ, bɛa dɛnaa n Lawa a dí-pɛn lɛ piɛ̃.

⁹ Sonbore, dí-pɛn mɛnɛn bɛ́ pii mà «N baran naarɛbaa zɛnaa wa, n baran gɛ̀ dɛ wa, n baran wurumu baa wa, n yii baran bɔ min kɔsɔ gɔn màn kɔ́n li wa», bɛn laanka gialakun kɛ tumaa mìi n ke: «N miã kɔsɔ dɔ narɛ ka n bɛ́ n din narɛ lɔn.»

¹⁰Bɛ̀ min mɛn tá ǹ miã kɔsɔ narɛ, a ba sii baraa zɛnɛɛ-n wa. Miã kɔsɔ narɛɛ lɛ n Lawa a dí-pɛn tumaa lɛ piɛ̃ lɛa.

¹¹Ka sii lɛ zɛnaa miɛ̃, a giala, wɔ bɛ́ biikoo mɛn nɛ sisia, ka á doɛ̃. Kaa yoo a bɔ nyuù-n biikoo lɛ n ke koe! Sonbore ne, kirisibaa lɛ wɔlɔ kunu kɔ wɔ ganaa pelo, á la wɔa golee Lawa li giala koe waáraa nɛ.

¹²Tèlò lɛ wɔlɔ lui, lɛ̀ a waa diri. Ka daa wɔ n na, wɔ n bɔ wɔlɔ tì siin ganaa, wɔ wɔlɔ fúlu sii zɛnaa a ziabaa ǹ mànan wɔ wɔ ganaa.

¹³Ka daa wɔ tɔ pepere wɔ, ka wɔlɔ fúlu minin bɛ́ zɛnɛɛ lɔn. Ka daa wɔ n parabaa ka màn dadaran bii laanka yɔ mii baraa nɛ, ka naarɛbaa laanka kɔkɔrɔbaa nɛ, ka zia laanka foo a wuu pɛ minin li ni.

¹⁴Ka Dɛnaa Yezu *Krita pàã wɔ ka ganaa, ka baran ka dinin kɔ gɔ̀nɔn foo siin kɛn la, ka ǹ bɔlɔ sɛ̀-mui siin kɛn zɛnaa wa.