Read Samo, Southern Rɔm 16 Bible Online

Rɔm 16 - Samo, Southern bible

Rɔm 16

¹Man wɔ dɔɔ̃n lɔ Feebe a sii toɛ ka gɔn. A n di nyɛɛ Sankree a Lawa a sɔmɔ minin manɛ.

²Ka kũ doɛ̃ sɔnbɔraanɛ Dɛnaa tɔ lɛ a lɛa, a kɔnpɛ ka Lawa-nyankɔlen sii zɛnaa ǹ gɔn nɛ. A laadoo bɛ́ re doe ka ganaa ka sii woo sii ni, ka bɛ zɛnaa nɛ. A giala, a dɔ nə́ n dɔ min gigiã lɛ, haalɛ masɛ dinmaa.

³ Ma á fòo diɛ Prisili laanka Akilaasi ni. Maǹ ma miã dí nya kun wolen lɛa Yezu *Krita a dí lɛ nɛ.

⁴Maa kirisibaa a lɛa, ǹ nə́ lɛ kɔ ǹ nə́ sii zɛnaa, ǹ dinin nyin nə́ boe la, a goã sii mɛn nɛ. Masɛ dinsɔɔ̃ bie bɛa bǐɛ̃ kɛ doɛ̃ ǹ nɛ wa, Lawa a sɔmɔ minin mɛnɛn bɛ́ tɔrɔ kɔsɔn lɛa, bɛn dɔn man bɛa bǐɛ̃ lɛ doɛ̃ ǹ nɛ.

⁵Lawa a sɔmɔ minin mɛnɛn bɛ́, n lɛ soe kɔn Prisili laanka Akilaasi lɛ a kion, ma á fòo diɛ bɛn dɔn manɛ. Ma á fòo diɛ ma dɔɔ̃n Epenɛti sonbore kɛ nɛ, a din na á lɛ kɔ Krita ganaa bibinaanɛ Azii gána nɛ.

⁶Ma á fòo diɛ Mariya nɛ, asɛ mɛn bɛ́ á dí gigiã nyaa ka nɛ.

⁷Ma á fòo diɛ Andronikisi laanka Zuniasi ni, ma din tɔrɔ minin manɛ, wɔ́ kòso dɔ zɛnaa kun. Lawa a dia dí-a wole sonboren manɛ, ǹsɛn dinin nə́ Dɛnaa lɛ wɔn baa masɛ nyɛɛnɛ.

⁸Ma á fòo diɛ Anpliatusu ni, min mɛn sii bɛ́ kaka ma ganaa parsiini wɔa Dɛnaa a lɛa.

⁹Ma á fòo diɛ Urbɛn nɛ, maa dí nya kun wole ne Krita tɔ lɛ a lɛa. Ma á fòo diɛ maa giaáragiĩ sonbore Sitakisi ni.

¹⁰Ma á fòo diɛ Apelɛsi ni, min mɛn bɛ́ á lɛ kɔ fuu ganaa Krita a lɛa. Ma á fòo diɛ Aristobulu a kion minin manɛ.

¹¹Ma á fòo diɛ ma din tɔrɔ min Erodiɔn nɛ. Narsiisi a kion minin mɛnɛn bɛ́ Lawa nyankoe, ma á fòo diɛ bɛn manɛ.

¹²Ma á fòo diɛ Trifɛnɛ laanka Trifozi ni, bɛn mɛnɛn bɛ́ dí nyɛɛ Dɛnaa nɛ, mà á fòo diɛ ma miãnɛn Pɛrsiisi ni, asɛ mɛn bɛ́ á dí gigiã nya Dɛnaa nɛ.

¹³ Ma á fòo diɛ Dɛnaa a dí-nyali gole Rufusu ni, ka ǹ dan nɛ, bɛ mɛn bɛ́ masɛ dɔ dan lɛa.

¹⁴Ma á fòo diɛ Asɛnkriti ni, ka Felegɔn nɛ, Ɛrmɛsi laanka Patrobaasi ni, Ɛrmasi laanka dɔɔ̃nɔn mɛnɛn bɛ́ kunun ǹ ni.

¹⁵Ma á fòo diɛ Filoge laanka Zuli ni, Neree laanka ǹ miãnɛn nɛ, Linpasi laanka Lawa-nyankɔlen mɛnɛn tumaa bɛ́ kunun ǹ ni.

¹⁶Ka fòo sonbore da kɔn nɛ. Krita a sɔmɔ minin tumaa á fòo diɛ ka nɛ.

¹⁷Ma dɔɔ̃nɔn lɛn, man ka nyankoe taãn-taãnɛ, min mɛnɛn bɛ́ toɛ̃-kɔn we Lawa-nyankɔlen bii, ǹ nə́ ǹ yiri siɛ̃ ǹ tá ǹ papaɛ̃, ka n dinin kũ bɛn ganaa. Ka n daraa Lawa a boo mɛn ganaa, bɛa minin kɛn lɛn da ǹ boon laanka ǹ minin daraa ǹ siin man zia biɛ bɛa boo kɛ lɛ ganaa. Ka n na ka n bɔ bɛa minin kɛn lɛn ganaa.

¹⁸A giala, bɛa minin kɛn lɛn bie dí nyɛɛ wɔa Dɛnaa Krita-n wa, maǹ dí nyɛɛ ǹ dinin nɔ̀ nɛ. Maǹ yiri baãnaanan siɛ̃, ka ǹ minin bebele ǹ boo paparɛn kɛn nɛ.

¹⁹Sonbore, min tumaa tá kaa Lawa bɔlɔ-sii kɛ doɛ̃. Bɛ lɛ na á toa, ma tá n nyɛnyɛɛ kaa lɛa. Sɛnɛ, man giɛ li ka ga sii bǐɛ̃ zɛnaa li, ka bɛa dɔ̃lin baa, ka baran ga sii baraa zɛnaa li, ka bɛa dɔ̃lin baa wa.

²⁰Kànaa ka boɛɛn nɛ, là nyantoro-kɔle Lawa á re *Sɛtaan tuturi ka gòã giulun. Wɔa Dɛnaa Yezu a bǐɛ̃ die a goã kun ka nɛ!

²¹ Maa dí nya kun wole Timote á fòo diɛ ka nɛ, ka ma tɔrɔ minin dɔn nɛ: Lusiisu ni, Zaazɔn nɛ ka Sɔsipatrɔsi ni.

²²Masɛ Tɛrtusu mɛn sɛ́wɔ kɛ lɛ kiɛ̃, ma á fòo diɛ ka nɛ ka Dɛnaa tɔ nɛ.

²³ Gayusu mɛn bɛ́ masɛ laanka Lawa a sɔmɔ minin tumaa a zaàtiingiĩ lɛa, bɛ á fòo diɛ ka nɛ. Kiwi lɛ a wɔrɔ-koali Erasti á fòo diɛ ka nɛ, ka wɔ dɔɔ̃n Kartusu dɔ nɛ.

²⁴[Wɔa Dɛnaa Yezu Krita a bǐɛ̃ die a goã kun ka tumaa nɛ. A n baa wɔ-n miɛ̃!]

²⁵Ka daa wɔ barka da Lawa nɛ! Á boe la a wɔ pàã gole kɔ golee a din li gɔ́ɔ̃ nɛ. Bɛ nə n zɛnɛɛ a Boo Tii Kɔɔ̃n kɛ barka nɛ man pii. Man bɛa Boo Tii Kɔɔ̃n kɛ lɛ pii, Yezu Krita wɔ gɔn la. Bɛa boo lɛ n sonbore durii kɔ́n nyɛɛ wɔ nɛ, sonbore mɛn bɛ́ á goã durii ni haalɛ lɛlɛ-lɛlɛ.

²⁶Sɛnɛ sisia, bɛa sonbore lɛ bɔ kanaa. Lawa a boo gii-dalin sɛ́wɔn nə́ nyaa, kanna, Lawa nyabaã lɛ din dùũ barka nɛ, bɛa sonbore lɛ bɔ kanaa, tɔrɔ kɔsɔn kɛn dɔn tumaa dɔ̃, màn mɛn bɛ́ toɛ, ǹ lɛ kɔ Boo Tii Kɔɔ̃n lɛ ganaa, ǹ Lawa bɔlɔ si.

²⁷Lawa goon toto mɛn dinsɔɔ̃ bɛ́ sii-dɔ̃li lɛa, gugurubaa n bɛ wɔ lɛa yǎa duuduu! A n miɛ̃.