Read Samo, Southern Rɔm 4 Bible Online

Rɔm 4 - Samo, Southern bible

Rɔm 4

¹Wɔ n die pii mà wàa kəni, wɔ digolo Abrahamu wɔ paǹ li? A na á wàa yɛ a minbuiin nɛbaa gɔ́ɔ̃ nɛ?

²Lawa na á lɛ kɔ a ganaa a nya ǹ dín lɛa? Sonbore, Abrahamu sɛ kɔn nə́ dí nya, màn mɛn bɛ́ boe la a tá a tɔ boe, sɛnɛ, Lawa yɔrɔ-a bie wa.

³ Lawa a boo kɛ n pii, mà «Abrahamu nə́ n foo doa Dɛnaa Lawa ganaa. Bɛ lɛ na á toa, Lawa kũ min pepere lɛa.»

⁴Bɛ̀ min dí nya, a na a saraa yii, bɛa saraa kɛ bie bǐɛ̃baa ǹ màn lɛa, ǹ nə́ kɔ la wa, a din a doakasie ne.

⁵Sɛnɛ, Lawa wɔ ba miɛ̃ wa. Lawa n giɛ golee Lawa li ganaa. Ta nya ǹ dí na a ba min lon á nyɛɛ wa, bɛ̀ á daa yaa, ǹ dɛnaa golee Lawa a zɛ̀rɛ bɔ sii baraa zɛnaali ganaa ǹ dí kɛ lɛ li, Lawa n lɛ koe ǹ dɛnaa ganaa min pepere lɛa, a goleemali kɛ lɛ a lɛa.

⁶Bɛ̀ Lawa lɛ kɔ min ganaa, a da yaa ǹ dɛnaa bie á dí nya, á bɛa lɛ-kɔmaganaa kɛ lɛ yɛ wa, barka dɛnaa ǹ ka bɛ nɛ. Kii Davida bɛ́ bɛa barka dama-a kɛ lɛ boo diɛ, á pɛ:

⁷ «Lawa min mɛnɛn tumaa a sii baraan toa ǹ nɛ, á ǹ sii baraan tuturu, barkadɛnan man ka bɛn nɛ.

⁸Lawa bɛ́ a ba giɛ min mɛn ganaa sii baraa-zɛnaali lɛa wa, barkadɛnaa n ka bɛ nɛ.»

⁹Bɛa Lawa a bǐɛ̃ kɛ lɛ n Zuifu kurii wolen kɛn dininsɔɔ̃nɔn wɔ lɛa? Hinlaa a tá tɔrɔ kɔsɔ kuriibaã wolen kɛn dɔn wɔ lɛa? Má pɛ gɔrɔ máa Abrahamu nə́ n foo doa Dɛnaa Lawa ganaa. Bɛ lɛ na á toa, Dɛnaa Lawa kũ min pepere lɛa.

¹⁰Bɛ na á n zɛnaa biĩ? A na á n zɛnaa a kurii kio ya? Hinlaa bɛ̀ a tɔn nə n kuru wa? A na á n zɛnaa bɛ̀ a tɔn nə n kuru bɔrɔ wa.

¹¹ Abrahamu na á kurii lɛ wɔ sii a kɔnboe lɛa. Bɛ n nyɛɛ mà a bɛ́ a tɔn nə n kuru dinin bɔrɔ wa, mà Lawa na á lɛ kɔ a ganaa min pepere lɛa, a goleemali a lɛa. Bɛa yɔrɔ kɛ lɛ la, kurii baãnaan mɛnɛn tumaa bɛ́ golee Lawa li, mà a lɛ kɔ ǹsɛn ganaa min peperen lɛa, Abrahamu na á bɛn tumaa a díi baa.

¹²Sonbore, Abrahamu n kurii wolen lɛn dɔn díi lɛa. Sɛnɛ, kurii wole kɛ tumaa bie Abrahamu a nɛ lɛa wa. Min mɛnɛn bɛ́ a lɛa, bɛn man ke, golee Lawa li wolen dininsɔɔ̃nɔn, ka wɔ di Abrahamu din bɛ́ á zɛnaa lɔn, bɛ̀ a ná a tɔn nə n kuru wa.

¹³ Sonbore, Lawa na á n lɛ kɔ Abrahamu la, mà asɛ n die kanaa din tumaa koe a nɛnyaanan la ǹ wɔ lɛa. Lawa na á n lɛ kɔ Abrahamu la kɛnɛn, Abrahamu a kɔ Lawa a dí-pɛn lɛ a lɛa bie wa. Sɛnɛ, Lawa din bɛ́ á ga a ganaa min pepere lɛa, a golee Lawa li mɛn a lɛa ke, bɛ taman yii ni.

¹⁴ Min mɛnɛn bɛ́ giɛ ǹ dinin ganaa Lawa a dí-pɛn bɔlɔ-silin lɛa, bɛ̀ Lawa a lɛ kɔ ǹ siin lɛn man bɛn dininsɔɔ̃nɔn wɔn lɛa, bɛ̀ Lawa din nə wusii á barka boe golee Lawa li ni, á n pàã boe a din a lɛ kɔ ǹ boon ne.

¹⁵Lawa a dí-pɛn lɛn man dɔlɔ diɛ min mìi ni, a giala, dí-pɛn bɛ́ ǹ ba bǎã mɛn nɛ wa, dí-pɛn bɔlɔ-tii dɔ banban.

¹⁶ Lawa na á ná a lɛ kɔ ǹ sii lɛ zɛnaa a giala, mà Abrahamu golee li. Bɛa lɛ kɔ ǹ sii lɛ n bǐɛ̃baa ǹ màn lɛa á kɔ kooro. Bɛa yɔrɔ kɛ la, a n lɛ kɔ ka sii mɛn nɛ, bɛ n Abrahamu a nɛnyaanan tumaa wɔ lɛa. Ǹ mɛnɛn bɛ́ Lawa a dí-pɛn nə́ ǹ li, a bie bɛn dininsɔɔ̃nɔn wɔ lɛa wa. Sɛnɛ, ǹ mɛnɛn dɔn nə golee Lawa li ka Abrahamu din bɛ́ lɔn, a n bɛn dɔn wɔ lɛa. Abrahamu lɛ n wɔ tumaa a díi lɛa.

¹⁷ A giala, Lawa pɛ nɛ: «Masɛ din ni má n baa tɔrɔ gigiã a díi lɛa.» Barka n lɛ-kɔ ǹ sii kɛ lɛ nɛ, Lawa din a lawabaa a lɛa. A giala, Abrahamu golee Lawa mɛn li ke, bɛ á boe la a geren yii kaa, ǹ wusoo ǹ yiikoonaan baa. Màn mɛnɛn bɛ́ ǹ banban duduu wa, á boe la a bɛn tumaa da.

¹⁸Foo-doa bɛ́ a ba sii mɛn din ni doo wa, asɛ nə́ n foo doa Lawa ganaa ka bɛ nɛ. Á golee li mà Lawa á re asɛ biɛ tɔrɔ gigiã a díi lɛa, a giala, Lawa pɛ nɛ: «N tɔrɔ á die mɔnɛɛ ka lon a leeren bɛ́ lɔn.»

¹⁹ Bɛa biikoo lɛ li bɛ̀ Abrahamu dɔ lɛ̀ paabiɛ kɛ miã. A na á goã foaã nɛ a yɔrɔ-a, mà asɛ a boe la a nɛ yɛ doo wa. A lɔ Saaraa dɔ́ zizi kɔ, bɛ̀ a ná a tɔn nɛ goon din yɛ wa. Haalɛ ka bɛ lɛ yii ni, Abrahamu a golee Lawa li kiɛɛrɛ kɔ wa,

²⁰a gɔ́ɔ̃ dɔ nə n lonlankɔ Lawa a lɛ kɔ ǹ boo kɛ lɛ wɔ gɔn la wa, á golee Lawa li ka foo-doa nɛ, a ná a tɔ bɔ.

²¹A na á n gòãn koa Lawa a lɛ kɔ ǹ boo kɛ lɛ la, á golee li taãn-taãnɛ, mà pàã tá Lawa lon a bɛ zɛnaa.

²²Bɛ lɛ nɛ, a tá n pii: «Lawa lɛ kɔ Abrahamu ganaa min pepere lɛa.»

²³Bɛa min peperebaa kɛ bie n pii Abrahamu dinsɔɔ̃ wɔ gɔn la wa.

²⁴A nə n pii wɔ dɔn wɔ gɔn la, bɛ̀ wɔ dɔn tá golee a din li, Lawa á re lɛ koe wɔ dɔn ganaa min peperen lɛa. A din Lawa lɛ na á wɔa Dɛnaa Yezu yii kaa, á bɔ geren bii.

²⁵ A na á toa Yezu lɛ gã, màn mɛn bɛ́ toɛ, a wɔa sii baraan tuturu. A na á ná a yii kaa á bɔ geren bii, màn mɛn bɛ́ toɛ, a wɔa zɛ̀rɛn nya, wɔ boo la, wɔ n baa min peperen lɛa a din yɔrɔ-a.