Read Samo, Southern Rɔm 6 Bible Online

Rɔm 6 - Samo, Southern bible

Rɔm 6

¹Wɔ n die pii mà wàa kəni? Wɔ n die sii baraa zɛnɛɛ wɔ wo-n nyɛɛnɛ, màn mɛn bɛ́ toɛ, Lawa a bǐɛ̃baa mɔnaa?

²Haayii dɛ! Wɔsɛn man goon kanna ka geren ne, sii baraa wɔ a paǹ li. Wàa n die toɛ wɔ sii baraa zɛnaa doo?

³*Batɛmu lɛ n wɔ kiɛ kun ka *Krita nɛ. Ka á bɛ giala miɛ ke? Bɛ giala mà bɛa batɛmu lɛ n wɔ kiɛ kun ka Krita nɛ, a gɛ̀ lɛ gɔ́ɔ̃ nɛ.

⁴ Bɛa batɛmu kɛ lɛ barka nɛ, wɔ n wɔ́ gã kun ka Yezu ni, ǹ nə́ wɔ bĩ kun ka a din ni. Sɛnɛ, wɔ Di Lawa bɛ́ a ná a yii kaa á bɔ geren bii, ka a din pàã gole kɛ nɛ, wɔsɛn dɔn yii á boe la a kaa, wɔ tɔ wɔ ǹ gɔn dii saa.

⁵Wɔ bɛ́ wɔ́ goã kun a din ni a gɛ̀ nɛ, wɔ n die goɛ̃ kun ni dɔn a yii-kaa gɔ́ɔ̃ nɛ.

⁶Ka daa wɔ kɛ giala ma sɔnbɔraanɛ: Wɔa tɔ wɔ ǹ gɔn zizi lɛ na á gã kun ka Krita nɛ dere ǹ gɔn ganaa. Wɔa sii baraa zɛnaa ǹ dùũ lɛ gã. Bɛ lɛ nɛ, wɔ a boe la wɔ n baa sii baraa a bɛ̀rɛn lɛa doo wa.

⁷A giala, bɛ̀ min gã, bɛ na á n bɔ sii baraa pàã giulun.

⁸Bɛ̀ wɔ́ gã kun ka Krita lɛ nɛ, wɔ á wɛɛ la, wáa wɔ yii dɔ á re goɛ̃ koo kun ka a din ni.

⁹Wɔ á doɛ̃ dɔn sonbore, wáa Krita lɛ yii bɛ́ á kaa á n bɔ geren bii ke, a giɛ̃ doo wa. Pàã ba gɛ̀ lon doo a boo asɛ la wa.

¹⁰A bɛ́ giɛ̃ ke, a na á gã sii baraa wɔ a paǹ li gunyin goon toto, kɔsɔ ba kio doo wa. A yii dɔ bɛ́ koo ke, a n koo Lawa a lɛa.

¹¹Ka doamaa-n ka n taasɛ ka dinin sii ganaa bɛa yɔrɔ goon kɛ lɛ la. Ka n ká gã sii baraa wɔ a paǹ li, sɛnɛ, ka bɛ́ kun Yezu Krita nɛ, ka yii n koo Lawa a lɛa.

¹²Ka baran toa sii baraa goã kii lɛa ka gɔ̀nɔn siĩ gã wole kɛ la doo wa. Ka baran kɔ dùũ sii babaraan kɛn lɛ doo wa.

¹³Ka baran ka dinin kɔ sii baraa la doo, ka sii baraa zɛnaa ǹ mànan baa wa. Sɛnɛ, ka ka dinin kɔ Lawa la, ka min mɛnɛn bɛ́, ǹ yii kaa ǹ nə́ n bɔ geren bii. Ka ka gɔ̀nɔn paǹ din tumaa kɔ la, peperebaa sii zɛnaa ǹ mànan lɛa.

¹⁴Sii baraa pàã ba re boe ka la doo wa, a giala, dí-pɛn bie ka mìi-n doo wa, Lawa a bǐɛ̃baa n ka mìi ni.

¹⁵Wɔ n die pii mà wàa kəni? Wɔ n die sii baraa zɛnɛɛ, wɔ pɛ, mà dí-pɛn bie wɔ mìi-n doo wa, mà Lawa a bǐɛ̃baa n wɔ mìi ni? Haayii dɛ!

¹⁶Táa ka á doɛ̃, mà bɛ̀ ǹ nə́ min kɔ bɛ̀rɛ lɛa min kɔsɔ la, mà ǹ dɛnaa n bɛa min kɛ lɛ bɔlɔ sii, a na a bɛ̀rɛ baa. Bɛ̀ ka á sii baraa zɛnɛɛ, ka ǹ sii baraa a bɛ̀rɛn lɛa, á n woe ka kiɛ gɛ̀ nɛ. Bɛ̀ ka á Lawa bɔlɔ sii, ka ǹ bɔlɔ-sii a bɛ̀rɛn lɛa, bɛ n ka bii kɔɔ̃n koe kɔn ka Lawa nɛ.

¹⁷Ka daa wɔ barka da Lawa nɛ. Ka n ká goã sii baraa a bɛ̀rɛn lɛa lɛlɛ, sɛnɛ, daraa ke á n kɔ ka la, sii yɔrɔ sonbore mɛn bɛ́ a nɛ, ká bɛ si ka ka foo din tumaa nɛ.

¹⁸Lawa bɛ́ á ka si sii baraa la, sisia ka ǹ ká a din a bɛ̀rɛn baa, màn mɛn bɛ́ toɛ, ka a dùũ siin zɛnaa.

¹⁹Man má bɛ̀rɛbaa saa sii a kɔnboe lɛa, má nyaa ka nɛ, màn mɛn bɛ́ toɛ, ka boo la ka a giala ma. Gɔgɔrɛbaa laanka kɔkɔrɔbaa mɛn bɛ́ min diɛ Lawa bɔlɔ tii ganaa a wo-n nyɛɛnɛ, táa ka n ká ǹ dinin kɔ bɛn la lɛlɛ, ka ǹ bɛ̀rɛn baa. Sisia, bɛa yɔrɔ kɛ lɛ la, Lawa dùũ siin mɛnɛn zɛnaa bɛ́ min *yoreen koe, ka doamaa nɛ ka ka dinin kɔ bɛn la, ka ǹ dɔn bɛ̀rɛn baa.

²⁰Ka bɛ́ sii baraa a bɛ̀rɛn lɛa ǹ mɛn waáraa, Lawa dùũ siin zɛnaa goã pàã lɛa ka mìi-n wa.

²¹Ka ǹ ká wàa là yɛ kəni? Pelo, bɛa siin kɛn lɛn man sìi diɛ ka ganaa, a giala, ǹ giala-nyɔmiɛ n ka gɛ̀ nɛ.

²²Sɛnɛ sisia, Lawa ka si sii baraa la, á ka baa a din a bɛ̀rɛn lɛa. Ka bɛ́ dí mɛn nyɛɛ, bɛa là n ka yoreenbaa nɛ, a giala-nyɔmiɛ n ka nyin nyabaã nɛ.

²³Sii baraa a saraa n ka gɛ̀ nɛ. Sɛnɛ, Lawa din na á bǐɛ̃ zɛnaa wɔ nɛ kooro, bɛ n ka nyin nyabaã wole kɛ nɛ, wɔa tá kun Dɛnaa Yezu Krita-n gɔ́ɔ̃ nɛ.