Read Samo, Southern Kor1 11 Bible Online

Kor1 11 - Samo, Southern bible

Kor1 11

¹ Ka ma lɛn zɔɔ̃, ka ma dinmaa bɛ́ *Krita lɛn zoɛ̃ lɔn.

²Man ka tɔ bǐɛ̃ pii, a giala, mà ka á n yiri koɛ masɛ li sii din tumaa gɔ́ɔ̃ nɛ. Ma ka daraa siin mɛnɛn dɔn ganaa, ka ǹ koe bɛn tumaa lɛ.

³Sɛnɛ, ma tá li máa ka kɛ dɔ dɔ̃: Giĩ tumaa a mìilandɛnaa n ka Krita nɛ, lɔ a mìilandɛnaa n ka giĩ ni, Krita a mìilandɛnaa n ka Lawa nɛ.

⁴Bɛ ganaa, giĩ mɛn tumaa bɛ́ Lawa nyankoe, hinlaa Lawa a boo gii diɛ ka màn nə́ kuməə ne a mìi ganaa, bɛ ǹ Krita puusə koe.

⁵Sɛnɛ, lɔ mɛn tumaa dɔ bɛ́ Lawa nyankoe, hinlaa Lawa a boo gii diɛ ka a mìi kooro ne, bɛ ǹ giĩn puusə koe. A giala, a n goon ká a na á n mìi kɔɔ̃.

⁶Bɛ̀ lɔ mɛn ba tapara kumii a mìi ganaa wa, a n mìi ka dɔ kukuru goon lɛa! Sɛnɛ, mìi ka kukurii, hinlaa a kɔɔ̃ bɛ́ sìi diɛ lɔ ganaa, a doamaa nɛ a màn kuməə a mìi ganaa.

⁷ Giĩ sɛ ba kɔnboe a màn kuməə a mìi ganaa wa, a giala, a n Lawa a kɔnboe lɛa, á n Lawa a gugurubaa nyɛɛ. Sɛnɛ, lɔ n giĩ a gugurubaa lɛa.

⁸A giala, ǹ bie ǹ nə giĩ bɔ lɔ-n ma, sɛnɛ, lɔ na á bɔ giĩ ni.

⁹ Ǹ bie ǹ nə́ giĩ zɛnaa ǹ nə́ kɔ lɔ la wa, sɛnɛ, maǹ nə́ lɔ zɛnaa ǹ nə́ kɔ giĩ la.

¹⁰Bɛ lɛ nɛ, lɔ n kɔnboe a màn kuməə a mìi ganaa, a nyaa mà a n giĩ gòã li, lon a dia dí-a wolen nə dɔ̃ mà a n giĩ wɔ lɛa.

¹¹Sɛnɛ, Dɛnaa yɔrɔ-a, lɔ ba n toɛ̃ kɔn ka giĩ-n doɛ̃ wa, giĩ dɔ ba n toɛ̃ kɔn ka lɔ-n doɛ̃ wa.

¹²A giala, ta maǹ nə́ lɔ bɔ giĩ ni ǹ nə́ zɛnaa, giĩ dɔ n yii lɔ la, sɛnɛ, ǹ tumaa n boe Lawa li.

¹³Ka dinin nə ga a ganaa: Á siĩni lɔ goã ka a mìi kooro ne Lawa nyankɔ biikoo li?

¹⁴Wɔ a doɛ̃ wɔ dinin li, bɛ̀ giĩ mìi ka sɔsɔrɔ kɔ á la yii ni, a sìi diɛ wa?

¹⁵A da yaa, mìi ka a sɔsɔrɔbaa n lɔ tɔ golebaa ǹ sii lɛa. A giala, lɔ bɛ́ kɔnboe a màn mɛn kuməə a mìi ganaa, maǹ nə́ mìi ka sɔsɔrɔ kɔ la bɛ lɛ taman yii gɔrɔ.

¹⁶Bɛ̀ min tá zoɛ̃ maa boo kɛa liere kɔ li, ǹ dɛnaa dɔ̃, mà wɔsɛn laanka Lawa a sɔmɔ kɔ́n ba landa kɔsɔ doɛ̃ Lawa guguru kɔ biikoo li wa.

¹⁷Ma bɛ́ die kaa siin mɛnɛn ganaa kanna, ma a ka tɔ bǐɛ̃ pii ka bɛn nɛ wa. A giala, ka bɛ́ lɛsɔkɔnɔn mɛnɛn zɛnɛɛ, bɛn ba n doe ka lɛ wa. Maǹ ka laadoo ziziɛ̃.

¹⁸Dinin bɔrɔ, ǹ nə́ pɛ ma nɛ, mà bɛ̀ ka á lɛsɔkɔn gole zɛnɛɛ, mà nana-kɔn nə ka bii. Má golee boo lɛ tɛn a taãnbaa li.

¹⁹A n siĩn dinin nana-kɔn yɛ ka bii, min mɛnɛn bɛ́ min peperen lɛa, wɔ tɔn boo la wɔ bɛn dɔ̃.

²⁰Bɛ̀ ka á n lɛ soekɔn miɛ̃ kun, Dɛnaa a màn-bii kɛ bie ka á bii wa.

²¹A giala, didie nə n nanaɛ, a din da ka màn-bii mɛn nɛ, á bɛ bii. A nə n zɛnɛɛ miɛ̃, bòo goã kɛa dɛnaa ganaa, bɛ̀ yɔ á kɛa dɛnaa dɔ yii ganaa.

²²Kaa kionən manə ǹ banban, ka á màn bii ǹ ni, ka n màn mii ǹ ni wa? Hinlaa ka ǹ zoɛ̃ mà ka Lawa a sɔmɔ lɛ piɛ̃ bɔ, ka sìi da gɔn kooro-an ganaa? Ka nə n yii diɛ mà ma wàa pɛ ka nɛ? Á kɔnboe ma ka tɔ bǐɛ̃ pɛ kɛ a lɛa? Haayii, ma a boe la ma á ka tɔ bǐɛ̃ pii wa.

²³A giala, Dɛnaa ma daraa màn mɛn ganaa, má ka dɔn daraa a ganaa, bɛ á ke: Ǹ bɛ́ re Dɛnaa Yezu koe tèlò mɛn nɛ, á buuru saa,

²⁴á barka da Lawa nɛ, á tatala kɔn, á pɛ: «Masɛ din gɔ̀nɔn nə ka kɛ nɛ, ma á koe ka la. Ka dɔn die ka zɛnaa, ka n yiri koa ka masɛ din ni.»

²⁵ A din yii goon ne, ǹ bɛ́ ǹ nə́ màn bii ǹ nə́ nya, á paan saa á pɛ: «Paan ke, masɛ din mà na a nɛ, a n lɛ kɔ kɔn la dii lɛa. Bɛ̀ ka á mii lɔn, ka n yiri koa ka masɛ din ni.»

²⁶Sonbore ne, biikoo mɛn tumaa li, bɛ̀ ka á buuru kɛ soɛ̃, ka n màn mii paan kɛ nɛ, ka ǹ Dɛnaa a gɛ̀ laakalɛɛ, yǎa a wusoo a daa li.

²⁷Bɛ lɛ nɛ, min mɛn bɛ́ re Dɛnaa a buuru kɛ soɛ̃, a màn mi paan kɛ nɛ, a gɔ́ɔ̃ ná a *yoreen wa, ǹ dɛnaa n kiri diɛ a din la Dɛnaa gɔ̀nɔn laanka a mà wɔ paǹ li.

²⁸Didie tumaa golee a dinmaa li taãnɛ, a tɔn buuru kɛ sɔ̃ a màn mi paan kɛ nɛ.

²⁹A giala, bɛ̀ min mɛn màn kɛ bii, á màn kɛ mi, a ná a ba n taasɛ, mà asɛ n doa-n kɔn ka Dɛnaa din gɔ̀nɔn nɛ wa, bɛa dɛnaa n kiri koɛ a din ni, ká màn kɛ a bii ni, ká a mii ni.

³⁰Bɛ lɛ nɛ, busulən tá ka bii, ka bɔlɔkan nɛ, ǹ tɛnɛn dinin nə́ gã.

³¹Bɛ̀ wɔ́ n gɔ́ɔ̃ ti wɔ ga a ganaa, ǹ ba re kiri we wɔ ganaa wa.

³²Sɛnɛ, Dɛnaa n kiri we wɔ ganaa, á n wɔ doree, ń giɛ dɔlɔ nyan wɔ kũ kun ka kanaa kɛ a minin ni wa.

³³Bɛa yɔrɔ kɛ lɛ la kəni, ma dɔɔ̃nɔn lɛn, bɛ̀ ka á n lɛ soekɔn, ka á màn kɛ bii, ka toa ka n yii da kɔn la.

³⁴Bɛ̀ bòo tá min mɛn ganaa, a màn bii piɛ, ń giɛ kaa lɛsɔkɔn lɛ nyan nə n baa kaa dɔlɔ damala ǹ sii lɛa Lawa gunun wa. Sii gialakunun kɛn, bɛ̀ ma din daa biikoo mɛn li, ma á re bɛn yɔrɔ boe.