Read Samo, Southern Kor1 14 Bible Online

Kor1 14 - Samo, Southern bible

Kor1 14

¹Ka ga kɔn-narɛɛ li. Ka n yiri koa Yiri Fu a bǐɛ̃baa ǹ mànan ganaa, sanparɛ Lawa a boo gii-dalibaa ke.

²A giala, min mɛn bɛ́ bɔlɔ soree pii, a bie boo diɛ ka minbuiinin ni wa, sɛnɛ, a n diɛ ka Lawa nɛ. Min kɔ́n ba a boo giala miɛ wa. A n sonbore durii taãnan pii ka Yiri Fu pàã nɛ.

³Sɛnɛ, min mɛn bɛ́ Lawa a boo gii diɛ, bɛ n boo diɛ minbuiinin ni, a nə́ n doe ǹ lɛ, a tá ǹ foo taɛ̃, a tá ǹ foo basɛ̃.

⁴Min mɛn bɛ́ boo diɛ ka bɔlɔ soree ne, bɛ nə n doe a dinsɔɔ̃ lɛ. Min mɛn bɛ́ Lawa a boo gii diɛ, bɛ nə n doe Lawa a sɔmɔ tumumaa lɛ.

⁵Ma tá li máa ka tumaa bɔlɔ soree pɛ doɛ̃. Sɛnɛ, bɛ̀ ka á Lawa a boo gii diɛ doɛ̃, bɛ á kɔɔ̃n ma ganaa doo á la yii ni. Taãn nɛ, min mɛn bɛ́ Lawa a boo gii diɛ, bɛ là tan á la bɔlɔ soree pɛle ne. Yǎa bɛ̀ a tá a boo lɛ giala pii, á n doe Lawa a sɔmɔ lɛ.

⁶Ma dɔɔ̃nɔn lɛn, man nɔ̀n diɛ ka la: bɛ̀ má daa ka li, má n boo diɛ ka nɛ ka bɔlɔ soree ne, ma là n ka wàa-n ka ganaa? Bɛ̀ maa boo lɛ sii-durii nyaa ka nɛ, a màn-doɛ̃ kɔ ka la wa, bɛ̀ a Lawa a sii nyaa ka nɛ wa, a daraa kɔ́n dɔ kɔ ka la wa, ma là ba ka ganaa wa.

⁷A n miɛ̃ ka sàn-kɔ ǹ mànan kɛn dɔn nɛ, ka pìi bɛ́ lɔn, ka tùtu ni. Bɛ̀ gòonən ba n boboe pìi toon ganaa, ǹ nə n boboe tùtu biɛn ganaa wa, ǹ bɛ́ zoɛ̃ mà ǹ loe mɛn lɔ, maǹ die siɛ lɔn ǹ tɔn a giala ma?

⁸Bɛ̀ ziabaa ǹ bɛn-pɛle ba a bɛn pii doɛ̃ foaãnɛ wa, die n die n yɔrɔ boe a wo zia la?

⁹A din yii goon ne, ka dɔn bɛ́ zoɛ̃ mà ka màn mɛn boo da, bɛ̀ ka á pii ka bɔlɔ soree ne, bɛ̀ a foaã nɛ wa, maǹ die siɛ lɔn ǹ na a giala ma? Bɛ á miɛ̃ ka ǹ boo diɛ piɛ̃ li!

¹⁰Boo nɛ gigiã tá kanaa kɛ nɛ, sɛnɛ, a gogoon tumaa giala na a tan.

¹¹Bɛ̀ min nə boo diɛ ma nɛ, má n má ba a boo lɛ giala miɛ wa, ǹ dɛnaa n goɛ̃ tii lɛa ma yɔrɔ-a, ma dɔ n goɛ̃ tii lɛa ǹ dɛnaa yɔrɔ-a.

¹²A din goon ne ka ka dɔn wɔ nɛ. Ka bɛ́ giɛ Yiri Fu a bǐɛ̃baa ǹ mànan li, ka ga ǹ li taãn-taãnɛ, sɛnɛ, ka zɛnaa Lawa a sɔmɔ kɛ a dɔmalɛ taman yii.

¹³Bɛ lɛ nɛ, min mɛn bɛ́ bɔlɔ soree pii, bɛ doamaa nɛ a Lawa nyankɔ, mà a boo la a na a giala pɛ doɛ̃.

¹⁴Bɛ̀ ma á Lawa nyankoe ka bɔlɔ soree ne, ma yiri n Lawa nyankoe. Sɛnɛ maa doɛ̃ n goɛ̃ kooro, a ná a màn kɔ́n giala miɛ a-n wa.

¹⁵Man die ǹ mɛn zɛnɛɛ kəni? Man die Lawa nyankoe ka ma yiri ni, ma a nyankɔ ka maa doɛ̃ dɔ nɛ. Man die loe loe ka ma yiri ni, ma lɔ ka maa doɛ̃ dɔ nɛ.

¹⁶Sonbore, bɛ̀ n Lawa nyankɔ, n barka da Lawa nɛ ka n yiri dinsɔɔ̃ nɛ, min mɛn bɛ́ too-kɔle kooro lɛa, bɛ n siɛ lɔn a pɛ mà «A n miɛ̃» n barka da Lawa-n lɛ kio? A giala, n bɛ́ boo mɛn diɛ a boe la á bɛ doɛ̃ wa.

¹⁷Haalɛ ta n barka da ǹ Lawa nyankɔ lɛ á siĩni, a dɔmalɛ lɛa n miã kɔsɔ kɛ lɛ ganaa wa.

¹⁸Masɛ á bɔlɔ soree pii má la ka tumaa nɛ, ma á bɛa barka diɛ Lawa nɛ.

¹⁹Sɛnɛ, lɛsɔkɔn bǎãn nɛ, bɛ̀ má boo sooro da, minin ná a giala miɛ, á n dɔmalɛ lɛa min kɔsɔ ganaa, bɛ á pɛsã á la maa bɔlɔ soree duu fù pɛ nɛ.

²⁰Ma dɔɔ̃nɔn lɛn, sii-doɛ̃ wɔ paǹ li, ka baran n dinin baa nɛnyaanan lɛa wa. Ka goã nɛnyaanan lɛa sii bɔnɛɛ wɔ paǹ li, sɛnɛ, sii-doɛ̃ wɔ paǹ li, ka toa ka goã min golen lɛa.

²¹ A tá kiɛ̃-n Lawa a sɛ́wɔ-n kɛnɛn: «Ma á re boo diɛ zaman kɛ nɛ ka bɔlɔ soree ne, ka tiin lɛ nɛ. A laanka bɛ nɛ, ǹ ba re n too koe ma lon wa. Masɛ din Dɛnaa-n má pɛ miɛ̃.»

²²Bɛa yɔrɔ kɛ lɛ la, bɔlɔ soree pɛ bie sii-nyaa ǹ sii lɛa goleemali wolen ne wa, sɛnɛ, a n sii-nyaa ǹ sii lɛa goleemali baãnaan nɛ. Lawa a boo gii diɛ sɛ n sii-nyaa ǹ sii lɛa goleemali wolen ne; sɛnɛ, a ba sii-nyaa ǹ sii lɛa goleemali baãnaan nɛ wa.

²³Bɛ̀ a n ka Lawa a sɔmɔ min tumaa na á n lɛ sɔkɔn, ǹ tumaa n boo diɛ ka bɔlɔ soree ne, bɛ̀ too-kɔle kooron, hinlaa goleemali baãnaan nə́ daa ka yaa walan miɛ, ǹ ba re pii mà gàãn man yui ka li wa?

²⁴Sɛnɛ, bɛa miɛ wa, bɛ̀ goleemali baãnaan, hinlaa too-kɔle kooro lɛ daa ka tumaa yaa, ka n boo diɛ ka Lawa a boo gii-dalin wɔ bɛ́ lɔn, á re yii, mà kaa boon tumaa ná asɛ kũ. Á re kiri we a din ganaa, a sii baraan wɔ paǹ li kaa boon kɛn lɛa.

²⁵Sii-durii mɛn bɛ́ a foo ne, bɛ á re yii kanaa. Á re n mìi kumii tán, a Lawa guguru kɔ, a pɛ: «Lawa á ka bii taãn-taãnɛ.»

²⁶A nə n pii kɛ ganaa mà wàa, ma dɔɔ̃nɔn lɛn? Bɛ̀ ka n lɛ sɔkɔn ka á Lawa guguru koe, loe n min goon li, minin daraa n kɛ dɔ li. Lawa sii mɛn nyaa, bɛ n kɔsɔ li, kɔsɔ dɔ n boo diɛ ka bɔlɔ soree ne, kɛ dɔ n bɔlɔ soree lɛ giala pii. Sɛnɛ, ka toa bɛ tumaa boo la a n dɔ Lawa a sɔmɔ lɛ.

²⁷Sɛnɛ doo, bɛ̀ ka á boo diɛ ka bɔlɔ soree ne, ka nyan kiɛ̃ min paa hinlaa min sɔɔ la wa. Didie tumaa toa, bɛ̀ ǹ miã boo da á nya, a dɔ tɔn a wɔ da. Min dɔ yɛ, á n didie a boo lɛ giala pii minin manɛ.

²⁸Bɛ̀ min banban á boo lɛ a binyəə pii doɛ̃ wa, ǹ didie nə n lɛ tã, a boo da a din gɔ́ɔ̃-n kɔn ka Lawa nɛ.

²⁹Lawa a boo gii-dalin boon wɔ paǹ li, min paa hinlaa min sɔɔ á boe la a boo da, ǹ miãn gialakunun kɛn nə́ kiri we ǹ boo diɛn lɛn ganaa.

³⁰Bɛ̀ min goon nə boo diɛ, min mɛnɛn bɛ́ tan ǹ nə́ ǹ too koe, bɛ̀ Lawa sii nyaa ǹ goon ne a boo lɛ wɔ paǹ li, á kɔnboe boo-dali lɛ nə n lɛ tã.

³¹Ka tumaa á boe la ka Lawa a boo gii-dalibaa ǹ boo da, sɛnɛ, ka da kɔn kio, ń giɛ min tumaa a boe la, a daraa yɛ a nɛ ka foo tãbaa nɛ.

³²Min mɛnɛn bɛ́ ǹ nə́ Lawa a boo gii-dalibaa yɛ, ǹ dinin man a diɛ biikoo doɛ̃.

³³A giala, Lawa bie sii lɔlɔkɔn wole lɛa wa, sɛnɛ, a n Lawa là nyantoro dɛnaa lɛa.

³⁴Ka a bɛ́ n zɛnɛɛ Lawa-nyankɔlen bii Lawa a sɔmɔ tumaa-n lɔn, lɛsɔkɔn bǎã nɛ, lɔn ba kɔnboe ǹ boo da wa. Ǹ na a lɛ kɔ, mà ǹ boo da wa. Ǹ doamaa nɛ ǹ goã lɛ-kɔlen lɛa, ka Lawa a Landa sɛ́wɔ dɔ bɛ́ pii lɔn.

³⁵Bɛ̀ ǹ tá li maǹ màn dɔ̃ sii gɔ́ɔ̃ nɛ, ǹ nɔ̀n da ǹ zuũn la piɛ. A siĩni lɔ boo da zaman bii wa.

³⁶Ka n taasɛ mà Lawa a boo lɛ na á n giala kɔ kasɛn li? Hinlaa a na á daa ka dininsɔɔ̃nɔn li?

³⁷Bɛ̀ min mɛn tá taasɛ ma asɛ n Lawa a boo gii-dali lɛa, hinlaa mà Yiri Fu a bǐɛ̃baa ǹ màn kɔ́n tá asɛ lon, a doamaa nɛ a dɔ̃, mà sɛ́wɔ ke ma á diɛ ka la, mà Dɛnaa din a dí-pɛ nɛ.

³⁸Bɛ̀ min mɛn ba bɛ doɛ̃ wa, Lawa ba ǹ dɛnaa dɔ doɛ̃ wa.

³⁹Bɛa yɔrɔ kɛ lɛ la, ma dɔɔ̃nɔn lɛn, ka n yiri koa Lawa a boo gii-dalibaa ganaa, sɛnɛ, ka baran n piã ka bɔlɔ soreen pɛ dɔ-n wa.

⁴⁰Sɛnɛ, ka a tumaa dɔ zɛnaa a yɔrɔ li tɛrɛɛnɛ.