Read Samo, Southern Kor1 15 Bible Online

Kor1 15 - Samo, Southern bible

Kor1 15

¹Ma dɔɔ̃nɔn lɛn, ma Boo Tii Kɔɔ̃n mɛn laakalaa ka nɛ, ka si, ka foo n tɔn doa-n a ganaa, man wusii ma á ka yiri diɛ bɛ nɛ.

²Bɛ̀ ká gũ doɛ̃ ka ma bɛ́ má pɛ ka-n lɔn, á re ka kirisibiɛ; bɛ̀ a n baa miɛ̃ wa, kaa goleemali n die kooro biɛ.

³ Ma din daraa mɛn yɛ, man má bɛ lɛ kɔ ka la. Màn mɛn bɛ́ gole sii tumaa nɛ bɛ á ke. *Krita na á gã wɔa sii baraan lɛa, ka Lawa a sɛ́wɔ bɛ́ á pɛ lɔn.

⁴ Ǹ nə́ bĩ, a lɛawaa sɔɔbaa ǹ wɔ pinaa, a yii kaa, ka Lawa a sɛ́wɔ bɛ́ á pɛ lɔn.

⁵ Á n din nyaa Piɛrɛ nɛ, bɛ kio, á n din nyaa a dia dí-a wole fulupaa kɛ nɛ.

⁶Bɛ kio doo, á n din nyaa a kialandɛnaa biɛsooro (500) ne kun. Ǹ gigiã yii á tɔn koo, ǹ tɛnɛn nə́ gã.

⁷Bɛ dɔ kio doo, á n din nyaa Zaaki ni, á tɔ́n nə n din nyaa a dia dí-a wolen tumaa nɛ.

⁸ A laan masɛ goã min taãn lɛa wa, á n din nyaa ma dɔ nɛ nyɔnyɔɔ.

⁹ A giala, ma din nə Yezu a dia dí-a wolen tumaa a boɛɛndɛnaa lɛa. Ma a kɔnboe dinin, ǹ ma bíi dia dí-a wole wa, a giala, man má goã boe Lawa a sɔmɔ minin yii-n lɛlɛ.

¹⁰Sɛnɛ, ma bɛ́ màn mɛn lɛa kanna, man bɛ lɛa Lawa a bǐɛ̃baa pàã ganaa. A bǐɛ̃ mɛn baa ma la, bɛ goã kooro wa. A giala dinin, mà má dí nya má la dia dí-a wole gialakunun kɛn lɛn tumaa nɛ. A taãnbaa li, Lawa a bǐɛ̃ mɛn bɛ́ kun ma nɛ, bɛ pàã nɛ, ma din wɔ bie wa.

¹¹Bɛa yɔrɔ kɛ lɛ la, ta masɛ nɛ hinlaa ta ǹsɛn manɛ, wɔ Boo Tii Kɔɔ̃n mɛn laakalaa ka nɛ, bɛ lɛ n ke, a din lɛ dɔ-n ká golee li.

¹²Bɛ̀ wɔ á pii ka nɛ, wáa Krita yii-kaa á n bɔ geren li, wàa na á baa kaa min tɛnɛn tá pii, mà geren yii kaa banban?

¹³Bɛ̀ gere yii kaa banban, Krita dɔ yii-kaa wa.

¹⁴Bɛ̀ Krita dɔ yii kaa wa, wɔ bɛ́ boo laakalaa mɛn we ka nɛ, bɛ n kooro lɛa, ka dɔn goleemali n kooro lɛa.

¹⁵Doo, bɛ̀ geren yii kaabaã lɛ n taãn lɛa, a n goon ka soɛ siére-pɛlen man wɔ nɛ Lawa wɔ paǹ li. A giala, mà wɔ́ pɛ wáa Lawa Krita bɔ geren li, á da yiikoonaabaa nɛ, a da yaa a na a yii kaa dɔn wa.

¹⁶Bɛ̀ geren yii a kiɛ wa, Krita dɔ yii kaa wa.

¹⁷Bɛ̀ Krita yii kaa wa, kaa goleemali lɛ n sii kooro lɛa. Ka n tɔn papaã-n kaa sii baraan gɔ́ɔ̃ nɛ.

¹⁸Haya, min mɛnɛn dɔn nə gã Krita wɔbaa gɔ́ɔ̃ nɛ, bɛn dɔn man nə́ papaã.

¹⁹Bɛ̀ wɔ n wɔ́ n foo doa Krita ganaa kanaa kɛ a yiikoonaabaa dinsɔɔ̃ a lɛa, wɔsɛn koe á re gole koe á la wɔ miãn wɔ nɛ.

²⁰Sɛnɛ, ka boo taãn nɛ, Krita lɛ yii bɛ́ á kaa bibinaa nɛ á n bɔ geren li, bɛ n nyɛɛ mà geren tumaa yii á re kiɛ.

²¹A giala sonbore, min goon na á toa gɛ̀ daa. A din yii goon ne, min goon dɔ n die toɛ geren yii-kaa dɔ daa.

²²Min tumaa bɛ́ giɛ̃ a Aadã tɔrɔbaa a lɛa lɔn, min tumaa dɔ yii n die kiɛ, a tá kun ka Krita-n a lɛa.

²³Sɛnɛ, didie wɔ nə n zɛnɛɛ a biikoo li. Bibinaa nɛ, Krita yii na á kaa. Bɛ kio, Krita a wusoo a daa biikoo li, min mɛnɛn bɛ́ a wɔn lɛa, bɛn yii á re kiɛ.

²⁴Bɛ kio kəni kanaa a nya nɛ. Krita n die lon màn pàãdɛnan tumaa laanka ǹ goledɛnan tumaa ziziɛ̃, a tɔn kiibaa kɔ Díi Lawa la.

²⁵ A giala, a n kɔnboe Krita goã kii lɛa, yǎa Lawa boe a zɔ́ɔn tumaa la, a ǹ kiɛ a gòãn giulun.

²⁶A bɛ́ re a zɔ́ɔ mɛn ziziɛ̃ nyɔnyɔɔ, bɛ n ka gɛ̀ nɛ.

²⁷ A din ni, ǹ nə́ pɛ Lawa a sɛ́wɔ nɛ: «Lawa màn tumaa kaa a gòãn giulun.» Sɛnɛ, màn "tumaa" boo kɛ bie pii mà Lawa dɔ tá a-n ma. A giala, a din nə toɛ màn tumaa tá n doree Krita nɛ.

²⁸Bɛ̀ màn tumaa nə́ n doroo Krita nɛ á nya, a din mɛn bɛ́ Lawa a Nɛ lɛa, á re n doree Lawa nɛ, Lawa mɛn bɛ́ á toa màn tumaa nə́ n doroo ne. Bɛ̀ á n baa miɛ̃, Lawa din tɔn goã pàã la, màn din tumaa mìi la.

²⁹Bɛ̀ a na a miɛ̃ wa, min mɛnɛn bɛ́ *batɛmu sii geren lɛa, bɛn man giɛ wàa li? Bɛ̀ geren yii-kaa na a banban duduu wa, wàa na á baa ǹ tá batɛmu sii ǹ lɛa?

³⁰Wɔsɛn dininmaan lɛn dɔn, wɔ bɛ́ boe la wɔ gã sii mɛn gɔ́ɔ̃ nɛ, wàa na á baa bɛ á koɛ wɔ la biikoo tumaa li?

³¹Ma dɔɔ̃nɔn lɛn, baraanɛ, gɛ̀ n ma lɛnpɛnɛ. Man bɛ pii ka-n sonbore maa din kalaa lɛa, kaa tá kun ka wɔa Dɛnaa Yezu Krita-n kɛ taman yii.

³² Masɛ zia baa kɔn ka min tɔrɔ baraan nɛ Efɛɛzi kiwi. Bɛ̀ ma foo na á goã doa-n minbuiinin sii giala ma dinsɔɔ̃ ganaa, bɛ̀ bɛa zia kɛ lɛ là n ka wàa-n ma ganaa. Bɛ̀ geren yii kaa na a banban, bɛ̀ wɔ n koe suusu kɛ lɛ pii: «Wɔ n màn bii, wɔ màn mi, a giala, biɛ̃ wɔ n die giɛ̃!»

³³Ka nyan ka dinin yiri sã wa: «Koa-kun wole baraan man giã ǹ gɔn sonbore ziziɛ̃.»

³⁴Ka toa ka wusoo ka sii giala ma, ka sii baraa zɛnaa lɛ da. A n kaa sìi boo lɛa ma á diɛ ka nɛ: Ka tɛnɛn ba Lawa doɛ̃ wa.

³⁵Kɔntan min tá re nɔ̀n diɛ mà geren lɛn yii n die kiɛ lɔn? Mà maǹ die gɔ̀nɔn mɛn siɛ?

³⁶Nsɛ baãnaa nɛ! Bɛ̀ n màn we da, á boe la a bɔ a da baa, bɛ̀ a ná a bɔɔ̃ á tɔn gii wa?

³⁷Ma nə́ n màn we kooro da, kɔntan wii nàn nɛ hinlaa màn kɔsɔ we ne, sɛnɛ, a gɔ̀nɔn bɛ́ lɔn a bɔ waáraa, n bie n da miɛ̃ wa.

³⁸Gɔ̀nɔn mɛn bɛ́ kɔɔ̃n Lawa ganaa, a n bɛ koe màn we lɛ la. Gɔ̀nɔn mɛn bɛ́ kɔnboe ka màn we lɛ gogoonmaa nɛ, a n bɛ koe la.

³⁹Màn yiikoonaan dinin tumaa siĩ a goɛ̃ goon wa. Bɔkɔnlɛ tá ǹ bii ni, ka minbuiinin siĩ ni, ka tɔɔn wɔ nɛ, ka bàanan wɔ nɛ, ka zɔ̀nɔn wɔ nɛ.

⁴⁰Lon mànan gɔ̀nɔn tan, tán mànan dɔn gɔ̀nɔn tan. Sɛnɛ, ǹ siĩnbaa a goon wa.

⁴¹Wasa a siĩnbaa na a gɔrɔn, mui dɔ wɔ na a gɔrɔn, leeren dɔn wɔ nə ǹ gɔrɔn. Haalɛ leeren dɔn dinin siĩnbaa n totoro.

⁴²A din yii goon ne ka geren yii kaa lɛ dɔ nɛ. Bɛ̀ ǹ nə́ gɔ̀nɔn da yala-n, a n boɛ̃. Bɛ̀ a yii kaa, a boɛ̃ doo duduu wa.

⁴³Bɛ̀ ǹ nə́ da yala-n, a n bɔbɔnɛɛ, pàã ná a ba a lon wa. Bɛ̀ a yii kaa, a n goɛ̃ siĩni, a n kaka.

⁴⁴Bɛ̀ ǹ nə́ da yala-n, a n gɔ̀nɔn siĩ kooro lɛa. Bɛ̀ a yii kaa a n goɛ̃ gɔ̀nɔn lɛa, Yiri Fu ná a nɛ. Gɔ̀nɔn mɛn bɛ́ gɔ̀nɔn siĩ kooro lɛa, bɛ bɛ́ a tan lɔn, gɔ̀nɔn mɛn dɔ bɛ́ Yiri Fu ná a nɛ, bɛ dɔ na a tan miɛ̃.

⁴⁵ Bɛ lɛ nɛ, Lawa a sɛ́wɔ pɛ: «Maǹ nə́ min bibinaa Aadã zɛnaa màn yiikoonaa lɛa.» Sɛnɛ, nyɔnyɔɔ Aadã ke, bɛ giala mà Krita, Yiri Fu n bɛ nɛ, á n yiikoonaabaa koe.

⁴⁶Sɛnɛ, gɔ̀nɔn siĩ kooro dɛnaa kɛ lɛ n bibinaa, Yiri Fu dɛnaa kɛ bie wa. Yiri Fu bɛ́ ǹ mɛn nɛ, bɛ n die bɛ kio.

⁴⁷Min bibinaa Aadã ke, bɛ n kanaa wɔ lɛa, a giala, a na á bɔ tán. Aadã paabaa ǹ wɔ kɛ na á bɔ Lawa li lon á daa.

⁴⁸Bɔ tán wole lɛ goã lɔn, minin mɛnɛn bɛ́ tán wɔn lɛa, bɛn man die kɔnboe ka bɔ tán wole kɛ-n miɛ̃. Bɔ lon wole lɛ dɔ goã lɔn, ǹ mɛnɛn bɛ́ lon wɔ lɛa, bɛn man die kɔnboe ka bɔ Lawa li a daa wole kɛ-n miɛ̃.

⁴⁹Wɔ kɔnbɔ ka bɔ tán wole kɛ lɛ-n lɔn, wɔ ǹ die kɔnboe ka bɔ Lawa li wole lɛ dɔ-n miɛ̃.

⁵⁰Ma dɔɔ̃nɔn lɛn, ma bɛ́ boo mɛn pii ka nɛ, bɛ á ke: màn mɛn nə n zɛnaa siĩ lɛa ka mà nɛ, bɛ gii ba *Lawa a kiibaa ǹ bǎã-n wa. Màn mɛn dɔ bɛ́ giɛ̃, bɛ gii ba nyin nyabaã kɛ-n ma.

⁵¹ Man die sii-durii kɔ́n nyɛɛ ka nɛ: wɔ tumaa bie re giɛ̃ wa, sɛnɛ, maǹ die wɔ tumaa bɔyɛɛ.

⁵²Bǎã goon ne, yii buĩ laanka a tiɛ̃ gɔ́ɔ̃ nɛ, bɛ̀ ǹ nə́ bɛn giala-nyɔmɔɔ pɛ. A giala, mà bɛn lɛ á re n pii, geren yii á re kiɛ, ǹ nyin nyabaã yɛ, ǹ tɔn wɔsɛn yiikoonaan bɔyaa.

⁵³Sonbore, màn mɛn bɛ́ boɛ̃, bɛ doamaa nɛ a bɔɔ̃baã wole baa. Màn mɛn dɔ bɛ́ giɛ̃, bɛ dɔ doamaa nɛ a nyin nyabaã yɛ.

⁵⁴ Màn bɔɔ̃ wole á re bɔɔ̃baã wole biɛ. Màn mɛn dɔ bɛ́ giɛ̃, bɛ dɔ á re giɛ̃ wa. Bɛ̀ bɛ nə́ n zɛnaa, Lawa a sɛ́wɔ kɛ a boo lɛ á re piɛ̃ kəni: «Gɛ̀ papaã, gɔ̀lɔ̀baa lɛ pã.»

⁵⁵ «Gɛ̀ nɛɛ! N gɔ̀lɔ̀baa lɛ á maa? Gɛ̀ nɛɛ! N minin ziziɛ̃ ǹ pàã lɛ á maa?»

⁵⁶Gɛ̀ a minin ziziɛ̃ ǹ pàã n boe sii baraa nɛ, sii baraa dɔ pàã n boe dí-pɛ nɛ.

⁵⁷Sɛnɛ, barka tá Lawa ganaa, asɛ mɛn bɛ́ á gɔ̀lɔ̀baa kɔ wɔ la wɔa Dɛnaa Yezu Krita pàã ganaa.

⁵⁸A bɛ́ miɛ̃, ma dɔɔ̃nɔn lɛn, ka n doa sɔnbɔraanɛ, màn kɔ́n ná a boe la, a bìn da ka ganaa wa. Ka toa ka wo nyɛɛnɛ biikoo tumaa li, Dɛnaa a dí-nyɛɛ gɔ́ɔ̃ nɛ, a giala, ka á doɛ̃, mà ka bɛ́ dí mɛn nyɛɛ kun ka Dɛnaa nɛ, mà bɛa kooro lɛa wa.