Read Samo, Southern Kor1 2 Bible Online

Kor1 2 - Samo, Southern bible

Kor1 2

¹Ma dɔɔ̃nɔn lɛn, masɛ dinmaa bɛ́ ma daa ka li, ma bie ma Lawa a sii-durii kɛ laakalaa ka nɛ, ka boo dadaran nɛ, ka sii-doɛ̃-n wa.

²A giala, ma biikoo mɛn zɛnaa ka li, ma ga li máa ma màn kɔsɔ nyaa ka nɛ, á kiɛ̃ Yezu *Krita boo la wa, sanparɛ a dere gɔn ganaa boo kɛ din.

³ Bɛ lɛ nɛ, má n din nyaa ka nɛ pàãwɛɛnaa lɛa, nyɛ́ɛ n ma ganaa, ma gɔ̀nɔn yii n bìn diɛ.

⁴Maa boo ne, ka maa laakalaa ǹ gɔn nɛ, ǹ kɔ́n goã sii-dɔ̃ ǹ lɛ gɔ́ɔ̃ boo lɛa wa. Sɛnɛ, Yiri Fu pàã màn mɛn kɔ ma la, man má bɛ dinsɔɔ̃ a sii nyaa ka nɛ.

⁵Bɛ na á n zɛnaa miɛ̃, màn mɛn bɛ́ toɛ, kaa goleemali baran goã doa-n minbuiinin sii-doɛ̃ ganaa wa, sɛnɛ, a goã doa-n Lawa a pàãdɛnaabaa ganaa.

⁶A laanka bɛ nɛ, kaa min mɛnɛn yii fulu Lawa a zii gɔ́ɔ̃ nɛ, man má goã sii-doɛ̃ sii nyɛɛ bɛn manɛ. Sɛnɛ, kanaa kɛ a sii-doɛ̃ sii bie wa, pàãdɛnan mɛnɛn dɔn bɛ́ kanaa kɛ gɔ́ɔ̃ nɛ, ǹ nə́ ǹ tan ziziɛ̃ a lɛa, bɛn yiri kɛ dɔ bie wa.

⁷Haayii, Lawa a sii-doɛ̃ mɛn bɛ́ durii-n minbuiinin la, man bɛ yɔrɔ pii ka nɛ. Kanaa bɛ́ a tɔn nə n giala kɔ wa, Lawa din sii-doɛ̃ mɛn yɔrɔ bɔ, a n zoɛ̃ mà a na a tɔ golebaa gii kɔn ka wɔ nɛ, bɛ nɛ. Sɛnɛ, a na á toa durii ni.

⁸Kanaa kɛ a pàãdɛnaa kɔ́n bɛa yiri kɛ dɔ̃ wa. Bɛ̀ maǹ nə́ bɛ dɔ̃, wɔa Dɛnaa mɛn bɛ́ tɔ golebaa na a wɔ lɛa, bɛ̀ ǹ ba re bɛ dere gɔn ganaa wa.

⁹ Sɛnɛ, a n ka Lawa a sɛ́wɔ bɛ́ á pɛ lɔn: «Min mɛnɛn bɛ́ Lawa narɛ, a màn mɛn zɛnaa á koa bɛn manɛ, min kɔ́n yii bin nə n miã yɛ wa, min kɔ́n too bin ma wa, min kɔ́n a taasiɛ tɔn dɔ a ganaa wa.»

¹⁰Sɛnɛ, Lawa bɛa sii-durii kɛ lɛ nyaa wɔsɛn nɛ Yiri Fu pàã ganaa. Taãn nɛ, Yiri Fu dinsɔɔ̃ n boe la a ga sii ganaa a dɔ̃, haalɛ Lawa a sii mɛn bɛ́ durii-n zuzulu, á bɛ tumaa doɛ̃.

¹¹Minbuiinbaa gɔ́ɔ̃ nɛ, minbuiin yiri n boe la a na a din a sii dɔ̃; a din yii goon ne, Lawa a Yiri Fu dinsɔɔ̃ n boe la a Lawa a sii dɔ̃.

¹²Ǹ bie ǹ nə́ kanaa a yiri kɔ wɔsɛn la wa, sɛnɛ, Lawa na á ná a din a Yiri Fu kɔ wɔ la, ń giɛ, a din bǐɛ̃baa ǹ mànan mɛnɛn kɔ wɔ la, wɔ boo la wɔ bɛn dɔ̃.

¹³Wɔ bie boo diɛ ka minbuiinin minin daraa ǹ yiri-n wa, sɛnɛ, wɔ ǹ diɛ ka Lawa a minin daraa ǹ yiri ni. A n miɛ̃, Yiri Fu n goɛ̃ min lon, bɛ̀ wɔ tɔn boo la wɔ Lawa a sii taãn nyaa nɛ.

¹⁴Lawa a Yiri Fu bɛ́ a ba min mɛn lon wa, bɛa boe la a lɛ kɔ Yiri Fu a boo taãnan ganaa wa. A n gàãnaabaa lɛa ǹ dɛnaa yii li, a boe la a tá a giala miɛ wa, a giala, Yiri Fu dinsɔɔ̃ n boe la á sii a bɔkɔnlɛ doɛ̃.

¹⁵Lawa a Yiri Fu bɛ́ min mɛn lon, bɛa dɛnaa á boe la a sii tumaa bɔ kɔn lɛ. Sɛnɛ, min kɔ́n ba boe la a kiri wɔ asɛ ganaa doɛ̃ wa.

¹⁶ A n ka Lawa a sɛ́wɔ bɛ́ á pɛ lɔn: «Die n boe la a Dɛnaa a taasiɛ dɔ̃? Die n boe la a yiri kɔ la?» Sɛnɛ, Krita a taasiɛ tá wɔsɛn lon.