Read Samo, Southern Kor1 6 Bible Online

Kor1 6 - Samo, Southern bible

Kor1 6

¹Bɛ̀ sii lɔlɔkɔn tá ka bii ka ka dɔɔ̃n Lawa-nyankɔle goon ne, a n siɛ lɔn, ka á woe a kiri we Lawa-nyankɔle baãnaan li? Wàa na á baa ka a we Lawa a zaman minin li wa?

²Ka á doɛ̃ mà Lawa a zaman minin lɛn man die kiri we kanaa minin ganaa wa? Bɛ̀ ka dinin man die kiri we kanaa minin ganaa, a n siɛ lɔn, sii bɔnboɛɛnɛn mɛnɛn bɛ́ ǹ ba màn kɔ́n lɛa wa, ka a boe la ka á bɛn kiri kuri wa?

³Ka a doɛ̃ mà wɔ á re kiri we lon a dia dí-a wolen dɔn dinin ganaa wa? Sanparɛ ka kanaa kɛ a siin ni!

⁴Bɛ̀ bɛ miã sii lɔlɔkɔn kɛ tá kasɛn bii ni, min mɛnɛn bɛ́ ǹ ba màn kɔ́n lɛa Lawa a sɔmɔ-n wa, ka ǹ woe bɛn kuĩ mà ǹ da kaa kiri kuru!

⁵Man kɛ pii ma á sìi diɛ ka ganaa. A bɛ́ miɛ̃ min kɔ́n na a ba kasɛn bii sii-dɔ̃li lɛa, a n boe la á siin yɔrɔ boe dɔɔ̃nɔn bii ni wa!

⁶Á siĩni, dɔɔ̃n min paa wo kɔn bíi, golee Lawa li baãnaan yɔrɔ-a?

⁷Ta á n baa lɔn, màn mɛn bɛ́ toɛ, kiri á goɛ̃ ka dininmaan bii ni, bɛ n ka dinin bɔ a mɛnaa duduu giala pii gɔrɔ. Wàa na á baa ka a lɛ koe ǹ sii kɔkɔrɔ zɛnaa ka-n wa, ka a lɛ koe ǹ ka koã wa?

⁸Sɛnɛ, ka dinin man sii kɔkɔrɔ zɛnɛɛ, ka n wurumu biɛ, ka n bɛ zɛnɛɛ ka dɔɔ̃nɔn dɔn manɛ.

⁹Ka a doɛ̃ mà min kɔkɔrɔn ba re bǎã yii *Lawa a kiibaa-n wa? Ka nyan ka dinin yiri sã wa! Din kũ doɛ̃baã wolen ne ka dì wúlu-bɔlen ne, naarɛbaalin ni, ka giĩ baa lɔ lɛa wolen ne,

¹⁰wurumun ni ka yii bɔ miã gɔn màn li wolen ne, yɔ-mili baraan nɛ, minin tɔ-ziziɛ̃lin ni, ka waa zii-a wolen ne, bɛa min kɛ kɔ́n ba re bǎã yii Lawa a kiibaa-n wa.

¹¹Ka tɛnɛn man ka goã miɛ̃. Sɛnɛ, Lawa sii baraa pii á bɔ ka ganaa, á ka bɔ ka gɔrɔn a din wɔn lɛa, á lɛ kɔ ka ganaa min peperen lɛa a din yɔrɔ-a, ka Dɛnaa Yezu *Krita tɔ nɛ, wɔa Lawa a Yiri Fu kɛ dɔ pàã ganaa.

¹² Kaa min tɛnɛn man pii: «Ǹ nə́ sii tumaa lɛ kɔ ma la.» Hiĩ, sɛnɛ, sii tumaa a zɛnaa a siĩ-n min ganaa wa. Ma á boe la má pɛ: máa «Ǹ nə́ sii tumaa lɛ kɔ ma la.» Sɛnɛ, ma a re toɛ ma màn kɔ́n a bɛ̀rɛ baa wa.

¹³Ka á pii doo: «Màn-bii n nɔ̀ wɔ lɛa, nɔ̀ dɔ n màn-bii wɔ lɛa.» Hiĩ, Lawa á re ǹ dinin paanan ziziɛ̃. Sɛnɛ, minbuiin gɔ̀nɔn bie á n zɛnaa din kũ doɛ̃baã siin lɛa wa. Gɔ̀nɔn nə Dɛnaa wɔ lɛa, Dɛnaa dɔ n gɔ̀nɔn wɔ lɛa.

¹⁴Lawa na á Dɛnaa bɔ geren li, á da yiikoonaabaa nɛ. Á re wɔ dɔn boe geren li, a wɔ kaa yiikoonaabaa nɛ ká a din pàã nɛ.

¹⁵Ka a doɛ̃ mà ka gɔ̀nɔn lɛ n Krita gùn lɛa wa? Ma á re Krita gù lɛ siɛ má baa lɔ naarɛbaali wɔ lɛa? Haayii! Ma a re bɛ zɛnɛɛ ka duduu wa!

¹⁶ Ka a doɛ̃ mà bɛ̀ min giã kun ka naarɛbaali ni, mà manə n biɛ gɔ̀nɔn goon lɛa wa? A giala, Lawa a sɛ́wɔ pɛ mà ǹ paanan tá re gɔ̀nɔn goon biɛ.

¹⁷Sɛnɛ, bɛ̀ min mɛn nə́ n doa kɔn ka Dɛnaa nɛ, a yiri nə n biɛ màn goon lɛa ka Dɛnaa nɛ.

¹⁸Ka baa si din kũ doɛ̃baã nyɛɛnɛ! A giala, mà min bɛ́ sii baraa gialakun mɛn kɔsɔ zɛnɛɛ, mà bɛ n kanaa, a we a gɔ̀nɔn nɛ wa. Sɛnɛ, min mɛn bɛ́ n din koe din kũ doɛ̃baã sii la, bɛ n sii baraa zɛnɛɛ a din gɔ̀nɔn kɛ nɛ.

¹⁹ Hinlaa ka n ka a doɛ̃ mà ka gɔ̀nɔn lɛ n Yiri Fu a giã ǹ kion lɛa wa? Bɛa Yiri Fu kɛ lɛ ka nɛ, Lawa din na á kɔ ka la. Ka bie ka dinin wɔ lɛa doo wa.

²⁰Lawa ka pii, á ka giɔ̀mɔ saraa. A bɛ́ miɛ̃, ka ka gɔ̀nɔn lɛ baa Lawa tɔ gole kɔ ǹ màn lɛa.