Read Samo, Southern Kor1 7 Bible Online

Kor1 7 - Samo, Southern bible

Kor1 7

¹Ka nɔ̀n da ma la ka boon mɛnɛn nɛ kaa sɛ́wɔ lɛ nɛ, wɔ ǹ die bɛn ganaa kanna. Ká pɛ, mà giĩ a siĩni a lɔ wɔ wa.

²Bɛ gɔ́ɔ̃ nɛ, man pii máa a n soɛ giĩ gogoonmaa a lɔ goã, lɔ gogoonmaa dɔ zuũ goã, ń giɛ din kũ doɛ̃baã siin baran yɛ wa.

³Giĩ na a nya ǹ dí nya a lɔ wɔ paǹ li, lɔ dɔ na a nya ǹ dí nya ǹ zuũ wɔ paǹ li.

⁴Lɔ a boe la, a n din foo sii zɛnaa ka a gɔ̀nɔn nɛ wa, a giala, a gɔ̀nɔn lɛ nə ǹ zuũ wɔ lɛa; a din yii goon ne, giĩ dɔ a boe la, a n din foo sii zɛnaa ka a gɔ̀nɔn nɛ wa, a giala, mà a gɔ̀nɔn lɛ na a lɔ wɔ lɛa.

⁵Ka nyan nə n piã ka kɔn nɛ wa, yǎa bɛ̀ ká pɛ kɔn nɛ, ka ń zoɛ̃ mà ka Lawa nyankɔ biikoo tɛn li. Sɛnɛ bɛ kio, ka ǹ wusii ka kaa kun a giala yii li. Bɛ̀ bɛ bie wa, boo ma din la baã tɔn kiɛ̃ a ka kũ, *Sɛtaan boo la a ka bebere.

⁶Ma bɛ́ boo mɛn diɛ kɛnɛn ke, a bie boo nyaǹ zii lɛa ma á pii wa. Sɛnɛ, a n lɛ kɔ ǹ sii lɛa, ma á pii ka nɛ.

⁷Ka boo taãn nɛ, bɛ̀ masɛ wɔ a lɛa nɛ, man pii máa min tumaa goã ka masɛ bɛ́ lɔn, a lɔ ná a banban. Sɛnɛ, Lawa na á bǐɛ̃ baa min tumaa la, ka yɔrɔ totoro ne, á kɛ kɔ kɛ la, á kɔsɔ dɔ kɔ kɛ dɔ la.

⁸Ma bɛ́ boo mɛn diɛ giɔmɔsɔ̃n manɛ, ka lɔ giɔɔrɔn nɛ, bɛ á ke: Bɛ̀ ka kaa tá kanaa zɛnaa ka woo ne, ka masɛ wɔ bɛ́ lɔn, á siĩni.

⁹Sɛnɛ bɛ̀ ká dɔ̃, mà ka a boe la ka ka dinin kũ doɛ̃ wa, ka kɔn wɔ. Kɔn-wɔ á soɛ á la nɔmaa foo sii gunun ni.

¹⁰ Kasɛn Lawa-nyankɔlen mɛnɛn bɛ́ ká kɔn wɔ, man boo nyaǹ zii kɛ nyɛɛ ka nɛ (sɛnɛ, a bie boe masɛ li wa, a n boe Dɛnaa din li): Lɔ kɔn-wɔle doamaa bie, a n na kɔn ka ǹ zuũ-n wa.

¹¹Bɛ̀ á boo la á n na kɔn nɛ dɔn, a nyan wɔ giĩ kɔsɔ li wa, hinlaa a wusoo, a wo kaa kun ka ǹ zuũ zizi ni. Giĩ dɔ doamaa bie, a na a lɔ loo wa.

¹²Man pii gialakunun kɛn manɛ (ma din a boo n bɛ nɛ, Dɛnaa wɔ bie wa): Bɛ̀ giĩ Lawa-nyankɔle mɛn a lɔ n goleemali baãnaa lɛa, lɔ lɛ lɛ kɔ mà asɛ tá a tá kanaa zɛnɛɛ kun ni a wo ne, a nyan loo wa.

¹³A din yii goon ne, bɛ̀ lɔ Lawa-nyankɔle mɛn zuũ n goleemali baãnaa lɛa, giĩ lɛ lɛ kɔ mà asɛ tá a tá kanaa zɛnɛɛ kun ni a wo ne, a nyan nə n piã wa.

¹⁴Bɛ̀ á n baa miɛ̃, giĩ goleemali baãnaa lɛ n Lawa a zaman min biɛ, a lɔ lɛ taman yii, lɔ goleemali baãnaa lɛ dɔ n Lawa a zaman min biɛ, ǹ zuũ lɛ taman yii. Bɛ̀ a n baa miɛ̃ wa, ǹ nɛnyaanan man goɛ̃ ka min kooron bɛ́ lɔn, a da yaa a taãnbaa li, nɛnyaanan lɛn tá boe la, ǹ Lawa a zaman minin baa.

¹⁵Sɛnɛ, bɛ̀ goleemali baãnaa lɛ pɛ, mà a nə n niɛ̃ kɔn ka goleemali wole lɛ nɛ, ta a giĩdɛnaa nɛ, ta a lɔdɛnaa nɛ, ka toa ǹ nə n na kɔn, ǹ goã ǹ dinin foo yii li. A giala, Lawa na á ka bíi, mà ka goã ka là nyantoro ne.

¹⁶Nsɛ Lawa-nyankɔle lɔ dɛnaa lɛ, ma n siɛ lɔn n tɔn dɔ̃, mà n tá re n zuũ kirisibiɛ? Nsɛ Lawa-nyankɔle giĩ dɛnaa lɛ, ma n siɛ lɔn n tɔn dɔ̃, mà n tá re n lɔ kirisibiɛ?

¹⁷Bɛ din tumaa kio, Dɛnaa din na á didie koa gɔn kɔ́n la. A bɛ́ á n bíi ǹ mɛn pinaa, á daa n yaa gɔn mɛn lɛ la ke, n dɔ giã bɛ lɛ la. Man Lawa a sɔmɔ din tumaa darɛɛ bɛ lɛ ganaa.

¹⁸Bɛ̀ Lawa min mɛn bíi, bɛ̀ á kurii ni, a nyan ga li, mà a n bɛa kurii lɛ papaɛ̃ wa. Bɛ̀ Lawa min mɛn dɔ bíi, bɛ̀ a ba kurii-n wa, a nyan ga li, mà ǹ na asɛ kuru wa.

¹⁹Kurii a màn kɔn lɛa wa, kuriibaã dɔ a màn kɔn lɛa wa. Lawa a dí-pɛn lɛ si dinsɔɔ̃ n sii taãn lɛa.

²⁰Lawa didie yaa gɔn mɛn la, á bíi, didie doamaa nɛ a goã bɛa gɔn kɛ lɛ la.

²¹Ta n mɛn nə n goã bɛ̀rɛ lɛa, n bíi-wɔ pinaa, n nyan nə n gɔ́ɔ̃ bii ka bɛ-n wa. Sɛnɛ, ta ma nə n din si ǹ gɔn yii dinin, n doa n dí nya Lawa nɛ bɛ dɔ gɔ́ɔ̃ nɛ.

²²A giala, Dɛnaa min mɛn bíi bɛ̀rɛbaa gɔ́ɔ̃ nɛ, bɛ n Dɛnaa a tá ma din gɔn wìi a lɛa wole lɛa. A din goon ne, Dɛnaa min mɛn bíi tá ma din gɔn wìi a lɛa wolebaa gɔ́ɔ̃ nɛ, bɛ n goɛ̃ *Krita a bɛ̀rɛ lɛa.

²³Lawa ka pii, á ka giɔ̀mɔ saraa. Ka nyan toa ka goã minbuiin nɛ a bɛ̀rɛ lɛa doo wa.

²⁴Bɛ̀ á miɛ̃, ma dɔɔ̃nɔn lɛn, didie tumaa goã Lawa yɔrɔ-a, ka a din bɛ́ á daa n yaa gɔn mɛn la, á n bíi.

²⁵Min mɛnɛn bɛ́ ǹ tɔn kɔn wɔ wa, Dɛnaa a boo nyaǹ zii ba ma gɔn ǹ wɔ paǹ li wa. Sɛnɛ, ma din yiri boo n ke, ma á pii. Dɛnaa bǐɛ̃ mɛn baa ma la, bɛ á toɛ min waa ma la.

²⁶Foo-ziziɛ̃ ǹ sii mɛn bɛ́ die minbuiin ganaa sisia, man taasɛ, máa bɛ̀ giĩ goã a ná a lɔ siɛ wa, bɛ á soɛ.

²⁷Sɛnɛ, bɛ̀ n mɛn a lɔ tan, ka nyan toɛ̃ kɔn wa. Bɛ̀ n mɛn tɔn lɔ wɔ wa, n nyan ga lɔ li wa.

²⁸Sɛnɛ, ta n mɛn nə ń lɔ wɔ, n sii baraa zɛnaa wa, ta nɛniɛ na á wɔ giĩ li, a sii baraa zɛnaa wa. Sɛnɛ, man zoɛ̃, máa guĩ guguru mɛn bɛ́ kɔn-wɔlen mìi ni, ǹ kanaa siin gɔ́ɔ̃ nɛ, máa ka n nyanaa bɛ nɛ.

²⁹Maa boo kɛ bɛ́ màn mɛn pii ka nɛ, ma dɔɔ̃nɔn lɛn, á ke: biikoo lɛ gialakun ba tɛ doo wa. A saa sisia ganaa, min mɛnɛn lɔ bɛ́ á tan, ǹ goã ka ǹ lɔ na a banban.

³⁰Min mɛnɛn bɛ́ wuu pii, ǹ goã ka ǹ foo na a tɔn ziziɛ̃ wa. Min mɛnɛn bɛ́ yaa woe, ǹ goã ka ǹ tɔn foo kɔɔ̃nbaa yɛ wa. Ǹ mɛnɛn nə mànan pii, ǹ goã ka ǹ màn-piin lɛn manə ǹ ba ǹ gɔn ma.

³¹Min mɛnɛn bɛ́ dí nyɛɛ kanaa kɛ gɔ́ɔ̃ nɛ, ǹ ná a là yii, ǹ goã ka manə ǹ tɔn dí kɔ́n nya ǹ ná a là yɛ wa. A giala, kanaa kɛ bɛ́ yɔrɔ mɛn la, a re beleboe doo wa.

³²Ma ba li máa taasiɛ mɔnaa ka ganaa wa. Giĩ mɛn bɛ́ a tɔn lɔ wɔ wa, bɛ nə n taasɛ Dɛnaa foo siin dininsɔɔ̃nɔn ganaa, a n giɛ li, mà asɛ Dɛnaa foo kɔɔ̃n kɔ.

³³Sɛnɛ, giĩ mɛn bɛ́ á lɔ wɔ, bɛ nə n taasɛ kanaa foo siin dininsɔɔ̃nɔn ganaa, a n giɛ li, mà a na a lɔ foo kɔɔ̃n kɔ.

³⁴A n talɛɛ-n kɔn taasiɛ màn paa bii ni. A din yii goon ne, lɔ hinlaa nɛniɛ mɛn bɛ́ a tɔn wɔ giĩ li wa, bɛ nə n taasɛ Dɛnaa a siin dininsɔɔ̃nɔn ganaa, a giala, a n giɛ li, mà asɛ gɔ̀nɔn laanka asɛ a taasiɛ goã Dɛnaa wɔ lɛa. Sɛnɛ, ǹ mɛn wɔ giĩ li, bɛ nə n taasɛ kanaa foo siin dininsɔɔ̃nɔn ganaa, a n giɛ li, mà asɛ nə ǹ zuũ foo kɔɔ̃n kɔ.

³⁵Man bɛ pii ka nɛ, máa a ka bǐɛ̃ kɔ, ma bie ka kurii kɔn-wɔ ganaa wa. Man giɛ li, máa kaa tá kanaa a sii zɛnaa soɛ kɔ kɛ nɛ, ka goã Dɛnaa din wɔn lɛa taãn-taãnɛ.

³⁶Bɛ̀ tɔntɔraa mɛn yɛ mà a boe la a n din kũ a san wɔ paǹ li wa, a saa lɔ lɛa a kɔnpɛ ka a din a taasiɛ nɛ. Bɛ bie sii baraa lɛa wa.

³⁷Sɛnɛ, bɛ̀ tɔntɔraa mɛn bɔ a din foo ne, pàã sii ná a ba a-n wa, bɛ̀ a boe a din la dɔn, bɛ̀ a taasɛ a din foo ne mà asɛ a re woe a san lɛ ganaa duduu wa, asɛ n sii sonbore zɛnɛɛ.

³⁸Bɛa yɔrɔ lɛ la, min mɛn bɛ́ lɔ siɛ, ǹ dɛnaa n sii sonbore zɛnɛɛ, min mɛn dɔ bɛ́ a lɔ siɛ wa, bɛa dɛnaa na á sii sonbore zɛnaa parsii ni.

³⁹Lɔ n doa-n kɔn ka ǹ zuũ ni, ta maǹ beleboe kanaa lɔn. Sɛnɛ, bɛ̀ ǹ zuũ gã, min mɛn bɛ́ kɔɔ̃n a ganaa, á boe la a kɔn wɔ ka bɛ nɛ. Sɛnɛ, giĩ lɛ goã Lawa-nyankɔle lɛa.

⁴⁰Bɛ̀ á goã a ná a kɔn wɔ wa, masɛ yii li, a là nyantoro á gole ka bɛ nɛ. Maa taasiɛ n ka bɛ nɛ, a tá ma yiri ni, máa Lawa a Yiri Fu tá ma li.