Read Samo, Southern Kor1 8 Bible Online

Kor1 8 - Samo, Southern bible

Kor1 8

¹Bɛ̀ á daa dì wúlu bɔ ǹ siĩ boo wɔ paǹ li, sonbore ne, «wɔ tumaa á màn doɛ̃,» ka ka tɛnɛn bɛ́ pii lɔn. Màn-doɛ̃ kɛ lɛ n minbuiin piɛ̃ gole koe, sɛnɛ, kɔn-narɛɛ n wɔa goleemali gole koe.

²Bɛ̀ min taasɛ a yiri ni, mà asɛ á màn kɛ doɛ̃, a tɔn bɛa màn lɛ dɔ̃, ka a bɛ́ kɔnboe a dɔ̃ lɔn wa.

³Sɛnɛ, bɛ̀ min tá Lawa narɛ, Lawa tá ǹ dɛnaa doɛ̃.

⁴Bɛ lɛ nɛ, nɔ̀n-diɛ bɛ́ màn mɛn ganaa, á ke: Wɔ á boe la wɔ dì wúlu bɔ ǹ siĩ sɔ̃? Wɔ á doɛ̃, wáa dì a màn kɔ́n bǎã siɛ kanaa kɛ-n wa. Wɔ n doɛ̃ dɔn, wáa Lawa goon toto na a tan.

⁵Min tɛnɛn tá taasɛ, mà lawan man tán la ka lon ne, lawa gigiã dinin, ka dɛnaa gigiã nɛ.

⁶Sɛnɛ, wɔsɛn yii li, Lawa n goon toto, a n Díi lɛa, màn tumaa zɛnaali lɛa, wɔa tá kanaa na a din wɔ lɛa. A din yii goon ne, Dɛnaa dɔ n goon toto, Yezu *Krita nɛ. Màn tumaa na a tan a din pàã ganaa, wɔ n kanaa a din pàã ganaa.

⁷Sɛnɛ, min tumaa tɔn bɛa sonbore kɛ dɔ̃ wa. Haalɛ tɔn pelo, a bɛ́ á ǹ tɛnɛn lɛ-mui sii baa, maǹ tɔn woe dì *wúlu bɔ ǹ bǎã nɛ, bɛ̀ ǹ tá tɔn dì wúlu bɔ ǹ siĩ soɛ̃, ka n pɛ mà bɛa siĩ lɛ n dì lɛ din wɔ lɛa. Ǹ gɔ́ɔ̃gɔ́ɔ̃ ǹ taasiɛ bɛ́ a tɛ wa, bɛa màn-bii kɛ lɛ n *gɔ̀ loe ǹ ganaa gɔrɔ.

⁸Màn-bii bie doe wɔ-n Lawa li wa. Ta wɔ bii wa, wɔ a foɛ̃ màn kɔ́n li wa, ta wɔ bii, wɔ a màn kɔ́n dɔ yii wa.

⁹Sɛnɛ, ka n yiri kɔ, bɛa tá ma din gɔn wìi a lɛa kɛ lɛ, a nyan goleemali boɛɛndɛnan kaa sii baraa-n wa.

¹⁰A giala, bɛ̀ goleemali boɛɛndɛnaa nə́ nsɛ yiridɛnaa lɛ yɛ, màn bii dì wúlu bɔ ǹ kion, á re pàã koe a gɔ́ɔ̃gɔ́ɔ̃ ǹ taasiɛ la, a pɛ mà asɛ dɔ n kɔnboe a dì wúlu bɔ ǹ siĩ sɔ̃ wa?

¹¹Nsɛ a yiridɛnaabaa lɛ là n ka wàa nɛ? N bɛ́ goleemali boɛɛndɛnaa lɛ diɛ papaã ganaa, a da yaa, Krita na á gã bɛa dɔɔ̃n kɛ lɛ dɔ a kirisibaa a lɛa.

¹²Bɛ̀ ka á sii baraa zɛnɛɛ ka dɔɔ̃nɔn man miɛ̃, ka ǹ sii lɛ we gɔ́ɔ̃gɔ́ɔ̃ ǹ taasiɛ boɛɛndɛnan ganaa, ka n sii baraa zɛnɛɛ Krita nɛ.

¹³Bɛ lɛ nɛ, bɛ̀ màn-bii á die ma diɛ ma dɔɔ̃n da sii baraa-n ganaa, man siĩ tii duduu goon lɛa, bɛ á soɛ ma dɔɔ̃n da sii baraa zɛnaa ganaa nɛ.