Read Samo, Southern Kor2 1 Bible Online

Kor2 1 - Samo, Southern bible

Kor2 1

¹ Masɛ Pooli n Yezu *Krita a dia dí-a wole lɛa, á kɔnpɛ ka Lawa foo sii ni. Ma laanka ma dɔɔ̃n Timote ne, wɔ n sɛ́wɔ kɛ diɛ Korɛntin Lawa a sɔmɔ minin la, ka Lawa a minin mɛnɛn tumaa bɛ́ Grɛki gána tumu ni.

²Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.

³Ma á fòo diɛ Lawa nɛ, asɛ mɛn bɛ́ wɔa Dɛnaa Yezu Krita ǹ Di lɛa. A din nə Díi lɛa wɔ makara doɛ̃. A din nə Lawa lɛa ma foo taɛ̃ sii tumaa gɔ́ɔ̃ nɛ.

⁴Lawa din nə ma foo taɛ̃ maa fuu-yɛ tumaa gɔ́ɔ̃ nɛ. Ma foo tãbaa mɛn yɛ a din li, a n mà ma boo la ma fuu-yɛlen tumaa foo taã ka bɛ lɛ nɛ.

⁵Sonbore, Krita a fuun lɛn bɛ́ ma yii gigiã lɔn, man foo tãbaa gole dɔ yii miɛ Krita pàã ganaa.

⁶Ma bɛ́ fuu lɛ yii ke, ka dinin bǐɛ̃ kɔ a lɛa nɛ. Man máa ka foo tãbaa yɛ. Ma foo bɛ́ tã ke, ka dinin foo tãbaa a lɛa nɛ. Ma dɔ fuun mɛnɛn kuubaa si ma ganaa, bɛa foo tãbaa lɛ n toɛ ka dɔn tá bɛa fuun lɛn miãn sii ka ganaa.

⁷Man waa-n kɛ la taãn-taãnɛ kaa wɔ paǹ li: Ma á doɛ̃ máa ka bɛ́ kaa wɔ gii yii maa fuun lɛn nɛ ke, ka n die kaa wɔ gii yii maa foo tãbaa lɛ dɔ-n miɛ̃.

⁸ Ma dɔɔ̃nɔn lɛn, taãn nɛ, man giɛ li, máa ma fuu mɛn yɛ Azii gána nɛ, máa ka bɛ dɔ̃. Fuu lɛ la ma yii ni, á kiɛ̃ ma pàã yii la, ka ma daa ma pɛ, máa man die giɛ̃.

⁹Ma yiri ni, fuu kɛ na á dɔ gɛ̀ wɔ gɔn la. Bɛ lɛ-n ke, ma a n foo doɛ ma din ganaa doo wa, Lawa ke geren yii kiɛ, man doɛ bɛ ganaa.

¹⁰A din na á ma kirisibaa bɛ miã gɛ̀ kɛ lɛ ganaa. Á re ma kirisibiɛ doo dinin. Hiĩ, man má n foo doa a din lɛ ganaa, á tɔn die ma kirisibiɛ doo.

¹¹Ka dɔn tá re n doe ma lɛ ka kaa Lawa nyankɔ nɛ. Lawa á re min gigiã a nyankɔ sii, a bɛa bǐɛ̃ kɛ zɛnaa ma nɛ, bɛa yɔrɔ kɛ la, min gigiã á re barka diɛ Lawa nɛ maa lɛa.

¹²Ma á boe la man din laakalaa ka màn kɔ́n nɛ. Bɛa màn lɛ á ke: Ma gɔ́ɔ̃gɔ́ɔ̃ ǹ taasiɛ ǹ nyɛɛ ma nɛ, mà má tɔ wɔ kanaa kɛ nɛ, sanparɛ kasɛn wɔ paǹ li, ka gɔ́ɔ̃ fubaa nɛ, ka Lawa a *yoreenbaa nɛ. Ma bie má zɛnaa ka minbuiinin sii-doɛ̃-n wa. Man má zɛnaa ka Lawa a bǐɛ̃baa barka nɛ.

¹³Ma bɛ́ sɛ́wɔn mɛnɛn diɛ ka la, ma bie màn kɔsɔ kiɛ̃ ǹ nɛ wa. Ka bɛ́ boe la, ka á màn mɛn pii ka tá a giala miɛ, man bɛ lɛ kiɛ̃ ǹ nɛ. Sɛnɛ, a tá ma yiri ni, máa ka á re boe la ka kɛ giala ma foaãnɛ.

¹⁴A giala sisia, ka ba a tumaa giala miɛ bɔrɔ wa. Sɛnɛ, Dɛnaa Yezu a wusoo a daa pinaa, ka á re n dinin kalɛɛ maa lɛa, ma dɔ á re n din kalɛɛ ka dɔn lɛa.

¹⁵ Man má n foo doa ka ganaa taãn-taãnɛ. Bɛ lɛ-n má tɔ́n lɛ kɔ, máa bɛ̀ ma á woe Masedoanɛ gána nɛ, máa ma á re boe ka li, bɛ̀ má n bɔyaa doo, ma da golee ka li. Bɛ̀ a na á n baa miɛ̃, bɛ̀ a n die foo kɔɔ̃n kɔ biɛ ka ganaa gunyin paa. Ka bɛ nɛ, bɛ̀ ka n die n doe ma lɛ, ka maa Zudee zii tɔ-wɔ kɛ nɛ.

¹⁷Bɛ a pɛ miɛ̃ kɛ a boe la a toa ka pɛ, mà ma a boo goon dali lɛa wa? Ma bɛ́ maa siin yɔrɔn boe lɔn, minbuiinbaa a bǐɛ̃ kɔ dinsɔɔ̃-n ma á giɛ li, a n boe la a toa ma pɛ mà «hiĩ, hiĩ», a da yaa «haayii, haayii» ni ma gɔ́ɔ̃ nɛ?

¹⁸Lawa n maa siére lɛa, ma boo mɛn da ka nɛ, a bie «Hiĩ, hiĩ» laanka «Haayii, haayii» lɛa wa koe.

¹⁹ A giala masɛ nɛ, ka Silaasi laanka Timote ne, wɔ Lawa a Nɛ Yezu Krita mɛn boo laakalaa kaa piɛ, a bie á goã pii mà «Hiĩ», a da yaa «Haayii» na a gɔ́ɔ̃-n wa. Ka bɛ-n dinin, a na á goã Lawa a «Hiĩ» lɛa.

²⁰Sonbore ne, a din nə Lawa a lɛ-kɔ ǹ sii tumaa a «Hiĩ» diɛ lɛ piɛ̃. Yezu Krita a lɛa nɛ, wɔ á pii wáa «a n miɛ̃», wɔ n Lawa tɔ gole koe ne.

²¹Lawa na á toa ma gòãn nə́ doa, kun ka ka dɔn nɛ, Krita wɔbaa gɔ́ɔ̃ nɛ. A din Lawa lɛ na á wɔ bɔ á wɔ baa a din wɔn lɛa.

²²A din na á ná a wɔbaa ǹ nyaǹ kiɛ̃ wɔ ganaa, a ná a Yiri Fu dɔ da wɔ foon ne. Bɛ n nyɛɛ mà a bǐɛ̃n mɛnɛn koa wɔ nɛ, mà wɔ á re bɛn yii.

²³Lawa n maa siére lɛa; bɛ̀ má soɛ bɔ, a ma nyin papaã. Man máa ma a die ka yii wɛ̃ wa, bɛ lɛ-n má pɛ máa ma a die Korɛnti bɔrɔ wa.

²⁴Goleemali wɔ paǹ li, wɔ ba li wáa wɔ sii kɔ́n da ka mìi-n wa. A giala, mà ka gòã doa parsiini goleemali gɔ́ɔ̃ nɛ. Sɛnɛ, wɔ ǹ taasɛ wáa wɔ dí nya kun ka nɛ kaa yii-nyɛɛ a lɛa.