Read Samo, Southern Kor2 10 Bible Online

Kor2 10 - Samo, Southern bible

Kor2 10

¹Masɛ Pooli dinmaa n kɛ pii ka nɛ, masɛ mɛn bɛ́, ǹ nə pii mà bɛ̀ ma á ka li, mà man min basiɛ̃ lɛa, sɛnɛ, mà bɛ̀ ma a ka li wa, mà man kakaarɛ ka ganaa. Man ka nyankoe ka *Krita a foo basiɛ̃ laanka a sonborebaa nɛ.

²Bɛ̀ má daa ka li, ka nyan ma da kakaarɛbaa ǹ sii zɛnaa ganaa ka pàã-n wa. A giala, min mɛnɛn bɛ́ taasɛ, mà man maa siin zɛnɛɛ kanaa sii dinsɔɔ̃ a lɛa, ma á boe la ma kakaarɛbaa ǹ sii zɛnaa ǹ nɛ doɛ̃.

³Taãn nɛ, wɔ n kanaa kɛ a min lɛa, sɛnɛ, wɔ bie yɔ boe ka kanaa minbaa ǹ yɔrɔ dinsɔɔ̃-n wa.

⁴Haayii, wɔsɛn ziabaa ǹ mànan bie kanaa a minbuiinin wɔn lɛa wa, sɛnɛ, ǹ pàã n boe Lawa li, ǹ nə́ Lawa a zɔ́ɔn sii ziziɛ̃. Min mɛnɛn bɛ́ taasiɛ gole we ǹ dinin ganaa, maǹ bɛn taasiɛ ziziɛ̃.

⁵Min mɛn tumaa a din gole kɔ bɛ́ a la yii ni, n dinin koɛ Lawa-doɛ̃ ganaa, wɔ ǹ bɛn tumaa gisĩ. Wɔ n min tumaa a taasiɛ kuĩ wɔ á golee ne, yǎa ǹ dɔn nə Krita a boo sii.

⁶Bɛ̀ ká boo-sili peperen baa lɔn, man dɔlɔ boe boo-sili baãnaan tumaa ganaa gɔrɔ.

⁷Ka ga siin ganaa doɛ̃. Bɛ̀ bɛ nɛ, bɛ̀ min mɛn golee li mà asɛ n Krita wɔ lɛa, ǹ dɛnaa nə n yiri koa kɛ li gɔrɔ. Masɛ dɔ n Krita wɔ lɛa ka a dɔ bɛ́ lɔn.

⁸Dɛnaa din pàã mɛn kɔ ma la, ta má n din laakalaa ka bɛ-n boɛɛnɛ, bɛa sìi diɛ ma ganaa wa. Bɛa pàã lɛ n kaa sii a wo nyɛɛnɛ ǹ giala lɛa, a bie ka ziziɛ̃ wa.

⁹A bie ka man zoɛ̃ mà ma nyɛ́ɛ da ka ganaa ka maa sɛ́wɔn nɛ wa.

¹⁰A giala, maǹ pii mà maa sɛ́wɔn lɛn tá guguru, ǹ nə́ kaka. Sɛnɛ, mà bɛ̀ ma tá ka li, mà ma pàã a tɛ wa, mà ma a boo dɔ diɛ doɛ̃ wa.

¹¹Bɛ miã dɛnan kɛn lɛn nə n yiri koa li ǹ dɔ̃, mà bɛ̀ man toa sɔsɔɔ ma boo mɛn da, ta man ka li, maa sii-zɛnaa dɔ n miɛ̃.

¹²Min mɛnɛn bɛ́ n dinin piɛ̃ gole koe, masɛ ba n zoɛ̃ kɔn ka bɛn nɛ wa. A giala, ǹ mìi we banban, maǹ nə n zoɛ̃ kɔn ka ǹ dinin ni, ǹ kɔnboe n ka ǹ dinin ni.

¹³Bɛ̀ masɛ wɔ a lɛa nɛ, ma a re n din laakalɛɛ, a kiɛ̃ ma din a lɛ doa ǹ bǎã la wa. Lawa dí kɔ ma la a ná a lɛ doa maa, bɛ lɛ na á daa ma-n yǎa kaa piɛ, ma a re kiɛ̃ bɛ la wa.

¹⁴Ma bɛ́ má daa kaa piɛ, ma bie má kiɛ̃ maa lɛ doa ǹ bǎã la wa. A kɔnpɛ ka bɛ lɛ nɛ, ma din nə má daa Boo Tii Kɔɔ̃n pɛ ka-n bibinaanɛ Yezu Krita wɔ gɔn la.

¹⁵Ma miãn nə dí mɛn nya, ma a n din gole koe ka bɛ-n wa. Sɛnɛ, ma á taasɛ máa kaa goleemali á re gole koe, màn mɛn bɛ́ toɛ, ma boo la ma dí nya ka bii, dí mɛn bɛ́ gole parsiini. Lɛ doa ǹ bǎã mɛn nə n koa, ma a re bɛ la boe wa.

¹⁶Bɛ kio, ma á re boe la, ma wo ka Boo Tii Kɔɔ̃n kɛ nɛ ka lɛkoro-a ǹ kiwin ni. Min kɔsɔn nə dín mɛnɛn nya ǹ dinin bǎã taãnan nɛ, man ma a n din laakalɛɛ ka bɛn nɛ wa.

¹⁷ Ká Lawa a sɛ́wɔ bɛ́ á pɛ lɔn: «Bɛ̀ min mɛn tá zoɛ̃ mà a n din koa, a n din koa ka Dɛnaa a sii-zɛnaa nɛ.»

¹⁸Ka boo taãn nɛ, min mɛn bɛ́ n din laakalɛɛ, ǹ dɛnaa a tɔ sonbore yii wa, sɛnɛ, Dɛnaa bɛ́ min mɛn laakalɛɛ, bɛ n tɔ sonbore yii.