Read Samo, Southern Kor2 11 Bible Online

Kor2 11 - Samo, Southern bible

Kor2 11

¹Haya! Bɛ̀ má gàãnaabaa boɛɛn zɛnaa, ka sabarɛbaa ka si ka ganaa! Hiĩ, ka maa sii si ka ganaa!

²Lawa bɛ́ zuu boe ka la lɔn, masɛ dɔ n zuu boe ka la miɛ̃. A giala, ka n goon ka nɛniɛ mɛn bɛ́ a tɔn giĩ dɔ̃ wa, má wɔsɔ giĩ goon toto la, bɛ n ka *Krita nɛ.

³ Sɛnɛ, nyɛ́ɛ tá ma ganaa, máa ka yiri á die ziziɛ̃, ka miɛ̃ bɛ́ á Ɛvu yiri sã ka soɛ-n lɔn. Doa-kɔn sonbore *yoreen mɛn bɛ́ ka bii ka Krita nɛ, ma ba li máa ka n na, ka n bɔ bɛ ganaa wa.

⁴A giala, ta min na á daa Yezu kɔsɔ boo da ka nɛ, a ná a goon ka masɛ bɛ́ má ǹ mɛn pɛ ka-n wa, hinlaa á yiri kɔsɔ wɔ ka nɛ a ná a goon ka kɛ nɛ ká yɛ wa, hinlaa á Boo Tii Kɔɔ̃n kɔsɔ pɛ ka nɛ tɔtɔ ka kɛ nɛ masɛ pɛ ka nɛ, ka ǹ lɛ koe bɛ ganaa taãn-taãnɛ.

⁵A tá ma yiri ni, máa masɛ a nyaabaa nɛ bɛa dia dí-a wole gɔ̀lɔ̀ dadaran kɛn lɛn-a wa.

⁶Ma a boo diɛ doɛ̃ wa, bɛ á taãn biɛ. Sɛnɛ, màn-doɛ̃ wɔ paǹ li, màn kɔ́n ma nyaabaa wa. Ma bɛ sɛ nyaa ka-n foaãnɛ biikoo tumaa li, sii tumaa gɔ́ɔ̃ nɛ.

⁷Má Lawa a Boo Tii Kɔɔ̃n kɛ laakalaa ka-n kooro. Má n din gisĩ má kasɛn goa lon. Man má sã ka bɛ nɛ?

⁸Má lɛ kɔ Lawa a sɔmɔ kɔsɔn nə́ goã ma sarɛɛ, a n goon ka man má bɛn ki bɔ, má daa n dɔ kasɛn lɛ nɛ.

⁹ Ma bɛ́ má goã kaa piɛ, bɛ̀ ma laadoo tá wɔrɔ ganaa, ma mɛnaa kaa min kɔ́n la wa. A giala, wɔ dɔɔ̃nɔn mɛnɛn nə bɔ Masedoanɛ, ǹ nə́ daa ma laadoo màn tumaa kɔ ma la. Man din kũ sii din tumaa gɔ́ɔ̃ nɛ, máa ma nyan goã guĩ lɛa ka mìi-n wa. Man tɔn die n din kuĩ miɛ̃.

¹⁰Krita a sonbore mɛn bɛ́ ma nɛ, man pii ka nɛ bɛa lɛa, máa min kɔ́n ba boe la a masɛ a din laakalaa kɛ kurəə Grɛki gána paǹ kɔ́n nɛ wa.

¹¹Bɛ giala mà wàa? Man ma a ka narɛ wa? Lawa din tá doɛ̃ mà ma á ka narɛ.

¹²Doo, ma bɛ́ maa sii zɛnɛɛ lɔn, man tɔn die zɛnɛɛ miɛ̃, ń giɛ min mɛnɛn bɛ́ giɛ gɔn kũ ǹ bǎã li, mà ǹ nə n dinin laakalaa, ǹ pɛ mà ǹsɛn dɔn man dí tɔrɔ goon nyɛɛ ka masɛ nɛ, bɛ nyan yɔrɔ yɛ ǹ li wa.

¹³Bɛa minin kɛn lɛn ba dia dí-a wole taãnan lɛa wa. Maǹ soɛ boe ka ǹ nya ǹ dí ni, ǹ nə́ n dinin biɛ Krita a dia dí-a wolen lɛa.

¹⁴Bɛ kɔ́n ba min tɔwɛɛ wa, a giala, *Sɛtaan dinmaa á boe la, a n din baa lon a dia dí-a wole tɛ fúludɛnaa lɛa.

¹⁵Bɛ̀ bɛa dí-nyalin kɛn lɛn dɔn nə́ n bɔyaa, ǹ nə́ n dinin baa dí pepere nyalin lɛa, a sii soree lɛa wa. Sɛnɛ, ǹ giala-nyɔmɔɔ waáraa, ǹ màn mɛn zɛnaa, bɛ lɛ n die doe ǹ ganaa.

¹⁶Man wusii pii ka-n doo: máa min kɔ́n nyan pɛ mà gàãnaa n ma-n wa. Hinlaa, ta ka ma baa gàãnaa lɛa, ka lɛ kɔ ma ganaa miɛ̃, ń giɛ ma dɔ á boe la, man din laakalaa boɛɛnɛ.

¹⁷Sonbore ne, kanna kəni, màn mɛn bɛ́ ma diɛ a nɛ, ma nə́ n din laakalɛɛ, ma ń boo diɛ ka gàãn man yui ma li. Dɛnaa foo sii bie ka bɛ-n sɛn wa.

¹⁸Bɛ̀ gialakunun tá n dinin laakalɛɛ ǹ minbuiinbaa ǹ siin lɛa, ma dɔ n die ma din laakalɛɛ.

¹⁹Kasɛn mɛnɛn bɛ́ sii-dɔ̃lin lɛa, min mɛnɛn bɛ́ ǹ mìi we banban, ka ǹ lɛ koe bɛn ganaa ka dinin li.

²⁰Ka ǹ lɛ koe mà ǹ ka lɛduə̃ ka bɛ̀rɛn bɛ́ lɔn, ǹ ka bebere ǹ ka gɔn mànan si ka la, ǹ ka yiri sã, ǹ ga ka ganaa màn bɔnboɛɛnɛn lɛa, ǹ ka dɛ ka yɔrɔ-a.

²¹Bɛ a pɛ á sìi diɛ masɛ ganaa: má pàã wɛɛnaa baa kaa paǹ li! Bɛ̀ min pɛ mà asɛ á n din laakalɛɛ ka sii ni, masɛ dɔ a boe la, ta á daa yaa man boo diɛ ka n pɛ mà gàãnaa n ma nɛ.

²²Bɛ̀ maǹ *Ebrəən lɛa? Masɛ dɔ na a lɛa. Bɛ̀ maǹ Izirayeli minin lɛa? Masɛ dɔ na a lɛa. Bɛ̀ maǹ Abrahamu tɔrɔn lɛa? Masɛ dɔ na a lɛa.

²³ Maǹ Krita a dí-nyalin lɛa? Bɛ̀ á bɛ baa dinin, masɛ á bɛ lɛa má la ǹ nɛ; man boo diɛ ka min mɛn bɛ́ a yiri papaã ka lenlen. Man pii: Nɔmaa gɔ́ɔ̃ nɛ, maa wɔ la ǹ wɔ nɛ, kòso wɔ gɔ́ɔ̃ nɛ, maa wɔ la ǹ wɔ nɛ, duwəə gɔ́ɔ̃ nɛ, maa wɔ la ǹ wɔ-n duduu, sii gɔgɔrɛ mɛn bɛ́ min nə́ boe la a gã a gɔ́ɔ̃ nɛ, bɛ́ ma yɛ gunyin damata.

²⁴ Zuifun min duwəə ka sɔsɔrɔ yii pɔsɔɔwenmanangɔrɔ ke, bɛ nə́ n zɛnaa ma nɛ gunyin sooro.

²⁵ Ǹ nə́ ma dɛ ka bàlà-n gunyin sɔɔ, ǹ nə́ ma dɛ ka kɔlɔn nɛ gunyin goon. Tà kuru ǹ goo yu ka ma nɛ mu li gunyin sɔɔ, má wasa zii goon ka tèlò goon zɛnaa mu li gunyin goon.

²⁶ Maa zii tɔ wɔ gigiã kɛ gɔ́ɔ̃ nɛ ka ma gòã nɛ, sii gɔgɔrɛn nə́ ma yɛ tà kuru ǹ bǎãn nɛ, waa zii ganaa wolen wɔ paǹ li, ma dɔɔ̃n Zuifun wɔ paǹ li, tɔrɔ kɔsɔn wɔ paǹ li, kiwi dadaran gɔ́ɔ̃ nɛ, ka don sabii ni, yìsi mu li ni ka ma din dɔɔ̃n babaraan nɛ.

²⁷Má nɔmaa ǹ dí kakan nya, biikoo gigiã li ma nyuù wɔ wa, bòo ma kũ, mu boro ma kũ. Biikoo gigiã li má n lɛ sɔɔ, má nɔmaa nyan gɔn ka mɔnaa wɛɛ nɛ.

²⁸Ma ba a gialakun kɛ nimii wa, Lawa a sɔmɔn gɔ́ɔ̃ bii ǹ siin man guĩ lɛa ma mìi-n baraa nɛ.

²⁹Die n pàãwɛɛnaa lɛa, man ma a doɛ̃ la wa? Die n sii baraa zɛnɛɛ, a ná a ma kuĩ tɛ lɛa wa?

³⁰Bɛ̀ á kɔnboe man din laakalaa, màn mɛn tumaa bɛ́ maa pàã wɛɛnaabaa nyɛɛ, ma nə n din laakalɛɛ ka bɛn nɛ.

³¹Barka tá Dɛnaa Yezu ǹ Di Lawa ganaa yǎa duduu! A din tá doɛ̃ mà ma a soɛ boe wa.

³² Ma bɛ́ Damaasi kiwi, kii Aretaasi a minin goledɛnaa mɛn bɛ́ walan, bɛ na á kiwi-lɛduə̃lin doa kiwi lɛ a kiɛnlɛn ganaa, mà ǹ ma kũ.

³³Sɛnɛ, yala mɛn bɛ́ kiwi lɛ a kungɔn ganaa, maǹ nə́ ma da kankaan nɛ, ǹ nə́ ma bɔ ka bɛ nɛ, ǹ nə́ ma gisĩ tán. Man má la la ka bɛa yɔrɔ kɛ lɛ nɛ.