Read Samo, Southern Kor2 12 Bible Online

Kor2 12 - Samo, Southern bible

Kor2 12

¹Á kɔnboe man din kalaa, a laanɛ a siĩn wa. Sɛnɛ, Dɛnaa toa ma siin mɛnɛn yɛ, man die bɛn boo diɛ kanna.

²A lɛ̀ fulusii n ke, má min goon dɔ̃, a n *Krita a min lɛa, a n sii-nyaa lɛa hinlaa, a n taãn lɛa hinlaa, ma a bɛ doɛ̃ wa, sɛnɛ, Lawa dinsɔɔ̃ n doɛ̃. Ǹ nə́ bɛa giĩ lɛ saa ǹ nə́ woo ne, yǎa lon gɔ́ɔ̃ giala-nyɔmɔɔ nɛ.

³Sɛnɛ, man wusii ma á pii doo, máa maǹ nə́ woo-n taãn hinlaa a n yii wɔlɔ yɛ ǹ sii lɛa hinlaa, ma a bɛ doɛ̃ wa, Lawa dinsɔɔ̃ n doɛ̃.

⁴Maǹ nə́ giĩ lɛ saa ǹ nə́ woo-n yǎa Lawa a piɛ. Á tɔ́n boon ma walan, a ná a boe la á wusii á pii wa, ǹ nə́ ǹ ba lɛ koe minbuiin nɛ la, mà a wusoo a pɛ wa.

⁵Bɛa min kɛ a lɛa, ma á boe la man din koa. Sɛnɛ, bɛ̀ masɛ a lɛa nɛ, man maa din-koa we maa pàãwɛɛnaabaa nɛ.

⁶Ta man zoɛ̃ mà man din koa, ma a gàãnaa sɛ biɛ wa, a giala, man die sonbore dinsɔɔ̃ pii. Sɛnɛ, ma nə n nyanɛɛ din-koa nɛ, a giala, ma a giɛ li mà min ma baa màn gole lɛa, á la maa sii-zɛnaa nɛ ka maa boo-diɛ-n ma.

⁷Bɛa sii-nyaa kaka kɛ lɛ bɛ́ boe la, á maa din koa ǹ giala biɛ, bɛ lɛ nɛ, ǹ nə́ là paparɛ ǹ busu da ma gɔ̀nɔn nɛ, ka *Sɛtaan a dia dí-a wole bɛ́ lɔn, mà a ma dɛ a ma kurəə din-koa tumaa ganaa.

⁸Ma gunyin sɔɔ n Dɛnaa nyankoe, máa a bɛa busu lɛ saa a bɔ ma la.

⁹Sɛnɛ, a na á pɛ ma nɛ: «Maa bǐɛ̃-zɛnaa kɛ dinsɔɔ̃ tá n boe, a giala, man dɔmalɛ we n ne n pàãwɛɛnaabaa gɔ́ɔ̃ nɛ.» Bɛ lɛ n toɛ kanna, ma á n din kalɛɛ maa pàãwɛɛnaabaa gɔ́ɔ̃ nɛ, ń giɛ Krita a dɔmalɛ kɛ tá n koe ma lɛ.

¹⁰Bɛ lɛ-n ma á n nyɛnyɛɛ maa pàãwɛɛnaabaa ǹ siin kɛn lɛa, ka sɔ kaa ma la nɛ, ka sii kakan ma yɛ nɛ, ka bɔ ma yii-n ni, ka taasiɛn nɛ, Krita a lɛa. A giala, bɛ̀ pàã wɛɛ̃ tá ma ganaa biikoo mɛn li, bɛ lɛ n maa kakabaa biikoo lɛa kəni.

¹¹Ma á ke boo mɛn diɛ ka gàãnaa wɔ bɛ́ lɔn, ka dinin man ká ma da bɛ ganaa, bɛ̀ ka dinin doamaa nɛ, ka maa zia gii si. A giala, ta masɛ a màn kɔ́n lɛa wa, maa a nyaabaa nɛ bɛa dia dí-a wole gɔ̀lɔ̀ dadaran kɛn lɛn-a wa.

¹²Siin mɛnɛn bɛ́ maa dia dí-a wolebaa nyɛɛ, bɛn nə́ n zɛnaa ka bii ka foo-kũ ni sɔnbɔraanɛ. Ǹ nə́ n zɛnaa ka kaãbaa ǹ sii dadaran nɛ, ka sii nyaa ǹ sii kɔsɔn nɛ.

¹³Lawa a sɔmɔ gialakunun kɛn man nə́ wàa yɛ, bɛ n nyaabaa-n kasɛn ganaa? Ma bɛ́ ma goã ka bebere ka gɔn màn sii ka la wa, yǎa bɛ dinsɔɔ̃. Bɛ̀ bɛ á kɔkɔrɔbaa ǹ sii lɛa má zɛnaa ka nɛ, ka bǐɛ̃ kɔ ma ganaa, ka toa ma nɛ.

¹⁴Á ke ma á zoɛ̃ doo, ma da kaa piɛ ká a sɔɔbaa ǹ wɔ nɛ. Ma a re goɛ̃ guĩ lɛa ka mìi-n wa. Man giɛ ka dinin li, ma bie giɛ kaa wɔrɔ li wa. A taãnbaa li, nɛnyaanan bie giɛ wɔrɔ li ǹ nə ǹ díin laadoo zɛnaa-n ma, sɛnɛ, díin man giɛ li ǹ nə ǹ nɛnyaanan laadoo saa nɛ.

¹⁵Man boe ma din ni, má n ma gɔn màn tumaa koe ka la, ka ma din tumumaa dɔ nɛ. Bɛ̀ má màn da ka narɛɛ li, ka á re nyaabiɛ ma narɛɛ ganaa?

¹⁶Ka a re lɛ koe sɛn, mà masɛ goã guĩ lɛa ka mìi-n wa. Sɛnɛ, kɔntan min tá re pii, mà man má yiri yɛ ka ganaa, ma ka kũ ka kan bɛ́ min kuĩ lɔn.

¹⁷Bɛ̀ á miɛ̃, ma min mɛnɛn lɛn dɔn dia ka la, ǹ goon ka bebere á ka gɔn màn si ka la?

¹⁸Má Tiiti nyankɔ, máa a wo kaa piɛ kun ka wɔ dɔɔ̃n kɛ nɛ, má goã má a boo da ka nɛ. Ka á boe la ka pɛ mà Tiiti ka gɔn màn si ka la? Masɛ laanka asɛ nɛ, wɔa nya ǹ dí mìi goã goon wa? Wɔa giã ǹ gɔn goã goon wa?

¹⁹Kɔntan, ka ǹ taasɛ haalɛ bibi, mà ma nə n din biɛ min pepere lɛa kasɛn yɔrɔ-a. Haayii, maa giaáran lɛn, Krita bɛ́ giɛ màn mɛn li, wɔ ǹ bɛ pii ka nɛ Lawa yɔrɔ-a. Man bɛ tumaa zɛnɛɛ, ka dinin bǐɛ̃ kɔ a wo nyɛɛn a lɛa goleemali gɔ́ɔ̃ nɛ.

²⁰Nyɛ́ɛ n ma ganaa, máa kɔntan ma a re die ka yiɛ, ka ma bɛ́ giɛ li lɔn wa, ka dɔn nə́ ka a re ma yii, ka ka bɛ́ giɛ li lɔn wa. Nyɛ́ɛ n ma ganaa, máa ma nyan da yaa bɛ̀ zian tá ka bii, ka foo wuu-pɛ nɛ, foo-yoo ne, ka miã lɔ zuũbaa nɛ, sɔ-kaa kɔn la nɛ, ka boo giməə da kɔn ganaa nɛ, din-koa nɛ, ka sii-lɔlɔkɔn nɛ.

²¹Ma bɛ́ re die boe ka li, nyɛ́ɛ tá ma ganaa, máa Lawa nyan ma kiɛɛrɛ kɔ ka yɔrɔ-a, ma wuu pɛ kaa min damata a sii ganaa wa. Ǹsɛn mɛnɛn nə sii baraa zɛnaa lɛlɛ, ma ba li ma wusoo ma da ǹ yaa miɛ̃ wa. Man zoɛ̃ máa ǹ nə n gɔ́ɔ̃ binyəə, ǹ nə́ n bɔ ǹ gɔgɔrɛbaa nɛ, ka ǹ din kũ doɛ̃baã nɛ, ka ǹ kɔrɔbaa ǹ sii kɔsɔn nɛ.