Read Samo, Southern Kor2 2 Bible Online

Kor2 2 - Samo, Southern bible

Kor2 2

¹Masɛ wɔ paǹ li, ma foo màn mɛn kũ, bɛ á ke: má pɛ máa ma a re wusii ma da ka li, ka foo-ziziɛ̃-n wa.

²A giala bɛ̀ má ka foo ziziɛ̃, die n die masɛ foo kɔɔ̃n koe doo? Ma kaa min mɛnɛn lɛn foo ziziɛ̃, bɛ̀ bɛn lɛn manɛ!

³Bɛ lɛ na á toa, má sɛ́wɔ lɛ dia ka la, ka ma bɛ́ má zɛnaa lɔn. Man ma ba li máa bɛ̀ má dɔ kaa piɛ, min mɛnɛn doamaa bɛ́ ǹ ma foo kɔɔ̃n kɔ, bɛn nə ma foo-ziziɛ̃lin baa wa. Má golee li taãnɛ, máa bɛ̀ má foo kɔɔ̃nbaa yɛ, ka dɔn tumaa a foo kɔɔ̃nbaa nɛ.

⁴Sonbore ne, má sɛ́wɔ dia ka foo-ziziɛ̃ nɛ, ka yiri-lɔlɔkɔn nɛ, ka yii mu gigiã nɛ. Kaa foo-ziziɛ̃ ǹ sii bie wa, sɛnɛ, ma bɛ́ ka narɛ taãn-taãn ka yɔrɔ mɛn nɛ, man máa ka bɛ dɔ̃.

⁵Bɛ̀ min foo-ziziɛ̃ ǹ sii zɛnaa, a bie masɛ dinsɔɔ̃ foo ziziɛ̃ wa, sɛnɛ, a n ka tumaa wɔ ziziɛ̃. Bɛ̀ a pɛ miɛ̃ kɛ la yii ni, a n ka tɛnɛn wɔ ziziɛ̃ sɛn.

⁶Kaa min gigiã bɛ́ á dɔlɔ bɔ bɛa min lɛ ganaa, bɛ́ á boe.

⁷Bɛ lɛ nɛ sisia, ka bǐɛ̃ kɔ ka a sii toa nɛ, ka a foo taã, ń giɛ foo-ziziɛ̃ gole nyan saa a bɔ a yiri la wa.

⁸Bɛ lɛ a lɛa, masɛ bɛ́ màn mɛn li, man máa ka sii zɛnaa a wɔ paǹ li, màn mɛn bɛ́ toɛ, a dɔ̃ ma ka tá asɛ narɛ.

⁹A giala, ma sɛ́wɔ mɛn dia ka la, a mìi n ke: man má zɔɔ̃ li máa man da ka gɔ́ɔ̃ li, ma dɔ̃ bɛ ka á tɔn ma lɛ sii ka sii tumaa nɛ.

¹⁰Bɛ̀ ka min a sã ǹ sii toa nɛ, masɛ dɔ n toɛ ǹ dɛnaa nɛ. A giala, bɛ̀ sii tan má n kɔnboe ma toa, man toɛ ka dinin lɛa *Krita yɔrɔ-a,

¹¹màn mɛn bɛ́ toɛ, *Sɛtaan nyan boo wɔ la wa. A giala, wɔ tá a nya ǹ dí doɛ̃.

¹² Má dɔ Troasi kiwi kəni, má n die Krita a Boo Tii Kɔɔ̃n kɛ laakalɛɛ walan. Dɛnaa din zii bũ ma nɛ foaãnɛ.

¹³Sɛnɛ, ma gɔ́ɔ̃ goã bii ni, a giala, ma wo ma dɔɔ̃n Tiiti yaa wa. Bɛ lɛ na á toa, má zii nyankɔ Troasi minin la, má kiɛ̃ má woo Masedoanɛ gána nɛ.

¹⁴Barka tá Lawa ganaa! A giala, a din nə wɔ kiɛ kun ka Krita a gɔ̀lɔ̀-baalin ni, wɔa tá kun ka Krita-n kɛ pàã ganaa. A n dí nyɛɛ ka wɔ nɛ, ń giɛ ǹ tá Krita doɛ̃ bǎã tumaa nɛ, ń giɛ dɔn Krita boo gìĩ kɔɔ̃n kɛ dɔ kaa bǎã tumaa nɛ.

¹⁵A bɛ́ miɛ̃, wɔ ǹ ka nyɔɔ gìĩ kɔɔ̃n bɛ́ lɔn, Krita n koe Lawa la *wúlu màn lɛa. Wɔ ǹ bɛ lɛ lɛa kirisibaalin laanka papaã wolen dɔn yii li.

¹⁶Papaã wolen yii li, gìĩ kɛ lɛ n gɛ̀ gìĩ lɛa, a n gɛ̀ dii; kirisibaalin yii li, a n yiikoonaabaa gìĩ lɛa, a n yiikoonaabaa koe. Die n boe la a bɛa dí kɛ miã nya?

¹⁷Masɛ bie pii koe Lawa a boo ganaa, ka min gigiã kɔsɔn kɛn bɛ́ lɔn wa. Haayii, Krita wɔbaa gɔ́ɔ̃ nɛ, masɛ n boo diɛ ka fubaa nɛ, ka Lawa din tɔ nɛ, a din yɔrɔ-a.