Read Samo, Southern Kor2 3 Bible Online

Kor2 3 - Samo, Southern bible

Kor2 3

¹A pɛ miɛ̃ kɛ á nyɛɛ ka nɛ, mà man zoɛ̃ man din laakalaa doo? Ma laadoo tá a ganaa ka min tɛnɛn bɛ́ lɔn, ǹ sɛ́wɔ dia ka la, ǹ ma laakalaa? Hinlaa ma ka nyankɔ, ka ma laakalaa ǹ sɛ́wɔ nɛ?

²Ka dinin man maa sɛ́wɔ lɛa, á n kiɛ̃ ma foo ne, min tumaa n boe la a pɛ doɛ̃.

³ Boo taãn nɛ, ka n sɛ́wɔ lɛa, *Krita din kiɛ̃, masɛ n má daa koa. A bie á kiɛ̃ ka sɛ́wɔ kiɛ̃ ǹ mu-n ma, sɛnɛ, a na á kiɛ̃ ka Lawa yiikoonaa a Yiri Fu ni. A bie á kiɛ̃ kɔlɔn ganaa wa, sɛnɛ, a na á kiɛ̃ minbuiinin foo ne.

⁴Ma á waa-n bɛ la, a giala, Lawa din na á ma foo doa ka Yezu Krita barka nɛ.

⁵Sonbore ne, ma a boe la ma taasɛ, máa ma á boe la, ma bɛa dí kɛ miã nya ka ma din pàã-n wa. Ma pàã lɛ n boe Lawa li.

⁶ A din na á pàã kɔ ma la, mà ma lɛ kɔ kɔn la dii kɛ lɛ nyaa minin ni ǹ dɔ̃. Bɛa lɛ kɔ kɔn la dii kɛ lɛ bie landa sɛ́wɔ wɔ lɛa wa, sɛnɛ, Yiri Fu wɔ nɛ. A giala, Landa á min dii, sɛnɛ, Yiri Fu sɛn yiikoonaabaa koe min la.

⁷Landa mɛn bɛ́ á n kiɛ̃ kɔlɔ ganaa sɛ́wɔ nɛ gogoon, Lawa a gugurubaa a siĩnbaa yɛ bɛa biikoo lɛ li. Muizu yɔrɔ tɛ pɛ ka yɔrɔ kɔ́n nɛ, yǎa Izirayeli minin nə́ ǹ ba boe la, ǹ tá n yiin doɛ la wa, a da yaa, bɛa tɛ-pɛ kɛ lɛ doamaa nɛ a papaã. Á ke, Landa mɛn bɛ́ a nya ǹ dí n woe ka min ni gɛ̀ ganaa, siĩnbaa kɛ miã na á yɛ bɛ nɛ.

⁸Siĩnbaa ba re yii Yiri Fu a nya ǹ dí ni a la bɛ-n wa? Hiĩ, á yii a nɛ a la nɛ!

⁹Sonbore, dí mɛn bɛ́ toɛ kiri minbuiinin kũ Lawa yɔrɔ-a, gugurubaa yɛ bɛ nɛ. Dí mɛn bɛ́ minbuiinin biɛ min peperen lɛa Lawa yɔrɔ-a, gugurubaa ba re yii bɛa dí lɛ nɛ a la bɛ-n wa? Hiĩ, á yii a nɛ a la nɛ!

¹⁰Ma á boe la ma pɛ dinin, máa gugurubaa mɛn goã á yɛ lɛlɛ ke, máa bɛ ba n zoɛ̃ kɔn ka pelo wɔ a gole gole kɛ-n wa.

¹¹Sonbore, màn mɛn bɛ́ a goã belebɔ taman yii wa, bɛ gugurubaa yɛ. Màn mɛn bɛ́ re goɛ̃ duduu, bɛa re gugurubaa yii a la bɛ-n wa? Hiĩ, á yii a la nɛ!

¹²Bɛa foo-doa kɛ lɛ miã bɛ́ ma lon, bɛ lɛ n ke ma á waa-n ma din la.

¹³ Ma bie zɛnɛɛ ka Muizu bɛ́ lɔn, á goã tapara koe a yɔrɔ lɛ, mà Izirayeli minin baran asɛ yɔrɔ a tɛ-pɛ kɛ a kiɛ̃ wolebaa dɔ̃ wa.

¹⁴Sɛnɛ, ǹ màn-doɛ̃ boo la a ná a giala ma wa. Haalɛ pelo, bɛ̀ ǹ tá lɛlɛ a lɛ kɔ kɔn la ǹ sɛ́wɔn kɛn pii, a n ka bɛa tapara kɛ lɛ n tɔn koe ne ǹ siã, ǹ ba ǹ giala miɛ wa. Tapara lɛ tɔn nə n bɔ ǹ siã wa, a giala, a nə n boe golee Krita li wole dinsɔɔ̃ siã.

¹⁵Haalɛ tɔn pelo, bɛ̀ ǹ tá Muizu a sɛ́wɔn kɛn pii lɔn, a n ka tapara lɛ nə n koe ǹ siã.

¹⁶ Yǎa bɛ̀ min mɛn nə n gɔ́ɔ̃ binyəə á kɔ Dɛnaa lɛ, tapara lɛ n mɛnɛɛ a n bɔ bɛa min kɛ siã.

¹⁷Bɛ má pɛ máa Dɛnaa, bɛ giala mà Yiri Fu. Bɛ̀ Dɛnaa a Yiri Fu tá bǎã mɛn nɛ, tá ma din gɔn wìi a lɛa dɔ n goɛ̃ walan.

¹⁸Wɔsɛn mɛnɛn tumaa bɛ́ tapara nə́ n bɔ wɔ siã, wɔsɛn man Dɛnaa a gugurubaa a siĩnbaa nyɛɛ. Wɔ́ n bɔyaa wɔ́ kɔnbɔ ka Dɛnaa din ni, wɔ́ wusoo wɔ́ gugurubaa yɛ, bɛ ń gole á la lɛlɛ wɔ kɛ nɛ. Dɛnaa din na á bɛa dí kɛ lɛ nya ka a Yiri Fu barka nɛ.