Read Samo, Southern Kor2 6 Bible Online

Kor2 6 - Samo, Southern bible

Kor2 6

¹Ma bɛ́ dí nyɛɛ kun ka Lawa din ni, a bǐɛ̃ mɛn baa wɔ la, man ka nyankoe máa ka nyan toa, bɛ goã kooro wa.

² A giala, Lawa din na á pɛ sɛ́wɔ nɛ: «Biikoo sonbore li, má n too kɔ n lon, kirisibaa pinaa, má daa n gú ganaa.» Á ke, sisia kəni, biikoo sonbore lɛ n ke, a minin kirisibaa pinaa lɛ dɔ n ke.

³Ma ba li ma min kɔ́n mìi ziziɛ̃ ka yɔrɔ kɔ́n nɛ wa, ń giɛ, ǹ nyan maa dí kɛ pɔpɔsɛ wa.

⁴Man sii tumaa zɛnɛɛ dinin, máa ǹ dɔ̃ mà Lawa a dí-nyali n ka ma nɛ. Man fuu sii ma ganaa parsiini ka foo-kũ ni. Sii kakan nə́ ma yɛ, ka gɔ́ɔ̃ bii ni.

⁵ Ǹ nə́ ma dɛ, ǹ nə́ ma da kòso-n. Ǹ nə́ zaman gigiã gɔ́ɔ̃ tii, bɛ̀ ǹ nə ǹ kaa ma ganaa. Má lɛ kɔ dí kakan nyɛɛ ganaa. Má n din kurəə nyuù ganaa, ka màn-bii ni gunyin damata.

⁶Man maa Lawa a dí-nyalibaa nyɛɛ ka maa *yoreenbaa nɛ, maa màn-doɛ̃ nɛ, ka maa foo-kũ ni, ka maa min bǐɛ̃baa nɛ. Man nyɛɛ dɔn ka Yiri Fu pàã nɛ, ka maa minin narɛ taãn-taãn nɛ,

⁷ka sonbore pɛ nɛ, Lawa din a boo sii la pàã nɛ. Maa ziabaa ǹ màn nə ka sii pepere ne. Man miɛ min ganaa ka bɛ nɛ, man ma din dɔ lɛduĩ ka bɛ nɛ.

⁸Maǹ ma guguru koe, bɛ̀ ǹ sìi dɔ da ma ganaa. Maǹ ma tɔ baraa pii, ǹ ná a bǐɛ̃ dɔ pii. Maǹ giɛ ma ganaa soɛ-bɔle lɛa, a da yaa man sonbore dɔ pii.

⁹Ka manə ǹ ba ma doɛ̃ wa, a da yaa ǹ tumaa dɔ n ma doɛ̃. Ka gere n ma nɛ, a da yaa ma yii dɔ n koo, ka ka yii bɛ́ a ganaa lɔn. Maǹ dɔlɔ boe ma ganaa, ǹ nə́ ǹ ba toɛ ma gã dɔn wa.

¹⁰Maǹ ma foo ziziɛ̃, sɛnɛ ma foo dɔ n kɔɔ̃n baraanɛ. Man doobaa lɛa ǹ yii li, sɛnɛ, man min gigiã dɔ biɛ pàãma lɛa. Man gɔn kooro-a lɛa ǹ yii li, sɛnɛ, màn tumaa dɔ n ma gɔn.

¹¹Maa Korɛnti a giaáran lɛn, má boo da ka-n foaãnɛ. Má n foo lɛ bũ ka-n panparaa nɛ.

¹²Man gɔ́ɔ̃ tii ka ganaa wa, sɛnɛ, kasɛn man ka kaa wɔ tii masɛ ganaa.

¹³Ka ma gɔn dòo saraa ma la: man boo kɛ pii ka nɛ, ka maa nɛnyaanan bɛ́ lɔn. Ka dɔn nə n foo lɛ bũ ma dɔ-n panparaanɛ!

¹⁴Ka nyan toa ka kaa sii kaa kun ka goleemali baãnaan nɛ wa. Ǹ minbaa a kɔnpii ka kaa wɔ-n wa. Kaa-kun mɛn nə màn pepere laanka màn baraa bii ni? Wɔlɔ fúlu n siɛ lɔn a n kaa kun ka wɔlɔ tì ni?

¹⁵*Krita n siɛ lɔn, a kɔn wɔ ma ka *Sɛtaan nɛ? Hinlaa goleemali wole a wàa n boe la, a goã kun ka goleemali baãnaa wɔ nɛ?

¹⁶ Lawa a kion a wàa n boe la a goã kun ka min kooron wúlu bɔ ǹ mànan nɛ? A giala, wɔ ǹ Lawa yiikoonaa a kion lɛa. Ka a din bɛ́ á pɛ lɔn: «Ma á re giɛ̃ ǹ bii, ma goã ǹ li. Ma á re ǹ Lawa biɛ, ǹ tá re maa zaman biɛ.»

¹⁷ Bɛ lɛ a lɛa nɛ, Dɛnaa pɛ: «Ka n bɔ ǹ li ka goã ka gɔrɔn, màn mɛn bɛ́ a yoreen ma, ka nyan wo bɛ wɔlɔ li wa, masɛ din tá re ka kuĩ doɛ̃.

¹⁸ Ma á re kaa díi biɛ, ka dɔn tá re maa nɛgiĩn biɛ ka maa nɛlɔn nɛ. Dɛnaa Pàãyiidɛnaa na á pɛ miɛ̃.»