Read Samo, Southern Kor2 7 Bible Online

Kor2 7 - Samo, Southern bible

Kor2 7

¹Maa giaáran lɛn, bɛa lɛ-kɔ ǹ siin kɛn lɛn là á gole wɔ ganaa. Bɛ lɛ n toɛ, sii mɛn tumaa bɛ́ gɔ̀nɔn laanka telenboen gɔgɔrɛ koe, ka daa wɔ n bɔ bɛn wɔlɔ li, wɔ n dinin *yoreen kɔ lenlen. Ka daa wɔ nyɛ́ɛ baa Lawa yii ni.

²Ka bǎã kɔ ma la ka foo ne! A giala, mà ma sã min kɔ́n ganaa wa, ma min kɔ́n wɔ ziziɛ̃ wa, ma min kɔ́n bebere má a gɔn màn si la wa.

³Ma bie boo kɛ pii ka nɛ, ma á kiri diɛ ka la wa. A giala, má saa lɛlɛ má pɛ, máa kaa sii n kaka ma ganaa, bɛ lɛ-n wɔ á kun baraanɛ yiikoonaabaa-n ka gɛ̀ gɔ́ɔ̃ nɛ.

⁴Ma foo á doa-n ka ganaa parsiini, ma nə n nyɛnyɛɛ ka a lɛa dɔn parsiini. Maa fuun tumaa gɔ́ɔ̃ nɛ, man piɛ̃-n ka foo tãbaa nɛ, maa foo kɔɔ̃n kɔ kiɛ̃ a bǎã la.

⁵ Haalɛ ma bɛ́ má dɔ Masedoanɛ gána nɛ, ma susui yɛ ka duduu wa. Sii kakan nə́ ma yɛ paǹ din tumaa ganaa: má yɔ bɔ kɔn ka min kɔsɔn nɛ, nyɛ́ɛ n ma foo ne.

⁶Sɛnɛ, Lawa mɛn bɛ́ foo ziziɛ̃ wolen foo taɛ̃, a din na á ma foo taã Tiiti a daa li.

⁷A daa kɛ dinsɔɔ̃ bie á ma foo taã wa, sɛnɛ, ka bɛ́ ká a dinmaa foo taã ka yɔrɔ mɛn nɛ, á bɛ dɔ pɛ ma nɛ. Ka yiri bɛ́ a ganaa, mà ka wusoo ka ma yɛ ka yɔrɔ mɛn nɛ, á bɛ dɔ pɛ ma nɛ, kaa foo-ziziɛ̃ ǹ gɔn nɛ, ka ka bɛ́ zoɛ̃ mà ka maa zia gii si lɔn. Bɛ lɛ n toɛ, kanna, ma foo wusoo á kɔɔ̃n kɔ doo á la lɛlɛ wɔ nɛ.

⁸Taãn nɛ, ma bɛ́ má sɛ́wɔ mɛn dia ka la, ta á ka foo ziziɛ̃, ma a n gɔ́ɔ̀ bii ka bɛ-n doo wa. Má n gɔ́ɔ̃ bii lɛlɛ, bɛ̀ ma bɛ́ má dɔ̃, máa maa sɛ́wɔ kɛ lɛ ka foo ziziɛ̃ biikoo kɔ́n li.

⁹Sɛnɛ kanna, ma nə n nyɛnyɛɛ. Kaa foo-ziziɛ̃ kɛ a lɛa bie wa, sɛnɛ, kaa foo-ziziɛ̃ mɛn bɛ́ á kaa giã ǹ gɔn bɔyaa ka yɔrɔ kɔsɔ nɛ, bɛa lɛa nɛ. A giala, Lawa bɛ́ foo-ziziɛ̃ mɛn li, ka n ká bɛ lɛ wɔ. Bɛ lɛ n ke, masɛ wɔ paǹ li, ma sii baraa kɔ́n zɛnaa ka-n ma.

¹⁰A giala, Lawa bɛ́ foo-ziziɛ̃ mɛn li, bɛ lɛ n min a giã ǹ gɔn bɔyɛɛ, a wo da kirisibaa nɛ, a ná a ba bǎã koe gɔ́ɔ̃ bii la wa. Sɛnɛ, wɔ dinin minbuiinbaa ǹ foo-ziziɛ̃n kɛn man woe wɔ-n gɛ̀ ganaa.

¹¹Foo-ziziɛ̃ mɛn ka yɛ, Lawa dí mɛn nya ka bɛ nɛ, ka yii tá a sii-zɛnaa ganaa kanna! Ka yii tá a ganaa, bɛa foo-ziziɛ̃ kɛ lɛ na á toa, ka n we yii sii kɛ lɛ a zɛnaali li, ka yii kakabaa nɛ, ka kaa zia gii si nyaa! Foo-yoo baraa mɛn goã ka nɛ, sii lɛ a zɛnaali wɔ paǹ li! Ka nyɛ́ɛ mɛn baa masɛ a foo-yoo ne! Wɔa wusoo a kɔn yɛ ǹ foo mɛn goã ka nɛ! Din kɔ sii ganaa mɛn goã ka nɛ, ká dɔlɔ bɔ sii baraa-zɛnaali lɛ ganaa! Ka ǹ ká nyaa ka bɛ lɛ tumaa nɛ, mà ka gii ba sii baraa kɛ lɛ-n wa.

¹²Ta bɛ nɛ, ma bɛ́ má sɛ́wɔ kɛ dia ka la, min mɛn bɛ́ á sii la, ma bie má dia bɛa lɛa wa, a sii la min mɛn dɔ la, ma dia bɛ dɔ a lɛa wa. Sɛnɛ, man máa ma sii bɛ́ kaka ka ganaa lɔn, ka boo la ka bɛa foaãbaa dɔ̃ Lawa yɔrɔ-a.

¹³Bɛ lɛ na á toa, ma foo taã, kaa sii-zɛnaa kɛ a lɛa. Ma bie má foo tãbaa dinsɔɔ̃ yɛ wa, foo kɔɔ̃n gole nə́ n nyəə ma-n doo, bɛ̀ ma bɛ́ má Tiiti yɛ, a foo n kɔɔ̃nɛ, mà ka tumaa ná asɛ foo taã parsiini.

¹⁴Má n din laakalaa Tiiti yɔrɔ-a kaa lɛa, sɛnɛ, ka sìi da ma ganaa wa. A giala, ma goã sonbore pii ka-n baraa-n lɔn, a din yii goon ne, ma din laakalaa ǹ boo mɛn da Tiiti yɔrɔ-a, bɛ dɔ́ yɛ pepere.

¹⁵Ka bɛ́ ká a lɛ si lɔn, ká kũ doɛ̃ lɔn, ká nyɛ́ɛ baa nɛ ka gɔ̀nɔn bìn-diɛ nɛ, bɛ̀ a yiri daa bɛ nɛ, màn nə miɛ a ka narɛɛ a golebaa li.

¹⁶Ma nə n nyɛnyɛɛ parsiini, a giala, ma á boe la man foo doa ka ganaa sii tumaa gɔ́ɔ̃ nɛ.