Read Samo, Southern Kor2 8 Bible Online

Kor2 8 - Samo, Southern bible

Kor2 8

¹ Wɔ dɔɔ̃nɔn lɛn, Lawa a bǐɛ̃baa ǹ siin nə n zɛnaa Masedoanɛn Lawa a sɔmɔn nɛ ka yɔrɔ mɛn nɛ, ma n zoɛ̃ máa ka bɛ dɔ̃.

²Damagɔ́ɔ̃li fuu nyaa ǹ golee Lawa li wolen man taãn-taãnɛ. Sɛnɛ, ǹ foo kɔɔ̃n kɔ gole kɔ, ǹ nə́ n dinin nyaa ka bǐɛ̃baa ǹ foo ne, ǹ laanka ǹ doobaabaa baraa kɛ nɛ.

³Masɛ nə ǹ siére lɛa. Ǹ bɛ́ boe màn mɛn la ǹ nə́ bɛ kɔ, ǹ nə́ kɔ ǹ dinin li, á la ǹ pàã yii din ni.

⁴Ǹ nə́ ma nyankɔ ka ǹ parsii ni, mà ma lɛ kɔ ma n gii kaa kun ka ǹsɛn nɛ, ǹ boo la, ǹ nə ǹ dɔmalɛ kɛ dia Zudee gána a Lawa a minin la.

⁵Ma yiri bɛ́ a goã màn mɛn ganaa wa, bɛ nə́ n zɛnaa. Ǹ nə́ n dinin kɔ Dɛnaa la bɔrɔ, bɛ kio, ǹ nə́ n dinin kɔ masɛ dɔ la, ka Lawa foo sii barka nɛ.

⁶Bɛ lɛ na á toa, má Tiiti nyankɔ parsiini má dia ka li, máa a bǐɛ̃baa ǹ dí mɛn giala kɔ, a bɛ lɛ nya a nyɔmɔɔ sɔnbɔraanɛ, ka a bɛ́ a ná a giala kɔ lɔn.

⁷Màn tumaa tá ka gɔn gigiã, goleemali ni, boo da doɛ̃ nɛ, màn-doɛ̃ nɛ, din kɔ sii ganaa duduu ni. Ka kɔn-narɛɛ dɔ yɛ á bɔ masɛ li. Ka toa bǐɛ̃baa ǹ foo gole dɔ goã ka nɛ, dɔmalɛ ǹ dí kɛ a lɛa.

⁸Pàã bie ma á nyɛɛ ka-n wa. Sɛnɛ, man ka miãn din kɔ sii ganaa kɛ pii ka nɛ, máa ka dɔn nə kaa kɔn-narɛɛ kɛ a taãnbaa nyaa.

⁹A giala, ka á wɔa Dɛnaa Yezu *Krita a bǐɛ̃baa ǹ gɔn doɛ̃: asɛ mɛn bɛ́ pàãma lɛa, á n din baa doobaa lɛa kaa lɛa, a boo la a kasɛn baa pàãman lɛa, ka a doobaabaa lɛ nɛ.

¹⁰Man maa taasiɛ nyɛɛ ka nɛ bɛa sii kɛ lɛ gɔ́ɔ̃ nɛ: Ka dí mɛn giala kɔ diɛ̃, a n siĩn ka kɔ bɛ lɛ. Ka dinin man ká bɛa dí kɛ lɛ bɔ bibinaanɛ, ka goã bɛ li wa, ká a sii zɛnaa dɔ giala kɔ.

¹¹Kanna kəni, ka dí kɛ nya ka nyɔmɔɔ. Ka bɔ ka yiri-n ka sonborebaa mɛn nɛ, ka wo-n miɛ̃, ka zɛnaa ka pàã yii li.

¹²A giala, bɛ̀ n màn kɔ ka yiri sonbore ne, màn mɛn bɛ́ n gɔn ń bǐɛ̃ baa nɛ, Lawa n bɛ sii, ǹ mɛn bɛ́ a ba n gɔn wa, a laadoo ba bɛ ganaa wa.

¹³Ka laadoo bɛ́ màn mɛn ganaa, ǹ bie pii mà ka n dɔ ka miã kɔsɔn lɛ ka bɛ-n wa, sɛnɛ, ka toa a zɛnɛ kɔn lɛ.

¹⁴Biikoo kɛ nɛ, kasɛn màn gialakun bɛ́ a tan, ǹsɛn wɔ nyaabaa, ka á boe la ka n dɔ ǹ lɛ. Ǹ kɔ́n pinaa, bɛ̀ ka dɔn wɔ nyaabaa, ǹ dɔn wɔ gialakun ná a tan, ǹ tá boe la ǹ nə n dɔ ka lɛ. A nə n biɛ miɛ̃ zɛnɛkɔnlɛ tɔn yɛ.

¹⁵ Bɛ n kɔnpii ka Lawa a sɛ́wɔ a boo-pɛ kɛ nɛ: «Min mɛn màn goa gigiã, a wɔ la yii-n wa, min mɛn dɔ goa boɛɛnɛ, a màn kɔ́n nyaabaa wa.»

¹⁶Ma á barka diɛ Lawa nɛ, asɛ mɛn bɛ́ á din kɔ sii ganaa da Tiiti yiri ni ka a lɛa, ka masɛ bɛ́ lɔn!

¹⁷Masɛ n má Tiiti nyankɔ má dia dí ganaa. Á lɛ kɔ, sonbore ne, sɛnɛ, a bɛ́ piɛ̃-n ka din kɔ sii ganaa nɛ, á bɔ a din ni mà asɛ á die boe ka li.

¹⁸Wɔ dɔɔ̃n kɔsɔ mɛn bɛ́, Lawa a sɔmɔn tumaa tá a tɔ laakalɛɛ Boo Tii Kɔɔ̃n kɛ wɔ paǹ li, má bɛ dia kun ni.

¹⁹Ka bɛ din ni doo, Lawa a sɔmɔn man nə́ bɔ, mà a maa zii tɔ wɔ kun wole baa, bǐɛ̃baa ǹ dí kɛ lɛ a nyɛɛ gɔ́ɔ̃ nɛ. Wɔ ǹ bɛa dí lɛ nyɛɛ Dɛnaa dinmaa a tɔ golebaa a lɛa, taasiɛ sonbore mɛn dɔ bɛ́ wɔ gɔ́ɔ̃ nɛ, wɔ bɛ dɔ nyaa nɛ.

²⁰Wɔsɛn mɛnɛn bɛ́ bɛa wɔrɔ gole kɛ a tamaalin lɛa, wɔ ǹ yiri boe wɔ dinin li, wáa wɔ nyan tɔ pɔpɔsiɛ kɔ́n yɛ a gɔ́ɔ̃-n wa.

²¹ Wɔ bie giɛ li, wɔ sii pepere zɛnaa Lawa dinsɔɔ̃ yɔrɔ-a wa, sɛnɛ, wɔ ǹ giɛ li wɔ zɛnaa minbuiinin dɔn yɔrɔ-a.

²²Ma dɔɔ̃n kɔsɔ dɔ á ke, ma á diɛ kunun ǹ ni. Biikoo gigiã li, má a sii gɔsɛ, á n din nyaa din kɔ sii ganaa wole lɛa biikoo tumaa li. Sɛnɛ kanna, a din kɔ sii ganaa la lɛlɛ wɔ nɛ, a giala, á waa ka la parsiini.

²³Tiiti wɔ paǹ li, ma din a tá kun wole n bɛ nɛ, a n dí nyɛɛ kun ka ma nɛ kaa lɛa. Wɔ dɔɔ̃n gialakunun mɛnɛn bɛ́ kun ni, bɛn man Lawa a sɔmɔ minin dia dí-a wolen lɛa. Maǹ sii zɛnɛɛ Krita guguru-kɔ a lɛa.

²⁴Ka nyaa ǹ nɛ, mà ka tá ǹ narɛ taãn-taãnɛ, ń giɛ Lawa a sɔmɔn lɛn tá doɛ̃, mà sonbore tá ma lon ka maa din laakalaa kɛ nɛ kaa lɛa.