Read Samo, Southern Fili 2 Bible Online

Fili 2 - Samo, Southern bible

Fili 2

¹Bɛ̀ foo-doa á yii Krita nɛ, bɛ̀ foo tãbaa á yii a kɔn-narɛɛ nɛ, bɛ̀ koa-kun tá ka laanka Yiri Fu bii, bɛ̀ bǐɛ̃baa laanka sii toa kɔn nɛ á yii a nɛ,

²ka kaa taasiɛn baa goon kɔn-narɛɛ gɔ́ɔ̃ nɛ, ka n gɔ́ɔ̃ baa goon ka kɔn ma sii tumaa ganaa. Bɛ̀ á miɛ̃, masɛ a foo kɔɔ̃nbaa n woe nyɛɛnɛ.

³Ka baran sii kɔ́n zɛnaa ka foo a wuu-pɛ nɛ, ka din gole kɔ-n wa. Sɛnɛ, ka n dinin boɛɛn kɔ, ka min kɔsɔn pɛsã kɔ ka dinin manɛ.

⁴Min kɔ́n baran ga a dinsɔsɔɔ̃ walan ma, sɛnɛ, ka ga min kɔsɔn walan.

⁵Ka toa Yezu Krita din a taasiɛn nə goã ka bii.

⁶Lawabaa na a din gɔn lɛlɛndun, sɛnɛ, a n paraa bɛ ganaa, mà asɛ goã goon ka Lawa-n wa.

⁷Sɛnɛ, màn mɛn bɛ́ a gɔn, a na á n piã ka bɛ nɛ a din li, á bɛ̀rɛbaa ǹ gɔn saa. Á n baa ka minbuiinin bɛ́ lɔn, á daa ka minbuiinbaa ǹ gɔn nɛ.

⁸Á lɛ kɔ, á n din boɛɛn kɔ, á lɛ si yǎa á dɔ a gɛ̀ ganaa, á gã gɔn ganaa dinin.

⁹Bɛ lɛ a lɛa nɛ, bǎã mɛn bɛ́ lon á la bǎã tumaa nɛ, Lawa saa á koa walan, á tɔ gole kɔ la, á la tɔ tumaa nɛ,

¹⁰ ń giɛ màn mɛn tumaa bɛ́ lon, ka tán nɛ, ka tán giulun ni, ǹ tumaa kaa tán, ǹ Yezu tɔ lɛ guguru kɔ.

¹¹Ǹ tumaa pɛ mà Yezu Krita n Dɛnaa lɛa, ǹ Díi Lawa tɔ guguru kɔ nɛ.

¹²A bɛ́ miɛ̃, maa giaáran lɛn, ka bɛ́ ká ma lɛ si biikoo tumaa li, bɛ̀ ma bɛ́ kun ka nɛ, a n siĩni kanna dɔn, ka ma lɛ si a la bɛ nɛ, maa tanbaã kɛ gɔ́ɔ̃ nɛ. Ka dí nya, ka n bìn diɛ nyɛ́ɛbaa Lawa-n gɔ́ɔ̃ nɛ, kaa bǐɛ̃-kɔ a lɛa.

¹³A giala, Lawa á tɔn dí nyɛɛ ka nɛ, ka boo la ka pàã yɛ, ka lɛ kɔ ka sii zɛnaa, a kɔnpɛ ka a din a dí yɔrɔ bɔ kɛ nɛ.

¹⁴Ka sii din tumaa zɛnaa, gungunun-si laanka sɛ̀-pɛ ná a ba a-n ma.

¹⁵ Ka zɛnaa miɛ̃, ń giɛ ka á goɛ̃ *yoreen ne, zɛ̀rɛ baãnaan lɛa, ka goã Lawa a nɛnyaanan lɛa, sɔ̀n ná a ba ka ganaa, kanaa min kɔkɔrɔ babaraan kɛn bii wa. Ka doamaa nɛ ka wɔlɔ fúlu bɔ ǹ bii, ka bólonən bɛ́ lɔn,

¹⁶ka yiikoonaabaa kɔ ǹ boo kɛ nyaa ǹ nɛ. Bɛ̀ ka á zɛnɛɛ miɛ̃, ma foo á re kɔɔ̃n koe ka ka nɛ, Krita a lɛawaa kɛ a pinaa; bɛ á re nyɛɛ, mà maa wen waa tumaa nɛ, ka maa dí nyɛɛ tumaa nɛ, mà ǹ goã kooro wa.

¹⁷Bɛ̀ a n doa wa, bɛ̀ má gɛ̀-wɔle baa, ma mà á re goɛ̃ kun ka kaa *wúlu màn kɛ nɛ, ka n koe Lawa la ka goleemali ni. Bɛ̀ bɛ́ taãn baa, ma foo n die kɔɔ̃n koe, ma ka dɔn tumaa gii da maa foo kɔɔ̃n kɔ kɛ nɛ.

¹⁸A din goon ne, ka dɔn foo doamaa nɛ a kɔɔ̃n kɔ, ka ma dɔ gii da kaa foo kɔɔ̃n kɔ nɛ.

¹⁹Ma foo doamaa-n Dɛnaa Yezu ganaa, máa ma boo la, ma Timote dia ka li kànaa ka boɛɛn nɛ, ń giɛ ma bɛ́ re ka boon mɛnɛn miɛ, ǹ boo la ǹ ma dinmaa foo taã.

²⁰A dinsɔɔ̃ n ma laadoo siin biɛ a wɔn lɛa, a nə́ n gɔ́ɔ̃ bii ka ka-n taãn-taãnɛ.

²¹Gialakun kɛ tumaa nə n taasɛ ka ǹ dininmaan siin ni, ǹ ba n taasɛ ka Yezu Krita wɔn nɛ wa.

²²Ka dininmaan tá doɛ̃, Timote na a bɔlɔgoondɛnaabaa kɛ nyaa ka-n ka yɔrɔ mɛn nɛ, a na á Boo Tii Kɔɔ̃n a dí kɛ nya kun ka ma nɛ, ka nɛ laanka a díi bɛ́ dí nyɛɛ kun lɔn.

²³Sii mɛn bɛ́ ma mìi-n kànaa, bɛ̀ má bɛa foaãbaa dɔ̃ lɔn gɔrɔ, a tá ma yiri-n máa ma á re diɛ ka li.

²⁴Sɛnɛ, ma foo á doa-n Dɛnaa ganaa, máa ma dinmaa á re die n yii koe ka li, kànaa ka boɛɛn nɛ.

²⁵Má ga a ganaa, máa a n siĩni ma wusoo ma wɔ dɔɔ̃n Epafroditi dia ka li, asɛ mɛn bɛ́ á dí nya, á zia baa kun ma nɛ, ká dia mà a da ma laadoo mànan kɔ ma la.

²⁶A gɔ́ɔ̃ goã a ganaa parsiini, mà a wusoo a da ka tumaa yaa, a giala, ka bɛ́ ká a busu kɔ mɛn boo ma, bɛ lɛ ná a yiri lɔlɔkɔn.

²⁷Sonbore, á busu kɔ á diri gɛ̀ la foɛɛ̃nɛ. Sɛnɛ, Lawa makara bɔ a ganaa. A bie á bɔ a dinsɔɔ̃ ganaa wa, a na á bɔ masɛ dɔ ganaa, mà màn nyan mɛ maa foo-ziziɛ̃ a golebaa li wa.

²⁸Man wɛ̃ nɛ, máa ma wusoo ma dia ka li, ka foo wusoo a kɔɔ̃n kɔ kun, màn nə n bɔ masɛ dɔ a foo-ziziɛ̃ lɛ.

²⁹A bɛ́ miɛ, ka n da lɛ ka foo kɔɔ̃n kɔ tumaa nɛ, ka dɔɔ̃n lɛa Dɛnaa wɔ gɔ́ɔ̃ nɛ. Ka doamaa-n ka guguru kɔ ǹ sii zɛnaa bɛa minin kɛn miãn manɛ, ka asɛ kɛ lɛ bɛ́ lɔn.

³⁰A giala, á baa re giɛ̃ Krita a dí kɛ a nya gɔ́ɔ̃ nɛ; ka dia dɔmalɛ mɛn koe ma la, ka dinin nə́ ka a boe la ka á die-n wa, a nyin baa re goɛ̃ bɛ gɔ́ɔ̃ nɛ.