Read Samo, Southern Kol 1 Bible Online

Kol 1 - Samo, Southern bible

Kol 1

¹Masɛ Pooli, Lawa dùũ barka nɛ, man Yezu *Krita a dia dí-a wole lɛa. Ma laanka ma dɔɔ̃ngiĩ Timote n sɛ́wɔ kɛ diɛ

²Lawa a minin kɛn la Kolɔɔsi kiwi, kasɛn mɛnɛn bɛ́ wɔ dɔɔ̃n bɔlɔgoondɛnan lɛa, Krita wɔ gɔ́ɔ̃ nɛ. Wɔa Díi Lawa die a bǐɛ̃ zɛnaa ka nɛ, a là nyantoro kɔ ka la.

³Biikoo tumaa li, bɛ̀ wɔ á Lawa nyankoe kaa lɛa, wɔ n barka diɛ wɔa Dɛnaa Yezu Krita ǹ Di Lawa nɛ.

⁴Wɔ́ kaa golee Yezu Krita li lɛ boo ma, ka kaa Lawa a minin tumaa narɛɛ kɛ nɛ.

⁵Ka foo bɛ́ doa-n màn mɛn ganaa lon, ka n ka bɛa foo-doa lɛ yɛ ka Boo Tii Kɔɔ̃n barka nɛ, ǹ mɛn bɛ́ sonbore boo lɛa. Ka n ka saa lɛlɛ ka bɛ lɛ ma.

⁶Ka dininsɔɔ̃nɔn bie bɛa Boo Tii Kɔɔ̃n kɛ lɛ doɛ̃ wa, sɛnɛ, kanaa paǹ din tumaa n doɛ̃. Bǎã din tumaa nɛ, bɛa boo lɛ n woe nyɛɛnɛ, á barka we minin ni. Boo lɛ na á bɛ zɛnaa ka dɔn manɛ, a kũ kaa wɔ a miɛ bibinaa pinaa lɛ ganaa, ǹ Lawa a bǐɛ̃baa lɛ boo da ka nɛ ǹ mɛn pinaa, ká ma, ká a sonbore kɛ dɔ̃.

⁷ Ka dinin Epafrasi mɛn bɛ́ wɔa giaára lɛa, á n wɔ miã dí-nyali dɔ lɛa, bɛ na á ka daraa bɛ ganaa. A n bɔlɔgoondɛnaa lɛa a dí kɛ nɛ, á nyɛɛ Krita nɛ kaa lɛa.

⁸Lawa a Yiri Fu kɔn-narɛɛ mɛn kɔ ka la, á bɛ boo da wɔ nɛ.

⁹Bɛ lɛ nɛ, a kũ boo kɛ lɛ a miɛ pinaa ganaa kaa wɔ gɔn la, wɔ ǹ Lawa nyankoe kaa lɛa biikoo tumaa li. Wɔ ǹ Lawa nyankoe wáa a sii-doɛ̃ kɔ ka la parsiini, a yiri kɔɔ̃n kɔ ka la, a din a Yiri Fu barka nɛ, a toa ka a din dùũ siin dɔ̃.

¹⁰Bɛa yɔrɔ kɛ lɛ la, ka á re boe la ka tɔ wɔ, ka Dɛnaa tɔ bɔ, ka á re boe la dɔn ka a dùũ siin zɛnaa biikoo tumaa li. Ka á re bǐɛ̃ tɔrɔ tumaa zɛnɛɛ, kaa dí á re bǐɛ̃ koe, ka á re woe nyɛɛnɛ Lawa doɛ̃ gɔ́ɔ̃ nɛ.

¹¹Lawa die a toa ka pàã gole kɔ, ká a din a boo sii la laanka a din a Lawabaa ǹ pàãdɛnaabaa kɛ barka nɛ, màn mɛn bɛ́ toɛ, ka sii si ma-a laanka gɔ̀lɔ̀baa yɛ fuu tumaa gɔ́ɔ̃ nɛ,

¹²ka boo la ka barka da Díi Lawa nɛ ka foo kɔɔ̃n nɛ. Lawa mɛn bɛ́ á zii bũ ka nɛ, a bɛ́ màn mɛn koɛ a minin manɛ, a din a wɔlɔ fúlu kɛ nɛ, a die a toa ka kaa wɔ gii yɛ bɛ nɛ.

¹³Sonbore, Lawa na á wɔ bɔ wɔlɔ tì a goledɛnaa *Sɛtaan pàã giulun, á wɔ kaa a din a Nɛgiĩ narɛɛ wole kɛ a kiibaa nɛ.

¹⁴ A Nɛgiĩ lɛ barka nɛ, á wɔ si sii baraa la, á wɔa sãn toa wɔ nɛ.

¹⁵Yii bɛ́ a ba Lawa yii wa, Krita lɛ sɛ na a kɔnboe lɛa yii n yii. A din nə màn zɛnaa tumaa a bibinaa lɛa.

¹⁶Lawa na á màn tumaa zɛnaa ka a din lɛ barka nɛ, lon mànan laanka tán wɔn nɛ, a yii a yɛ wolen laanka a yii a yɛbaã wolen dɔn dinin ni, ka lon màn pàãdɛnan bɛ́ lɔn ka ǹ goledɛnan nɛ. Lawa na á màn tumaa zɛnaa a din lɛ barka nɛ, a na á ǹ zɛnaa a din dɔ a lɛa.

¹⁷Krita bɛ́ a tan, bɛ̀ màn kɔ́n banban. Màn tumaa dɔ a doa kɔn ka a din ni lɛ n toɛ, ǹ gogoonmaa tá a bǎã nɛ.

¹⁸ A din nə Lawa a sɔmɔ kɛ mìi lɛa, Lawa a sɔmɔ mɛn bɛ́ a din gɔ̀nɔn lɛa. Bɛa gɔ̀nɔn kɛ lɛ nyin nə boe a din ni, a giala, a din nə min bibinaa lɛa, a yii kaa á n bɔ geren bii, a din nə bibinaa lɛa sii din tumaa gɔ́ɔ̃ nɛ.

¹⁹A na á kɔɔ̃n kɔ Lawa din ganaa, á Lawabaa ǹ sii tumaa lɛ-piɛ̃ wɔ a Nɛgiĩ lɛ nɛ,

²⁰ á tán laanka lon mànan tumaa bii kɔɔ̃n kɔ kɔn ka a din ni, a Nɛgiĩ lɛ barka nɛ. Lawa a Nɛgiĩ mà lɛ, á kaa dere ǹ gɔn ganaa, bɛ na á daa ka là nyantoro ne.

²¹Bɛ na á n zɛnaa ka dɔn manɛ. Lɛlɛ ka goã Lawa doɛ̃ wa, ka bɛ dɔ-n doo, ka n ká goã a zɔ́ɔn lɛa, a giala, ka n ká goã sii baraan taasɛ, ka nə́ ǹ zɛnɛɛ dɔn.

²²Sɛnɛ kanna, a Nɛgiĩ a gɛ̀ ke, á wɔ ka minbuiin nɛ bɛ́ lɔn, bɛ barka nɛ, Lawa ka baa a din a giaáran lɛa, ka boo la ka soo a din yɔrɔ-a, ka a din a tɔrɔ minin bɛ́ lɔn, *gɔ̀ ná a ba ka ganaa wa, zɛ̀rɛ dɔ ná a ba ka ganaa wa.

²³Sii goon dinsɔɔ̃ n ke, ka doamaa-n ka goã doa-n golee Lawa li gɔ́ɔ̃ nɛ, ka baran toa min ka na, a ka bɔ kaa foo-doa kɛ ganaa wa, ka foo-doa mɛn lɛ yɛ Boo Tii Kɔɔ̃n kɛ a miɛ gɔ́ɔ̃ nɛ. Bɛa Boo Tii Kɔɔ̃n kɛ lɛ, á n pɛ kanaa min din tumaa nɛ, Lawa na á masɛ Pooli dia bɛ lɛ nyɛɛ.

²⁴Sisia kəni, ma bɛ́ fuun mɛnɛn yii ka a lɛa, ma nə n nyɛnyɛɛ bɛn gɔ́ɔ̃ nɛ. A giala, bɛa yɔrɔ kɛ lɛ la, man fuu yii ma din gɔ̀nɔn nɛ Krita gɔ̀nɔn kɛ a lɛa, bɛ giala, mà Lawa a sɔmɔ a lɛa. Wɔ doamaa bɛ́-n wɔ nɔmaan mɛnɛn wɔ kun ka Krita nɛ, ma dɔ nə n doɛ, ma á bɛn sii ma ganaa ma tá ǹ lɛ piɛ̃.

²⁵Lawa din dí mɛn kɔ ma la, mà ma nya kaa lɛa, masɛ n má Lawa a sɔmɔ kɛ a dí-nyali baa bɛ lɛ taman yii. Lawa na á dí kɔ ma la, mà ma a din a boo kɛ pɛ, ma a lɛ pã.

²⁶Bɛ na á goã sii-durii lɛa, á n kuməə-n haalɛ lɛlɛ-lɛlɛ, sɛnɛ, Lawa din na á bɛ nyaa kanna, a din a minin kɛn manɛ.

²⁷Bɛa sii-durii kɛ lɛ a bǐɛ̃ a golebaa laanka a gugurubaa n doe tɔrɔ tumaa ganaa, Lawa na á ga li mà a bɛ lɛ nyaa a din a minin kɛn manɛ. Bɛa sii-durii lɛ n ka kɛ nɛ: Krita n ka gɔ́ɔ̃ nɛ, bɛ n foo-doa lɛa, mà ka á re kaa wɔ gii yii Lawa a gugurubaa kɛ nɛ.

²⁸Bɛ lɛ nɛ, wɔ á Krita lɛ boo diɛ min din tumaa nɛ. Min bɛ́ boe la a sii mɛn tumaa dɔ̃, wɔ nə n gɔn wɛɛ min gogoonmaa nɛ, wɔ n darɛɛ bɛ ganaa, màn mɛn bɛ́ toɛ, min gogoonmaa boo la, a n din nyaa Lawa yɔrɔ-a min lɛ piɛ̃ lɛa, a kaa-kun ka Krita-n kɛ a lɛa.

²⁹Maa doa parsiini lɛ mìi n ka bɛ nɛ. Ma bɛ́ dí mɛn dɔ nyɛɛ ka Krita pàã kɛ nɛ, a nə́ n doe ma lɛ taãn-taãnɛ, bɛ lɛ dɔ mìi n ka bɛ nɛ.