Read Samo, Southern Kol 4 Bible Online

Kol 4 - Samo, Southern bible

Kol 4

¹ Goledɛnan lɛn, ka kaa bɛ̀rɛn kũ doɛ̃, ka peperebaa sii zɛnaa ǹ nɛ. Ka doamaa-n ka dɔ̃, mà ka dɔn goledɛnaa tan lon.

²Ka n doa Lawa-nyankɔ ganaa, ka n yii dɔraa bɛ gɔ́ɔ̃ nɛ, bɛ̀ ka n barka diɛ Lawa nɛ.

³Ka n toa bɛ lɛ gɔ́ɔ̃ nɛ ka Lawa-nyankɔ wɔsɛn dɔn manɛ, màn mɛn bɛ́ toɛ, Lawa zii kɔ wɔ la, wɔ *Krita a boo kɛ da, ma bɛ́ kòso-n kanna boo mɛn a lɛa.

⁴Ka Lawa nyankɔ, ma boo la ma sii-durii kɛ lɛ boo da ma toɛ̃, ka ma doamaa bɛ́-n ma zɛnaa lɔn.

⁵ Ka tɔ wɔ ka sii-doɛ̃ nɛ, Lawa-nyankɔle baãnaan wɔ a paǹ li. Ka dɔ biikoo sonbore gogoonmaa ganaa.

⁶Ka toa kaa boo goã boo sonbore lɛa biikoo tumaa li, á n kɔɔ̃nɛ, ka bɛ dɔ nɛ, ka min gogoonmaa lɛ si sɔnbɔraanɛ.

⁷ Wɔ dɔɔ̃ngiĩ sonbore Tisiki mɛn bɛ́, Dɛnaa a dí-nyali bɔlɔgoondɛnaa lɛa, a n ma miã dí nya kun wole lɛa Dɛnaa nɛ, bɛ á re maa sii din tumaa yɔrɔ pii ka nɛ.

⁸Man diɛ ka li a tɔ-a, màn mɛn bɛ́ toɛ, a wɔ boo pɛ ka nɛ, a ka foo taã dɔn.

⁹ Onezimu mɛn bɛ́ ma dɔɔ̃n bɔlɔgoondɛnaa lɛa, a sii n kaka ma ganaa, bɛ ǹ diɛ zii. Ka dinin min ni ka bɛa Onezimu lɛ nɛ. Sii mɛn tumaa bɛ́ n zɛnɛɛ kànaa, ǹ tá re bɛ pii ka nɛ.

¹⁰ Aristarki mɛn bɛ́ kòso-n kun ma-n kànaa, bɛ á fòo diɛ ka nɛ. Barnabaasi n dɔɔ̃ngiĩ a nɛ Marki dɔ á fòo diɛ ka nɛ. Ka boon ma a wɔ gɔn la, bɛ̀ á daa ka li, ka kũ doɛ̃.

¹¹Yezu mɛn bɛ́ ǹ nə́ bíi Zustusu, bɛ dɔ á fòo diɛ ka nɛ. Bɛa min sɔɔ kɛ lɛ dinsɔɔ̃ n Zuifu lɛa, ǹ nə́ *Lawa a kiibaa ǹ dí kɛ lɛ nyɛɛ kun ma nɛ. Ǹ nə́ ma foo taã parsiini.

¹² Epafrasi mɛn bɛ́ á bɔ ka dinin li, bɛ dɔ á fòo diɛ ka nɛ. A n Yezu Krita a bɛ̀rɛ lɛa; biikoo tumaa li, a n yɔ boe kaa lɛa ka Lawa-nyankɔ nɛ, màn mɛn bɛ́ toɛ, ka goã doa nɛ, kaa sii yii lɛ n piɛ̃ nɛ, ka n golee-n Lawa dùũ li, ka n koe lɛ.

¹³Man siére boo kɛ pii a lɛa, a tá dí gigiã nyɛɛ kasɛn Kolɔɔsi minin lɛa, ka Lawodisee laanka Irapolisi minin ni.

¹⁴Wɔa giaáragiĩ Luku mɛn bɛ́ dɔɔ̃tɔrɔ lɛa, bɛ laanka Demaasi á fòo diɛ ka nɛ.

¹⁵Wɔ á fòo diɛ Lawodisee a Lawa-nyankɔlen manɛ. Wɔ á fòo diɛ Ninfa nɛ, ka Lawa a sɔmɔ minin kɛn nɛ, n lɛ soekɔn a kion.

¹⁶Bɛ̀ ká maa sɛ́wɔ lɛ pɛ, ka dia Lawodisee a Lawa a sɔmɔ minin la, ǹ dɔn nə pɛ. Sɛ́wɔ lɛ a mɛn dɔ bɛ́ re boe Lawodisee a da ka li, ka dɔn nə bɛ pɛ.

¹⁷ Ka pɛ Arsipu dɔ nɛ mà «Dɛnaa dí mɛn kɔ la mà a nya, mà a yiri bɔ bɛ li, a toa a nya sɔnbɔraanɛ a na a lɛ pã.»

¹⁸Masɛ dinmaa Pooli n fòo boo kɛ kiɛ̃, ka ma din gɔn nɛ. Ka yiri baran bɔ mà man kòso-n wa. Lawa a bǐɛ̃ die a goã kun ka nɛ.