Read Samo, Southern Zoz 1 Bible Online

Zoz 1 - Samo, Southern bible

Zoz 1

¹Dɛnaa Lawa a dí-nyali Muizu a gɛ̀ kio, Dɛnaa Lawa boo da ka Muizu a dɔmalɛ wole, Nunu a nɛgiĩ Zozoe ne á pɛ nɛ:

²«Maa dí-nyali Muizu gã. Kanna kəni, n din yoo, n Zurdɛ̃ tà kɛ kuru, n din laanka zaman kɛ lɛ tumaa nɛ. Ma bɛ́ gána mɛn koe ka dinin Izirayeli minin lɛn la, ka wo walan.

³ Ka ma pɛ Muizu-n lɔn, ka gòã bɛ́ re miɛ̃ bǎã woo bǎã nɛ, má bɛ kɔ ka la.

⁴A kũ diə gole lɛ laanka Liban gána kɛ ganaa, a wo Efrati tà gole kɛ yaa, a Ɛti tɔrɔn gána kɛ tumaa da a nɛ, a wo yǎa kɔ̀ gole kɛ lɛ-a lɛ̀nyɛɛnɛ, ka dinin bǎã n die goɛ̃ ka bɛ tumaa nɛ.

⁵A n toa n yii n koo, min kɔn ba re golee n yɔrɔ-a a yɔ bɔ n ganaa wa. A giala, masɛ goã kun ka Muizu-n lɔn ke, man die goɛ̃ kun ka n dɔ-n miɛ̃. Ma a die n gɔn boe n ganaa wa, ma a re n toɛ walan duduu wa.

⁶N gù we yii, n nə n foo taã. A giala, man lɛ kɔ ka digolon la ka gána mɛn a sii ni, n din lɛ n die woe bɛ tatalɛ n kɔ zaman kɛ lɛ la.

⁷Yǎa n din nə n gù we yii, n nə n foo taɛ̃ taãn-taãnɛ. Maa dí-nyali Muizu dí-pɛn mɛnɛn tumaa kɔ n la, a toa n zɛnaa ǹ sii tumaa kɔnpɛ ka bɛn lɛn nɛ. N nyan kanaa n zii da n wo gusin wa, n baran wo n gɔsɛ wa, màn mɛn bɛ́ toɛ, n bɛ́ re n gɔn diɛ dí woo dí ganaa, bɛ boo la a bǐɛ̃ kɔ.

⁸N nyan toa dí-pɛn sɛ́wɔ kɛa boon nə n na n lɛ-a wa. N taasɛ bɛn lɛn ganaa penleen laanka tèlò ne, màn mɛn bɛ́ toɛ, boo mɛn tumaa bɛ́ kiɛ̃ nɛ a nɛ, n toa n zɛnaa ǹ sii tumaa kɔnpɛ ka bɛn nɛ. Bɛ̀ ń zɛnaa miɛ̃, n sii á re woe nyɛɛnɛ, á re bǐɛ̃ dɔ koe.

⁹Ma din bie má pɛ n nɛ, máa n nə n gù we yii n nə n foo taã wa ya? N baran nyɛ́ɛ baa wa, n baran toa n gù gã wa. A giala, masɛ Dɛnaa Lawa mɛn lɛ á ke n Lawa lɛa, ń bɛ́ re woe bǎã woo bǎã nɛ, masɛ tá kunun n ni.»

¹⁰Bɛ kio, Zozoe dí kɔ zaman lɛ a nyɛɛnaandɛnan la á pɛ ǹ nɛ:

¹¹«Ka n bibiə̃ giã ǹ bǎã lɛ nɛ, ka pɛ zaman lɛ nɛ, mà ǹ ga màn-bii li ǹ koa ǹ gɔn li. A giala, kànaa laanka lɛawaa sɔɔ, ka á re Zurdɛ̃ tà kuri. Dɛnaa Lawa lɛ, kaa Lawa lɛa, bɛ bɛ́ gána mɛn lɛ koe ka la, ka á re woe bɛ lɛ sii ka baa kaa wɔ lɛa.»

¹²Zozoe boo da Urubɛn tɔrɔn laanka Gaadi tɔrɔn nɛ ka Manaasee tɔrɔn kɛn talɛɛ nɛ, á pɛ ǹ nɛ:

¹³Dɛnaa Lawa a dí-nyali Muizu dí mɛn pɛ ka nɛ, ka n yiri koa bɛ li. A na á pɛ: «Dɛnaa Lawa lɛ, kaa Lawa lɛa, bɛ na á gána kɛ lɛ kɔ ka la, Zurdɛ̃ tà kɛa lɛ̀giala gɔn la, mà ka n susu a nɛ.

¹⁴Muizu bǎã mɛn lɛ kɔ ka la Zurdɛ̃ tà kio, kaa lɔn nɛ, kaa nɛnyaanan laanka kaa tɔɔn nɛ, bɛn tá re goɛ̃ walan. Sɛnɛ, ǹ mɛnɛn tumaa bɛ́ zia-baalin lɛa, bɛn die ǹ nə ǹ ziabaa ǹ mànan goa, ǹ mɛ ǹ dɔɔ̃nɔn lɛn nyɛɛnɛ, ǹ nə n dɔ ǹ lɛ,

¹⁵yǎa Dɛnaa Lawa susui koe ǹ dɔɔ̃nɔn lɛn la, ka a bɛ́ á kɔ ka dɔn la lɔn. Dɛnaa Lawa lɛ, kaa Lawa lɛa, bɛ bɛ́ gána mɛn lɛ koe ka dɔɔ̃nɔn lɛn la, ka n dɔ ǹ lɛ, yǎa ǹ dɔn nə bɛ sii ǹ biɛ ǹ wɔ lɛa. Bɛ kio, bǎã mɛn bɛ́ kaa wɔ lɛa, Dɛnaa Lawa a dí-nyali Muizu bǎã mɛn lɛ kɔ ka la Zurdɛ̃ tà kio, lɛ̀giala gɔn la, ka tá re ǹ bɔyɛɛ ka da walan.»

¹⁶Ǹ nə́ Zozoe lɛ si ǹ nə́ pɛ nɛ: «N bɛ́ dí mɛn tumaa koe wɔsɛn la, wɔ á re a tumaa nyɛɛ. N bɛ́ re wɔ diɛ bǎã woo bǎã nɛ, wɔ́ á re woe.

¹⁷Wɔ bɛ́ wɔ́ Muizu bɔlɔ si lɔn sii tumaa gɔ́ɔ̃ nɛ, wɔ á re n dɔ bɔlɔ sii miɛ̃. Dɛnaa Lawa lɛ, kaa Lawa lɛa, yǎa bɛ lɛ goã kunun n ni, ka a bɛ́ ke á goã kun ka Muizu-n lɔn.

¹⁸Min mɛn bɛ́ re n piɛ̃ ka n da ǹ boo ne, n bɛ́ re dí mɛn tumaa koe wɔ la, min mɛn bɛ́ re n bɔlɔ tii bɛ gɔ́ɔ̃ nɛ, wɔ́ á re bɛa dɛnaa dii a gã. Yǎa nsɛ nə n gù we yii n nə n foo taã!»