Read Samo, Southern Zoz 11 Bible Online

Zoz 11 - Samo, Southern bible

Zoz 11

¹Asɔɔrɔn kii Zabɛn bɛ ma lɔn, á minin dia Madɔn kii Zobabu li, ka Simurɔn wɔ laanka Aksafun wɔ nɛ.

²Á minin dia kiin kɛn dɔn li kele yii kɛ nɛ gɔsɛ a lɛ̀gɔn la, á ǹ dia Zurdɛ̃ a nyankɔrɔ basa dɛnan kɛn dɔn li, Kinerɛti tà a gusin a lɛ̀gɔn la, á ǹ dia diə gɔ́ɔ̃ wɔn kɛn li, ka ǹ mɛnɛn dɔn bɛ́ Dɔɔrɔ kele la, lɛ̀nyɛɛnɛ.

³Kanaan minin mɛnɛn bɛ́ lɛ̀giala-n, ka ǹ mɛnɛn bɛ́ lɛ̀nyɛɛnɛ, á minin dia bɛn dɔn li, ka Amɔɔrɔ tɔrɔn kɛn nɛ, Ɛti tɔrɔn nɛ Perɛzi minin ni, Zebuzu wɔn kɛn nɛ kele yii ni, ka Evii tɔrɔn kɛn nɛ Ɛrmɔn kele gòã lɛ nɛ, Misipaa gána nɛ.

⁴Ǹ dinin nə́ soo ka ǹ zia-baalin tumaa-n kunun ǹ ni, zaman damata, mɔnaa-n ka kɔ̀ mu lɛ-a ǹ nyɔɔsɔ̃ bɛ́ lɔn. Ǹ nə́ soo ka sùin laanka ziabaa ǹ wotoron ne giãgiã.

⁵Bɛa kiin lɛn tumaa daa golee Merɔmu tà lɛ-a, mà maǹ die zia biɛ Izirayeli minin ganaa.

⁶Dɛnaa Lawa tɔ́n pɛ Zozoe ne: «N baran nyɛ́ɛ baa ǹ nɛ wa. A giala, biɛ̃ kɛnɛn yoroo, ma á re ǹ tumaa dii ma ǹ kɔ Izirayeli minin lɛn la. N die n nə ǹ sùin lɛn pere biɛn kukuru, n tɛ da ǹ ziabaa ǹ wotoron lɛn ganaa.»

⁷Ǹ laan bɛ̀ maǹ doɛ̃, bɛ̀ Zozoe bɛ́ á daa ka zia-baali zaman lɛ tumaa-n kun ni, ǹ nə́ kakaa ǹ la Merɔmu tà lɛ-a.

⁸Dɛnaa Lawa nə́ ǹ wɔ Izirayeli minin lɛn gɔn. Ǹ nə́ ǹ dɛ, ǹ nə́ ǹ loo yǎa Sidɔn kiwi gole kɛ nɛ. Ǹ nə́ ǹ loo miɛ̃ yǎa Misirifɔti-Mayimu kiwi, ǹ nə́ woo ǹ ne yǎa Misipaa kiwi a nyankɔrɔ basa kɛ nɛ, dia-n woe lɛ̀giala la. Ǹ nə́ ǹ dɛ yǎa ǹ nə́ nya, ǹ nə ǹ min goon din yii toa koo wa.

⁹Dɛnaa Lawa goã á màn mɛn pɛ Zozoe ne, Zozoe na á bɛ lɛ zɛnaa ǹ nɛ: Á ǹ sùin lɛn pere biɛn kukuru, á tɛ da ǹ ziabaa ǹ wotoron lɛn ganaa.

¹⁰A din waáraa lɛ nɛ, Zozoe nə́ n bɔyaa, á daa Asɔɔrɔ kiwi kũ, á ǹ kii dɛ. Sonbore ne, Asɔɔrɔ na á goã bɛa gánan lɛn tumaa a kiwi gole lɛa lɛlɛ.

¹¹Min mɛn tumaa goã a nɛ, ǹ nə́ bɛn dɛ lenlen. Màn woo màn tá fɔfoã sii, bɛ kɔn goã a-n doo wa. Ǹ nə́ tɛ da Asɔɔrɔ kiwi lɛ ganaa.

¹²Zozoe bɛa kiin lɛn tumaa a kiwin kũ kɔnlɛ ka ǹ dininmaan nɛ. Á kiin lɛn laanka kiwi minin lɛn dɛ lenlen, ka Dɛnaa Lawa a dí-nyali Muizu goã á pɛ mà ǹ zɛnaa lɔn.

¹³Sɛnɛ, kiwin mɛnɛn tumaa goã tenten la, Izirayeli minin lɛn nə tɛ da bɛ kɔn ganaa wa, bɛ̀ á n bɔ Asɔɔrɔ kiwi kɛ dinsɔɔ̃ nɛ Zozoe tɛ da a ganaa.

¹⁴Izirayeli minin lɛn nə́ bɛa kiwin lɛn mànan tumaa laanka ǹ tɔɔn goa ǹ dinin wɔ lɛa. Sɛnɛ, ǹ nə́ minbuiin nɛ kɛ tumaa dɛ yǎa ǹ nə́ ǹ nya. Màn woo màn tá fɔfoã sii, ǹ bɛ kɔn toa a-n wa.

¹⁵Dɛnaa Lawa goã á pɛ a dí-nyali Muizu-n lɔn, Muizu dɔ na á pɛ Zozoe-n miɛ̃, Zozoe dɔ na á zɛnaa miɛ̃. Dɛnaa Lawa goã á màn mɛn tumaa pɛ Muizu ni, Zozoe nə ǹ kɔn na á da wa.

¹⁶Zozoe bɛa gána lɛ tumaa kũ: Kele yii bǎã kɛ nɛ, gusin a lɛ̀gɔn la kɛ tumaa nɛ, Gosɛnɛ gána tumaa, diə bǎã kɛ nɛ ka Zurdɛ̃ a nyankɔrɔ basa kɛ nɛ, Izirayeli a kele yii kɛ laanka a diə bǎã nɛ.

¹⁷A saa Alaki kele ganaa kunu Seyiiri kiwi li, a wo yǎa Baali-Gaadi kiwi, Liban a nyankɔrɔ basa kɛ nɛ, Ɛrmɔn kele gòã lɛ kɛ nɛ á bɛn kiin tumaa kũ, á ǹ dɛ ǹ nə́ gã.

¹⁸Zozoe zia baa bɛa kiin lɛn tumaa ganaa á belebɔ nɛ.

¹⁹Kiwi lɛ goon din kɔn wɔ ma ka Izirayeli minin lɛn nɛ wa. Yǎa Evii tɔrɔn kɛn, ǹ nə́ goã giã-n Gabawɔ̃ kiwi. A na á gialakunun kɛn tumaa kũ zia gɔ́ɔ̃ nɛ.

²⁰ A giala, Dɛnaa Lawa din na á ǹ foo laa, á ǹ kaa kɔn ka Izirayeli minin lɛn nɛ. A na á goã giɛ li, bɛn nə ǹ dɛ ǹ nə ǹ nya lenlen, ǹ nə́ ǹ ba n tɛn toɛ ǹ nɛ wa, ka Dɛnaa Lawa goã á pɛ Muizu-n lɔn.

²¹Zozoe daa bɛa waáraa kɛ lɛ nɛ, á Anaaki tɔrɔn kɛn dɛ á ǹ bɔ kele yii bǎãn kɛn nɛ Ebrɔn, Debiiri, Anaabu, Zudaa gána a kele yii kɛ tumaa ka Izirayeli gána a kele yii kɛ tumaa nɛ. Zozoe nə́ ǹ laanka ǹ kiwin tumaa ziziɛ̃ lenlen.

²²Anaaki tɔrɔ goã Izirayeli gána-n doo wa, yǎa Gaazaa kiwi ka Gaati laanka Asidɔdi kiwi ni.

²³Dɛnaa Lawa goã á màn mɛn tumaa pɛ Muizu ni, Zozoe na á gána lɛ tumaa kũ á kɔnpɛ ka bɛ lɛ nɛ. Á gána lɛ tatala Izirayeli tɔrɔn lɛn lɛ yii li, á kɔ ǹ la kíɛ̃ lɛa. Bɛ kio, gána lɛ tɔ́n goã là nyantoro la zia ná a banban.