Read Samo, Southern Zoz 16 Bible Online

Zoz 16 - Samo, Southern bible

Zoz 16

¹Bǎã mɛn dɔ Zozɛfu tɔrɔn kɛn ganaa, a n siɛ tán Zurdɛ̃ tà lɛ-a kunu Zerikoo kiwi li, a wo Zerikoo kiwi lɛ a mu pìã lɛ-a lɛ̀giala gɔn la. Ǹ gèlè nə n toɛ Zerikoo, a don kɛ wɔsɔ kɔn, a kiɛ̃ a wo Betɛli a kele yii kɛ nɛ.

²A n soe Betɛli a wo Luuzu, a kiɛ̃ a da bɔ Arkii tɔrɔn kɛn gèlè la Atarɔti kiwi,

³a gisĩ a da bɔ Yafletii tɔrɔn kɛn gèlè la dia-n woe lɛ̀nyɛɛnɛ. Bɛti-Ɔrɔn kiwi ke tán li, a n woe yǎa bɛ gèlè la, a da yǎa Gezɛɛrɛ, a kiɛ̃ a wo n doa kɔ̀ gole kɛ ganaa.

⁴Zozɛfu tɔrɔ Manaasee laanka Efrayimu a minin nə bǎã mɛn yɛ ǹ kíɛ̃ lɛa, a din lɛ n ka bɛ nɛ.

⁵Bǎã mɛn dɔ Efrayimu a tanlɛ minin ganaa, bɛ gèlè n ka kɛ nɛ: Lɛ̀nyɛɛn gɔn la, ǹ bǎã lɛ gèlè n ka Atarɔti-Adaara nɛ, a wo yǎa Bɛti-Ɔrɔn kiwi kɛ nɛ lon li.

⁶Ǹ gèlè lɛ n soe walan, a wo n doa kɔ̀ gole kɛ ganaa lɛ̀nyɛɛnɛ, Mikmetaati kiwi a gɔsɛ a lɛ̀gɔn la. A nə n pɛnɛ a da bɔ Taanati-Siiloo kiwi a lɛ̀giala gɔn la, a kiɛ̃ a wo Anaaki kiwi.

⁷A nə n toɛ Yanoa, a gisĩ a da bɔ Atarɔti laanka Naara kiwi, a da n lɔ Zerikoo ganaa, a kiɛ̃ a wo n doa Zurdɛ̃ tà ganaa.

⁸Gèlè lɛ n wusii a n toa Tapuwa kiwi, a wo Kana tà lɛ-a lɛ̀nyɛɛn gɔn la, a kiɛ̃ a wo n doa kɔ̀ gole kɛ ganaa. Bǎã mɛn dɔ Efrayimu a tanlɛ minin ganaa ǹ kíɛ̃ lɛa, a din lɛ n ka bɛ nɛ,

⁹kun ka ǹ kiwin mɛnɛn tumaa laanka ǹ lɛkoro lɛ-a bǎãn nɛ Manaasee tɔrɔn bǎã nɛ ǹ nə́ ǹ kɔ Efrayimu tɔrɔn lɛn la.

¹⁰ Kanaan minin mɛnɛn nə goã giã-n Gezɛɛrɛ, ǹ bɛn loo wa. Bɛ lɛ n ke, Kanaan minin lɛn nə́ giã Efrayimu minin lɛn bii yǎa á daa kaa pelo lɛ. Sɛnɛ, maǹ nə́ ǹ kaa pàã dí ganaa.