Read Samo, Southern Zoz 18 Bible Online

Zoz 18 - Samo, Southern bible

Zoz 18

¹Izirayeli zaman tumaa nə́ n lɛ sɔkɔn Siiloo. Ǹ nə́ kɔn yɛ ka Lawa nɛ ǹ mɔnaa kion kɛ doa walan. Bɛ á zɛnɛɛ, bɛ̀ ǹ nə́ boo gána lɛ la.

²Izirayeli minin lɛn tɔrɔ sɔbaa na á goã ǹ nə́ ǹ tɔn bǎã kɔ bɛn la ǹ kíɛ̃ lɛa wa.

³Zozoe tɔ́n pɛ Izirayeli minin lɛn manɛ: «Dɛnaa Lawa, ka digolon Lawa gána mɛn lɛ kɔ ka la, ka nə n yii diɛ yǎa biĩ, ka tɔn woe giɛ̃ a nɛ?

⁴Ka min sɔɔ bɔ tɔrɔ gogoonmaa a minin bii, man die ǹ diɛ dí ganaa. Bɛn die ǹ yoo ǹ wo n bibiə̃ gána lɛ nɛ. Bǎã mɛn bɛ́ re doe ǹ mɛnɛn minin ganaa, ǹ die ǹ bɛ gèlè kiɛ̃ ǹ tɔn wusoo ǹ da masɛ li.

⁵Ǹ die ǹ gána lɛ talakɔn wɔlɔ sɔbaa: Zudaa tɔrɔn nə giã ǹ bǎã nɛ gusin a lɛ̀gɔn la, Zozɛfu tɔrɔn nə giã ǹ bǎã nɛ gɔsɛ a lɛ̀gɔn la.

⁶Kasɛn kɛn nə bǎã sɔbaa lɛ gèlè kiɛ̃, ka die ka da kɔ ma la kànaa. Masɛ á die n piɛ̃ ǹ ganaa Dɛnaa Lawa yɔrɔ-a, wɔa Lawa lɛ, màn mɛn bɛ́ toɛ tɔrɔ gogoonmaa na a wɔ gii dɔ̃.

⁷Sɛnɛ, *Levii tɔrɔn mɛnɛn bɛ́ ka bii, bǎã banban bɛn wɔ lɛa wa. A giala, ǹ wɔ gii n ka Dɛnaa Lawa a wúlu bɔ kɛ nɛ. Gaadi tɔrɔn kɛn sɛn, Urubɛn tɔrɔn nɛ ka Manaasee tɔrɔn kɛn talɛɛ nɛ, bɛn nə́ bǎã yɛ Zurdɛ̃ tà kio lɛ̀giala-n. Dɛnaa Lawa a dí-nyali Muizu na á bɛa bǎã lɛ kɔ ǹ la.»

⁸Bɛa minin lɛn nə́ n yɔrɔ bɔ ǹ nə́ woo. Ǹsɛn mɛnɛn bɛ́ re woe gána lɛ gèlè kiɛ̃, Zozoe pɛ ǹ nɛ: «Ka woo ka n bibiə̃ gána lɛ nɛ, ka a gèlè lɛ kiɛ̃, ka wusoo ka da ma li. Ma á re n piɛ̃ gána lɛ ganaa kànaa, Dɛnaa Lawa yɔrɔ-a Siiloo, màn mɛn bɛ́ toɛ, didie na a wɔ gii dɔ̃.»

⁹Bɛa minin lɛn nə́ woo, ǹ nə́ n bibiə̃ gána lɛ nɛ, ǹ ná a gèlè lɛ kiɛ̃ bǎã sɔbaa lɛ a kuru kɔn lɛ yii li ka kiwin mɛnɛn dɔn bɛ́ ǹ nɛ. Bɛ kio, ǹ nə́ n bɔyaa ǹ nə́ daa Zozoe li, giã ǹ bǎã nɛ Siiloo.

¹⁰Zozoe nə́ n pã bɛa bǎãn lɛn ganaa, Dɛnaa Lawa yɔrɔ-a Siiloo, á tɔ́n gána lɛ gii Izirayeli minin lɛn bii, á tɔrɔ gogoonmaa wɔ gii kɔ la.

¹¹Pã lɛ a bibinaa na á mɛnaa Bɛnzamɛn tɔrɔ minin la, a kɔnpɛ ka ǹ tanlɛ yii ni. Bǎã mɛn dɔ ǹ ganaa, a n Zudaa tɔrɔn laanka Zozɛfu tɔrɔn bǎã kɛ bii.

¹²Gɔsɛ a lɛ̀gɔn la, ǹ gèlè lɛ n siɛ tán Zurdɛ̃ tà lɛ-a, a kɔ Zerikoo wàã lɛ, a gɔsɛ a lɛ̀gɔn la, a kiɛ̃ a wo kele yii kɛ nɛ dia-n woe lɛ̀nyɛɛnɛ, a tɔn wo n doa Bɛti-Avɛn don kɛ ganaa.

¹³Gèlè lɛ n boe walan a wo Luuzu. A n koe Luuzu a gusin a lɛ̀gɔn lɛ, maǹ bɛ lɛ bíi mà Betɛli. Bɛti-Ɔrɔn kiwi mɛn bɛ́ tán li, kele mɛn bɛ́ a gusin a lɛ̀gɔn la, gèlè lɛ n boe bɛ la a gisĩ a da Atarɔti-Adaara kiwi.

¹⁴Gèlè lɛ nə n toɛ kele lɛ li lɛ̀nyɛɛnɛ, Bɛti-Ɔrɔn kiwi yɔrɔ-a, dia-n woe gusin a lɛ̀gɔn la, a n pusu a wo lɛ̀nyɛɛnɛ, a tɔn wo n doa Kiriyati-Baali kiwi ganaa. A din lɛ nɛ ǹ tá bíi mà Kiriyati-Yarimu. Zudaa tɔrɔn lɛn kiwi ni. Lɛ̀nyɛɛn gɔn la, a gèlè n ka bɛ nɛ.

¹⁵Gusin a lɛ̀gɔn la a gèlè lɛ nə n giala koe Kiriyati-Yarimu kiwi, a n toa walan a wo lɛ̀nyɛɛn li, a kiɛ̃ a wo Nɛftoa a mu yalan kɛn lɛ-a.

¹⁶Gèlè lɛ nə n toɛ walan, a gisĩ a da kele kɛ gòã lasa ganaa, Hinɔn tɔrɔn nyankɔrɔ basa kɛ yɔrɔ-a, Refayimu tɔrɔn diə fúlu kɛ nɛ, gɔsɛ a lɛ̀gɔn la. A nə n toɛ Hinɔn a nyankɔrɔ basa lɛ nɛ, Zebuzu tɔrɔn kele kɛa gusin a lɛ̀gɔn la, a gisĩ a da Ɛn-Rogeli tà lɛ-a.

¹⁷A nə n pɛnɛ gɔsɛ a lɛ̀gɔn la, a bɔ Ɛn-Semɛsi kiwi, bɛ kio, Gelilɔti kiwi, Adumimu kele kɛa dii ǹ bǎã yɔrɔ-a. A nə n toɛ walan a da Urubɛn a nɛgiĩ Bohana a kɔlɔ kɛ li.

¹⁸A n boe kele lɛ a gɔsɛ a lɛ̀gɔn la, Zurdɛ̃ a nyankɔrɔ basa kɛ lɛ li, a gisĩ a da bɔ nyankɔrɔ basa lɛ din ni.

¹⁹Gèlè lɛ n die a da bɔ Bɛti-Hogolaa kiwi wàã li gɔsɛ a lɛ̀gɔn la, a kiɛ̃ a wo n doa yìsi mu tà kɛa golee ǹ bǎã nɛ gɔsɛ a lɛ̀gɔn la, Zurdɛ̃ tà a mu bɛ́ kiɛ li bǎã mɛn nɛ. Gusin a lɛ̀gɔn la, gèlè lɛ n ka bɛ nɛ.

²⁰Lɛ̀giala gɔn la, Zurdɛ̃ tà kɛ na á goã gèlè lɛa. Bǎã mɛn dɔ Bɛnzamɛn tɔrɔn tanlɛ minin ganaa, kíɛ̃ lɛa, a gèlè bɛ́ paǹ mɛn tumaa li, a din lɛ n ka bɛ nɛ.

²¹Bɛnzamɛn tɔrɔn lɛn tanlɛ minin kiwin man nə́ goã ka kɛn nɛ: Zerikoo, Bɛti-Hogola, Emɛki-Kesiisi,

²²Bɛti-Arabaa, Semarayimu, Betɛli,

²³Abimu, Paaraa, Ofra,

²⁴Kefaramonaa, Ɔfunii, Gebaa. Maǹ kiwi dadara fulupaa ka ǹ lɛkoro lɛ-a kiwi bisinin ni.

²⁵Kiwi kɔsɔn mɛnɛn dɔn nə goã ǹ wɔn lɛa, bɛn man ka kɛn nɛ: Gabawɔ̃, Ramaa, Beerɔti,

²⁶Mispee, Kefiraa, Mosaa,

²⁷Rekɛmu, Yirpeeli, Tareyalaa,

²⁸Selaa, Elɛfu, Zebuzu bɛ giala mà Zeruzalɛmu, Gibeya, Kiriyati-Yarimu. Bɛn man kiwi dadara fulusii, ka ǹ lɛkoro lɛ-a kiwi bisinin ni. Bǎã mɛn dɔ Bɛnzamɛn tɔrɔn tanlɛ minin lɛn ganaa kíɛ̃ lɛa, a din nə ka kɛ nɛ.