Read Samo, Southern Zoz 21 Bible Online

Zoz 21 - Samo, Southern bible

Zoz 21

¹*Levii tɔrɔn kɛdɛnan nə́ n zɔ̃ ǹ nə́ dɔ Lawa a wúlu-bɔle Eleyazaara laanka Nunu a nɛgiĩ Zozoe li ka Izirayeli tɔrɔn lɛn kɛdɛnan nɛ.

² Ǹ nə́ boo da ǹ nɛ Siiloo, Kanaan gána nɛ, ǹ nə́ pɛ ǹ nɛ: «Dɛnaa Lawa goã á pɛ Muizu ni, mà ǹ die ǹ kiwin kɔ wɔsɛn la wɔ giã ǹ nɛ, ka ǹ lɛkoro lɛ-a bǎãn nɛ, wɔa tɔɔn buu sɔ̃ ǹ bǎã lɛa.»

³Bǎãn mɛnɛn nə dɔ Izirayeli minin lɛn ganaa, ǹ dinin nə́ kiwin kɔnɔn bɔ bɛn lɛn nɛ, ka ǹ lɛkoro lɛ-a bǎãn nɛ, ǹ nə́ ǹ kɔ Levii tɔrɔn lɛn la, ka Dɛnaa Lawa goã á pɛ lɔn.

⁴Bǎã lɛ kɔn dɔ Levii tɔrɔ Keyati a tanlɛ minin ganaa. Ǹ mɛnɛn bɛ́ Lawa a wúlu-bɔle Aarɔn tɔrɔn lɛa ǹ bii, bɛn nə́ kiwi fulusɔɔ yɛ. Bɛa kiwin lɛn kɔnɔn man Zudaa tɔrɔn bǎã nɛ, ǹ tɛn nə Simiɔn tɔrɔn bǎã nɛ, ǹ tɛn dɔ n Bɛnzamɛn tɔrɔn bǎã nɛ.

⁵Ǹ bɛ́ ǹ nə́ n pã, kiwi fù na á dɔ Keyati tɔrɔ gialakunun kɛn ganaa Efrayimu tɔrɔn tanlɛ minin bǎã nɛ, ǹ kɔn dɔ ǹ ganaa Dan tɔrɔn bǎã nɛ, ǹ kɔn dɔ ǹ ganaa Manaasee tɔrɔn kɛn talɛɛ a bǎã nɛ.

⁶Ǹ nə́ wusoo ǹ nə́ n pã, Gɛrsɔn tɔrɔn nə́ kiwi fulusɔɔ yɛ Basan gána nɛ, Isakaara tɔrɔn tanlɛ minin li, Asɛɛrɛ tɔrɔn wɔn li, Nɛfutalii tɔrɔn wɔn nɛ, ǹ nə́ ǹ kɔn yɛ Manaasee tɔrɔn kɛn talɛɛ dɔ li.

⁷Merari a tanlɛ minin kɛn man nə́ kiwi fulupaa yɛ Urubɛn tɔrɔn li, ǹ nə́ ǹ kɔn yɛ Gaadi tɔrɔn laanka Zabulɔn wɔn li.

⁸Dɛnaa Lawa goã á pɛ Muizu-n lɔn, Izirayeli minin lɛn man nə́ n pã, ǹ nə́ tɔ́n bɛa kiwin lɛn laanka ǹ lɛkoro lɛ-a bǎãn kɔ Levii tɔrɔn lɛn la.

⁹Ǹ kiwin mɛnɛn kɔ ǹ la, ǹ tɛn nə Zudaa tɔrɔn bǎã nɛ, ǹ tɛn nə Simiɔn tɔrɔn bǎã nɛ. Bɛa kiwin kɛn lɛn ǹ tɔ á re n pii,

¹⁰bɛn man nə́ Aarɔn tɔrɔn wɔn baa, ǹ mɛnɛn lɛn bɛ́ Keyati a tanlɛ minin lɛa, Levii tɔrɔn lɛn bii. A giala, ǹ bɛ́ ǹ nə́ n pã, bǎã lɛ a bibinaa na á dɔ ǹ dinin ganaa.

¹¹Arabaa kiwi ke, Anaaki ǹ di Arabaa tɔ ná a ganaa, ǹ nə́ bíi Ebrɔn, Zudaa tɔrɔn kele yii kɛ nɛ, maǹ nə́ bɛ lɛ laanka a lɛkoro lɛ-a bǎãn kɔ ǹ la.

¹²Sɛnɛ, kiwi lɛ a don ne, ka a lɛkoro lɛ-a kiwi bisinin ni, maǹ nə́ bɛ kɔ Zefunee a nɛgiĩ Kalɛbu la, a wɔ lɛa.

¹³Ǹ kiwin mɛnɛn kɔ wúlu-bɔle Aarɔn tɔrɔn la bɛn man ka kɛn nɛ: Ebrɔn kiwi ke gɛ̀-dɛle a baa si a wo mìi duru ǹ bǎã lɛa, bɛ laanka a lɛkoro lɛ-a bǎãn manɛ, Libnaa laanka a lɛkoro lɛ-a bǎãn nɛ,

¹⁴Yatiiri laanka a lɛkoro lɛ-a bǎãn nɛ, Ɛstemoa laanka a lɛkoro lɛ-a bǎãn nɛ,

¹⁵Holɔn laanka a lɛkoro lɛ-a bǎãn nɛ, Debiiri laanka a lɛkoro lɛ-a bǎãn nɛ,

¹⁶Ayini laanka a lɛkoro lɛ-a bǎãn nɛ, Yuutaa laanka a lɛkoro lɛ-a bǎãn nɛ, Bɛti-Semɛsi laanka a lɛkoro lɛ-a bǎãn nɛ. A kaa kun kiwi manangɔrɔ ǹ nə́ ǹ bɔ Zudaa tɔrɔn laanka Simiɔn tɔrɔn bǎã nɛ.

¹⁷Ǹ kiwin mɛnɛn bɔ Bɛnzamɛn tɔrɔn bǎã nɛ, bɛn man ka kɛn nɛ: Gabawɔ̃ laanka a lɛkoro lɛ-a bǎãn manɛ, Gebaa laanka a lɛkoro lɛ-a bǎãn nɛ,

¹⁸Anaatɔti laanka a lɛkoro lɛ-a bǎãn nɛ, Almɔn laanka a lɛkoro lɛ-a bǎãn nɛ. A kaa kun kiwi sii.

¹⁹Aarɔn tɔrɔn lɛn Lawa a wúlu-bɔlen lɛa, kiwin mɛnɛn nə dɔ bɛn ganaa, a kaa kun kiwi fulusɔɔ ka ǹ lɛkoro lɛ-a bǎãn nɛ.

²⁰Pã lɛ gɔ́ɔ̃ nɛ, Keyati tɔrɔ gialakunun mɛnɛn dɔn bɛ́ Levii tɔrɔn lɛa, bɛn nə́ kiwin yɛ Efrayimu minin bǎã nɛ.

²¹Ǹ kiwin mɛnɛn kɔ ǹ la bɛn man ka kɛn nɛ: Sisɛmu kiwi ke, gɛ̀-dɛle a baa si a wo mìi duru ǹ bǎã lɛa, bɛ laanka a lɛkoro lɛ-a bǎãn manɛ Efrayimu a kele yii ni, Gezɛɛrɛ laanka a lɛkoro lɛ-a bǎãn nɛ,

²²Kibusayimu laanka a lɛkoro lɛ-a bǎãn nɛ, Bɛti-Ɔrɔn laanka a lɛkoro lɛ-a bǎãn nɛ. A kaa kun kiwi sii.

²³Ǹ kiwin mɛnɛn kɔ ǹ la Dan tɔrɔn bǎã nɛ, bɛn man ka kɛn nɛ: Ɛlteke laanka a lɛkoro lɛ-a bǎãn manɛ, Gibetɔn laanka a lɛkoro lɛ-a bǎãn nɛ,

²⁴Ayalɔn laanka a lɛkoro lɛ-a bǎãn nɛ, Gat-Rimɔn laanka a lɛkoro lɛ-a bǎãn nɛ. A kaa kun kiwi sii.

²⁵Ǹ kiwin mɛnɛn kɔ ǹ la Manaasee tɔrɔn kɛn talɛɛ a bǎã nɛ, bɛn man ka kɛn nɛ: Tanaaki laanka a lɛkoro lɛ-a bǎãn manɛ, Gat-Rimɔn laanka a lɛkoro lɛ-a bǎãn nɛ. A kaa kun kiwi paa.

²⁶Keyati tɔrɔ gialakunun lɛn tanlɛ minin kiwin lɛn kaa kun nə kiwi fù ka ǹ lɛkoro lɛ-a bǎãn nɛ.

²⁷Ǹ nə́ kiwin kɔ Levii tɔrɔ Gɛrsɔn a tanlɛ minin la Manaasee tɔrɔn kɛn talɛɛ a bǎã nɛ, bɛn man ka kɛn nɛ: Golan kiwi ke, gɛ̀-dɛle a baa si a wo mìi duru ǹ bǎã lɛa, bɛ laanka a lɛkoro lɛ-a bǎãn manɛ Basan gána nɛ, ka Bɛtiseraa laanka a lɛkoro lɛ-a bǎãn nɛ. A kaa kun kiwi paa.

²⁸Ǹ kiwin mɛnɛn kɔ ǹ la Isakaara tɔrɔn bǎã nɛ, bɛn man ka kɛn nɛ: Kisiɔn laanka a lɛkoro lɛ-a bǎãn manɛ, Daberati laanka a lɛkoro lɛ-a bǎãn nɛ,

²⁹Yarmuti laanka a lɛkoro lɛ-a bǎãn nɛ, Ɛn-Ganimu laanka a lɛkoro lɛ-a bǎãn nɛ. A kaa kun kiwi sii.

³⁰Ǹ kiwin mɛnɛn kɔ ǹ la Asɛɛrɛ tɔrɔn bǎã nɛ, bɛn man ka kɛn nɛ: Miseyali laanka a lɛkoro lɛ-a bǎãn manɛ, Abdɔn laanka a lɛkoro lɛ-a bǎãn nɛ,

³¹Ɛlkaati laanka a lɛkoro lɛ-a bǎãn nɛ, Rehɔbu laanka a lɛkoro lɛ-a bǎãn nɛ. A kaa kun kiwi sii.

³²Ǹ kiwin mɛnɛn kɔ ǹ la Nɛfutalii tɔrɔn bǎã nɛ, bɛn man ka kɛn nɛ: Kedɛsi kiwi ke, gɛ̀-dɛle a baa si a wo mìi duru ǹ bǎã lɛa, bɛ laanka a lɛkoro lɛ-a bǎãn manɛ Galilee gána nɛ, Amɔti-Dɔɔrɔ laanka a lɛkoro lɛ-a bǎãn nɛ, Kartan laanka a lɛkoro lɛ-a bǎãn nɛ. A kaa kun kiwi sɔɔ.

³³Gɛrsɔn tɔrɔn tanlɛ minin kiwin lɛn kaa kun nə kiwi fulusɔɔ ka ǹ lɛkoro lɛ-a bǎãn nɛ.

³⁴Levii tɔrɔ gialakunun kɛn, Merarii a tanlɛ minin lɛa, ǹ nə́ kiwin kɔ bɛn la Zabulɔn tɔrɔn bǎã nɛ. Bɛa kiwin lɛn man ka kɛn nɛ: Zokoneyamu laanka a lɛkoro lɛ-a bǎãn manɛ, Kartaa laanka a lɛkoro lɛ-a bǎãn nɛ,

³⁵Diminaa laanka a lɛkoro lɛ-a bǎãn nɛ, Nahalali laanka a lɛkoro lɛa bǎãn nɛ. A kaa kun kiwi sii.

³⁶Urubɛn tɔrɔn bǎã nɛ, maǹ nə́ kiwin kɛn kɔ ǹ la: Besɛɛrɛ laanka a lɛkoro lɛ-a bǎãn manɛ, Yasaa laanka a lɛkoro lɛ-a bǎãn nɛ,

³⁷Kedemɔti laanka a lɛkoro lɛ-a bǎãn nɛ, Mefaati laanka a lɛkoro lɛ-a bǎãn nɛ. A kaa kun kiwi sii.

³⁸Ǹ kiwin mɛnɛn kɔ ǹ la Gaadi gána nɛ, bɛn man ka kɛn nɛ: Ramɔti kiwi ke, gɛ̀-dɛle a baa si a wo mìi duru ǹ bǎã lɛa, bɛ laanka a lɛkoro lɛ-a bǎãn manɛ Galaati gána nɛ, Mahanayimu laanka a lɛkoro lɛ-a bǎãn nɛ,

³⁹Ɛsibɔn laanka a lɛkoro lɛ-a bǎãn nɛ, Yazɛɛrɛ laanka a lɛkoro lɛ-a bǎãn nɛ. Bɛa kiwin lɛn kaa kun nə kiwi sii.

⁴⁰Ǹ nə n pã ǹ nə́ kiwin mɛnɛn kɔ Levii tɔrɔ Merari a tanlɛ minin la, ǹ kaa kun nə kiwi fulupaa.

⁴¹Ǹ kiwin mɛnɛn bɔ Izirayeli minin gialakunun kɛn bǎã nɛ, ǹ nə́ ǹ kɔ Levii tɔrɔn lɛn la, ǹ kaa kun nə kiwi pusiwenkiwisi, ka ǹ lɛkoro lɛ-a bǎãn nɛ.

⁴²Bɛa kiwin lɛn gogoonmaa laanka a lɛkoro lɛ-a bǎãn manɛ. Bɛa kiwin lɛn tumaa na á goã miɛ̃.

⁴³Dɛnaa Lawa gána lɛ tumaa kɔ Izirayeli minin lɛn la. A giala, á goã á n lɛ kɔ ǹ digolon la, mà asɛ á re koe ǹ la. Izirayeli minin nə́ gána lɛ si, ǹ nə́ giã a nɛ.

⁴⁴Dɛnaa Lawa là nyantoro kɔ ǹ la paǹ tumaa li, ka a bɛ́ á goã á pɛ ǹ digolon man lɔn. Ǹ zɔ́ɔn lɛn tumaa, ǹ kɔn boo la á golee ǹ nyɛɛn wa. Dɛnaa Lawa nə́ ǹ zɔ́ɔn lɛn tumaa wɔ ǹ gɔn.

⁴⁵Dɛnaa Lawa lɛ-kɔ Sonbore mɛn tumaa wɔ Izirayeli minin lɛn manɛ, ǹ kɔn goã kooro wa. Á ná a tumaa a sii zɛnaa.