Read Samo, Southern Zoz 22 Bible Online

Zoz 22 - Samo, Southern bible

Zoz 22

¹Bɛ kio kəni, Zozoe Urubɛn tɔrɔn bíi, Gaadi tɔrɔn nɛ, ka Manaasee tɔrɔn kɛn talɛɛ nɛ.

² Á pɛ ǹ nɛ: «Dɛnaa Lawa a dí-nyali Muizu boo mɛn tumaa pɛ ka nɛ, ka kɔ bɛ lɛ. Masɛ dɔ boo mɛn tumaa pɛ ka nɛ, ka ma bɔlɔ si.

³Lɛ̀ gigiã gɔ́ɔ̃ nɛ, a da pelo kɛ yaa, ka ka dɔɔ̃nɔn lɛn kaa wa. Dɛnaa Lawa mɛn bɛ́ kaa Lawa lɛa, ká n yiri koa bɛa dí-pɛn li ká ǹ tamaa.

⁴Dɛnaa Lawa lɛ, kaa Lawa lɛa, á susu ǹ bǎã kɔ ka dɔɔ̃nɔn lɛn la kanna kəni, ka a bɛ́ á goã á pɛ ǹ nɛ lɔn. A bɛ́ miɛ̃, ka á boe la ka wusoo ka wo piɛ sisia. Dɛnaa Lawa a dí-nyali Muizu gána mɛn kɔ ka la Zurdɛ̃ tà kio lɛ̀giala-n, ka wo giã bɛ nɛ.

⁵Sɛnɛ, Dɛnaa Lawa lɛ, kaa Lawa lɛa, bɛa dí-nyali Muizu lɛ dí mɛn tumaa pɛ ka nɛ landa gɔ́ɔ̃ nɛ, ka n yiri koa bɛ li taãn-taãnɛ, ka kɔ lɛ. Dɛnaa Lawa lɛ, ka Lawa lɛa, ka bɛ lɛ narɛ, ka a foo sii zɛnaa, ka kɔ a dí-pɛn lɛ, ka n naa a din lɛ ganaa. Ka n dinin kɔ, ka dí nya a din lɛ nɛ, ka ka foo tumaa nɛ.»

⁶Zozoe barka da ǹ ganaa, á tɔ́n nə ǹ kaa ǹ nə́ woo piɛ.

⁷Muizu na á goã á bǎã kɔ Manaasee tɔrɔn kɛn talɛɛ goon la Basan gána nɛ. Á bǎã kɔ talɛɛ goon kɛ dɔ la ǹ dɔɔ̃nɔn li, Zurdɛ̃ tà kio lɛ̀nyɛɛnɛ. Zozoe bɛ́ ǹ kiɛ mà ǹ wo piɛ, a na á barka da ǹ dɔn ganaa,

⁸á pɛ ǹ nɛ: «Ka die ka wusoo ka wo piɛ ka naforo gigiã nɛ, ka tɔɔ gigiã nɛ, ka wɔrɔ nɛ, ka sana nɛ, ka zan nɛ, ka fɔlɔ nɛ, ka mɔnaan nɛ, gigiã a tɔ-a. Ka mànan mɛnɛn lɛn si kaa zɔ́ɔn la, ka ǹ gii kɔn ka ka tɔrɔ minin gialakunun ni.»

⁹Urubɛn tɔrɔn nɛ, Gaadi tɔrɔn nɛ, Manaasee tɔrɔn lɛn talɛɛ nɛ, bɛn nə́ kiɛ̃ ǹ nə́ n bɔ Izirayeli minin gialakunun lɛn li Siiloo, Kanaan gána nɛ, mà maǹ wusii woe Galaati gána nɛ. Muizu na á goã á bɛa bǎã lɛ kɔ ǹ dɔn la ǹ wɔ gii lɛa, ka Dɛnaa Lawa bɛ́ á goã á pɛ-n lɔn.

¹⁰Ǹ bɛ́ ǹ nə́ dɔ Zurdɛ̃ tà lɛ-a bǎãn kɛn nɛ, ǹ nə́ ǹ tɔn soo ǹ nə́ n bɔ Kanaan gána dɔ din ni bɔrɔ wa, ǹ nə́ *wúlu bɔ ǹ bǎã dɔ, wúlu bɔ ǹ bǎã gangabiɛ.

¹¹Izirayeli minin gialakunun lɛn nə́ ma, mà Urubɛn tɔrɔn nɛ, Gaadi tɔrɔn nɛ ka Manaasee tɔrɔ gialakunun kɛn nɛ lɛ̀giala-n, mà bɛn nə́ wúlu bɔ ǹ bǎã dɔ Zurdɛ̃ tà lɛ-a bǎãn kɛn nɛ, dia-n die ǹsɛn dinin ganaa Kanaan gána nɛ.

¹²Izirayeli minin lɛn bɛ́ ǹ nə́ bɛ ma lɔn gɔrɔ, ǹ tumaa nə́ n lɛ sɔkɔn Siiloo mà maǹ woe ǹ gialaa.

¹³Ǹ nə́ Lawa a wúlu-bɔle Eleyazaara a nɛgiĩ Pineyasi dia Galaati gána nɛ Urubɛn tɔrɔn li, Gaadi tɔrɔn li, ka Manaasee tɔrɔn kɛn talɛɛ nɛ lɛ̀giala-n.

¹⁴Ǹ nə́ kiã fù dɔ dia kun ni, kiã goon, tɔrɔ gogoonmaa wɔ lɛa. Izirayeli tɔrɔn lɛn tumaa a tanlɛ minin kiãn man ka bɛn nɛ.

¹⁵Ǹ nə́ woo Urubɛn tɔrɔn laanka Gaadi tɔrɔn li ka Manaasee tɔrɔn kɛn talɛɛ nɛ Galaati gána nɛ. Ǹ nə́ pɛ ǹ nɛ:

¹⁶ «Dɛnaa Lawa a zaman tumaa na á wɔsɛn dia, mà wɔ da pɛ ka nɛ mà wàa mɛn bɔlɔ wurumudɛnan sii n ke, ká zɛnaa Izirayeli a Lawa nɛ. Mà wàa na á baa ka tá n niɛ n boe Dɛnaa Lawa ganaa pelo, ka n kiɛ̃ woe wúlu bɔ ǹ bǎã kɔsɔ doe, ka nə n piɛ̃ ka Dɛnaa Lawa nɛ?

¹⁷ Wɔ sii baraa mɛn zɛnaa Pewɔɔrɔ kele la, bɛ n sii kiɛɛrɛ lɛa? Haalɛ pelo, wɔ tɔn nə n bɔ bɛ din ni wa. A da yǎa Dɛnaa Lawa ná a dɔlɔ bɔ a zaman tumaa ganaa.

¹⁸Kasɛn dɔn bɛ́ yui n niɛ n boe Dɛnaa Lawa ganaa pelo, ka nə́ n piɛ̃, biɛ̃ biɛ̃, a foo n die yui wɔsɛn Izirayeli zaman kɛ tumaa li.

¹⁹Bɛ̀ ka n taasɛ mà kaa gána lɛ a Dɛnaa Lawa a giã ǹ bǎã lɛa wa, gána mɛn bɛ́ a din wɔ lɛa, a giã ǹ bǎã sonbore kɛ ná a nɛ, ka wusoo ka da walan, ka giã kun ka wɔsɛn nɛ. Sɛnɛ, Dɛnaa Lawa, wɔa Lawa a wúlu bɔ ǹ bǎã kɛ miã ke ka dɔ, ka nyan toa ka n piã ka Dɛnaa Lawa nɛ, ka n na ka n bɔ wɔsɛn ganaa wa dɛ!

²⁰Mànan mɛnɛn doamaa bɛ́ a bie ka goa-n wa, Zeraa a nɛgiĩ Aakan bɛ́ á ǹ goa, Dɛnaa Lawa foo bie á busu Izirayeli zaman lɛ tumaa li á dɔlɔ da ǹ mìi-n wa? Ka bɛ dɔ nɛ, a dinsɔɔ̃ bie á gã a sii baraa kɛ lɛ a zɛnaa taman yii wa.»

²¹Urubɛn tɔrɔn laanka Gaadi tɔrɔn nɛ, ka Manaasee tɔrɔn kɛn talɛɛ nɛ, bɛn nə́ Izirayeli tɔrɔn lɛn tumaa a tanlɛ minin kiãn lɛ si, ǹ nə́ pɛ ǹ nɛ:

²²— Dɛnaa Lawa n lawan Lawa lɛa. Wɔsɛn nə sii mɛn zɛnaa ke, màn mɛn nə wɔsɛn da a ganaa, Dɛnaa Lawa, lawan Lawa lɛ á doɛ̃. Izirayeli minin lɛn tumaa dɔ á re doɛ̃. Bɛ̀ á daa yaa sonbore wɔsɛn nə́ n piã ka Dɛnaa Lawa nɛ, wɔ sii babaraa la la, a nyan toa pelo a lɛawaa kɛ kiɛ̃ wɔsɛn la wa.

²³Bɛ̀ wɔsɛn man wɔ́ wɔ dinin wúlu bɔ ǹ bǎã dɔ, wɔ́ n die n niɛ n boe Dɛnaa Lawa ganaa, bɛ̀ wɔ wúlu mànan tã bɛ la, wɔ Lawa gɔ ǹ mànan kakaa la, bɛ̀ wɔ barka da Lawa nɛ ǹ wúlu bɔbɔ la, Dɛnaa Lawa die a bɛa nɔ̀n da wɔsɛn la.

²⁴Sɛnɛ, a bie miɛ̃ wa. Bɛ̀ ń yaa wɔsɛn nə́ kɛ zɛnaa, nyɛ́ɛ na á wɔ kaa a ganaa. A giala, wɔ n taasɛ, wáa kɔntan, kaa nɛnyaanan tá re pii wɔsɛn wɔn manɛ ǹ kɔn pinaa kɛnɛn: «Ka dɔn wàa n kun ka Dɛnaa Lawa, Izirayeli minin Lawa nɛ?

²⁵Kasɛn Urubɛn tɔrɔn laanka Gaadi tɔrɔn kɛn lɛn, Dɛnaa Lawa gèlè da wɔ laanka kasɛn bii. Bɛ n ka Zurdɛ̃ tà kɛ nɛ. Kaa wɔ gii ba Dɛnaa Lawa a sii kɔn nɛ wa.» Bɛ̀ á n baa miɛ̃, ka dinin nɛnyaanan lɛn man die wɔsɛn wɔn lɛn kurii Dɛnaa Lawa guguru kɔ ganaa.

²⁶Bɛ lɛ na á toa wɔsɛn nə́ pɛ kɔn nɛ, wáa yǎa wɔsɛn nə wúlu bɔ ǹ bǎã doe. Wɔ bie re *wúlu màn tiɛ̃ la wa, wɔ bie re wúlu boe la wa.

²⁷Sɛnɛ, wɔ n wɔ́ dɔ siére lɛa, a n wɔ laanka kasɛn bii, wɔsɛn tɔrɔn bii, nyɛɛ mà Dɛnaa Lawa din a dí ni wɔsɛn dɔn nə́ nyɛɛ, ka wɔa wúlu màn tiɛ̃n nɛ, ka wɔa barka da ǹ wúlu mànan nɛ, ka wúlu màn tɔrɔ kɔsɔn dɔn nɛ. Wɔ n wɔ́ zɛnaa miɛ̃, màn mɛn bɛ́ toɛ, kaa nɛnyaanan baran pɛ wɔsɛn wɔn man biɛ̃ mà ǹ wɔ gii ba Dɛnaa Lawa a sii kɔn nɛ wa.

²⁸Wɔ n wɔ́ pɛ, bɛ̀ ka lɛ dɔ bɛa boo lɛ ganaa ǹ mɛn pinaa, ká pɛ wɔ laanka wɔa nɛnyaanan manɛ, wɔ á re pii ka-n kɛnɛn: «Ka ga, wɔsɛn digolon man nə́ wúlu bɔ ǹ bǎã kɛ dɔ ka Dɛnaa Lawa din wɔ kɛ bɛ́ lɔn. Wúlu màn tiɛ̃ hinlaa wulu màn kɔsɔn lɛa bie wa. Sɛnɛ, a n wɔ bii siére lɛa.»

²⁹Wɔ bie wɔ́ wúlu bɔ ǹ bǎã kɛ dɔ wúlu màn tiɛ̃ a lɛa wa. Wɔ bie re Lawa gɔ ǹ wúlu laanka wúlu tɔrɔ kɔsɔn boe la wa. Wɔ bie wɔ́ dɔ wɔ́ n die n piɛ̃ ka Dɛnaa Lawa nɛ, wɔ n wusii n boe a kio wa. Bɛa taasiɛ ba wɔsɛn yiri-n duduu wa. Bɛ̀ á n bɔ Dɛnaa Lawa din a wúlu bɔ ǹ bǎã kɛ nɛ a giã ǹ bǎã sonbore kɛ yɔrɔ-a, wɔsɛn ba li wɔ wúlu bɔ bǎã kɔsɔ-n wa.

³⁰Zaman lɛ a nyɛɛnaandɛnan nɛ, Izirayeli tɔrɔn lɛn tumaa a tanlɛ minin kiãn nɛ, bɛn nə́ goã kun ka Lawa a wúlu-bɔle Pineyasi ni. Pineyasi laanka bɛn bɛ́ ǹ nə́ Urubɛn tɔrɔn lɛ ma bɛa boon lɛn diɛ kun ka Gaadi tɔrɔn laanka Manaasee tɔrɔn nɛ, á kaa ǹ foo la.

³¹Lawa a wúlu-bɔle Eleyazaara a nɛgiĩ Pineyasi tɔ́n pɛ ǹ nɛ: «Wɔ dɔ̃ pelo, wɔ́ Dɛnaa Lawa tá kun ka wɔ nɛ. Wɔsɛn dɔn nə goã nyɛ́ɛ biɛ sii babaraa mɛn nɛ, ka bɛ la Dɛnaa Lawa la wa. A zɛnaa kɛnɛn ke, ka n ka Izirayeli minin tumaa kanbaa Dɛnaa Lawa a dɔlɔ ganaa.»

³²Lawa a wúlu-bɔle Eleyazaara a nɛgiĩ Pineyasi laanka nyɛɛnaandɛnan lɛn nə́ zii nyankɔ Urubɛn tɔrɔn laanka Gaadi tɔrɔn lɛn la Galaati gána nɛ, ǹ nə́ wusoo ǹ nə́ daa Izirayeli minin lɛn li Kanaan gána nɛ, ǹ nə́ boo lɛ yɔrɔ pɛ ǹ nɛ.

³³Bɛ́ kaa Izirayeli minin lɛn foo la, ǹ nə́ barka da Lawa nɛ. Ǹ goã taasiɛ mɛn we, mà ǹsɛn man die woe Urubɛn tɔrɔn lɛn laanka Gaadi tɔrɔn lɛn gialaa ka zia nɛ, ǹ nə ǹ gána yu, ǹ nə́ bɛa taasiɛ lɛ lɛ da.

³⁴Bɛ lɛ na á toa, Urubɛn tɔrɔn laanka Gaadi tɔrɔn lɛn nə́ tɔ́n bɛa wúlu bɔ ǹ bǎã lɛ bii mà «siére.» A n nyɛɛ mà Dɛnaa Lawa din nə Lawa taãn lɛa.