Read Samo, Southern Zoz 23 Bible Online

Zoz 23 - Samo, Southern bible

Zoz 23

¹A kũ biikoo sɔsɔɔ ganaa, Izirayeli minin lɛn zɔ́ɔn mɛnɛn tumaa goã ǹ lɛnpɛnɛ, Dɛnaa Lawa nə́ ǹ si bɛn la, á là nyantoro kɔ ǹ la. Bɛ́ daa yaa bɛ̀ Zozoe zizi kɔ taãn-taãnɛ. Bɛ lɛ kio ne,

²á Izirayeli minin lɛn tumaa bíi ǹ kɔn pinaa, ǹ min golen ne, ǹ nyɛɛnaandɛnan nɛ, ǹ sii yɔrɔ-bɔlen laanka ǹ landa sii-daraalin ni, á pɛ ǹ nɛ: «Á ke, má zizi kɔ taãn-taãnɛ.

³Dɛnaa Lawa lɛ, kaa Lawa lɛa, bɛ sii mɛn tumaa zɛnaa tɔrɔn kɔsɔn kɛn lɛn nɛ kaa lɛa, ka dininmaan bɛ́ ka a tumaa yɛ. A giala, Dɛnaa Lawa lɛ, kaa Lawa lɛa, a din na á yɔ bɔ kaa lɛa.

⁴Ka ga: tɔrɔn mɛnɛn bɛ́ tɔn nə ǹ bǎã nɛ, ma ǹ mɛnɛn dɔn dɛ má ǹ nya, a saa Zurdɛ̃ tà kɛ ganaa lɛ̀giala-n a wo kaa kɔ̀ gole kɛ lɛ lɛ̀nyɛɛnɛ, pã na á n wɔ bɛa tɔrɔn kɛn lɛn bǎãn ganaa, má ǹ gii Izirayeli tɔrɔn lɛn lɛ yii li, má kɔ ǹ la.

⁵Dɛnaa Lawa lɛ, kaa Lawa lɛa, a din tá re ǹ lui, a ǹ bɔ ka nyɛɛnɛ, a din tá re baa diɛ ǹ gòã li, ka tá re ǹ gána sii ka n kɔ lɛ, ka kaa Lawa, Dɛnaa Lawa bɛ́ á goã á pɛ ka-n lɔn.

⁶Sɛnɛ, ka n gù we yii taãn-taãnɛ, màn mɛn tumaa bɛ́ kiɛ̃-n Muizu a landa sɛ́wɔ kɛ nɛ, ka n doa ka kɔ bɛ lɛ. Ka nyan kanaa ka wo gusin wa, ka nyan kanaa ka wo gɔsɛ wa.

⁷Tɔrɔn mɛnɛn bɛ́ tɔn giã nɛ ka li ke, ka nyan toa ka n lɔlɔkɔn ka bɛn nɛ wa. Ka nyan toa ka bɛn dìn kɛn tɔ bíi wa, ka baran n liɛ ka ǹ tɔ-n wa, ka baran kaa tán ǹ giulun ka ǹ gugurukɔ wa.

⁸Sɛnɛ, Dɛnaa Lawa lɛ, kaa Lawa lɛa, ka n doa kɔn ka bɛ lɛ nɛ, ka ka bɛ́ ka zɛnaa lɔn, yǎa á daa kaa pelo lɛ.

⁹A giala, tɔrɔn mɛnɛn bɛ́ gigiã, pàã dɔ nə́ ǹ lon, a din na á bɛn loo, á ǹ bɔ ka nyɛɛnɛ. Min kɔn bin tɔn boo la á golee ka nyɛɛn wa, yǎa á daa kaa pelo lɛ.

¹⁰ Kaa min goon na á goã baa diɛ kaa zɔ́ɔn lɛn min duu goon gòã li. A giala, Dɛnaa Lawa lɛ, kaa Lawa lɛa, bɛ na á goã zia diɛ kaa lɛa, ka a bɛ́ á pɛ ka-n lɔn.

¹¹Bɛ lɛ nɛ, ka n yiri koa ka dinin li taãn-taãnɛ, ka kaa Lawa, Dɛnaa Lawa lɛ narɛ.

¹²Sɛnɛ, bɛ̀ ka wusoo ka ka kio ne, ká woo n paraa tɔrɔ kɔsɔn kɛn ganaa, giã nɛ ka bii, bɛ̀ ka kɔn wɔ ma ka ǹ minin ni, bɛ̀ ka n lɔlɔkɔn-a ǹ nɛ,

¹³ka dɔ̃ taãn-taãnɛ, mà Dɛnaa Lawa lɛ, kaa Lawa lɛa, a re tɔrɔ kɔsɔn kɛn lui bɛ̀ a ǹ bɔ ka nyɛɛn doo wa. Bɛn lɛn man die biɛ laanka kan biɛ ka ganaa, ǹ ka kaa sii ni. Bɛn lɛn man die fuu nyɛɛ ka nɛ, ka sɛ̌n bɛ́ lɔn ǹ nə́ ka duwii ni, ǹ ka là da paparɛɛ ganaa, ka nyɛn nə ka yii ni, yǎa ka papaɛ̃ ka n boe bǎã sonbore kɛ nɛ, ǹ mɛn lɛ á ke kaa Lawa, Dɛnaa Lawa kɔ ka la.

¹⁴Masɛ mɛn nə́ ke, sisia bɛ̀ máa min tumaa a woo ǹ bǎã kɛa zii siɛ. Sɛnɛ, kasɛn kɛn nə dɔ̃ taãn-taãnɛ, ka ka foo tumaa nɛ, mà Dɛnaa Lawa lɛ, kaa Lawa lɛa, bɛ boon mɛnɛn tumaa da kaa wɔ paǹ li, ǹ kɔn goã kooro wa. A ná a tumaa a sii zɛnaa ka nɛ. Bɛa boon lɛn kɔn goã kooro wa.

¹⁵Dɛnaa Lawa lɛ, kaa Lawa lɛa, a goã á boo kɔɔ̃n mɛn tumaa da ka nɛ, a bɛ tumaa a sii zɛnaa ka-n lɔn ke, a boo baraa mɛn tumaa dɔ da kaa wɔ paǹ li, á die bɛ dɔ a sii zɛnɛɛ. Kaa Lawa, Dɛnaa Lawa lɛ n die goɛ̃ bɛa zɛnaa la miɛ̃, yǎa a ka dii a ka boe bǎã sonbore kɛ nɛ, a din bǎã mɛn lɛ kɔ ka la.

¹⁶Dɛnaa Lawa lɛ, kaa Lawa lɛa, bɛ lɛ kɔ kɔn la boo mɛn da ka nɛ, bɛ̀ ka bɛ toa walan, ka kiɛ̃ ka woo kaa tán dìn giulun ka bɛn guguru kɔ, Dɛnaa Lawa foo á re yui ka li. A gána sonbore mɛn lɛ kɔ ka la, á re ka dii bǎã goon a ka bɔ a nɛ.»