Read Samo, Southern Zoz 24 Bible Online

Zoz 24 - Samo, Southern bible

Zoz 24

¹Ǹ kɔn pinaa, Zozoe Izirayeli minin lɛn tumaa lɛ sɔkɔn Sisɛmu. Á lɛ dia ǹ min golen la, ǹ nyɛɛnaandɛnan nɛ, ǹ sii yɔrɔ-bɔlen ne ka ǹ landa sii-daraalin ni. Ǹ nə́ daa golee Lawa yɔrɔ-a.

² Zozoe tɔ́n pɛ ǹ nɛ: — Dɛnaa Lawa, Izirayeli minin Lawa lɛ mà ma pɛ ka nɛ kɛnɛn: «Lɛlɛ, ka digolon lɛn, Teraa laanka a nɛgiĩ Abrahamu ni ka Nakɔɔrɔ nɛ, bɛn man nə́ goã giã-n Efrati tà kio, ǹ nə́ goã dìn guguru koe walan.

³ Ma din ni má ka digolo Abrahamu bɔ tà lɛ kio má soo ne. Ma din ni má mɛ a nyɛɛnɛ má n bibiə̃ ne Kanaan gána tumaa nɛ, má a tɔrɔn mɔnaa: Ma din ni má Izaaki kɔ la,

⁴ ma tɔ́n Zakɔba laanka Ezawu kɔ Izaaki la. Ma din ni má Seyiiri a kele yii kɛ kɔ Ezawu la má a giã a nɛ. Zakɔba laanka a nɛnyaanan sɛn nə́ woo Ezipti gána nɛ.

⁵ Bɛ kio, má tɔ́n Muizu laanka Aarɔn dia. Má sii gigiã zɛnaa má nɔmaa da Ezipti gána mìi ni, má tɔn ka waa má soo ka nɛ.

⁶Ma din má ka digolon lɛn waa má soo ǹ ne, yǎa ǹ nə́ dɔ Sawɛɛ tà lɛ-a. Ezipti minin lɛn dɔn man nə́ ka digolon lɛn kio loo miɛ̃, ka wotoron laanka sùin ni, yǎa Sawɛɛ tà lɛ-a.

⁷Ka digolon lɛn nə́ n lɛ dɛ masɛ Dɛnaa Lawa ganaa, ma tɔ́n labara tì da ǹ laanka Ezipti minin lɛn bii, má kɔ̀ mu nyɛnaa má kɔ Ezipti minin lɛ. Ma sii mɛn zɛnaa Ezipti minin manɛ, ka yii bɛ́ á yɛ. Bɛ kio, ka dɔn nə́ giã don, ka belebɔ walan.

⁸ Bɛ kio, má daa ka nɛ Amɔɔrɔ tɔrɔn gána nɛ, ǹ mɛnɛn lɛn bɛ́ giã-n Zurdɛ̃ tà kio, lɛ̀giala-n. Amɔɔrɔ tɔrɔn lɛn nə́ zia baa ka ganaa. Sɛnɛ, ma din ni má Amɔɔrɔ tɔrɔn lɛn wɔ ka gɔn, ka tɔ́n boo ǹ la, ká ǹ gána si. Ma din ni má ǹ dɛ, má ǹ bɔ ka nyɛɛnɛ.

⁹ Moabun kii Sipɔɔrɔ a nɛgiĩ Balaaki dɔ́ yoo, mà a n zia biɛ Izirayeli minin lɛn ganaa. Á minin dia dinin, mà ǹ wo lɛ dia Bewɔɔrɔ a nɛgiĩ Balaamu la, mà a da lɛn baraa bíi ka li.

¹⁰Sɛnɛ, masɛ din ni má n piã, man too kɔ Balaamu lon wa. Má bɛ da lɛn bǐɛ̃ bíi ka li ganaa, má ka kũ má ka si Balaaki la.

¹¹Ka Zurdɛ̃ tà kuru, ka daa ka dɔ Zerikoo. Zerikoo kiwi minin nə́ zia baa ka ganaa, Amɔɔrɔ tɔrɔn nɛ, Perɛzi tɔrɔn nɛ, Kanaan minin ni, Ɛti tɔrɔn nɛ, Girgazi tɔrɔn nɛ, Evii tɔrɔn nɛ ka Zebuzu tɔrɔn nɛ. Sɛnɛ, má ǹ wɔ Izirayeli minin lɛn gɔn.

¹²Má yirigisiĩn dia ka nyɛɛnɛ, bɛn nə́ kaa zɔ́ɔn lɛn loo ǹ nə́ ǹ bɔ ka nyɛɛnɛ, ka a bɛ́ á n zɛnaa Amɔɔrɔ kii min paa kɛ-n lɔn. Ka bie ka bɛ zɛnaa ka kaa gɔya san nɛ wa, ka bie ka zɛnaa ka kaa san nɛ wa.

¹³ Ka bɛ́ ka dí nya gána mɛn nɛ ka nɔmaa wa, ma din ni má bɛ kɔ ka la. Ka bɛ́ giã-n kiwin mɛnɛn nɛ, ka dinin bie ka ǹ dɔ wa, ma din ni má ǹ kɔ ka la. Ka bɛ́ *rezɛ̃ da laanka *olivie dan mɛnɛn nɛ bii, ka dinin bie ka ǹ zumu wa, masɛ din ni má ǹ kɔ ka la.»

¹⁴Zozoe tɔ́n pɛ Izirayeli minin lɛn manɛ kɛnɛn: «A bɛ́ miɛ̃, ka nyɛ́ɛ baa Dɛnaa Lawa nɛ, ka dí nya nɛ ka ka foo tumaa nɛ, ka bɔlɔgoondɛnaabaa nɛ. Ka digolon bɛ́ ǹ nə́ goã dìn mɛnɛn guguru koe Efrati tà kio, hinlaa Ezipti gána nɛ, ka bɛn goa ka ǹ bɔ ka li, ka dí nya Dɛnaa Lawa nɛ.

¹⁵Sɛnɛ, bɛ̀ dí nya Dɛnaa Lawa nɛ lɛ a siĩni ka yii li wa, ka dinin bɛ́ li ka dí nya min mɛn nɛ, ka bɛ bɔ pelo. Ka digolon nə lawa kɔsɔn mɛnɛn guguru kɔ bɛ̀ ǹ bɛ́ tɔn giã-n Efrati tà kio, hinlaa ǹ bɛ́ giã-n Amɔɔrɔ tɔrɔn mɛnɛn gána nɛ, bɛn dìn kɛn. Masɛ laanka maa kion minin ni sɛn, wɔsɛn man die dí nyɛɛ Dɛnaa Lawa nɛ.»

¹⁶Zaman lɛ tɔ́n Zozoe lɛ si á pɛ: «Wɔsɛn nə Dɛnaa Lawa toa walan mà wɔ n dí nyɛɛ dìn manɛ, Lawa die a wɔ kanbaa bɛ ganaa!

¹⁷A giala, Dɛnaa Lawa din nə wɔsɛn Lawa lɛa. A din na á wɔsɛn laanka wɔ digolon waa Ezipti, á wɔ bɔ Ezipti gána a bɛ̀rɛbaa nɛ. A din lɛ na á kaãbaa ǹ sii dadaran kɛn zɛnaa wɔsɛn yii ni: Wɔsɛn nə zii tɔ mɛn tumaa wɔ, wɔsɛn nə bɔ tɔrɔ kɔsɔn mɛnɛn tumaa bii wɔ́ kiɛ̃, Dɛnaa Lawa din na á wɔ tamaa bɛ tumaa gɔ́ɔ̃ nɛ.

¹⁸Dɛnaa Lawa din na á bɛa tɔrɔn kɛn lɛn tumaa loo á ǹ bɔ wɔ nyɛɛnɛ, ka Amɔɔrɔ tɔrɔn kɛn dɔn dinin ni giã-n gána lɛ nɛ. Bɛ lɛ n ke, wɔ dɔn man die dí nyɛɛ Dɛnaa Lawa nɛ, a giala, a din nə wɔsɛn Lawa lɛa.»

¹⁹Zozoe tɔ́n pɛ zaman lɛ nɛ: «Ka nyan toa ka taasɛ mà dí nya Dɛnaa Lawa nɛ n sii nanaa lɛa wa. A giala, a n Lawa *yoreen lɛa, Lawa mɛn bɛ́ a ba li ka kɔsɔ ti asɛ ganaa wa. Kaa piãn sii kɛn laanka kaa sii baraan kɛn nɛ, a die bɛn toɛ ka nɛ wa.

²⁰A giala, bɛ̀ ka Dɛnaa Lawa toa walan, ká tɔrɔ kɔsɔn dìn guguru kɔ, a laanɛ á bǐɛ̃ zɛnaa ka nɛ, a n die n bɔyɛɛ ka li bɛ kio, a baraa zɛnaa ka nɛ, a ka dɛ a ka nya.»

²¹Zaman lɛ wusoo á pɛ Zozoe ne: «N bɛ́ màn mɛn pii, taãn nɛ. Sɛnɛ, wɔsɛn man die dí nyɛɛ Dɛnaa Lawa nɛ.»

²²Zozoe tɔ́n pɛ ǹ nɛ: «Táa ka dinin lɛ na á pɛ, mà kasɛn nə́ Dɛnaa Lawa bɔ, ka n die dí nyɛɛ nɛ?» Ǹ nə́ Zozoe lɛ si: «Wɔsɛn dinin lɛ na á pɛ.»

²³Zozoe tɔ́n pɛ: «A bɛ́ miɛ̃, tɔrɔ kɔsɔn dìn kɛn, ka bɛn goa ka ǹ bɔ ka dinin li, ka kaa taasiɛ doa Dɛnaa Lawa, Izirayeli minin Lawa ganaa.»

²⁴Zaman lɛ wusoo á pɛ Zozoe ne: «Wɔsɛn man die dí nyɛɛ wɔa Lawa, Dɛnaa Lawa lɛ nɛ, wɔ n die n too koe a din lɛ lon.»

²⁵Zozoe lɛ kɔ kɔn la wɔ ka zaman lɛ nɛ bɛa pinaa kɛ lɛ nɛ. Á sii zɛnaa ǹ gɔnɔn laanka landan koa ǹ la Sisɛmu kiwi.

²⁶Zozoe bɛa boon lɛn kiɛ̃ Lawa a dí-pɛn sɛ́wɔ kɛ nɛ. Bɛ kio, á kɔlɔ gole saa á doa tán da sasa kɛ giulun, bǎã kɛ nɛ, ǹ nə́ bɔ ǹ nə́ koa Dɛnaa Lawa wɔ lɛa.

²⁷Zozoe tɔ́n pɛ zaman lɛ tumaa-n kɛnɛn: «Á ke, kɔlɔ kɛ n die goɛ̃ siére lɛa wɔsɛn yɔrɔ-a, a giala, Dɛnaa Lawa boo mɛn tumaa da wɔ nɛ, a ná a tumaa ma. A n die goɛ̃ siére lɛa ka yɔrɔ-a, màn mɛn bɛ́ toɛ, ka baran n piã ka Lawa-n wa.»

²⁸Bɛ kio, Zozoe nə́ n gɔn bɔ zaman lɛ ganaa. Didie wusoo á woo a bǎã nɛ.

²⁹ Bɛa siin lɛn kio, Dɛnaa Lawa a dí-nyali, Nunu a nɛgiĩ Zozoe gã. Bɛ á zɛnɛɛ bɛ̀ a lɛ̀ paabiɛ ka fù ni.

³⁰Bǎã mɛn dɔ a ganaa kíɛ̃ lɛa, ǹ ná a gere bĩ walan, Timinaati-Seraa kiwi, Efrayimu a kele yii bǎã kɛ nɛ, Gaasi kele a gɔsɛ a lɛ̀gɔn la.

³¹A Zozoe yii toa koo, Izirayeli minin lɛn nə́ dí nya Dɛnaa Lawa nɛ. Min golen mɛnɛn nə goã a kio, bɛn nə́ Dɛnaa Lawa a nya ǹ dín lɛn tumaa yɛ Izirayeli minin wɔ paǹ li. A bɛn dɔn yii toa koo, Izirayeli minin lɛn nə́ dí nya Dɛnaa Lawa nɛ.

³² Izirayeli minin lɛn nə bɔ ka Zozɛfu wen mɛnɛn nɛ Ezipti gána nɛ, ǹ nə́ bɛn dɔn bĩ Sisɛmu. Ǹ nə ǹ bĩ bǎã mɛn nɛ, Zakɔba na á goã á bɛa bǎã lɛ pii Sisɛmu kiwi lɛ a koa wole Hamɔɔrɔ tɔrɔn lon, wɔrɔ we paabiɛ. Bɛ na á Zozɛfu tɔrɔn lɛn kíɛ̃ baa.

³³Aarɔn a nɛgiĩ Eleyazaara dɔ́ gã. Kele bǎã mɛn dɔ a nɛgiĩ Pinaasi ganaa, ǹ ná a gere bĩ walan. Maǹ nə́ goã ǹ nə́ bɛa bǎã lɛ kɔ la Efrayimu kele yii ni.