Read Samo, Southern Zoz 6 Bible Online

Zoz 6 - Samo, Southern bible

Zoz 6

¹Zerikoo kiwi a kiɛnlɛn man nə́ goã tiɛ̃ nɛ mɛrɛmɛrɛ Izirayeli minin lɛn nyɛɛnɛ. Min goã boe la á soe wa, min dɔ goã boe la á we wa.

²Dɛnaa Lawa tɔ́n pɛ Zozoe ne: «Ga, má Zerikoo kiwi lɛ wɔ n gɔn, a kii kɛ nɛ, ká a zia-baali foo tãnaan kɛn nɛ.

³Ka mɛnɛn tumaa bɛ́ zia-baalin lɛa, ka die ka kiwi lɛ lɛnpɛnɛ gunyin goon baraabaraa. Ka die ka zɛnaa miɛ̃ lɛawaa sɔrɔ gɔ́ɔ̃ nɛ.

⁴Lawa a wúlu-bɔle sɔbaa die a mɛ goo lɛ nyɛɛnɛ, ka bɛn sɔbaa kɛ nɛ. A lɛawaa sɔbaabaa ǹ wɔ pinaa, ka die ka kiwi lɛ lɛnpɛnɛ gunyin sɔbaa, bɛ̀ wúlu-bɔlen lɛn sɛn tá bɛa bɛnɛn lɛn pii.

⁵Bɛ̀ ǹ nə́ bɛn pɛ kɔsɛkɔsɛ, yǎa ka a wuu ma lɔn gɔrɔ, zaman lɛ tumaa nə n lɛ dɛ kɔsɛkɔsɛ. Kiwi lɛ a kungɔn tá re kiɛ a din li. Bɛa biikoo li, zaman lɛ a min gogoonmaa wo a din nyɛɛn perepere.»

⁶Nunu a nɛgiĩ Zozoe tɔ́n Lawa a wúlu-bɔlen lɛn bii á pɛ ǹ nɛ: «Ka *lɛ kɔ kɔn la ǹ goo lɛ saa. Wúlu-bɔle sɔbaa dɔ bɛn sɔbaa goa, ǹ kiɛ̃ ǹ mɛ Dɛnaa Lawa a goo lɛ nyɛɛnɛ.»

⁷Á tɔ́n pɛ zaman lɛ nɛ: «Ka kiɛ̃ ka kiwi lɛ lɛnpɛnɛ. Sɛnɛ, zia-baalin kɛn sɛn nə kiɛ̃ ǹ mɛ Dɛnaa Lawa a goo lɛ nyɛɛnɛ.»

⁸Zozoe pɛ zaman lɛ-n lɔn, a na á n zɛnaa miɛ̃: wúlu-bɔle sɔbaa mɛn goã bɛn sɔbaa lɛ guĩ Dɛnaa Lawa nyɛɛnɛ, bɛn nə́ n toa woe, bɛ̀ ǹ tá bɛn pii. Dɛnaa Lawa a lɛ kɔ kɔn la ǹ goo lɛ na á goã koe ǹ lɛ.

⁹Wúlu-bɔlen mɛnɛn nə goã bɛn pii, zia-baalin lɛn man nə́ goã tɔ we bɛn nyɛɛnɛ. Zia-baalin mɛnɛn nə goã kio, bɛn man nə́ goã koe goo lɛ kio lɛ. Maǹ nə́ goã n toɛ woe, bɛ̀ ǹ tá bɛn pii.

¹⁰Sɛnɛ, Zozoe na á goã á n gɔn waa zaman lɛ nɛ, á pɛ ǹ nɛ mà ǹ nyan toa ǹ nə n lɛ dɛ wa, ǹ nyan toa min nə ǹ lɛ ma wa, ǹ nyan toa boo kɔn soo ǹ lɛ-n wa, yǎa asɛ din bɛ́ re pii ǹ ni ǹ mɛn pinaa mà ǹ nə n lɛ dɛ. Bɛa biikoo li, ǹ tɔn nə n lɛ dɛ.

¹¹Zozoe nə́ ǹ da kiwi lɛ lɛnpɛnɛɛ ganaa gunyin goon ka Dɛnaa Lawa a goo lɛ nɛ. Bɛ kio, zaman lɛ nə́ n bɔyaa á woo a giã ǹ bǎã nɛ, ǹ nə́ waa walan.

¹²Zozoe yoo baayɛlɛ yiisoone, wúlu-bɔlen lɛn dɔn nə́ Dɛnaa Lawa a goo lɛ saa.

¹³Wúlu-bɔle sɔbaa mɛn goã bɛn sɔbaa lɛ guĩ Dɛnaa Lawa a goo lɛ nyɛɛnɛ, ǹ bɛ́ ǹ nə́ zii saa ǹ nə́ woe, bɛn man nə́ goã bɛn pii. Zia-baalin man nə́ goã tɔ we ǹ nyɛɛnɛ, gialakunun man nə́ goã koe Dɛnaa Lawa a goo lɛ kio lɛ. Maǹ nə́ goã n toɛ woe, bɛ̀ ǹ tá bɛn pii.

¹⁴A lɛawaa paabaa ǹ wɔ pinaa, ǹ nə́ kiwi lɛ lɛnpɛnɛ gunyin goon doo. Bɛ kio, ǹ nə́ n bɔyaa ǹ nə́ woo ǹ giã ǹ bǎã nɛ. Ǹ nə́ zɛnaa miɛ̃ lɛawaa sɔrɔ gɔ́ɔ̃ nɛ.

¹⁵A lɛawaa sɔbaabaa ǹ wɔ pinaa, ǹ nə́ yoo baayɛlɛ yiisoone, bɛ̀ wɔlɔ á ke die fúli, ǹ nə́ kiwi lɛ lɛnpɛnɛ gunyin sɔbaa, á kɔnpɛ ka a zɛnaa ǹ gɔn nɛ. Bɛa pinaa kɛ lɛ dinsɔɔ̃ nɛ, ǹ nə́ kiwi lɛ lɛnpɛnɛ gunyin sɔbaa.

¹⁶A gunyin sɔbaabaa ǹ wɔ li kəni, wúlu-bɔlen lɛn nə́ bɛn pɛ. Zozoe tɔ́n pɛ zaman lɛ nɛ mà ǹ nə n lɛ dɛ, a giala, mà Dɛnaa Lawa kiwi lɛ kɔ ǹ la.

¹⁷Kiwi lɛ laanka màn mɛn tumaa bɛ́ a nɛ, Dɛnaa Lawa wɔ nɛ. Ka die ka bɛ tumaa ziziɛ̃ lenlen. Sɛnɛ, Rahabu kɛ lɛ lɔ kɔrɔ lɛa, ka die ka bɛ dinsɔɔ̃ yii toa koo, a din laanka min mɛn tumaa bɛ́ re goɛ̃ kion kun ni. A giala, á wɔa dia dí-a wolen duru.

¹⁸Sɛnɛ, kasɛn kɛn nə n dinin kũ. Ka doamaa bɛ́ nɛ ka mànan mɛnɛn ziziɛ̃ lenlen, ka nyan toa ka yii bɔ bɛ kɔn li ka saa wa. Bɛ̀ ká bɛ mɛn saa, ka n ka koe bɔ Izirayeli zaman ganaa, ka sii dɛ ka kaa ǹ ganaa.

¹⁹Wɔrɔ din tumaa ka sana nɛ, zan mànan kɛn tumaa ka fɔlɔ wɔn nɛ, ka die ka bɛn tumaa kaa ǹ gɔrɔn, Dɛnaa Lawa wɔn lɛa, ka ǹ kaa Dɛnaa Lawa gɔn màn tamaa ǹ bǎã kɛ nɛ.

²⁰ Bɛ kio, ǹ nə́ bɛn pɛ. Zaman lɛ din bɛ wuu ma lɔn, ǹ nə́ kaa lɛ-dɛ-n kɔsɛkɔsɛ, kiwi lɛ a kungɔn na, á kaa a din li. Zaman lɛ yiɛ á tele kiwi lɛ ganaa. Didie woo a din nyɛɛn perepere, ǹ nə́ kiwi lɛ si ǹ nə́ n kɔ lɛ.

²¹Màn mɛn tumaa goã kiwi lɛ nɛ, ǹ ná a tumaa ziziɛ̃ lenlen: A saa giĩn ganaa a wo lɔn yaa, a saa tɔntɔraan ganaa a wo min golen yaa, diin dɔn dinin ni, ka sèren laanka dundunun ni, ǹ ná a tumaa dɛ.

²²Giĩ min paa mɛn goã ǹ nə́ woo ga gána lɛ ganaa ka durii ni, Zozoe goã á pɛ bɛn manɛ mà ǹ wɔ lɔ kɔrɔ kɛ lɛ a kion, ǹ lɔ lɛ bɔ ǹ soo ne, kun ka min mɛn tumaa bɛ́ a wɔ lɛa, ka ǹ bɛ́ ǹ nə́ goã ǹ nə́ n liɛ nɛ lɔn.

²³Tɔntɔraan mɛnɛn nə goã ǹ nə́ woo ga gána lɛ ganaa ka durii ni, bɛn nə́ wɔ kion lɛ nɛ, ǹ nə́ Rahabu bɔ ǹ nə́ soo ne, ǹ di ni, ǹ dan nɛ, ǹ dɔɔ̃nɔn nɛ ka màn mɛn tumaa bɛ́ á goã a wɔ lɛa. Ǹ ná a tanlɛ minin tumaa waa ǹ nə́ soo ǹ ne, ǹ nə́ woo giã ǹ bǎã kɔ ǹ la Izirayeli minin giã ǹ bǎã lɛ kio.

²⁴Sɛnɛ, kiwi lɛ sɛ, ǹ nə́ bɛ tã kun ka a gɔ́ɔ̃gɔ́ɔ̃ ǹ màn tumaa nɛ, yǎa wɔrɔ kɛ laanka sana ke, ka zan mànan kɛn laanka fɔlɔ wɔn nɛ. Maǹ nə́ bɛn kaa kun ka Dɛnaa Lawa a kion mànan nɛ.

²⁵ Rahabu lɔ kɔrɔ kɛ lɛ, Zozoe bɛ yii toa koo, ǹ di kion minin ni, ka min mɛn tumaa goã a wɔ lɛa. A na á giã Izirayeli minin lɛn bii, yǎa á daa kaa pelo kɛ lɛ. A giala, Zozoe goã á minin mɛnɛn dia mà ǹ wo ga gána lɛ ganaa ka durii ni, a na á goã á bɛn lɛn duru.

²⁶ Bɛa waáraa kɛ lɛ nɛ, Zozoe nə́ n liɛ á pɛ: «Min mɛn bɛ́ re yui kɛ kio mà a n kiwi kɛ doe, Zerikoo kiwi lɛ, Dɛnaa Lawa die a bɔ̀n da bɛa dɛnaa ganaa. Min mɛn bɛ́ re a gòã kiɛ tán ǹ mɛn pinaa, a nɛgiĩ bibinaa gã. A bɛ́ re goo we lɛ ǹ mɛn pinaa, a nɛgiĩ gɔn nyɔmiɛ̃ gã.»

²⁷Dɛnaa Lawa goã kun ka Zozoe ne. Zozoe tɔ bɔ gána lɛ paǹ tumaa nɛ.