Read Samo, Southern Zoz 7 Bible Online

Zoz 7 - Samo, Southern bible

Zoz 7

¹Sɛnɛ, Izirayeli minin lɛn nə́ Lawa bɔlɔ tii. Dɛnaa Lawa bɛ́ á n gɔn waa ǹ nɛ, mà ǹ baran màn kɔn saa Zerikoo kiwi lɛ a yui pinaa wa, min yɛ ǹ bii á màn saa. Zudaa tɔrɔn kɛn min goon ne. A tɔ n Aakan, ǹ di tɔ n Karmii. Karmii lɛ n Zabdii a nɛgiĩ lɛa, Zabdii dɔ n Zeeraa a nɛgiĩ lɛa. Bɛa sii lɛ na á toa Dɛnaa Lawa foo yoo Izirayeli minin lɛn li parsiini.

²Bɛ lɛ kio-n kəni, Zozoe nə́ n toa Zerikoo kiwi, á minin dia Ayii kiwi kɛ nɛ kunu Bɛti-Avɛn li, Betɛli a lɛ̀giala gɔn la. Á pɛ ǹ nɛ mà ǹ woo ǹ nə n bibiə̃, ǹ ga gána lɛ ganaa. Bɛa minin lɛn nə́ woo, ǹ nə́ n bibiə̃ ǹ nə́ ga Ayii kiwi lɛ ganaa.

³Bɛ kio, ǹ nə́ n bɔyaa, ǹ nə́ daa Zozoe li ǹ nə́ pɛ nɛ: «Mìi ba la zaman lɛ tumaa din woo wa. Min duu paa hinlaa duu sɔɔ kɛ miã á boe Ayii minin lɛn la. Ka baran bɛa nɔmaa kɛ da zaman lɛ tumaa mìi-n walan wa. A giala, Ayii minin lɛn ba tɛ wa.»

⁴Giĩ duu sɔɔ kɛ miã na á soo zaman lɛ bii ǹ nə́ woo. Sɛnɛ, ǹ nə́ baa si Ayii minin lɛn nyɛɛnɛ.

⁵Ayii minin lɛn nə́ min pɔsɔɔwensɔrɔ kɛ miã dɛ ǹ bii. Ǹ nə́ gialakunun kɛn kaa ǹ nyɛɛnɛ ǹ nə́ ǹ loo, a saa kiwi lɛ a kiɛnlɛ ganaa, yǎa Sebarimu kiwi. Ǹ nə́ ǹ dɛ kele kɛa gisĩ ǹ bǎã nɛ. Zaman lɛ foo biɛ na, ǹ gɔ́ɔ̃ mu baa.

⁶Bɛ gɔ́ɔ̃ nɛ, Zozoe ná a mɔnaan kũ á ǹ tɔtoɛ̃. Foo-ziziɛ̃ gɔn, a din laanka Izirayeli a min golen lɛn nə́ tii goa bɛ̀ ǹ kaa ǹ mìi ni. Ǹ nə́ na ǹ nə́ kaa tán ǹ yɔrɔ la Dɛnaa Lawa a goo lɛ yɔrɔ-a yǎa wasa woo mɛ.

⁷Zozoe tɔ́n pɛ: «E Dɛnaa, Dɛnaa Lawa! Wàa na á baa ń Zurdɛ̃ tà kɛ kuri ka zaman kɛ nɛ, ń die wɔ koe Amɔɔrɔ tɔrɔn kɛn la, bɛn nə́ die wɔ bɔ̀n biɛ? Toa bɛ̀ wɔsɛn dinin man wɔ́ giã Zurdɛ̃ tà kɛ kio!

⁸E Dɛnaa! Izirayeli minin bɛ́ ǹ nə́ baa si ǹ zɔ́ɔn nyɛɛnɛ, masɛ n die wàa mɛn boo diɛ bɛ kio doo kəni?

⁹Kanaan minin lɛn laanka gána lɛ a min gialakunun tumaa bɛ́ re kɛ miɛ ke, maǹ die n bɔyɛɛ wɔsɛn li, ǹ wɔ dɛ, wɔsɛn boo ná a ba n diɛ gána kɛ-n doo wa. Ma n die wàa mɛn zɛnɛɛ, minin nə tɔn nə n tɔ gole kɛ dɔ̃ kəni?»

¹⁰Dɛnaa Lawa tɔ́n pɛ Zozoe ne: «Yoo! Wàa na á baa, n ta niɛ kiɛ tán n yɔrɔ la?

¹¹Izirayeli minin lɛn man nə́ sii baraa zɛnaa. Ma ǹ kurəə sii mɛn a zɛnaa ganaa, maǹ nə́ bɛ zɛnaa. Ma ǹ kurəə mànan mɛnɛn goa ganaa, maǹ nə́ bɛn goa. Maǹ nə́ ǹ koã dinin, ǹ nə́ ǹ duru, ǹ nə́ ǹ kaa kun ka ǹ mànan nɛ.

¹²Bɛ lɛ n ke, Izirayeli minin lɛn ba boe la ǹ golee ǹ zɔ́ɔn yɔrɔ-a wa. Maǹ die goɛ̃ baa sii ǹ zɔ́ɔn lɛn nyɛɛn kɛnɛn miɛ̃. A giala, bɛa bɔlɔ-tii sii lɛ nə ǹ kio. Ma bɛ́ má ǹ kurəə mànan mɛnɛn goa ganaa, bɛ̀ ǹ bie ǹ bɛa mànan lɛn ziziɛ̃ lenlen ǹ nə ǹ bɔ ǹ bii wa, masɛ a re goɛ̃ kunun ǹ ni doo wa.

¹³Yoo n *gɔ̀ bɔ zaman lɛ ganaa. N die n pɛ ǹ nɛ mà ǹ gɔ̀ bɔ ǹ dinin ganaa biɛ̃ ǹ taman yii. A giala, masɛ Dɛnaa Lawa lɛ, Izirayeli minin Lawa lɛa, ma din ni má pɛ máa ma ǹ kurəə mànan mɛnɛn goa ganaa, máa bɛ kɔn tá ǹ dinin Izirayeli minin kɛn lɛn bii. Ǹ ba boe la ǹ nə n yɔrɔ da ǹ zɔ́ɔn lɛn la doɛ̃ wa, yǎa ǹ bɛa màn kɛ lɛ boe ǹ boe ǹ bii.

¹⁴Bɛ lɛ taman yii, biɛ̃ baayɛlɛ, ka tɔrɔn lɛn die ǹ nə n zɔ̃ ǹ dɔ masɛ li gogoon. Masɛ Dɛnaa Lawa bɛ́ re n gɔn nyɛɛ tɔrɔ mɛn ganaa, bɛa minin die ǹ nə n zɔ̃ n dɔ masɛ li tanlɛ tanlɛ. Masɛ Dɛnaa Lawa bɛ́ re n gɔn nyɛɛ tanlɛ mɛn ganaa, bɛa minin die ǹ nə n zɔ̃ ǹ dɔ masɛ li kiɛnlɛ kiɛnlɛ. Masɛ Dɛnaa Lawa bɛ́ re n gɔn nyɛɛ kion mɛn a minin ganaa, bɛa giĩn die ǹ nə n zɔ̃ ǹ dɔ masɛ li gogoon.

¹⁵Ma bɛ́ re n gɔn nyɛɛ min mɛn ganaa màn lɛ a saali lɛa, ǹ die ǹ bɛa dɛnaa da tɛ-n ǹ tã, a din laanka màn mɛn tumaa bɛ́ a wɔ lɛa. A giala, a na á masɛ Dɛnaa Lawa bɔlɔ tii, á sii bɔbɔnɛɛ zɛnaa Izirayeli gána nɛ.»

¹⁶A lɛawaa, Zozoe yoo baayɛlɛ yiisoone, á Izirayeli tɔrɔn lɛn gogoonmaa a minin bíi á daa ǹ nɛ. Dɛnaa Lawa nə́ n gɔn nyaa Zudaa tɔrɔn ganaa.

¹⁷Zozoe Zudaa tɔrɔ minin bíi tanlɛ tanlɛ, á daa ǹ nɛ. Dɛnaa Lawa nə́ n gɔn nyaa Zeeraa a tanlɛ minin ganaa. Á Zeeraa a tanlɛ a giĩn bíi gogoon á daa ǹ nɛ. Dɛnaa Lawa nə́ n gɔn nyaa Zabdii ganaa.

¹⁸Bɛ kio, Zozoe Zabdii a kion a giĩ gogoonmaa bíi á daa nɛ. Dɛnaa Lawa nə́ n gɔn nyaa Aakan ganaa. Zudaa tɔrɔn kɛn min goon ne. A díi tɔ n Karmii, Karmii dɔ a díi tɔ n Zabdii. Zabdii a díi tɔ n Zeeraa.

¹⁹Zozoe tɔ́n pɛ Aakan nɛ: «Maa nɛgiĩ, bǐɛ̃ kɔ n taãn pɛ Dɛnaa Lawa yɔrɔ-a, Izirayeli minin Lawa lɛ. N sii mɛn zɛnaa, bǐɛ̃ kɔ n pɛ ma-n kɛnɛn kɛnɛn, n nyan toa n pɛ mà ma nə n duri masɛ la wa.»

²⁰Aakan tɔ́n Zozoe lɛ si, á pɛ nɛ: «Taãn nɛ, masɛ sii baraa zɛnaa Dɛnaa Lawa nɛ, Izirayeli minin Lawa lɛ. Ma sii mɛn zɛnaa, á ke:

²¹Wɔ mànan mɛnɛn goa zia-baa lɛ gɔ́ɔ̃ nɛ, masɛ n má Mezopotamii gána a dɔnkɛ sonbore goon yɛ, ka wɔrɔ kilo paa kɛ miã nɛ, ka sana kuturu goon ne, bɛ dɔ á kilo talɛɛ boe. Ma yii na á bɔ bɛn lɛn li, má ǹ goa. Á ke, ǹ tá durii-n tán maa mɔnaa kion bii, wɔrɔ lɛ tá a giulun.»

²²Zozoe tɔ́n minin dia. Bɛn nə́ baa si, ǹ nə́ tele Aakan a mɔnaa kion lɛ ganaa. Ǹ nə́ woo mànan lɛn yaa durii-n a mɔnaa kion lɛ-n sonbore, ka wɔrɔ lɛ nɛ ǹ giulun.

²³Ǹ nə́ mànan lɛn gɔsɛ mɔnaa kion lɛ bii ǹ nə́ soo ǹ ne, ǹ nə́ daa ǹ kɔ Zozoe laanka Izirayeli minin lɛn tumaa la. Ǹ nə́ ǹ kaa tán Dɛnaa Lawa yɔrɔ-a.

²⁴Bɛa biikoo li kəni, Zozoe Zeeraa a nɛgiĩ Aakan kũ, á wɔrɔ lɛ dɔ saa ka dɔnkɛ lɛ laanka sana kuturu lɛ nɛ, á ná a nɛgiĩn laanka a nɛlɔn dɔn kũ, a diin laanka a dundunun ni, a tɔɔ bisinin ni, a mɔnaa kion lɛ nɛ ka màn mɛn tumaa bɛ́ a wɔ lɛa. Izirayeli minin tumaa kaa kun ka Zozoe ne, ǹ nə́ woo ǹ ne Akɔɔrɔ a nyankɔrɔ basa kɛ nɛ.

²⁵Zozoe tɔ́n pɛ Aakan nɛ walan: «Wàa na á baa n bɔ̀n da wɔsɛn ganaa? Dɛnaa Lawa die a bɔ̀n da n dɔ ganaa pelo lɛawaa kɛ nɛ.» Izirayeli minin lɛn tumaa kɔlɔ kaã bɔ ǹ ganaa. Ǹ nə́ ǹ dɛ ka kɔlɔn nɛ, ǹ nə́ ǹ tã.

²⁶Bɛ kio, ǹ nə́ kɔlɔ da kɔn la Aakan lalan ka telee-n, Dɛnaa Lawa foo tɔ́n basã. Bɛa kɔlɔ dakɔnla lɛ á tɔn na a tan haalɛ tɔn pelo. Bɛ lɛ na á toa, ǹ tá tɔn bɛa bǎã kɛ lɛ bii haalɛ tɔn pelo mà "Akɔɔrɔ" bɛ giala mà "bɔ̀n da ǹ nyankɔrɔ basa".