Read Samo, Southern Zoz 9 Bible Online

Zoz 9 - Samo, Southern bible

Zoz 9

¹Kiin mɛnɛn tumaa goã Zurdɛ̃ tà a lɛ̀nyɛɛn gɔn la kele yii kɛ nɛ, ǹ mɛnɛn dɔn nə goã nyankɔrɔ basa kɛ nɛ, ka kɔ̀ gole lɛkoro lɛ-a tumaa wɔn kɛn nɛ, a wo diri Liban gána la, bɛn tumaa bɛa siin lɛn boo ma. Bɛ lɛ nɛ, Ɛti tɔrɔn kii ni, Amɔɔrɔ tɔrɔn wɔ nɛ, Kanaan minin wɔ nɛ, Perɛzi tɔrɔn wɔ nɛ, Evii tɔrɔn wɔ nɛ ka Zebuzu tɔrɔn wɔn nɛ,

²ǹ tumaa nə́ n sɔkɔn, ǹ nə́ n lɛ kaa kun, mà maǹ woe zia biɛ Zozoe laanka Izirayeli minin lɛn ganaa.

³Zozoe sii mɛn zɛnaa Zerikoo laanka Ayii kiwi, Gabawɔ̃ minin dɔn ná a boo ma.

⁴Sɛnɛ, bɛn nə́ yiri woorobaa ǹ sii zɛnaa. Ǹ nə́ n dinin baa wo zii-n wolen lɛa: Ǹ nə́ boroo pɔpɔsiɛn goa ǹ nə́ ǹ kaa ǹ dundunun la, ka duvɛ̃ bɔnaa zizin mɛnɛn bɛ́ ǹ nə́ tɔtoɛ̃, ǹ nə́ ǹ ninimi.

⁵Ǹ nə́ mɔnaa zizin wɔ ǹ dinin ganaa. Kɔsɔ zizin mɛnɛn bɛ́ ǹ nə́ ǹ ninimi, ǹ nə́ bɛn wɔ ǹ gòãn ganaa. Ǹ buuru mɛn tumaa kaa ǹ lon màn-bii lɛa, bɛ́ laa á pɔpɔsɛ.

⁶Ǹ nə́ woo dɔ Zozoe li giã ǹ bǎã kɛ nɛ Gilgaali, ǹ nə́ pɛ a laanka Izirayeli minin lɛn manɛ mà ǹsɛn man boe gána sɔsɔɔ-n die. Mà ǹsɛn man giɛ li, a lɛ kɔ kɔn la wɔ ka ǹsɛn nɛ kəni.

⁷ Izirayeli minin nə́ pɛ Evii tɔrɔn lɛn manɛ mà kɔntan ǹ giã ǹ bǎã din wɔlɔ á kunu ǹsɛn ganaa. Bɛ̀ á miɛ̃, mà ǹsɛn man siɛ lɔn ǹ tɔn lɛ kɔ kɔn la wɔ ka ǹ nɛ?

⁸Ǹ nə́ tɔ́n pɛ Zozoe nɛ mà ǹsɛn tá re a dí-nyalin biɛ. Zozoe tɔ́n nɔ̀n da ǹ la mà dien man ka ǹsɛn nɛ, mà maǹ boe maa?

⁹Ǹ ná a lɛ si kɛnɛn: «N dí-nyalin lɛn bɛ́ boe gána mɛn nɛ die, á sɔsɔɔ taãn-taãnɛ. Dɛnaa Lawa lɛ, n Lawa lɛa, bɛ lɛ a lɛa nɛ. A giala, wɔsɛn ná a boo ma. A sii mɛn tumaa zɛnaa Ezipti gána nɛ,

¹⁰Amɔɔrɔ tɔrɔn kii min paa mɛn goã Zurdɛ̃ tà kio, Ɛsibɔn kii Sihɔn ke ka Basan kii Ɔgu kɛ nɛ á goã giã-n Astarɔti kiwi, a sii mɛn tumaa zɛnaa bɛn dɔn manɛ, wɔsɛn nə́ ma.

¹¹Bɛ lɛ n ke, wɔa min golen laanka wɔa gána lɛ a minin tumaa boo da ka wɔ nɛ, ǹ nə́ pɛ mà wɔ màn-bii kɔn goa wɔ kaa wɔ lon zii tɔ we lɛ taman yii, wɔ da n da Izirayeli minin lɛn lɛ wɔ pɛ ǹ nɛ mà wɔsɛn manə ǹ dí-nyalin lɛa. Mà ǹ lɛ kɔ kɔn la wɔ ka wɔ nɛ kanna kəni.

¹²Wɔa buuru á ke. Wɔ bɛ́ soe wɔ n die ka li ǹ mɛn pinaa, a fuumaa nɛ wɔ goa wɔ́ kaa wɔ lon, wɔa màn-bii lɛa. Sɛnɛ, á ke á laa kanna, á pɔpɔsɛ.

¹³Duvɛ̃ bɔnaan kɛn, wɔ bɛ́ bɛn piɛ̃ ka duvɛ̃ nɛ, bɛ̀ ǹ diidiimaa nɛ. Bɛn nə́ ke ǹ nə́ tɔtoɛ̃. Zii lɛ a sasabaa a la yii-n taman yii, wɔa mɔnaan laanka wɔa kɔsɔnɔn nə́ ke ǹ nə́ ziziɛ̃.»

¹⁴Izirayeli minin nə́ ǹ màn-bii lɛ kɔn si ǹ nə́ bii, sɛnɛ, ǹ nɔ̀n da Dɛnaa Lawa la ka a lɛ gɔ́ɔ̃ ǹ boo-n wa.

¹⁵Zozoe kɔn wɔ ma ǹ nɛ, á lɛ kɔ kɔn la wɔ ka ǹ nɛ, lɛ kɔ kɔn la mɛn bɛ́ ǹ yii toɛ koo. Zaman lɛ a goledɛnan nə́ bɛ lɛ a liɛ wɔ ǹ nɛ.

¹⁶Sɛnɛ, lɛ kɔ kɔn la lɛ kio lɛawaa sɔɔ, Izirayeli minin lɛn nə́ ma, mà minin kɛn lɛn manə ǹsɛn miãkɛnɛn lɛa, mà maǹ giã nɛ ǹsɛn dinin bii.

¹⁷Izirayeli minin lɛn nə́ zii saa. Ǹ lɛawaa sɔɔbaa ǹ wɔ pinaa, ǹ nə́ dɔ bɛa minin lɛn giã ǹ kiwin ni. Ǹ kiwin lɛn man ka Gabawɔ̃ nɛ, Kefiraa nɛ, ka Beerɔti laanka Kiriyati-Yarimu ni.

¹⁸Sɛnɛ, Izirayeli minin lɛn nə ǹ dɛ wa. A giala, zaman lɛ a goledɛnan man nə́ goã ǹ nə́ bɛ lɛ a liɛ wɔ ǹ nɛ, ka Dɛnaa Lawa, Izirayeli minin Lawa lɛ tɔ nɛ. Sɛnɛ, zaman lɛ tumaa na á goã bɛa sɛ pii goledɛnan lɛn ganaa ǹ lɛ giulun.

¹⁹Goledɛnan lɛn tumaa tɔ́n pɛ zaman lɛ tumaa-n kɛnɛn: «Wɔsɛn dinin man wɔ n liɛ ka nɛ ka Dɛnaa Lawa, Izirayeli minin Lawa kɛ tɔ nɛ. Kanna, wɔ a boe la wɔ n gɔn da ka ganaa doɛ̃ doo wa.

²⁰Sɛnɛ, wɔ bɛ́ re sii mɛn zɛnɛɛ ka nɛ, bɛ n ka kɛ nɛ: Wɔ n die ka yii toɛ koo, màn mɛn bɛ́ toɛ, wɔ liɛ mɛn wɔ ka nɛ, Dɛnaa Lawa foo baran busu wɔsɛn li bɛ taman yii wa.»

²¹Goledɛnan lɛn nə́ pɛ mà ǹ nə ǹ yii toa koo. Sɛnɛ, maǹ nə́ goã ǹ kiɛ gɔn-yu laanka mu-si ganaa zaman lɛ tumaa wɔ lɛa, a kɔnpɛ ka goledɛnan lɛn da ǹ boo ne ǹ wɔ paǹ li.

²²Zozoe tɔ́n lɛ dia Gabawɔ̃ minin lɛn la á pɛ ǹ nɛ: «Wàa na á baa ka tá wɔsɛn bebele ka n pii mà kasɛn bɔ ǹ bǎã á sɔsɔɔ á la yii ni, a da yaa ka wɔlɔ dɔ n kunu wɔsɛn ganaa foɛɛ̃ nɛ?

²³Bɛ lɛ nɛ, a kũ sisia ganaa, bɔ̀n na á ka yɛ. Ka n die goɛ̃ bɛ̀rɛbaa ǹ dí la miɛ̃, ka gɔn yu, bɛ̀ ka mu si masɛ a Lawa a kion kɛ wɔ lɛa.»

²⁴Ǹ nə́ tɔ́n Zozoe lɛ si ǹ nə́ pɛ nɛ: «Ǹ tá goɛ̃ bɛ̀ ǹ pɛ wɔsɛn man foaã nɛ mà Dɛnaa Lawa lɛ, n Lawa lɛa, mà bɛ na á goã á pɛ a dí-nyali Muizu ni, mà asɛ á re gána lɛ tumaa koe ka la, mà ka die ka gána lɛ a minin tumaa dɛ, ka ǹ bɔ ka nyɛɛnɛ. Bɛ lɛ na á nyɛ́ɛ gole da wɔsɛn ganaa. Bɛ lɛ na á toa wɔ́ zɛnaa kɛnɛn, wɔ́ ga wɔ dinin nyin li.

²⁵Kanna kəni, wɔsɛn tá n gɔn. Sii mɛn a zɛnaa bɛ́ kɔɔ̃nɛ n ganaa, á n pepere n din yii li, bɛ zɛnaa wɔsɛn manɛ.»

²⁶Zozoe nə́ ǹ kũ ka bɛa yɔrɔ lɛ nɛ á ǹ gɔsɛ Izirayeli minin lɛn gɔn á ǹ kaa sɛn, ǹ nə ǹ dɛ doo wa.

²⁷Sɛnɛ, bɛa pinaa kɛ lɛ nɛ, Dɛnaa Lawa din bɛ́ re bǎã mɛn boe, Zozoe nə́ ǹ koa zaman lɛ laanka Dɛnaa Lawa a *wúlu bɔ ǹ bǎã kɛa gɔn-yulin laanka a mu-silin lɛa walan. Haalɛ tɔn pelo, ǹ tɔrɔn man tɔn bɛa dí kɛ lɛ nyɛɛ.